Jesús jina llampʼu sonqo, khuyakuyniyojtaj kana

 1. ¿Imaraykutaj Jesús jina ruwaspa Diosman astawan qayllaykunchej?

RUNASQA pitachus allinpaj qhawanchej,chay runa jina imatapis ruwayta munanchej. Tukuy runasmanta nisqataj Jesucristolla, pay kikin ruwanapaj jina karqa. ¿Imaraykutaj? Jesús nerqa: “Noqata rikuwajqa Tataytapis rikun”, nispa (Juan 14:9). Chayta nerqa, imaraykuchus Jesusqa imaynachus Tatan kasqanta rikucherqa. Chayrayku Jesusmanta yachakuspaqa, Jehovamanta yachakushanchej. Jesús jina ruwaspataj, tukuy imata Ruwaj Jehovaman astawan qayllaykunchej. Chayta ruwayqa, ni imawan kikinchakunchu.

2, 3. 1) ¿Imaraykutaj Jehová Biblianejta Jesusmanta willawanchej? 2) ¿Imata ruwananchejtataj Jehová munan? 3) ¿Imatataj kay yachaqanapi, qhepan yachaqanapi ima yachakusunchej?

² Jehovaqa, Biblianejta ashkha imasta Jesuspa kausayninmanta willawanchej. Imaraykuchus Pay munan Churinta rejsinanchejta, Churin jina tukuy imata ruwananchejta ima (1 Pedro 2:21 leey). Bibliapi “kikillantataj ruwanaykichejpaj” nispaqa, Jesuspa purisqanta purina kasqanta nisharqa, nisunman pay jina tukuy imata ruwana kasqanta. Arí, Jesusqa juntʼa runa karqa. Jina kajtinpis Jehovaqa mana suyanchu uj juntʼa runa jina tukuy imata allintapuni mana pantaspa ruwananchejta. Astawanpis Jesús jina ruwanapaj mayta kallpachakunanchejta munan.

³ Kunantaj Jesuspa wakin kʼacha kaykunasninmanta yachakuna. Kay yachaqanapeqa llampʼu sonqo kasqanmanta, khuyakuyniyoj kasqanmanta ima yachakusunchej; qhepan yachaqanapitaj mana manchachikoj kasqanmanta, allin yuyayniyoj kasqanmanta ima yachakusunchej. Sapa ujta ukhunchashaspataj imaynachus chay kʼacha kay kasqanta, imaynatachus chayta Jesús rikuchisqanta, imaynatachus pay jina rikuchiyta atisqanchejta ima yachakusunchej.

 4. ¿Imaynataj llampʼu sonqo runa?

⁴ Jatunchakoj runasqa yuyanku llampʼu sonqo runas llauchʼis, manchalis kasqankuta. ¿Chay yuyasqanku cheqachu? Mana. Imaraykuchus llampʼu sonqo kanapajqa kallpachakuna tiyan, mana manchachikojtaj kana tiyan. ¿Imaynataj llampʼu sonqo runa? Llampʼu sonqo runaqa mana jatunchakunchu, nitaj runaykachanchu. Chantapis pay kikinta imaynatachus qhawakusqanta qhawarikun. Sutʼincharinapaj, Bibliamanta parlaj libro nisqanman jina, llampʼu sonqo runaqa Diospa ñaupaqenpi ni imapis kasqanta yachan. Noqanchejpis llampʼu sonqo kasunchej chayqa, mana yuyasunchu wajkunamanta nisqa may sumaj kasqanchejta (Rom. 12:3; Fili. 2:3). Juchasapa runas kasqanchejrayku llampʼu sonqo kayta mana atillanchejchu. Chaywanpis llampʼu sonqo kayta atisunman, Jehovaj jatun kayninpi tʼukurispa, Jesús jina ruwaspa ima.

5, 6. 1) ¿Pitaj arcángel Miguel? 2) ¿Imaynatá llampʼu sonqo kasqanta Miguel rikucherqa?

⁵ ¿Imaynatataj Jesús llampʼu sonqo kasqanta rikucherqa? Payqa janaj pachapi may atiyniyoj ángel jina kashaspa llampʼu sonqo kasqanta rikucherqa, kay Jallpʼapi juntʼa runa kaspapis llampʼu sonqo kasqanta rikuchillarqataj. Kunantaj chaykunata ukhuncharina.

