Genesis

1 Qallariypim Diosqa unancharqa hanaq pachatawan kay pachata.+

2 Kay allpa pachapiqa manam imapas karqachu, tutayaypa pampasqan ukullay-uku yakullam karqa,+ Diospa atiyninñataqmi*+ kayman-wakman yakupa hawanpi muyurqa.+

3 Chaymi Diosqa nirqa: “Achkiyá kachun”, nispa. Hinaptinmi achki karqa.+ 4 Chaymantam Diosqa achki allin kasqanta qawarqa, hinaspam tutayaytawan achkita rakirqa. 5 Diosmi achkita suticharqa punchawwan, tutayaytañataq tutawan.+ Hinaptinmi tutaykuqmanta paqarinnintin tutaykuqkama karqa punta kaq punchaw.

6 Chaymantam Dios nirqa: “Yaku+ altoman rakisqa kaptinyá chawpinñataq mana imapa kanan* kachun”, nispa.+ 7 Chaymi Diosqa altoman yakuta rakiruspan mana imapa kananta rikurichirqa.+ Chaymi chayna karqa. 8 Chay mana imapa kasqantam Diosqa suticharqa cielowan, hinaptinmi tutaykuqmanta paqarinnintin tutaykuqkama karqa iskay kaq punchaw.

9 Chaymantam Dios nirqa: “Allpa pachapi qiparuq yaku huk hawaqllaman huñunasqa kaptinyá chaki pampa rikurichun”,+ nispa. Hinaptinmi chayna karqa. 10 Chay chaki pampatam Dios suticharqa allpawan,+ chay huñunasqa yakutañataqmi lamar quchawan.+ Chay ruwasqanqa allinmi Diospaqqa karqa.+ 11 Chaymantam Dios nirqa: “Allpamantayá wiñamuchun qurakuna, muguyuq kawsaykuna hinaspa ruruyuq tukuy rikchaq sachakuna, sapakama rurunman hina chaynataq mugunman hina”, nispa. Hinaptinmi chayna karqa. 12 Chaynapim wiñamurqa qurakuna, muguyuq kawsaykuna+ hinaspa ruruyuq tukuy rikchaq sachakuna, sapakama mugunman hina chaynataq rurunman hina. Chay ruwasqanqa allinmi Diospaqqa karqa. 13 Hinaptinmi tutaykuqmanta paqarinnintin tutaykuqkama karqa kimsa kaq punchaw.

14 Chaymantam Dios nirqa: “Punchawtawan tutata rakinanpaq+ cielopi kachun inti, killa hinaspa lucerokuna.+ Chaynapi watakunapas, puquy tiempopas, chiraw tiempopas* chaynataq punchawkunapas kananpaq.+ 15 Hinaspa cielomanta allpa pachata achkinanpaq”, nispa. Hinaptinmi chayna karqa. 16 Diosmi intitawan killata rikurichirqa. Intitam rikurichirqa punchawpi achkinanpaq,+ killatañataqmi tutapi achkinanpaq. Rikurichirqataqmi lucerokunatapas.+ 17 Chaykunatam Diosqa rikurichirqa cielomanta kay allpa pachata kanchamunanpaq, 18 rikurichirqaqa punchawpipas hinaspa tutapipas achkimunanpaqmi. Chaymi achkipas hinaspa tutayaypas karqa.+ Chay ruwasqanqa allinmi Diospaqqa karqa. 19 Hinaptinmi tutaykuqmanta paqarinnintin tutaykuqkama karqa tawa kaq punchaw.

20 Chaymantam Dios nirqa: “Yakupiyá rikurichun challwakunawan tukuy rikchaq animalkuna*, rikurichuntaqyá allpa pachapi alton pawaqkunapas”, nispa.+ 21 Chaymi Diosqa unancharqa yakupi hatu-hatun challwakunata*. Unancharqataqmi yakupi miraq tukuy rikchaq challwakunatawan animalkunatapas* chaynataq raprayuq tukuy rikchaq alton pawaqkunatapas. Chay ruwasqanqa allinmi Diospaqqa karqa. 22 Chaymantam Diosqa bendecispan nirqa: “Achkallataña miraspayá lamar quchaman huntachun,+ alton pawaqkunapas allpa pachapiyá mirachun”, nispa. 23 Hinaptinmi tutaykuqmanta paqarinnintin tutaykuqkama karqa pichqa kaq punchaw.

24 Chaymantam Dios nirqa: “Tukuy rikchaq animalkunayá* allpa pachapi rikurichun. Rikurichunyá uywa animalkuna, purun animalkuna chaynataq qasqunpa puriq animalkunapas”, nispa.+ Hinaptinmi chayna karqa. 25 Chaymi Diosqa unancharqa tukuy rikchaq purun animalkunata, tukuy rikchaq uywa animalkunata hinaspa qasqunpa puriq tukuy rikchaq animalkunata. Chay ruwasqanqa allinmi Diospaqqa karqa.

26 Chaymantam Dios nirqa: “Runatayá ruwasunchik+ ñuqanchikman rikchakuqta,+ paypa makinpiyá kachun yakupi challwakuna, alton pawaqkuna, uywa animalkuna chaynataq qasqunpa puriq animalkunapas. Makinpitaqyá kachun allpa pachapas”, nispa.+ 27 Hinaspam Diosqa runata unancharqa kikinman rikchakuqta. Payman rikchakuqtamá qaritawan warmita unancharqa.+ 28 Chaymantam Diosqa bendecispan nirqa: “Achka churi-wawayuqyá kaychik, miraspayá allpa pachaman huntaychik,+ makikichikpiyá kachun allpa pachaqa.+ Makikichikpitaqyá kachun+ yakupi challwakunapas, alton pawaqkunapas chaynataq allpapi tukuy rikchaq animalkunapas”, nispa.

29 Chaymantam Dios nirqa: “Allpa pachapi muguyuq llapallan kawsaykunatawan ruruq llapallan sachakunatam quykichik. Tukuy chaykunam mikunaykichikpaq kanqa.+ 30 Animalkuna mikunanpaqñataqmi quni tukuy rikchaq qurakunata. Chay qurakunatam mikunqa llapallan purun animalkuna, alton pawaqkuna hinaspa allpapi kawsaq tukuy rikchaq animalkuna”, nispa.+ Hinaptinmi chayna karqa.

31 Chaymantam Diosqa tukuy ima ruwasqanta qawarqa, hinaptinmi chay ruwasqankunaqa suma-sumaq karqa.+ Hinaptinmi tutaykuqmanta paqarinnintin tutaykuqkama karqa suqta kaq punchaw.