Cantar de los Cantares
4 Yananñataqmi* nirqa:
“Kuyasqay yanalláy, ¡mayna kuyayllapaqmi qamqa kanki!
¡Qam hina kuyayllapaqqa manam pipas kanchu!
Urpichakunapa ñawichan hinaraqmi ñawichaykipas uyayki tapakusqayki ukupi kachkan.
Chukchachaykipas Galaad urqukunamanta+ uraykamuq cabrakuna hinam.
2 Kiruchaykikunapas millwanta chayllaraq rutusqa oveja hinam,
bañachisqankumanta chayllaraq lluqsiq ovejakuna hinam.
Kiruchaykikunaqa ovejakunapa wachakusqan parisnintin
chitachakuna hinam llapallan kachkan.
3 Simichaykipas puka qaytu hinam pukay-pukaycha.
Rimasqaykipas suma-sumaqllañam.
Uya tapakusqayki ukupim
uyachaykipas iskayman partisqa granada hina kachkan.
4 Kunkachaykipas+ Davidpa torren+ hinam kuyaychallapaq,
rumiwan suma-sumaq pirqasqa hinam kuyaychallapaq.
Chay torrepiqa allin peleaq runakunapa harkachikunankutam+ warkunku,
ruyrunpa kaq harkachikunatam chaypiqa waranqata warkunku.
5 Ñuñuchaykikunapas parisnintin uña luwichu hinam,+
amanqay waytakunapa chawpinpi
mikuq luwichukuna hinam”, nispa.
6 Sipasñataqmi nirqa:
“Manaraqpas achikyay wayra wayramuchkaptinmi risaq miskillaña asnaq wiqiyuq sachapa* kasqan urquman,
manaraqpas inti siqaykuchkaptinmi* risaq miskillaña asnaq yuraq wiqiyuq sachapa* kasqan muquman”, nispa.+
7 Yananñataqmi nirqa: “Ancha-ancha kuyayllapaqmi kanki kuyasqay yanalláy,+
ima mana allinpas qampiqa manam kanchu.
8 Kuyasqay yanalláy, Libano urqumantayá+ kuska pasakusun.
Amana urqumantayá uraykamuy,
Senir urqumantayá uraykamuy, Hermon urqumantayá+ uraykamuy,
leonkunapa machayninmantayá uraykamuy,
tigrekunapa* kasqan urqumantayá uraykamuy.
9 ¡Kuyasqay panilláy*! ¡Kuyasqay yanalláy!
Sunqullaytam suwaruwanki.+ Kuyayllapaq ñawichaykikunawan qawaykuwaspallaykim sunqullayta suwaruwanki.
Kunkaykipi huknin alaqallawanmi sunqullayta suwaruwanki.
10 ¡Kuyasqay panilláy! ¡Kuyasqay yanalláy! ¡Mayna sumaqmi kuyakuynikiqa!+
Vinomantapas aswan allinmi kuyakuynikiqa.+
Imapas miski asnaqkunamantaqa aswan miskitaraqmi perfumekiqa asnarin.+
11 Kuyasqay yanalláy, simichaykipas abejapa mielnin hinam miskillaña.+
Qalluykipas lecheyuq hinaspa mielniyuq hinam.+
Pachaykipa asnayninpas Libano lawpi sachakunapa asnaynin hinam.
12 ¡Kuyasqay panilláy! ¡Kuyasqay yanalláy!
Qamqa kanki qinchasqa huerta hinam, qamqa kanki wichqasqa pukyu hinam.
13 Qamqa kanki rurusapa granada sachakunapa kanan huerta hinam.
Qampiqa kachkan tukuy rikchaq allinnin ruruyuq sachakunawan miskillaña asnaq waytakunam*,
14 nardowan+ azafran waytakunam, miskillaña asnaq qurakunawan+ canela+ sachakunam,
miski asnaq wiqiyuq sachakunam* hinaspa aloes+ sachakunam
chaynataq tukuy rikchaq miski asnaq plantakunam.+
15 Qamqa kanki huertapi pukyu hinam, qamqa kanki pozopi tomana yaku hinam,
qamqa kanki Libano lawmanta yarqa yaku hinam.+
Huertay lawmanyá llampullata pukurimuy miskillaña asnaynin chiqirinanpaq”, nispa.
Sipasñataqmi nirqa:
“Kuyasqay yanallayqa huertanmanyá yaykumuchun,
yaykumuspayá sachakunapa allinnin rurunkunata mikuchun”, nispa.