Agradecekuq kaymanta

DOCTORKUNAPA IMA NISQANKU.

Huk qillqam nin: “Agradecekuq kayninchikmi yanapawanchik kusisqa kawsakunapaq. Chaymantapas agradecekuq runakunaqa hawkallam tarikunku, manam anchachu unqunku, sasachakuykunatapas hawkallam atipanku hinaspapas allin amistadkunatam armanku”, nispa (Harvard Mental Health Letter).

¿IMATAM BIBLIA NIN?

Bibliam kallpanchawanchik agradecekuq kanapaq. Apostol Pablom nirqa: ‘Agradecekuqtaqyá kaychik’, nispa. Payqa sapa kutim pipas Diosmanta willakusqanta uyariykuptinqa Diosman graciasta quq (Colosenses 3:15; 1 Tesalonicenses 2:13). Chiqaptapuni kusisqa kawsakuyta munaspaqa manam simillanchikwanchu agradecekunanchik, aswanqa ruwasqanchikwanmi qawachinanchik. Chayna kayninchikmi yanapawasun mana hatun tukuq kanapaq, mana kikillanchikpaq munaq kanapaq, mana sientekunanchikpaq, aswanmi yanapawasun runamasinchikwan hawkalla kawsakunapaq.

Unanchawaqninchik Diospas servisqanchikmantam agradecekuwanchik runakunalla kachkaptinchikpas. Chaytam Hebreos 6:10 nin: “Diosqa manam mana allin ruwaqchu llamkasqaykichikta hinaspa sutin kuyasqaykichikrayku runankunata servisqaykichikta qunqarunanpaqqa”, nispa. Arí, Jehova Diospaqqa mana agradecekuq kayqa mana allin ruwaymi.

“Tukuy tiempoyá kusikuychik. Tukuy imamantayá Diosman graciasta quychik” (1 Tesalonicenses 5:16, 18).

RUNAKUNAPA NISQANKU.

Pitapas imapipas yanapaykuwasqanchikmanta utaq sumaq rimaykunawan kallpanchaykuwasqanchikmanta sunqumanta agradecekuptinchikqa kusisqa hinaspa kuyasqam sientekunku. Mana riqsisqanchik runakunapas agradecekuptinchikqa kusisqam sientekunku.

¿IMATAM BIBLIA NIN?

Jesusmi nirqa: “Quychikyá, hinaptinqa runakunapas qusunkichikmi. Achka-achkatam millqaynikichikman talliykusunkichik”, nispa (Lucas 6:38). Vanuatu nacionpi Rose sutiyuq warmachata imayna yanapasqankumanta yachasun.

Chay warmachaqa Jehova Diospa testigonkunapa huñunakuyninkumanmi riq, ichaqa manam anchachu uyarisqankunataqa yachaq uyariyta hinaspa rimayta mana atisqanrayku. Ichaqa huk punchawmi señas rimayta yachaq casarasqa testigokuna chay warmachapa kasqanman chayarurqaku. Hinaspankum chay rimayta iñiqmasinkunaman yachachirqaku warmachawan rimanankupaq. Rose warmachaqa sunqumanta agradecekuspanmi nirqa: “Ancha kusisqam kachkani, amistadniykunam llumpayta kuyawan”, nispa. Chay warmacha kusisqa hinaspa agradecekuq kasqanta qawasqankuraykum yanapaqnin testigokunaqa ancha kusisqa tarikunku. Roseqa anchatam chaninchan pipas paywan rimananpaq kallpanchakuptinqa (Hechos 20:35).

‘Pipas graciasta quwaqniyqa yupaychawanmi’ (Salmo 50:23).

¿IMATAM BIBLIA NIN?

Imapipas piensasqanchikman hinam kusisqapas utaq llakisqapas tarikunchik. Davidmi Diosta kaynata mañakurqa: ‘Atiynikiwan ruwasqaykikunapim piensani’, nispa (Salmo 143:5). Davidqa tukuy tiempom yuyaymanaq Jehova Diospa ruwasqankunapi. Chayna kasqanmi yanaparqa agradecekuq runa kananpaq (Salmo 71:5, 17).

Bibliam kallpanchawanchik ‘imapas chiqap kaqkunapi, ancha allin kaqkunapi, imapas allin ruway kaqkunapi hinaspa chuya kaqkunapi hinalla piensananchikpaq’ (Filipenses 4:8). Hinalla piensanapaq kallpanchawaspanchikqa niwachkanchikmi agradecekuq kanapaqqa puntata yuyaymanananchikmanta. Chaynata ruwaspaqa agradecekuq runam kasun.

“Entiendena kaqtam yuyaymanasaq” (Salmo 49:3).