Intiru mundui manzharinun illapahua huanchinamanda | Biblia caimanda ¿imara nin?

2022 julio quilla pasaushcai intiru mundui illapasha manzhanai huanchinauna tiashca:

• 10 de julio de 2022 The Japan Times nishca periódico nica: “Japonmanda pasashca presidente Shinzo Abe shuti huanchishcamanda chi llactai, intiru mundui runaunara manzhachica, chi llactai mana ashca macanuna tian shinallara illapaunara charingaj shinzhi leyguna tian”.

• 4 de julio de 2022 Reuters agencia de noticias nishca rimaca: “Dinamarcai causaj runauna ashca manzharishca anuca Copenague partii atun tiendai shu runa illapasha quinsa runaunara huanchijpi”.

• 10 de julio de 2022 The Guardian nishca periódico nica: “Sudáfrica: maican illapasha runauna quinsa chunga pichca runaunara huanchinuca tragura upina puistui Soweto llactai”.

• 5 de julio de 2022 CBS News nishca televisiombi, radioibi cai noticia cunuca: “Pasaj semana tucurishcai Estados Unidospi illapashcaunamanda 220 yali runauna huañuchishca anuca 4 de julio nishca istara pasanujpi”.

¿Shu punzha ganaslla causana charina ushashunzhu? Caimanda Biblia ¿imara nin?

Biblia intindichin “puchucai timpuunai” causaushcara, cai timpui ashca runauna yapa milliuna, alira ranara chijnijcuna anun (2 Timoteo 3:1, 3). Cai milli rashcaunara ricusha runauna manzharishca causanun (Luca21:11). Shinajpi Biblia nin huanchinaunara macanunaras Yaya Dios tucuchinga, runauna ‘shu gustu lugarbi causana anun ali huasiunais gustu samana lugargunais’ (Isaías 32:18). Shinajpi ¿imasnara huanchinauna macanunas tucuchishca anga?

Yaya Dios milli runaunara illapaunaras tucuchingami.

• “Manalira rurajcuna allpamanda tucuchishca anunga” (Proverbios 2:22).

• Yaya Dios “guerragunara tucuchin cai pacha puchucai pundagama. Arcora paquin, lanzara ñutu partiunai pitin; caballogunahuaj carruunara ninai rupachin” (Salmo 46:9).

Yaya Dios runaunara ganaslla causanuchu yachachisha shu rai huanchinaunara macanunaras tucuchinga.

• “Paiguna mana huajlichinunga manaliras mana ruranunga ñuca santu urcui; allpallara Dios yachanahua undajta ashcaraigu imasna yacu lamarda tapan” (Isaías 11:9).

• Cuna punzhaunai Yaya Dios ashca runaunara intiru mundui yachachiun mana macanungaj illapaunaras mana apingaj, Biblia nin: “Paihua isparauna tarbana saulima tigrachinunga, shinallara lanzaguna sisara pitij tijera cuinta” (Miqueas 4:3).

Mana manzhasha causana tianamanda Yaya Dios pactachina shimira mas yachana munasha “¿Es posible librarse del miedo?” nishca temara leangui.

Macanuna imasna shu rai tucurinamanda yachana munasha “¡Por fin paz e la Tierra!” nishca temara leangui.