Romanos

1 Jesucristopa* serviqnin ñuqa Pablom qillqamuykichik, ñuqaqa apostol* kanaypaq chaynataq Diosmanta sumaq willakuykunata willakunaypaqmi akllasqa karqani.+ 2 Diosmi chuya qillqakunapi chay sumaq willakuyta willakuqninkunawan* ñawpaq tiempomantaraq willachirqaña. 3 Chay sumaq willakuyqa churinmantam karqa, payqa Davidpa+ mirayninmantam rikurimurqa. 4 Chay churintam Diosqa atiyninwan wañusqakunapa kasqanmanta kawsarichirqa,+ kawsarirachispanmi churin kasqanta qawachirqa.+ Payqa señorninchik Jesucristom, 5 paynintakamam Diospa ancha kuyakuyninta* chaskirqanchik. Jesusmi apostol kanaypaq+ akllaykuwarqa, chaynapi llapallan nacionpi runakuna+ iñinankupaq, payta kasukunankupaq chaynataq sutin hatunchasqa kananpaq. 6 Qamkunapas akllasqa wakin nacionkuna hinam akllasqaña kachkankichik Jesucristota qatinaykichikpaq. 7 Roma llaqtapi Diospa lliw kuyasqankuna, qamkunamanmi qillqamuykichik, qamkunaqa chuya kanaykichikpaqmi qayasqa karqankichik.

Qamkunapaqyá kachun taytanchik Diospa hinaspa señorninchik Jesucristopa ancha kuyakuynin* chaynataq hawkayaynin.

8 Imamantapas puntataqa llapallaykichikmantam Jesucristontakama Diosta agradecekuni, agradecekuniqa Diosman sunqu kasqaykichikmanta* enteron allpa pachapi rimasqankuraykum. 9 Ñuqam tukuy sunquywan Diosta servichkani churinmanta sumaq willakuyta willakuspay, Diosqa yachanmi qamkunapaq sapa kuti mañakusqayta.+ 10 Ñuqaqa mañakuchkani Dios munaptinqa qamkunaman imaynapas chayamunaypaqmi. 11 Qamkunawan tupaykuytam anchata munachkani Diosmanta ima yachachikuytapas willanaypaq, chaynapi Diosta yupaychaspaykichik allinta takyanaykichikpaq. 12 Astawanqa munachkani ñuqanchikpura kallpanchanakuykuytam,+ qamkunapas chaynataq ñuqapas Diospi hinalla hapipakusqanchikmanta rimarisqanchikwan kallpanchanakuykuytam munachkani.

13 Wawqi-panillaykuna, ñuqaqa achka kutitam qamkunapa kasqaykichikman hamuyta munarqani, ichaqa manam atimurqanichu. Munarqanim huklaw nacionkunapi hina runakunata Diospi iñinankupaq yanapayta. 14 Ñuqaqa manupi hinam kachkani Grecia nacionniyuq runakunapaq, huklaw nacionniyuq runakunapaq chaynataq yachayniyuq hinaspa mana yachayniyuq runakunapaqpas. 15 Chaymi anchata munachkani qamkunamanpas Roma llaqtapi sumaq willakuymanta willayta.+ 16 Ñuqaqa manam pinqakunichu sumaq willakuymanta willakuytaqa,+ chay sumaq willakuyqa Diospa atiyninwanmi kachkan llapallan iñiqkuna salvakunankupaq.+ Puntatam salvakun judiokuna,+ chaymantañataqmi griego rimayniyuqkuna.+ 17 Diospa allin ruwaq kasqanmi sutilla qawakuchkan iñiqkunapi,+ chayqa Diosta astawan kuyanankupaqmi yanapan. Ñawpaq qillqakunapipas kaynatam nin: “Allin ruwaq runam ichaqa kawsanqa Diospi hapipakusqanrayku*”, nispa.+