⁶ Imaynachus kasqan. Judas libropi Jesús niraj kay Jallpʼaman jamushaspa uj imata ruwasqanmanta parlan (Judas 9 leey). Arcángel Miguel chayri angelesta kamachej Jesús, “Kuraj Supaywan churanak[orqa] Moisespa cuerponrayku”. Jehovaqa Moisés wañupusqantawan, ayanta uj cheqaman pʼamparqa ni pi runa tarinanpaj (Deu. 34:5, 6). Ichapis Kuraj Supayqa, Moisespa cuerponta apaykachayta munarqa, israelitasta llulla yupaychayman tanqananpaj. Moisespa cuerponwan imata ruwayta munajtinpis, Miguelqa mana manchachikuspa chayta ruwajta mana saqerqachu. Uj libro nisqanman jina, ichapis Jesusqa Satanasman nerqa Moisespa cuerponta apananpaj mana derechoyojchu kasqanta. Chaywanpis Jesusqa yacharqa mana paychu juzganan kasqanta. Chayrayku saqerqa Tukuy atiyniyoj Juez Jehová, Kuraj Supayta juzgananta. Imaraykuchus Jehovalla Kuraj Supayta juzgananpaj derechoyoj karqa. Ajinamanta Miguelqa llampʼu sonqo kasqanta rikucherqa.

 7. ¿Imaynatá Jesús parlasqanpi, ruwasqanpi ima llampʼu sonqo kasqanta rikucherqa?

⁷ Jesusqa kay Jallpʼapi kashaspa parlasqanpi, ruwasqanpi ima llampʼu sonqo kasqanta rikucherqa. Parlasqanpi. Payqa ni jaykʼaj allinpaj qhawachikuyta munarqachu, astawanpis Tatan jatunchasqa kananta munarqa (Mar. 10:17, 18; Juan 7:16). Jesusqa ni jaykʼaj yachachisqasninta pisipaj qhawarqachu, nitaj kʼumuykachacherqachu. Astawanpis paykunata allinpaj qhawarqa, imatapis sumajta ruwasqankumanta allinta ruwasqankuta nerqa, paykunapitaj atienekorqa (Luc. 22:31, 32; Juan 1:47). Ruwasqasnin. Jesusqa mana tukuy imayoj kausaytachu ajllarqa (Mat. 8:20). Astawanpis pisipaj qhawasqa ruwaykunata ruwarqa (Juan 13:3-15). Llampʼu sonqo kasqantataj kasukuspa rikucherqa (Fili. 2:5-8). Mana kasukuyta munaj jatunchakoj runasmanta nisqataj, Jesusqa Diospa tukuy ima nisqanta llampʼu sonqowan ‘wañupunankama kasukorqa’. Kayqa sutʼita rikuchin Diospa Churin Jesús ‘llampʼu sonqopuni’ kasqanta (Mat. 11:29).

8, 9. ¿Imaynatá llampʼu sonqo kasqanchejta rikuchinchej?

⁸ ¿Imaynatá Jesús jina llampʼu sonqo kasunman? Imaynachus kasqanchej. Llampʼu sonqo kaspaqa, atiyninchej mana wiñaypajchu kasqanta yachanchej, runasta mana juzgananchejchu kasqanta, wajkunata pantajtinku mana qhawaranachu kasqanta, nitaj imatachus ruwasqankuta iskayrayachinachu kasqanta yachallanchejtaj (Luc. 6:37; Sant. 4:12). Nillataj qotuchakuypi ima ruwaytapis mana japʼejkunamanta chayri mana ruwayta atejkunamanta nisqaqa, aswan ‘cheqan runas’ kasqanchejta creekunchejchu (Ecl. 7:16). Qotuchakuymanta llampʼu sonqo ancianosqa, mana yuyankuchu hermanosninkumanta nisqa aswan sumaj kasqankuta. Astawanpis paykunaqa wajkunata “pay[kuna]manta aswan kurajta jina” qhawanku (Fili. 2:3; Luc. 9:48).

⁹ Walter Thornpa kausayninmanta parlarinachej. Payqa 1894 watapi qotuchakuykunata waturispa llankʼayta qallarerqa. Ashkha watastaña qotuchakuykunata waturishajtintaj, Nueva Yorkpi kaj, Hacienda del Reino nisqaman wajyarerqanku, chaypitaj wallpasta uywaspa llankʼaj. Payqa wakin kutis yuyaj waj llankʼaypaj jina kasqanta. ¿Imatá chay kutispi ruwaj? Pay nerqa: “Noqallapi yuyaspa, kayta nikuni: ‘Qolu jallpʼitalla kankeqa, ¿imaraykutaj jatunchakushankiri?’”, nispa (Isaías 40:12-15 leey). Chay hermanoqa may llampʼu sonqopuni karqa.

10. ¿Imaynatá llampʼu sonqo kasqanchejta rikuchisunman parlayninchejwan, ruwayninchejwan ima?

