Exodo

39 Diospa carpanpi llamkanankupaqmi sumaq awasqa pachakunata ruwarqaku azul llañu qaytumanta, morado qaytumanta+ hinaspa puka llañu qaytumanta. Moisesta Jehova Dios kamachisqanman hinataqmi ruwarqaku Aaronpaq suma-sumaq awasqa pachata.+

2 Bezalelqa mandiltam* ruwarqa+ quriwan, azul llañu qaytuwan, morado qaytuwan, puka llañu qaytuwan hinaspa kawpusqa linaza llañu qaytuwan. 3 Chay mandilpaqqa quritam llaspayanankama martillowan takarqaku, hinaptinmi Bezalelqa qaytuta ruwananpaq llañuchallata kuchurqa. Hinaspanmi awarqa azul llañu qaytuwan, morado qaytuwan, puka llañu qaytuwan hinaspa linaza llañu qaytuwan kuskata. Chaynatam mandiltaqa ruwarqaku. 4 Chay mandiltaqa ñawpaqninpaqwan qipanpaq kananpaqmi hombronpi iskay piezata sirarqaku. 5 Wiqaw watanatapas Moisesta Jehova Diospa kamachisqanman hinam ruwarqaku quriwan, azul llañu qaytuwan, morado qaytuwan, puka llañu qaytuwan hinaspa kawpusqa linaza llañu qaytuwan. Chay wiqaw watanaqa mandilta churakuspa watakunankupaqmi karqa.+

6 Chaymantam llipipipiq yana* alaqa iskay rumikunata muyuriq patachanpi quriwan hapichirqaku. Chay iskaynin alaqa rumikunapim sellopipas qillqachkanmanku hina Israelpa churinkunapa sutinta qillqarqaku.+ 7 Chaymantam chay iskaynin rumikunata mandilpa hombronpi churarqaku, chayqa karqa Israelpa miraynin runakuna yuyarinanpaqmi.+ Chaytaqa ruwarqaku Moisesta Jehova Diospa kamachisqanman hinam. 8 Chaymantam pecherata+ mandilta hina ruwarqa quriwan, azul llañu qaytuwan, morado qaytuwan, puka llañu qaytuwan hinaspa kawpusqa linaza llañu qaytuwan.+ 9 Pataraptinkuñataqmi chay pecherapa tawan lawnin huk cuarta* sayayniyuq karqa. 10 Chaypim 12 alaqa rumikunata alliqmanta* ichuqman* qatinasninpi churarqaku. Qallariypim karqa puka*, qillu* hinaspa verde* llipipipiq alaqa rumikuna. 11 Qatiqninpim karqa celeste*, azul* hinaspa pukaniraq* llipipipiq alaqa rumikuna. 12 Hina qatiqninpim karqa pukaniraq qillu*, uqi allqa* hinaspa morado* llipipipiq alaqa rumikuna. 13 Tukuyninpiñataqmi karqa qamya verde*, yana hinaspa verde allqa* llipipipiq alaqa rumikuna. Llapallan chay alaqa rumikunaqa qurimanta hapichinayuqkamam karqa. 14 Chay alaqa rumikunapim qillqasqa karqa Israelpa 12 churinkunapa sutin. Sapa sutim Israelpa miraynin 12 ayllukunaman tuparqa, sellopi hinam sapa rumipi huk suti qillqasqa karqa.

15 Pecherapa muyuriqninpiñataqmi churarqaku qurimanta ruwasqa waskillata.+ 16 Pecherapaqqa ruwarqakutaqmi qurimanta iskay hapichinatapas chaynataq rinrinkunatapas, hinaspam hanay esquinankunapi churarqaku. 17 Chaymantam qurimanta iskay waskillakunata pecherapa rinrinman ustuchirqaku. 18 Chay waskillakunatam mandilpa hombropi kaq alaqa rumikunata hapiqman ustuchirqaku, chaynapim pecheraqa mandilpa ñawpaqninpi karqa. 19 Chaymantapas pecherapa uray esquinankunapiqa qurimanta iskay rinrinkunatam churarqaku, chayqa pecherapa qipa lawninpim karqa mandilwan tupanakunanpaq.+ 20 Mandilpipas churarqakutaqmi hombronkunapa urayninpi qurimanta iskay rinrinkunata, chay rinrikunaqa karqa wiqaw watanapa hanaychanpim. 21 Hinaspam chay pecherataqa mandilman watarqaku, azul waskillawanmi pecherapa rinrinmanta mandilpa rinrinman watarqaku. Chaynapim pecheraqa wiqaw watanapa hanayninpi hinaspa mandilpi sumaq hapichisqa karqa. Chaytaqa Moisesta Jehova Diospa kamachisqanman hinam ruwarqaku.

