Cuti causarina ¿imara nisha nin?

Bibliai anástasis, griego shimii nisha nin, “cuti causarina” cai intindichin “cuti atarina”, shu runara cuti causachishcai atarina cuinta an; manara huañushcai imasna tunu runa ajta shinallara causaringa (1 Corintios 15:12, 13).

Hebreo shimii Biblia quillcashca partii causarina shimi mana tian. Shinajpi cai Biblia partii causarina shimi chapanamanda rimanmi. Por ejemplo, profeta Oseas cai Jehová rimashcara quillcaca: “Ñuca paigunara Pambashca uctumanda quishpichishami; paigunara huañuimanda cuti mañashami” (Oseas 13:14; Job 14:13-15; Isaías 26:19; Daniel 12:2, 13).

¿Huañushcauna maibi cuti causarinunga? Huaquin runauna ahua pachai causangaj atarinunga Cristohua mandangaj (2 Corintios 5:1; Apocalipsis 5:9, 10). Biblia cai causarina, “punda causarina” an nin (Apocalipsis 20:6; Filipenses 3:11). Biblia nin punda causarijcuna ñaupa causarinai causachishcauna anun. Punda causarina tiajpi huasha causarinas tian. Huasha causarinai causarijcuna cai Allpai causanunga (Salmo 37:29).

¿Imara tucun causachijpi? Huañushcaunara causachingaj Yaya Dios Jesusma ushaira cushca (Juan 11:25). Chi ushaihua Jesús “tucui pambariajcunara” atachinga, caran runara atachinga manara huañushcallaira imasna ajta paihua iyaihua, munaihua, sintishcahua (Juan 5:28, 29). Allpai causangaj causachishcauna mana ungununga ucha illaj aicha, tulluunas charinunga (Isaías 33:24; 35:5, 6). Ahua pachai causangaj causachishcauna ‘espíritu sami aicha’ charinunga, cai nin, angelguna tucununga (1 Corintios 15:42-44, 50).

¿Pigunara causarinunga? Biblia yachachin Allpai “huañushcauna causarinungami aliunas manaliunas” (Hechos 24:15). Aliuna muntun cuti causarijpi ali sirvij runauna imasna Noé, Abrahán, Sara cuinta tianunga (Génesis 6:9; Hebreos 11:11; Santiago 2:21). Manali muntun ucui Dios mandashcaunara ricsingaj, casungaj mana ushaj runauna tiangami.

Yaya Diosta tucui huras mana casungaj munaj runauna ña mana cuti causaringachu. Cai runauna huañusha huiñaigama huañunun (Mateo 23:33; Hebreos 10:26, 27).

Causarina ¿ima huras tiangairi? Biblia yachachica ahua pacha causarina Cristo shamunai tianga nisha 1914 huata callarishcai (1 Corintios 15:21-23). Cai Allpai causarina tucunga Jesús Huaranga Huatauna mandanai, chi timpui Allpa shu paraíso tucunga (Lucas 23:43; Apocalipsis 20:6, 12, 13).

¿Imarasha causarinai quirina ushanchi? Biblia ricuchin iscun runauna causarishcara, paiguna causarishcai ricuj runauna tianauca (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Shu mas ricsishca causarina Lazaromanda aca. Cai runa chuscu punzhauna huañushca aca, astaumbas Jesús ashca runauna ñaupai causachica (Juan 11:39, 42). Jesusta chijnijcuna mana ricuchina ushanuca chi tucushcara, chiraigu Jesusta Lazaroras huañuchina munanuca (Juan 11:47, 53; 12:9-11).

Biblia nin Dios ushaira charin huañushca runaunara causachingaj. Dios caran huañushca runa imasna ashcara ali iyarina ushan. Astaumbas Tucui Ushaj Dios ashcamanda mana imas arcana ushan huañushcaunara causachingaj (Job 37:23; Mateo 10:30; Lucas 20:37, 38). Pai huañushcaunara causachina ushan astaun causachina munanmi, chimanda Biblia nin: “Camba maquihua rurashcaunara cutillara ricungaj munanguimi” (Job 14:15; Nueva Versión Internacional). Shina Biblia ricuchin Dios imasna sintiringa runauna causachishcai cai Allpai causanuchu.

Cuti causarinamanda panda iyaiguna

Huaquinguna quirinun: Cuti causarishcai mana huañuj alma ñucanchi aichama cutillara tigran nisha.

Sirtu yachachina: Biblia mana yachachin shu runa huañushcai alma causasha catishcara. Astaun yachachin alma intiru causaj ashcara (Génesis 2:7; Ezequiel 18:4). Chimanda shu runara cuti causachijpi manara huañushca aj cuinta causarin.

Huaquinguna quirinun: Maicanguna causarishca ratullaira cuti huañuchishca anunga nisha.

Sirtu yachachina: Biblia nin “manalira rajcuna causarinaungami caudsayachij tucungaj” (Juan 5:29). Runauna manara huañushcallaira rurashcaunamanda mana taripashca anunga, astaun causarishca huasha rurashcaunamanda taripashca anunga. Chimanda Jesús nica: “huañushcauna Diospa Churi shimira uyanaungami uyajcunas causarinaungami” (Juan 5:25). Causachishca runauna Jesús rimashcara yachachishcaunaras casunujpi paiguna shutiunara “causana quillcai quillcashca saquiringami” (Apocalipsis 20:12, 13).

Huaquinguna quirinun: Runauna manara huañushcallaira charishca aichallahua charinunga nisha.

Sirtu yachachina: Huañushca huasha aichaga ismurinmi, chimanda mana chi aichallahua causarina ushan (Eclesiastés 3:19, 20).