¹⁰ Parlayninchej. Imatachus nisqanchejqa llampʼu sonqochus manachus kasqanchejta rikuchin (Luc. 6:45). Imaraykuchus llampʼu sonqo runaqa mana imastachus allinta ruwasqallanmantachu parlan (Pro. 27:2). Astawanpis mayta kallpachakun hermanospi kʼacha kaykunata tarinanpaj, imatapis allinta ruwajtinku allinta ruwanki ninanpaj ima (Pro. 15:23). Ruwasqasninchej. Llampʼu sonqo cristianosqa, mana kay pachapi may rejsisqa kaytachu maskʼanchej. Manaqa Diosta astawan sirvinapaj kapusqallanchejwan kusisqas kausakunchej, pisipaj qhawasqa llankʼaykunata ruwaspapis (1 Tim. 6:6, 8). Chantapis llampʼu sonqo kasqanchejta rikuchillanchejtaj Diosta kasukuspa. Diospa llajtan yuyaychawasqanchejta, qotuchakuypi ancianosta ima kasukunapajpis llampʼu sonqo kananchej tiyan (Heb. 13:17).

11. ¿Imaynataj khuyakuyniyoj runa?

¹¹ ¿Imaynataj khuyakuyniyoj runa? Khuyakuyniyoj runaqa munakuyniyoj. Bibliataj Jehovamanta, Jesusmanta ima parlaspa khuyakuyniyoj, munakuyniyoj ima kasqankuta nin (Luc. 1:78; 2 Cor. 1:3; Fili. 1:8). Uj libro khuyakuymanta sutʼinchasqanman jina, khuyakuyniyoj kayqa mana wajkunamanta llakikuyllachu, astawanpis khuyakoyqa tanqawanchej wajkunaj allinninkuta maskʼanapaj, paykunarayku imatapis ruwanapaj ima. Chantapis khuyakuyniyoj kasunchej chayqa, wajkunata yanapasunchej aswan sumajta kausakunankupaj.

12. 1) ¿Imaynatá Jesús rikucherqa wajkunamanta khuyakusqanta? 2) ¿Imastataj Jesús ruwarqa wajkunamanta khuyakusqanrayku?

¹² ¿Imaynasmantá Jesús khuyakuyniyoj kasqanta rikucherqa? Sonqonpi yuyasqan, ruwasqasnin ima. Jesusqa amigan Mariata, waj runastawan Lázaro wañupusqanmanta waqashasqankuta rikuspa “waqarikorqa” (Juan 11:32-35 leey). Imaynatachus uj viudaj wawanta khuyakusqanrayku kausaricherqa, ajinallatataj Lazarotapis khuyakusqanrayku kausaricherqa (Luc. 7:11-15; Juan 11:38-44). Ajinamanta Jesusqa, ichapis janaj pachapi kausakuy suyakuyta Lazaroman qorqa. Chantapis waj kutipiña, khuyakusqanrayku runas payman jamojtinku “tukuy imata yachachiyta qallarerqa” (Mar. 6:34). Chaytaj yachachisqanman jina kausakojkunata yanaparqa kausayninkuta tijranankupaj. Arí, Jesusqa khuyakusqanrayku wajkunata yanaparqa (Mat. 15:32-38; 20:29-34; Mar. 1:40-42).

13. ¿Imaynatataj Jesús runasta parlapayaj? (5 paginapi dibujota qhawariy.)

¹³ Parlasqanpi. Jesusqa wajcha runasta, ñakʼarichisqasta ima may khuyakuywan parlapayaj. Apóstol Mateo, Isaías libropi nisqanman jina Jesusmanta nerqa: “Lajrasqa soqosollatapis mana pʼakenqachu, nitaj qʼoshñishaj mechatapis wañuchenqachu”, nispa (Isa. 42:3; Mat. 12:20). ¿Ima niyta munan Mateoj nisqan? Jesús ni jaykʼaj pitapis pisipaj qhawasqanta. Jesusqa wajkunawan parlaspa paykunata kallpacharej. Chantapis “pʼaquiska sonkoyojcunata vendana[n]paj” uj sumaj willayta runasman willarqa (Isa. 61:1, Quechua de Cuzce). Chantapis “saykʼusqa kajkuna[ta], llasa qʼepiyojkuna[ta] ima” parlayninwan samaricherqa (Mat. 11:28-30). Yachachisqasninmantaj Jehová paykunamanta llakikusqanta nerqa. Kay pachapaj pisipaj qhawasqa kajkunamanta chayri juchʼuyman rijchʼakojkunamantapis llakikusqanta nillarqataj (Mat. 18:12-14; Luc. 12:6, 7).