22 Away yachaqtaqmi ruwarqa azul qaytumanta mandilpa ukunpi churakunan mana makituyuq pachatapas.+ 23 Chay ruwasqan pachaqa uma ustuchinapaq chawpinpi uchkuyuqmi karqa. Chay uchkupa patan mana llikikurunanpaqmi sumaq sirasqa karqa. 24 Chay mana makituyuq pachapa uray patanpiñataqmi ruwarqaku granadapa rurunkunata warkurayananpaq. Chaytaqa ruwarqaku kawpusqa azul llañu qaytumanta, morado qaytumanta chaynataq puka llañu qaytumantam. 25 Ruwarqakutaqmi qurimanta campanachakunatapas. Hinaspam patanman churarqaku ruwasqanku granadapa rurunkunawan chullachispa. 26 Diospaq llamkaspa churakunanku mana makituyuq pachapa uray patanpim chullachirqaku ruwasqanku granadapa rurunkunata qurimanta campanachakunawan. Chaytaqa ruwarqaku Moisesta Jehova Diospa kamachisqanman hinam.

27 Chaymantapas Aaronpaq hinaspa churinkunapaqmi ruwarqaku linaza llañu qaytumanta makituyuq pachata.+ 28 Aaronpaqqa ruwarqakutaqmi sumaq uma wankunatapas+ linaza llañu qaytumanta, churinkunapaqpas ruwarqakum linaza llañu qaytumanta uma wankunata,+ ruwarqakutaqmi kawpusqa linaza llañu qaytumanta ukun pachakunatapas.+ 29 Chaymantapas wiqaw watanatam ruwarqaku kawpusqa linaza llañu qaytumanta, azul llañu qaytumanta, morado qaytumanta hinaspa puka llañu qaytumanta. Chaykunataqa ruwarqaku Moisesta Jehova Dios kamachisqanman hinam.

30 Chaymantapas qurimantam llipipipiq llaspalla suytu tablachata hina* ruwarqaku, hinaspam sellopi hina chaypi qillqarqaku ‘Jehova Diosllam chuyay-chuyayqa’ niqta.+ 31 Chay llaspalla quritam watarqaku azul llañu qaytuwan uma wankunaman watanankupaq, chaytaqa ruwarqaku Moisesta Jehova Diospa kamachisqanman hinam.

32 Chaynatam Diospa carpanpaq utaq huñunakuna carpapaq tukuy ima ruwayta tukurqaku. Israelpa mirayninkunaqa Moisesta Jehova Diospa kamachisqanman hinam lliwta ruwarqaku.+ Chayna nisqanman hinamá ruwarqaku.

33 Hinaspam Diospa carpanpaq tukuy ima ruwasqankuta Moisesman aparqaku.+ Aparqakum hapichinakunata,+ punkupaq hina marcokunata,+ kaspikunata,+ qirukunata,+ qirukunapaq tuquyuq tiyanakunata, 34 carneropa pukayachisqa qalas qaranmanta qatata,+ foca animalpa qalas qaranmanta qatata, rakiq hatun cortinata,+ 35 Diospa baulninta kaspintinta,+ tapanta,+ 36 mesata, servicionkunata,+ sapaqchasqa tantata, 37 qurimanta candelabrota+ qatinasninpi churasqa mecherontinta, candelabropa servicionkunata,+ achki ratananpaq aceiteta,+ 38 qurimanta incienso* kañana altarta,+ akllasqa runakunaman tallina miski asnaq aceiteta,+ inciensota,+ carpaman yaykunapi kananpaq hatun cortinata,+ 39 broncemanta altarta,+ rejillanta, kaspinkunata,+ servicionkunata,+ lavatoriota tiyanantinta,+ 40 patiopaq hatun telakunata, qirunkunata, qirunkunapaq tuquyuq tiyanakunata,+ patiopa punkunpaq cortinata,+ waskakunata, estacakunata+ hinaspa Diospa carpanpi llamkanankupaq serviciokunata. 41 Aparqakutaqmi Diospa carpanpi llamkanankupaq suma-sumaq awasqa pachakunatapas sacerdote Aaronpaq+ hinaspa churinkunapaq.

42 Tukuy chaytam Israelpa mirayninkunaqa ruwarqaku Moisesta Jehova Diospa kamachisqanman hina.+ 43 Moisesñataqmi asuykuspan qawaykurqa Jehova Diospa kamachisqanman hina ruwasqankuta, hinaspam Moisesqa paykunapaq Diosta mañakurqa.