Watejmanta kurajpaj qhawasqa kayta munanku

Jesuswan yachachisqasninwanqa Pereanta sur ladoman riytawan, Jericó llajta chaynejta Jordán mayuta chimparqanku. Chaytaj Jerusalén qayllapi kasharqa. Jesuswan khuskataj waj runaspis 33 watapi Pascuata ruwaj rillarqankutaj.

Jesusqa ñaupaqenkuta risharqa, munarqataj Pascuapaj Jerusalenman chayayta. Yachachisqasnintaj qhepanta manchasqalla risharqanku. Imajtinchus Jerusalenman rispaqa kausayninkuta wañuy pataman churasharqanku. Chayrayku Lázaro wañuporqa chaypacha, Tomaspis Jesús Judeaman riyta munajtin nerqa: “Jaku, noqanchejpis paywan khuska wañumuna”, nispa (Juan 11:16, 47-53).

Chantá Jesusqa apostolesninta wajnejman pusaspa, paykunaman willarqa imachus Jerusalenpi kananta. Pay nerqa: “Jerusalenman rishanchej, chaypitaj noqataqa kuraj sacerdotesman, leymanta yachachejkunaman ima jaywaykuwanqanku. Paykunataj wañuchisqa kanayta nenqanku, mana judío kajkunamantaj jaywaykuwanqanku, alqochakunawankupaj, jasutʼinawankupaj, kʼaspipitaj wañuchinawankupaj. Kinsa pʼunchayninmantaj kausarichisqa kasaj”, nispa (Mateo 20:18, 19).

Chaywanqa kinsa kutitaña parlasharqa wañuchisqa kananmanta, kausarimunanmanta ima (Mateo 16:21; 17:22, 23). Jinapis chay kutipeqa willarqa uj kʼaspipi wañuchisqa kananta. Yachachisqasnintajrí Jesuspa nisqanta mana entienderqankuchu. Imajtinchus Jesús Jerusalenpi gobiernonta sayarichinanta suyakusharqanku. Chantapis Cristo kay jallpʼapi kamachejtin jatunpaj qhawasqa kayta suyakusharqanku.

Santiagojta, Juanpatawan mamankoqa ichapis Salomé karqa. Paytaj Jesuswan khuska risharqa. Paypa wawasninmanqa Jesús uj sutita churarqa, chaytaj “Qhon Qhonpa Wawasnin” niyta munan. Chay sutita churarqa mana manchachikuspa imachus sonqonkupi kasqanmanta parlasqankurayku (Marcos 3:17; Lucas 9:54). Aswan ñaupajmantaña Juanwan Santiagowanqa, Cristoj Gobiernonpi jatunpaj qhawasqa kayta munarqanku. Chaytataj mamankoqa yacharqa. Chayrayku Jesusman qayllaykuspa qonqorikorqa, uj imata wawasninpaj mañakunanpaj. Jesustaj nerqa: “¿Imatataj munankiri?”, nispa. Paytaj kuticherqa: “Niy ari kay iskay wawasniy Gobiernoykipi tiyaykukunankuta, ujnin pañaykipi, ujnintaj lloqʼeykipi”, nispa (Mateo 20:20, 21).

Chayta mañakunantaqa wawasnin Santiagowan, Juanwan nisqanku. Chantá Jesusqa paymanta alqochakunankumanta, kʼumuykachachisqa kananmanta parlaytawan, paykunata nerqa: “Qankunaqa mana yachankichejchu imatachus mañakushasqaykichejta. ¿Atiwajchejchu ujyayta, ujyanaypajña kashani chay copamanta?”, nispa. Paykunataj nerqanku: “Arí, atiykuman”, nispa (Mateo 20:22). Jinapis manasina yacharqankuchu imatachus nishasqankuta.

Chantá Jesús nerqa: “Copaymantaqa ujyankichejpuni. Chaywanpis pikunachus pañaypi, lloqʼeypiwan tiyaykukunankoqa, mana noqamantachu kashan, manachayqa Tataymanta. Pay ajllanqa pikunachus chaypi tiyaykukunankuta”, nispa (Mateo 20:23).

Apóstol Juanwan Santiagowan imatachus mañakusqankuta yachaytawan, chunka apostolesqa mayta phiñakorqanku. Paykunaqa aswan ñaupaj kutipiña chʼajwarqanku pichus aswan kuraj kasqankumanta. Juanwan Santiagowanpis chay kutipiñachá nerqanku imatachus munasqankuta (Lucas 9:46-48). Jina kajtinpis chayri manapis, paykunaj mañakusqankoqa rikuchin mana Jesús nisqanman jinachu ruwashasqankuta. Jesusqa paykunata yuyaycharqaña tukuymanta aswan sullkʼa kanankuta. Jinapis aswan kuraj kayta munashallarqankupuni.

Jesustajrí 12 apostolesninta wajyaspa kʼachallamanta yuyaycharqa: “Qankunaqa yachankichej kay jallpʼapi kamachejkunaqa munayninkuman jina runasta kamachisqankuta, autoridadespis atiyninkuwan runasta ñakʼarichinku. Qankuna ukhupeqa mana ajinachu kanan tiyan. Astawanpis pichus qankunamanta kuraj kayta munajqa, kamachiykichej kanan tiyan. Chantá pichus qankunamanta ñaupajpi kayta munajqa, tukuyniykichejta esclavo jina sirvisunaykichej tiyan”, nispa (Marcos 10:42-44).

Chantá Jesusqa yachachisqasninman pay jina imatapis ruwanankuta yuyaycharqa. Pay nerqa: “Noqapis mana sirvichikojchu jamuni, manachayqa sirvej, kausayniytataj qosaj ashkha runasta kacharichinaypaj”, nispa (Mateo 20:28). Jesusqa kinsa watata jinaña wajkunata sirvispa kasharqa, runasrayku kausayninta qonankamataj runasta sirvillarqapuni. Yachachisqasninpis sirvinankupaj wakichisqa kananku karqa, manataj sirvichikuytachu maskʼananku karqa. Chantapis tukuymanta aswan sullkʼa kananku karqa, manataj kurajchu.