Miqueas
4 Tucuri punllacunapica
Jehová Diospaj huasi shayacun urcuca
shujtaj urcucunamanta ashtahuan jahuamanmi sinchita shayachishca canga.
Chai urcuca lomacunatapish yalli ashtahuan jatunmi canga.
Chaimanmi gentecunaca shamungacuna.
2 Achca llajtacunamanta gentecuna shamushpaca:
“Jacuchij, Jehová Diospaj urcuman huichiyashunchij.
Jacobpaj Diospaj huasiman huichiyashunchij.
Paica paipaj ñancunapi purinatami ñucanchijman yachachinga.
Chaimi ñucanchijca paipaj ñancunapi purishun” ningacunami.
Sionmantami leyca* llujshinga,
Jerusalenmantami Jehová Dios nishca shimicunaca llujshinga.
3 Achca pueblocunapurapica paimi juez canga.
Carupi caj poderyuj llajtacuna ima mana allita ruracujtaca paimi allichinga.
Paicunapaj espadacunataca yapuna rejacunatami* rurangacuna.
Paicunapaj lanzacunataca hocescunatami rurangacuna.
Llajtacunaca caishuj chaishuj ña mana macanacungacunachu,
macanacunatapish ña mana yachangacunachu.
4 Cada unomi paipaj uva yura ucupi, paipaj higo yura ucupi tiyaringacuna.*
Paicunataca pi mana manchachingachu.
Chaitaca jahua pacha soldadocunata mandaj Jehová Diosmi paipaj shimihuan nishca.
5 Tucui gentecunami cada uno paicunapaj diosta sirvingacuna.*
Pero ñucanchijca ñucanchij Jehová Diostami huiñai huiñaita sirvishun.*
6 Jehová Diosca cashnatajmi nin: “Chai punllaca
cojeashpa purijcunataca tandachishami.
Caita chaita cachashcacunatapish
ñuca llaquichishcacunandijmi tandachisha.
7 Cojeashpa purijcunamanta saquirishcacunataca tandachishami.
Caruman apashcacunatapish poderta charij llajtatami rurasha.
Jehová Diosca Sion urcumantami paicunataca
cunanmanta huiñai huiñaicama mandanga.
8 Ovejacunata chapana torrella,
Sionpaj ushushipaj lomalla,
punta* mandana poderca cambajmanmi tigranga, ari, cambajmanmi tigranga.
Jerusalenpaj ushushipaj cashca mandanaca cambajmanmi tigranga.
9 ¿Imamantataj sinchita caparicungui?
¿Manachu reyta charingui?
¿Canman consejota cujchu huañurca?
¿Chaimantachu huahuata huachacuj huarmi shina yallitaj nanaihuan cangui?
10 Sionpaj ushushilla,
huahuata huachacuj huarmi shina
nanaihuan torciriyari, caparishpa huacayari.
Cunanca ciudadmanta rishpami campopi causangui.
Canca Babilonia llajtacamami chayangui.
Chaipimi quishpichishca cangui.
Chaipimi Jehová Diosca cambaj contracunapaj maquimanta cantaca quishpichinga.*
11 Chaimi achca llajtacunaca canta llaquichingapaj tandanacungacuna.
Paicunaca: ‘Sionca pingachishca* cachun,
chaitaca ñucanchij ñahuicuna ricuchun’ ningacunami.
12 Pero paicunaca Jehová Diospaj yuyaicunataca mana yachancunachu.
Diospaj munaitapish* mana intindincunachu.
Paica trillana pambapi cunanlla cuchushca granota filapi churashca shinami paicunataca tandachinga.
13 Sionpaj ushushilla, jatarishpa granota trillai.
Cambaj gachucunataca* fierrotami rurasha.
Cambaj sillucunataca cobretami rurasha.
Canmi achca pueblocunataca ñutungui.
Paicuna mana allita rurashpa imata japishcacunataca Jehová Diosmanmi cungui.
Paicunapaj valishca cosascunatapish tucui allpa pachata mandaj Amitomanmi cungui” ninmi.