Diospa churinqa runakunapa achkin hinam

Ramada fiestapa tukusqan punchawpim Jesusqa Diospa wasinpi ‘qullqi churananku lawpiña’ Diosmanta yachachirqa (Juan 8:20; Lucas 21:1). Yaqachusmi chayqa karqa warmikunapa pation lawpi.

Chay lawpim fiesta punchawkunaqa achki ratachinankuta tutan allinsuta ratachiqku karukama achkinanpaq. Chay achki ratachinankuqa tawam karqa sapakama aceite tazonniyuqkama. Chaypim Jesusqa nirqa: “Ñuqam kani llapa runakunapa achkiynin. Qatiwaqniyqa manapunim tutayaypiqa purinqachu, aswanmi payqa kawsay qukuq achkiyniyuq kanqa”, nispa (Juan 8:12). Chaywanqa yaqachá runakunaqa achki imayna ratasqanpipas yuyaymanarqaku.

Fariseokunañataqmi Jesuspa contranpi nirqaku: “Qamqa kikillaykimantam willakunki, willakusqaykiqa manam chiqapchu”, nispa. Jesusñataqmi nirqa: “Ñuqallamanta willakuptiypas ñuqapa willakusqayqa chiqapmi, ñuqaqariki yachanim maymanta hamusqayta hinaspa mayman risqaytapas, qamkunam ichaqa mana yachankichikchu maymanta hamusqayta nitaq mayman risqaytapas”, nispa. Hinaspam nirqaraq: “Chaskisqaykichik Moisespa leyninpipas qillqasqam kachkan: ‘Iskay testigopa willakusqanmi chiqapqa’, niq. Ñuqam kani kikiymanta testigakuq, kachamuwaqniy hanaq pacha taytapas ñuqamantataqmi testigakun”, nispa (Juan 8:13-18).

Fariseokunañataqmi Jesuspa chayna nisqantapas mana kasuspanku nirqakuraq: “¿Maypitaq kachkan taytaykiqa?”, nispa. Jesusñataqmi nirqa: “Qamkunaqa manam riqsiwankichikchu, manataqmi taytaytapas riqsinkichikchu. Riqsiwaspaykichikqa riqsiwaqchiktaqmi taytaytapas”, nispa (Juan 8:19). Fariseokunaqa Jesusta presocharuyta munaspapas manam atirqakuchu.

Chaymantam Jesusqa yapamanta kaynata nirqa: “Ñuqam pasakusaq hinaptinmi qamkunaqa maskawankichik, ichaqa huchaykichikpim wañunkichik. Maymi risqaymanqa manam qamkunaqa riyta atiwaqchikchu”, nispa. Judio runakunañataqmi Jesuspa ima niy munasqanta mana yachaspa nirqaku: “Manachá payqa wañurachikunqachu, ¿aw? Payqariki nichkan: ‘Maymi risqaymanqa manam qamkunaqa hamuyta atiwaqchikchu’, nispam. Chay runakunaqa manam hanaq pachamanta Jesus hamusqantaqa yacharqakuchu. Chaymi Jesus nirqa: “Qamkunaqa kankichik kay pachamanta kaqkunam, ñuqañataqmi kani hanaq pachamanta. Qamkunaqa kankichik runakunamantam, ñuqam ichaqa mana runakunamantachu kani”, nispa (Juan 8:21-23).

Chaynatam Jesusqa hanaq pachapi kasqanmanta hinaspa Diospa kachamusqan kasqanmanta willakurqa. Religionkunapi punta apaqkunam ichaqa mana chayna kasqanpaqchu hapiqku, aswanqa mana kaqpaqpas hapispam nirqaku: “¿Qamqa pitaq kanki?”, nispa (Juan 8:25).

Hinaptinmi Jesusqa chiqnisqankurayku nirqa: “¿Imapaqñataq rimayllapas-rimapayaykichik?”, nispa. Hinaspam payta imanasqa uyarinankumanta rimaspan nirqa: “Kachamuwaqniyqa chiqap rimaqmi, paymanta uyarisqay kaqkunatam llapa runakunaman willakuni”, nispa (Juan 8:25, 26).

Hinaspapas taytanpi ancha hapipakusqantam qawachirqa kaynata nispan: “Maypacham runapa churinta warkuruspaykichikmi yachankichik suyasqaykichik kaq runaqa ñuqa kasqayta, yachankichiktaqmi kikillaymanta mana imatapas ruwasqayta, aswanqa taytaypa yachachiwasqanman hina kaykuna rimasqayta. Kachamuwaqniyqa ñuqawanmi kachkan, manam sapallaytachu saqiruwan munasqan kaqkunata ruwasqayrayku”, nispa (Juan 8:28, 29).

Chaymantam paymanta mana iskayrayaq judiokunata nirqa: “Rimasqaykunata hinalla kasukuspaykichikqa chiqaptapunim qatiqniykuna kankichik, hinaspam chiqapmanta yachankichik hinaptinmi chay chiqap yachasqaykichik librasunkichik”, nispa (Juan 8:31, 32).

Libre kanankumanta nisqanwanmi wakin judiokunaqa llumpayta hukmanyaspa nirqaku: “Ñuqaykuqa kaniku Abrahanpa mirayninmi, manam haykapipas ñuqaykuqa pipa sirvientenpas karqanikuchu, ¿imaynanpimá qamqa ninki ‘librem kankichik’ nispaqa?”, nispa. Judio runakunaqa huk law nacionkunapa sirvientenmi wakinpiqa karqaku, ichaqa manam riqsikuqkuchu. Chaywanpas Jesusqa nirqam: “Chiqaptapunim nikichik: Pipas hucha ruwaqqa huchapa sirvientenmi”, nispa (Juan 8:33, 34).

Huchapa sirvienten kasqankuta mana riqsikuspankum judiokunaqa aswanraq huchallikuchkarqaku. Chaymi Jesus nirqa: “Chaymantapas sirvienteqa manam wiñaypaqchu wasipiqa qipan, churim ichaqa wiñaypaq qipakun”, nispa (Juan 8:35). Pi sirvientepas manam churi hinachu ima herenciatapas chaskin, aswanqa patronpa munasqan punchawmi qarqurachikun. Churim ichaqa ‘wiñaypaq’ utaq wañukunan punchawkama wasipi qipakun.

Chaynaqa, Jesusmanta imam kaqta yachaymi wañuymantawan huchamantaqa pitapas ‘wiñaypaq’ libran. Chaymi Jesusqa tukunanpaq nirqa: ‘Diospa churin librasuptikichikqa chiqaptapunim libre kankichik’, nispa (Juan 8:36).