Miqueas
5 “Llaquichishca ushushilla,
cunanca cambaj cuerpotami cuchuricungui.
Ñucanchij muyundijpimi shayarishcacuna.
Israel llajtamanta jueztaca shuj varahuanmi quijadospi huajtancuna.
2 Belén Efrata pueblolla,
canca Judapaj familiacunapurapi cangapajca yallitaj uchillami cangui.
Canmantami shuj mandaj llujshinga, paimi Israelpica ñuca munaita ruranga.
Paica ñaupa tiempomantami tiyan, ñaupa punllacunamantami tiyan.
3 Diosca paipaj pueblotaca shuj huachagrij huarmi
huahuata huachangacamami shitashcata saquinga.
Saquirij paipaj huauquicunaca Israel pueblomanmi tigrangacuna.
4 Chai mandajca shayarishpami Jehová Diospaj fuerzahuan,
paipaj Jehová Dios autoridadta cushcahuan paipaj pueblota michinga. Diospaj shutica jatunmari.
Paicunaca tranquilomi causangacuna.
Chaimi chai mandaj jatun cashcataca tucui allpa pachapi yachangacuna.
5 Paica sumaj causaitami apamunga.
Asiriocuna ñucanchij llajtaman yaicujpi, ñucanchij sinchi torrecunata urmachijpica
paicunahuan macanacuchunca canchis* michijcunatami nombrashun. Ari, gentecunapuramantaca pusaj* mandajcunatami nombrashun.
6 Paicunaca Asiria llajtataca espadahuanmi llaquichingacuna.*
Nemrodpaj allpa lindecunacamami chayangacuna.
Paimi asiriocuna ñucanchij allpaman yaicujpi,
ñucanchij llajtata tucuchijpica paicunapaj maquimanta quishpichinga.
7 Jacobpaj huahua huahuacunamanta saquirijcunaca achca llajtacuna chaupipica
Jehová Diosmanta shamuj shulla tamya shina,
qꞌuihua jahuapi urmaj achca tamya shinami cangacuna.
Shulla urmangapajca shuj runataca mana shuyanchu,
tamya urmangapajpish runacunapaj churicunataca mana chapanchu.
8 Jacobpaj huahua huahuacunamanta saquirijcunaca
llajtacunapurapi, achca pueblocuna chaupipica
bosquepi tiyaj animalcunapaj chaupipi caj shuj león shinami cangacuna.
Shinallataj ovejacunapaj chaupipi caj shuj malta león shinami cangacuna.
Chai leonca animalcunapaj chaupita pasashpami llaquichishpa huañuchin.
Paicunata quishpichijca pi mana tiyanchu.
9 Cambaj contracunata mishashpami cambaj maquita alzangui.
Cambaj tucui contracunami tucuchishca cangacuna”.
10 Jehová Diosca cashnatajmi nin: “Chai punllaca
cambaj caballocunatapish, cambaj carretacunatapishmi tucuchisha.
11 Cambaj allpapi tiyaj llajtacunataca tucuchishami.
Cambaj jatun pircacunatapish urmachishami.
12 Can brujiashpa catichunca mana saquishachu.
Cambaj chaupipi magiata rurajca pi mana saquiringachu.
13 Cambaj rurashcalla dioscunatapish, cambaj adorana pilarcunatapishmi tucuchisha.
Cambaj maquihuan rurashca dioscunapaj ñaupajpica ña mana cumuringuichu.
14 Cambaj adorana postecunataca* surcushpami shitasha.
Cambaj llajtacunatapishmi tucuchisha.
15 Ñucata mana cazuj llajtacunataca
colerashpa, yallitaj pꞌiñarishpami llaquichisha”.