Hebreos

11 Iñiyqa* suyasqanchikta chiqaptapuni chaskinanchikmanta mana iskayrayaymi+ chaynataq imamantapas yachasqanchikrayku mana rikusqanchik kaqkunata chiqap kasqanpaq hapiymi. 2 Chayna iñiyniyuq kasqankuraykum ñawpaq tiempopi abuelonchikkunaqa Diospa chaskisqan karqaku*.

3 Diospi iñisqanchikraykum yachanchik hanaq pachapi hinaspa kay pachapi kaqkunapas* Dios rimariptin maymi kananpi kasqanta, chaynaqa qawasqanchikkunam rikurirun mana rikusqanchik kaqkunamanta.

4 Diospi iñisqanraykum Abelqa Cainpa qusqan ofrendamantapas aswan allin ofrendataraq Diosman qurqa,+ chaynata iñisqanraykum Diosqa allin ruwaqpaq qawarqa, Diosqa paypa qusqantam chaskiykurqa.+ Chaymi Abel wañusqaña kachkaptinpas Diospi iñisqanqa hinallaraq yachachiwachkanchik.+

5 Diospi iñisqanraykum Enocpas+ wañuyta mana riqsinanpaq huklawman apasqa karqa, chaymi paytaqa mana maypipas tarirqakuchu huklawman Dios aparusqanrayku,+ manaraq huklawman apasqa kachkaptinmi paymanta Dios willakurqa paypa munasqanman hina kawsakusqanmanta. 6 Diosmanta iskayrayaq runaqa* manapunim Diostaqa kusichinmanchu, pipas Diosman asuykuqqa Dios chiqap kasqantam creenan, creenantaqmi tukuy sunqunkuwan maskaqninkunaman pagapuq kasqantapas.+

7 Diospi iñisqanraykum Noeypas+ mana rikusqan kaqkunamanta Dios willaykuptin+ payta manchakusqanrayku wasi hina hatun buqueta* ruwarqa,+ chaynapi ayllun mana wañunanpaq. Chaynata iñisqanraykum runakuna castigasqa kanankuta qawachirqa,+ chaynata iñisqanraykutaqmi payqa allin ruwaq runa kasqanta riqsichikurqa.

8 Diospi iñisqanraykum Abrahanpas+ Dios kamachiptin kasukurqa, hinaspam mayman rinanta mana yachachkaspanpas llaqtanmanta lluqsirqa herencia chaskinan allpaman.+ 9 Diospi iñisqanraykum prometesqa allpapipas runapa llaqtanpi forastero hina purirqa.+ Carpakunallapi yachaspam*+ purirqa hina chay herencia chaskiqmasin Isaacwan hinaspa Jacobwan.+ 10 Payqa suyarqa alli-allin cimientasqa llaqtatam, chay llaqta imayna ruwasqa kananpaqqa Diosmi tantiarqa, paytaqmi hatarichirqapas.+

11 Diospi iñisqanraykum Sarapas yuyaqña kachkaspanpas+ wawayuq kayta atirqa, payqa yacharqam prometeqnin Diosqa mana llullakuq kasqanta. 12 Chayraykum wañusqa hinaña kaq+ chullalla runapa mirayninpas+ cielopi lucerokuna hina chaynataq lamar quchapa patanpi mana yupay atina aqu hina achkallaña karqa.+

13 Rimasqanchik llapallan runakunaqa wañukunanku punchawkamam Diosman sunqu karqaku, Diospa promesanta manaraq chaskichkaspankupas+ Diospi iñisqankuraykum chay promesakuna cumplikusqanta karullamanta qawachkanmankupas+ hina rikuspa kusikurqaku, hinaspam willakurqaku kay allpa pachapiqa huklaw llaqtayuq chaynataq forasterolla kasqankumanta. 14 Chaynata willakuqkunaqa sutillatam qawachichkanku yachanankupaq llaqtata tukuy sunqunkuwan maskasqankuta. 15 Sichum maymi lluqsimusqanku llaqtata yuyarayanmanku karqa+ hinaspankuqa kutikunmankuchá karqa. 16 Kunanpas chayna runakunaqa hanaq pachapi kaq aswan allin llaqtayuq kanankupaqmi kallpanchakuchkanku, chaymi Diosqa mana pinqakunchu “Diosniykum” nispa paykuna sutichaptinkupas,+ Diosqa huk llaqtatam paykunapaq hatarirachin.+

17 Diospi iñisqanraykum Abrahanqa pruebaman churasqa kaspan+ churin Isaacta Diospaq kañapunan karqa. Kusikuyllawanña promesakuna uyariq Abrahanqa sapallan churintam wañuchinanpaqña kachkarqa,+ 18 chaytam ruwarqa “Isaacmantam kanqa miraynikiqa” nispa+ Dios nichkaptinpas. 19 Abrahanqa yuyaymanarqa wañuruptinpas Isaacta kawsarichinanpaq Dios atiyniyuq kasqanpim, Abrahanqa churintam wañusqanmanta kawsarimuchkaqta hina chaskiykurqa, chayqa qipa punchawkunata chayna pasakunanmanta yachanapaqmi karqa.+

