Miqueas
6 Jehová Dios ima nishcata uyapaichij.
Jatarichij, urcucuna ñaupajpi difindirichij.
Lomacunapish cancuna rimashcata uyachun.
2 Urcucunalla, Jehová Dios demandashcata uyaichij.
Allpa pacha sinchi cimientocunapish uyaichij.
Jehová Diosca paipaj pueblohuanmi shuj demandapi yaicushca.
Israelhuanmi juiciopi yaicunga:
3 “Ñuca pueblolla, ¿cantaca imatataj rurashcaniyari?
¿Can shaicushca sintirichunca imatataj rurashcaniyari?
Ñuca contra huillapai.
4 Cantaca ñucami Egipto llajtamanta llujshichircani.
Esclavo cashca llajtamantami quishpichircani.
Canta pushachunca Moisesta, Aaronta, Miriamtami cacharcani.
5 Ñuca pueblolla, Moab llajtamanta rey Balac imata rurasha nishcata,
Beorpaj churi Balaam imata cutichishcata,
Sitimmanta Guilgalcama ima tucushcata yuyaripai.
Chashnami Jehová Dios allita ruraj cashcata yachangui”.
6 ¿Jehová Diospaj ñaupajpica imahuantaj ricurishari?
¿Jahua pachapi caj Diospaj ñaupajpica imahuantaj cumurishari?
¿Rupachishca ofrendacunahuanchu ricurisha?
¿Shuj huatata charij bizicunahuanchu ricurisha?
7 ¿Jehová Diosca huaranga huaranga carnerocunata cujpi,
achca aceiteta cujpichu cushilla canga?
¿Ñuca mana cazushcamantaca ñuca punta churitachu cusha?
¿Ñuca juchamantaca ñuca propio churitachu cusha?
8 Runalla, paica ima alli cashcatami canmanca nishca.
¿Jehová Diosca cantaca imatataj mañanyari?
¡Cashcata ruraj cachun, llaquij cachun,*
humilde shunguhuan cambaj Dioshuan purichunllami mañan!
9 Jehová Diosca llajtapi causaj gentecunatami caparin.
Alli yachaita charijcunaca cambaj shutitami manchangacuna.
Llaquichij varata alli ricuichij, chai varata pi cachajtapish alli ricuichij.
10 ¿Mana allita rurashpa japishca cosascunapish,
millanayachishca mana completo efapish* millai runapaj huasipirajchu?
11 ¿Ñucaca mana alli pesaj balanzacunata charishpa,
cabalta mana pesaj rumicunata bolsapi charishpaca cashcata rurajchu* casha?
12 Chai llajtamanta achcata charij runacunaca siempremi llaquichincuna.
Chaipi causaj gentecunapish llullacunatami nincuna.
Paicunapaj shimi cꞌallupish umanmi.
13 “Chaimantami cantaca chugriringacama huajtagrini.
Cambaj juchacunamantami shitashcata saquisha.
14 Micushpapish mana huijsa pajtata micunguichu,
yaricaihuanmi saquiringui.
Cosascunataca huaquichingapajmi quichungui, pero chaicunahuanca mana saquiringuichu.
Imata apajpipish chaitaca cambaj contracunamanmi cusha.
15 Tarpushpapish mana cosechanguichu.
Aceitunacunata sarushpapish aceitetaca mana charinguichu.
Uvacunata sarushpapish vinotaca mana ubyanguichu.
16 Cancunaca Omripaj mandashcacunatami catinguichij, Acabpaj familia tucui imata rurashcacunatapishmi catinguichij.
Paicuna cushca consejocunata catishpami imatapish ruranguichij.
Chaimantami cantaca llaquinaita saquisha.
Llajtapi causaj gentecunamantapishmi shujtajcunaca burlaringacuna.*
Cancunaca gentecuna pꞌiñashcami canguichij”.