18 Diosqa piñakuynintam+ hanaq pachamanta qawachimun mana kasukuq runakunaman hinaspa imapas mana allin ruwaqkunaman. Paykunaqa mana allin kaqkunata ruwaspankum runakunata harkanku chiqap kaqta mana riqsinankupaq.+ 19 Diosqa paykunamanmi sutillata riqsichikun, chaynapi payta chaylla riqsinankupaq.+ 20 Diospa imayna kasqanqa sutillataqmi qawakun kay pacha unanchasqa kasqanmantapacha, paypa imayna kasqantaqa riqsichwan tukuy ima unanchasqankunamanta yachaspam. Unanchasqankunapim qawachwan+ wiña-wiñaypaq atiyniyuq kasqanta+ chaynataq payqa Dios kasqantapas.+ Chaynaqa, manam ninmankuchu: “Diosmantaqa manam imatapas yacharqanichu”, nispaqa. 21 Paykunaqa Diosta riqsichkaspankupas manam Diosninkuta hinaqa hatuncharqakuchu nitaq agradecekurqakuchu, aswanqa mana yuyayniyuq ruqru umañam rikurirurqaku, mana entiendeq sunqunkupas tutayarurqam.+ 22 Yachaysapapaq hapikuspankupas mana yachayniyuqmi rikurirurqaku, 23 hinaspam mana haykapipas wañuq* Diosta hatunchanankumantaqa wañuq runaman rikchakuq taytachata hatuncharqaku, hatuncharqakutaqmi alton pawaqkunaman rikchakuqtapas, tawa chakiyuq animalkunaman chaynataq qasqunpa puriq animalkunaman rikchakuq taytachakunatapas.+

24 Chaymi sunqunkupa munasqanta ruwayta munaptinku Diosqa saqiykun millakuypaq kaqkunata ruwanankupaq, chaynapi cuerponkuta pinqayman churanankupaq. 25 Paykunaqa Diosmanta chiqap kaqkunatam llullaman tikrarunku, hinaspam unanchaqta yupaychanankumantaqa chaynataq servinankumantaqa unanchasqakunataña yupaychanku, Diosqa wiña-wiñaypaq alabasqam. Chaynayá kachun*. 26 Chaymi Diosqa paykunata saqiykun qari kayninwan utaq warmi kayninwan pinqakuypaq kaqkuna ruwayta munapayanankupaq,+ warmikunapas manaña qariwan kayta munaspankum mana ruwanakunataña ruwanku,+ 27 chaynataqmi qarikunapas manaña warmiwan kayta munaspanku qaripuraña kakunku puramintita munapayanakuspanku,+ chaynatam millakuypaq kaqkunata ruwanku, hinaspam mana allin ruwasqankumanta mana allinta chaskinku.+

28 Dios riqsiyta mana munaptinkum Diosqa paykunata saqiykun huchallikuyllapi umayuq kaspanku mana allinkunata ruwanankupaq.+ 29 Paykunaqa manam haykapipas allin ruwayman hinaqa imatapas ruwankuchu, paykunaqa kachkanku tukuy mana allin ruwaypi umayuqllañam,+ imatapas llumpayta munapayaqllañam,+ runamasinta ñakarichiqllañam, envidiakuqllañam,+ runa wañuchiqllañam,+ liryanakuqllañam, runamasin pantachiqllañam+ hinaspa hukkunapa contranpi mana allin ruwaqkunallañam.+ Paykunaqa kanku cuento qipikunam, 30 runamasinta yanqamanta tunpaqkunam,+ Diosta chiqniqkunam, runamasinta mana respetaqkunam, hatuntukuqkunam, alabakuqkunam, mana allin ruwaykunata rikurichiqkunam*, tayta-maman mana kasukuqkunam,+ 31 ruqru umakunam,+ rimasqanman hina mana ruwaqkunam, runamasinta mana kuyaqkunam hinaspa imaniraqllapas mana llakipayakuqkunam. 32 Chay runakunaqa allintam yachanku Diospa kamachikuyninman hina chayna ruwaqkuna wañuypi tukunankumanta,+ chaywanpas chay mana allinkunataqa hinallam ruwachkanku, hukkuna ruwaptinpas “allinmi” ninkum.