20 Diospi iñisqanraykum Isaacpas hamuq tiempopi imayna kanankumanta Jacobtawan+ Esauta+ bendecirqa.

21 Diospi iñisqanraykum Jacobpas wañukunanpaqña kachkaspan+ tawnanman hapipakuykuspan Joseypa sapakama churinkunapaq bendicionta mañapurqa,+ hinaspam Diosta yupaycharqa.+

22 Diospi iñisqanraykum Joseypas wañukunanpaqña kachkaspan willakurqa Israelpa mirayninkuna Egipto nacionmanta lluqsinankumanta, kamachirqataqmi tullunkunawan ima ruwanankutapas*.+

23 Diospi iñisqankuraykum Moisespa tayta-mamanpas pay naceptin kuyayllapaq wawa+ kasqanta qawaykuspanku kimsa killa pakarurqaku,+ paykunaqa Egipto nacionta kamachiq runapa kamachisqantapas manam manchakurqakuchu.+ 24 Diospi iñisqanraykum Moisespas yuyayniyuqña karuspan+ mana munarqachu Egipto nacionta kamachiq runapa* churinpa wawanwan sutichasqa kaytaqa.+ 25 Moisesqa Diospa runankunawan kuska ñakariytam akllakurqa, huchallapi kawsaspan huk tiempolla kusikunanmantaqa. 26 Payqa Egipto nacionpi tukuy ima kaqkunamantapas astawanqa akllakurqa Diospa akllasqan kaspa insultasqa kaytam, chayqa paypaqqa quri-qullqimantapas aswan allinmi karqa. Chaynataqa ruwarqa premiota chaskiyta tukuy sunqunwan suyasqanraykum. 27 Diospi iñisqanraykum Egipto+ nacionta kamachiq runapa piñakuynintapas mana manchakuspan+ Egiptomanta ripukurqa, payqa mana rikuy atina Diosta qawachkanmanpas hinam sasachakuypi kaspanpas allinta takyarqa.+ 28 Diospi iñisqanraykum pascuata ruwarqa, hinaspapas punku hapiq kaspikunamanmi yawarta challarqa chaynapi Israelpa mirayninkunapa piwi* churinkuta Diospa angelnin mana wañuchinanpaq.+

29 Diospi iñisqankuraykum Israel runakunapas Puka lamar qucha kicharikuykuptin chaki allpanta chimparqaku,+ Egipto runakunam ichaqa chimpanankupaq yaykuruspanku yakuwan millpurachikurqaku.+

30 Diospi iñisqankuraykum Jerico llaqtapa pirqankuna tuñirurqa llaqtata qanchis punchawpuni Israel runakuna muyuruptinku.+ 31 Diospi iñisqanraykutaqmi Rahab sutiyuq chuchumika* warmipas llaqtata watiqaq riq runakunata allinllata chaskiykurqa, chayraykum mana kasukuq runakunawan kuskaqa mana wañurqachu.+

32 Chaynaqa, ¿imataraqtaq rimariyman? Manach tiempo haypawanmanchu Gedeonmanta,+ Baracmanta,+ Sansonmanta,+ Jefteymanta,+ Davidmanta,+ Samuelmanta+ hinaspa Diospa wakin willakuqninkunamanta* rimanaypaqqa. 33 Paykunaqa Diospi iñisqankuraykum huklaw nacionkunata vencerqaku,+ allinta imatapas ruwarqaku, Diospa prometesqankunata uyarirqaku,+ leonkunapa siminta wichqarurqaku,+ 34 ratachkaq ninapipas mana ruparqakuchu,+ espadawan wañuchisqa kanankumanta lluptirqaku,+ mana kallpayuq kachkaspankupas kallpasapa rikurirurqaku,+ guerrapi peleaspankupas qarinchakurqaku,+ huklaw llaqtamanta tropakunatapas qatikacharqaku.+ 35 Warmikunapas wañuqninkutam kawsarichisqataña chaskiykurqaku.+ Wakin runakunañataqmi librasqa kayta mana munaspanku wañunankukama maqapasqa karqaku kawsariyta suyasqankurayku. 36 Wakinmantam asikurqaku hinaspam azoterqaku. Manamá chayllachu aswanqa cadenasqa+ hinaspa carcelkunaman churasqam karqaku,+ chayna sasachakuykunapimá karqaku. 37 Wakinmi karqaku rumikunawan chuqapasqa,+ Diospi iñisqankurayku sasachakuykunaman churasqa, serruchowan kuchusqa* hinaspa espadakunawan wañuchisqa.+ Wakinñataqmi karqaku wakchayaypi, ñakariypi+ hinaspa maqapasqa.+ Chayna kaspankum ovejakunapa hinaspa cabrakunapa qaranwan+ churakuykuspanku kaypi-chaypi purillarqaku. 38 Paykunaqa ancha allin runakuna kasqankuraykum mana chay runakunapaq hinachu karqaku. Chaymantapas, mana imapa kanan chunniqkunapi, urqukunapi, machaykunapi+ hinaspa qaqa uchkukunapim purirqaku.

39 Diospi iñisqanraykum Diosqa chay runakunamanta allinta rimarqa, chaywanpas paykunaqa manam mayqinninkupas Diospa prometesqankuna ruwasqa kasqantaqa rikurqakuchu. 40 Chaynam karqa ñuqanchikpaq Dios aswan allin kaqkunata ñawpaqmantaraq tantiarusqanrayku,+ chaynapi paykunapas ñuqaykurayku mana huchayuqña kanankupaq.