Miqueas
3 Ñucaca cashnami nircani: “Jacobpaj huahua huahuacunata pushajcuna, uyapaichij.
Israelitacunata mandajcuna, cancunapish uyapaichij.
¿Manachu cancunaca cashcata rurashpa juzgana canguichij?
2 Pero cancunaca allitaca pꞌiñanguichijmi, mana allitaca cꞌuyanguichijmi.
Ñuca pueblopaj aicha caratapish, tullucunamanta aichatapishmi lluchunguichij.
3 Cancunaca ñuca pueblopaj aichatapishmi micunguichij,
paicunapaj aicha caratapishmi lluchunguichij.
Mangapi yanungapaj tullucunata pꞌaquij shina,
mangapi yanungapaj aichata pꞌitij shinami paicunapaj tullucunataca pꞌaquinguichij, ñutunguichij.
4 Chai tiempopica ayudachunmi Jehová Diosta mañanguichij,
pero paica mana cutichingachu.
Chai tiempopica cancunapaj mana alli ruraicunamantami
paipaj ñahuita cancunamanta pacanga.
5 Profetacunaca ñuca pueblotami pandachicuncuna. Paicunapaj quiruhuan imata cashtucushpaca ‘¡Sumaj causaimi tiyanga!’ nishpami huillancuna,
pero paicunapaj shimipi imata mana churajpica macanacuimi tiyanga nishpami huillancuna.
Chai profetacunapaj contrami Jehová Diosca caita nin:
6 ‘Cancunaca tutapi shinami amsapi canguichij. Muscuipi shinaca imata mana ricunguichijchu.
Cancunapajca amsallami tiyanga, ña mana ashtahuan adivinanguichijchu.
Profetacunapajca intica huashicungami,
paicunapajca punllaca amsayangami.
7 Muscuipi shina ricushcacunata huillaj runacunaca pingachishcami cangacuna.
Adivinocunapish llaquillami saquiringacuna.
Dios imata mana cutichishcamantami
tucuicuna pingaimanta paicunapaj shimitaca* taparingacuna’ ninmi” nircanimi.
8 Pero ñucaca Jehová Diospaj espiritumantami achca poderta charini.
Chai espiritumi ñucataca cashcata rurachun, fuerzata charichun ayudan.
Chashnami Jacob cꞌariyashcata, Israel juchata rurashcata huillai tucuni.
9 Jacobpaj huahua huahuacunata pushajcuna, caita uyapaichij.
Israelitacunata mandajcuna, cancunapish caita uyapaichij.
Cancunaca cashcata ruranatami pꞌiñanguichij, tucui ima alli cashcatami huishtunguichij.
10 Sion llajtataca yahuarta jichashpami shayachinguichij. Jerusalentapish millaita rurashpami shayachinguichij.
11 Pushajcunaca camarita japishpami juzgancuna.
Sacerdotecunaca pagajpimi yachachincuna.
Profetacunaca cullquiraicullami adivinancuna.
Chashnapish Jehová Diosmi ayudan nishpami paicunaca:
“¿Manachu Jehová Diosca ñucanchijhuan can?
Ñucanchijtaca ima llaqui mana japingachu” nincuna.
12 Cancunapaj culpamantami
Sionca tarpuna allpa shina yapushca canga.
Jerusalenca rumi montonllami saquiringa.
Diospaj huasi shayacun urcupish yuracuna junda loma shinami canga.