1 Corintios

9 ¿Manachu ñuqaqa munasqayta ruwanaypaq libre kani? ¿Manachu ñuqaqa apostol kani? ¿Manachu ñuqaqa señorninchik Jesustapas rikurqani?+ ¿Manachu qamkunaqa señorta servispay yanapasqaykuna kankichik? 2 Hukkunapaq mana apostol kaspaypas chiqaptapunim qamkunapaqqa apostol kani. Qamkunaqa señorpa apostolnin kasqaymantam sello hina kankichik.

3 Defiendekuspaymi juzgawaqniykunata nini: 4 ¿Manachu ñuqaykuqa mikunaykupaq hinaspa tomanaykupaq hukkunamanta chaskiymanku? 5 ¿Manachu wakin apostolkuna hina, señorninchikpa wawqinkuna+ hina chaynataq Pedro*+ hina Diospi iñiq warmiwan casarakuspayku kuska maymanpas riymanku?+ 6 ¿Bernabeywan+ ñuqallachu mantienekunaykupaq llamkapakunayku? 7 ¿Pi soldadotaq kikinpa gastonwan cuartelpi servin? ¿Pitaq uvasta tarpuspan rurunta mana mikunchu?+ Utaq, ¿pitaq animalkunata michispan lechenta mana tomanchu?

8 ¿Runakunapa nisqanman hinachu kaykunataqa nichkaykichik? ¿Manachu Moisespa chaskisqan kamachikuypipas kaykunamantaqa riman? 9 Moisespa chaskisqan kamachikuypim nin: “Iraspaykichikqa* amam toroykichiktaqa sinqachankichikchu”, nispa.+ ¿Kaytaqa tororaykuchu Diosqa nichkarqa? 10 ¿Manachu ñuqanchikrayku chaytaqa nichkan? Arí, ñuqanchikraykumá chayna qillqasqaqa karqa. Yapuqpas hinaspa iraqpas llamkan chay llamkasqanmanta mikunanpaqmi.

11 Sichu ñuqayku Diosmanta kaqkunata tarpuchkaq hina qamkunaman willarqaykiku hinaptinqa, ¿manachu qamkunamanta cosechachkaq hina ima yanapakuytapas chaskinayku?+ 12 Hukkunapas yanapanaykichikpaq mañakusuchkaptikichikqa, ¿manachu ñuqaykuqa aswanraq yanapawanaykichikpaq mañakuymanku? Chayna kaptinpas ñuqaykuqa manam mañakuykikuchu,+ aswanqa tukuy imatam aguantaniku Cristomanta* sumaq willakuyta ama imapas harkananpaq.+ 13 ¿Manachu yachankichik Diospa wasinpi llamkaqkunaqa imapas mikunapaq kaqta mikusqankuta? Hinaspapas, ¿manachu yachankichik altarpi* Diospaq llamkaqkunaqa runakunapa qusqankumanta wakinta mikusqankuta?+ 14 Chaynataqmi señorninchikpas kamachirqa sumaq willakuyta willakuqkuna willakusqankumanta imapas necesitasqanta chaskinankupaq.+

15 Chayna kachkaptinpas manam ñuqaqa imatapas mañakurqaykichikchu.+ Manataqmi ñuqawan chaynata ruwanaykichikta munaspaychu kaykunataqa qillqamuchkaykichik. Ñuqaqa anchatam kusikuni sumaq willakuyta mana imallapaq willakusqaywan, chayraykum wañukuyniy aswan allinqa kanman chayna kusisqa kasqayta pipas qichuruwananmantaqa.+ 16 Sumaq willakuymanta willakusqayqa manam hatunchakunaypaqchu, chaytaqa ruwani ruwanaypuni kaptinmi. ¡Imaynaraq kayman sumaq willakuyta mana willakuspayqa!+ 17 Sichu chayta tukuy sunquywan ruwaspayqa premiotam chaskisaq, kay llamkaytaqa mana munastinpas ruwasaqmi señorninchikmanta chaskisqayrayku.+ 18 Hinaptinqa, ¿imataq chay premioqa? Premioyqa sumaq willakuymanta mana imallapaq willakusqaymi, chaynapi Diosmanta willakusqayrayku imallatapas quwanaykichikpaq mañakunay kaptinpas mana mañakunaypaq.

19 Mana pipa serviqnin kachkaspaypas llapallanpa serviqninmi rikuriruni, atisqayman hina achka runakunata yanapanaypaq. 20 Chayraykum judiokunapaq judio hina kani paykunata yanapanayrayku.+ Kamachikuykunata* kasukuqkunawanmi kamachikuykunata kasukuchkaq hina kani, mana kasukunay kachkaptinpas chaytaqa ruwani kasukuqkunata yanapanaypaqmi.+ 21 Diospa kamachikuyninta chaynataq Cristopa kamachikuyninta kasukuchkaspaypas leyta mana kasukuqkunawan kaspayqa mana kasukuq hinam kani paykunata yanapanaypaq.+ 22 Mana kallpayuqkunawanmi mana kallpayuq hina kani mana kallpayuqkunata yanapanaypaq.+ Tukuytam ruwani tukuy rikchaq runata yanapanaypaq, chaynapi tukuy imata ruwaspa wakillantapas salvanaypaq. 23 Tukuy imataqa ruwani sumaq willakuyraykum, chaynapi llapa runakunaman willakunaypaq.+

24 ¿Manachu yachankichik carrerapi kallpaqkunaqa* llapallanku kallpaspankupas premiota huklla chaskisqanta? Chaynaqa premiota chaskinaykichikpaq hinayá kallpaychik.+ 25 Chaymantapas carrerapi kallpaq runaqa tukuy imapim controlakun. Chaynataqa ruwanku tukuruqlla coronata chaskinankupaqmi,+ ñuqanchikmi ichaqa chaynata kallpanchik mana tukuq coronata chaskinanchikpaq.+ 26 Ñuqaqa kallpachkani manam ñawsa hinachu,+ nitaqmi peleachkanipas wayrata takachkaq hinachu, 27 aswanqa cuerpoytam+ controlani hinaspam sirvienteta hina kamachini, chaynapi hukkunamanpas willakuchkaptiy kikiytapuni Dios mana qipancharuwananpaq.