Apocalipsis

14 Chaymantam rikurqani Sion muqupi+ malta carnero+ sayachkaqta, paywanmi kachkasqa 144.000+ runakuna, paykunapa urkunkupim qillqasqa kasqa malta carneropa sutin hinaspa taytanpa+ sutin. 2 Uyarirqanitaqmi achkallay-achka yakupa qapariyninta hina chaynataq rayopa tuqyasqanta hina hanaq pachamanta qapariytapas, chay uyarisqay qayakuyqa kasqa arpata tocaspanku takiqkunapa takisqanku hinam. 3 Chay 144.000 runakunam takichkasqaku, chay takisqankuqa+ uyarikusqa yaqa musuq taki hinam, takisqakuqa tronopa ñawpaqninpim chaynataq querubin sutiyuq tawa angelkunapawan+ kamachiqkunapa*+ ñawpaqninpim. Chay takitaqa manam pipas yachayta atirqachu, aswanqa 144.000+ runakunallam, paykunaqa kay pachamanta rantisqam kanku. 4 Hinaspapas paykunaqa manam millakuypaq huchataqa ruwarqakuchu, manamá warmikunawanqa haykapipas puñurqakuchu.+ Paykunaqa malta carnerotam maymanña riptinpas qatinku,+ paykunaqa Diospaq hinaspa chay malta carneropaqmi punta rikurimuq ruru+ hina runakunamanta rantisqa kanku.+ 5 Paykunaqa mana llullakuqmi hinaspa mana huchayuqmi kanku.+

6 Rikurqanitaqmi hanaq pachapa chawpinta pawachkaq huk angeltapas, paymi wiñaypaq kaq sumaq willakuyta apachkasqa kay pachapi yachaqkunaman* willakunanpaq. Arí, apachkasqaqa llapallan nacionkunaman, kastakunaman, tukuy rimayniyuqkunaman hinaspa lliw llaqtakunamanmi.+ 7 Paymi kallpawan nirqa: “Juzganan hora chayaramusqanraykuyá Diosta respetaspa hatunchaychik.+ Chaynaqa hanaq pachatapas, kay pachatapas, lamar quchatapas+ hinaspa pukyukunatapas unanchaqtayá yupaychaychik”, nispa.

8 Chaymantapas iskay kaq angeltam rikurqani, paymi kaynata nirqa: “¡Vencerachikunñam, vencerachikunñam+ hatun Babiloniawan sutichasqa llaqtaqa!+ ¡Payqa kay pachapi llapallan nacionkunapi runakunamanmi vinota tomachirqa, chay vinoqa llumpay huchapakuy* munasqanmi!”, nispa.+

9 Rikurqanitaqmi kimsa kaq angeltapas, paymi kallpawan nirqa: “Manchakuypaq animalta+ chaynataq imagenninta yupaychaq hinaspa makinpi utaq urkunpi marcachikuq runaqa+ 10 tomanqataqmi Diospa vinontapas, chay vinoqa Diospa piñakuyninmi,+ chay vinoqa mana imawanpas chaqrusqam hinaspapas Diospa piñakuyninwan huntasqa vasonmanmi tallisqa karqa. Chaymantapas chay marcachikuq runaqa ninawanmi hinaspa azufrewanmi+ ñakarichisqa kanqa chuya angelkunapawan malta carneropa ñawpaqninpi. 11 Ñakarichiqnin ninapa qusninmi wiña-wiñaypaq kanqa,+ manchakuypaq animalta chaynataq rikchayninta yupaychaq hinaspa sutinwan marcachikuq runaqa tuta-punchawmi ñakarichisqa kanqa.+ 12 Diospa runankunaqa+ ñakariykuna aguantaytam yachananku, paykunaqa Diospa kamachikuyninkunatam kasukunku hinaspapas Jesuspi iñisqankuman+ hinam kawsakunku”, nispa.

13 Uyarirqanitaqmi hanaq pachamanta kayna qayakuytapas: “Kaynata qillqay: Señorpa+ qatiqnin wañuqkunaqa kunanmantapacham kusisqa kanqaku. Arí, chuya espirituqa* llamkasqankumanta samanankupaqñam nin, llamkasqankuqa manam qunqasqachu kanqa”, niqta.

14 Chaymantam rikurqani yuraq puyuta, chay puyupim runapa churinman+ rikchakuq tiyachkasqa, payqa kachkasqa qurimanta coronayuqmi, makinpiñataqmi kachkasqa afilasqa rutuna.

15 Diospa wasinmantapas* huk angelmi lluqsiramurqa, hinaspam puyupi tiyaqta kallpawan qayaspan nirqa: “Rutunaykiwanyá rutuyña, ñam cosechanapaq horaqa chayaramunña, kay pachapi cosechaqa puqusqañam kachkan”, nispa.+ 16 Hinaptinmi puyupa hawanpi tiyaqñataq rutunanta kay pachaman haywariykamurqa, chaymi kay pachapi cosechaqa cosechasqaña karqa.

17 Hanaq pacha Diospa wasinmantaqa huk angelpas lluqsiramurqam, paypas kachkasqa afilasqa rutunayuqmi.

18 Altarmantapas huk angeltaqmi lluqsiramurqa, payqa atiyniyuq kasqanraykum ninawanqa munasqanta ruwasqa. Paymi kallpawan qayakuspan afilasqa rutunayuqta nirqa: “Afilasqa rutunaykiwanyá kay pachapi uvasta cosechay, ñam uvasqa puqusqaña kachkan”, nispa.+ 19 Hinaptinmi chay angelqa rutunanta kay pachaman haywariykamuspan uvasta cosecharqa, hinaspam wischuykurqa uvas saruna pozoman, chay pozoqa Diospa piñakuyninmi.+ 20 Chay uvasqa llaqtapa hawa lawninpim caballokunapa sarusqan karqa, hinaptinmi chay pozomantaqa yawar lluqsiramurqa caballokunapa hakimanman haypanankama, chay yawarqa yaqa 300 kilometrokamam* mastarikurqa.