14. ¿Imaynatataj wajkunamanta khuyakusqanchejta rikuchisunman?

¹⁴ ¿Imaynatá Jesús jina khuyakuyniyoj kasunman? Sonqonchejpi yuyasqanchej. Bibliaqa wakin kutis mana atillajtinchejpis khuyakuyta rikuchinapaj kallpachakunanchejta yuyaychawanchej. Sutʼincharinapaj, Bibliaqa “khuyakuywan” pʼachawan jina pʼachallikunanchejta niwanchej (Colosenses 3:9, 10, 12 leey). ¿Imaynatataj wajkunamanta khuyakusqanchejta rikuchisunman? Biblia nisqanman jina “tukuy sonqo munaku[spa]” (2 Cor. 6:11-13). Llakiyninmanta willariwajtinchej sumajta uyarispa (Sant. 1:19, 20). Tapurikunataj: “Ajina llakiypi rikukuspa, ¿imaynataj kayman? ¿Imatataj necesitayman?”, nispa (1 Ped. 3:8).

15. ¿Imaynatataj yanapasunman llakiypi rikukojkunata?

¹⁵ Ruwasqasninchej. Khuyakoyqa wajkunata yanapanapaj tanqawanchej, astawanraj llakiypi kajkunata yanapanapaj. ¿Imaynasmanta yanapasunman? Romanos 12:15 versículo nin: “Waqajkunawantaj waqaychej”, nispa. Wakin kutisqa llakisqa kajkunaqa, uyarinanchejta, entiendenanchejta imalla necesitanku. Uj hermanata, wawan wañupojtin hermanos sonqocharqanku. Pay nin: “Hermanos wasiyman jamusqanku, noqawan khuska waqasqanku ima, mayta yanapawarqa”, nispa. Chantapis khuyakuyninchejta rikuchillasunmantaj waj imasta ruwaspa. Ichapis qotuchakuypi uj viuda hermana wasinta allinchananpaj yanapata necesitan. Chayri uj machitu hermano tantakuyman rinanpaj, willayman rinanpaj manachayri doctorpaman rinanpaj yanapata necesitan. Chaykunapi yanapajtinchej hermanosqa mayta kusikunku (1 Juan 3:17, 18). Chantapis khuyakuyninchejta rikuchillanchejtaj, runasman sumaj willaykunata willamuspa. Chayta ruwaspataj runasta mayta yanapanchej.

16. ¿Imaynatataj llakisqa kajkunata yanapasunman?

¹⁶ Parlayninchej. Khuyakuyniyoj kayqa pisi kallpayojkunata yanapanapaj tanqawanchej (1 Tes. 5:14). ¿Imaynatataj sinchʼi llakiypi kajkunata yanapasunman? Paykunamanta mayta llakikusqanchejta nispa, chantá allin imasta ruwasqankumantapis allinta ruwanki nispa. Chantapis nillasunmantaj Diosninchej cheqa kajta rejsinankupaj yanapasqanta, paykunata Dios allinpaj qhawasqanta ima (Juan 6:44). Chantapis Jehová “llakisqa sonqoyojkunata, umphuyasqa sonqoyojkunatawan”, mayta munakusqanta nillasunmantaj (Sal. 34:18, Qheshwa Biblia). Kʼachamanta parlapayajtinchejqa, llakisqa kajkuna mayta sonqochakunkuman (Pro. 16:24).

17, 18. 1) ¿Imatataj Jehová munan ancianos ruwanankuta? 2) ¿Imatataj qhepan yachaqanapi yachakusunchej?

¹⁷ Ancianosqa Jehovaj ovejitasninta munakuywan, khuyakuywan ima qhawananku tiyan (Hech. 20:28, 29). Imaraykuchus Jehová paykunaman kamachin ovejitasninman yachachinankuta, kallpachanankuta, sonqochanankuta ima (Isa. 32:1, 2; 1 Ped. 5:2-4). Khuyakuyniyoj ancianosqa mana hermanosninkoj patronninkuchu kanku, nitaj munasqankuman jinachu imatapis ruwachinku. Astawanpis kallpachakunku hermanos kusisqas kanankupaj, yachankutaj hermanos Diosta munakusqankurayku tukuy sonqo sirvinankuta (Mat. 22:37).

¹⁸ Jesús llampʼu sonqo kasqanpi, khuyakuyniyoj kasqanpi ima tʼukureyqa, Jesús jina ruwanallapajpuni yanapawanchej. Qhepan yachaqanapitaj, yachakusunchej imaynatachus Jesús jina mana manchachikoj, allin yuyayniyoj kayta atisqanchejta.