Imanasqataq Diosta manchakuna runakunamantaqa

HUK mozom admirasqallaña kachkarqa Jehová Diospa testigonkunawan parlasqanpi sumaq yachachikuykunata entiendesqanrayku. Unay watañam payqa tapukurqa mana allinkunata imanasqa Dios saqesqanmanta, hinaptinmi Jehová Diospa Testigonkuna Bibliawan yachaykachirqa. Manam haykapipas piensarqachu Bibliapi chayna yachachikuy kasqanmantaqa.

Chay Testigokuna pasakuptinkum wasiyoqqa mozopa cuartonman piñasqallaña yaykuruspan tapurqa: “¿Pikunataq chay iskay runakunaqa karqa?”, nispa.

Mozoñataqmi manchakuspan ima niytapas atirqachu.

Piñasqallañam nirqa: “¡Yachanipunim pikuna kasqanta, huktawan hamurullachunku hinaptinqa wasiymantam lloqsinki!”, nispa.

Hinaspanmi punkuta chamqaspa lloqsirurqa.

Cheqap cristianokunaqa cheqnisqa kanankutam yachanku

Manam kay mozollatachu kaynaqa pasan, Bibliaqa ninmi: ‘Cristo Jesuspa agradonpaq kawsakuy munaqqa Cristoraykum ñakarichisqa kanqa’, nispa (2 Timoteo 3:12). Arí, cheqap cristianokunaqa manam haykapipas allin qawasqachu karqaku. ¿Imanasqa? Apostol Juanpa nisqanman hinaqa, ‘kay pachapi mana allin kaqkunaqa Diablopa makinpim’ kachkan. Bibliaqa nintaqmi ‘Diabloqa yarqasqa leon hina muyuriqnikichikpi’ purisqanta, chaynapi “pitapas millpurunanpaq” (1 Juan 5:19; 1 Pedro 5:8). Hinaptinqa, ¿imaynatam chayta ruranman? Payqa runakuna manchakuyninchiktam servichikunman.

Chayraykum cristianokunaqa cheqnisqa kanku. Señorninchik Jesucristopas mana huchayoq hinaspa allinkunata rurachkaspanpas kamisqa chaynataq cheqnisqam karqa. Paymi wañukunan tuta nirqa, “yanqamantam cheqniwarqaku”, nispa (Juan 15:25). Qatiqninkunamanpas nirqam: ‘Runakuna cheqnisuptikichikqa yuyariychikyá qamkunamantapas puntataqa ñoqata cheqniwasqankuta. Yuyariychikyá nisqaykunata. Sirvienteqa manam aswan munayniyoqchu patronninmantaqa. Ñoqatam qatikachawarqaku, chaynaqa qamkunatapas qatikachasunkichikmi’, nispa (Juan 15:18, 20).

Chayta manchakuspankum wakinkunaqa mana reqsichikuyta munarqakuchu. Bibliaqa willawanchiktaqmi wakiqninkuna ‘judiokunata manchakuspanku’ Jesusmanta mana rimasqankuta (Juan 7:13; 12:42). Chay tiempopi kamachikuq judiokunam Jesuspi iñiqkunata huñunakunanku wasimanta qarqonankupaq manchachirqaku. Qawasqanchikman hinam achka runakuna Jesusta mana qatirqakuchu runakunata manchakusqankurayku (Hechos 5:13).

Tiempopa risqanman hinam Jerusalenpi “iñiqkunata ñakarichinankupaq qatikachayta qallaykurqaku” (Hechos 8:1). Arí Roma lawpi cristianokunaqa imamantapas cheqnisqan karqaku. Chay llaqtapim apostol Pablota reqsisqa Judiokuna nirqaku: ‘Ñoqaykupas yachanikum iñiqkunapa contranpi tukuy hinastinpi rimasqankuta’, nispa (Hechos 28:22). Hinaptinqa cheqap cristianokunaqa maypipas cheqnisqam karqaku.

Kunan tiempopipas, Satanasqa hinallam Cristiano kay munaqkunata hukmanyachinanpaq runa manchakuyta servichikuchkan. Chayraykum Jehová Diospa testigonkunawan estudiaq achka runakuna, cheqnisqa kanku llamkaqmasinkunawan, estudiaqmasinkunawan hinaspa vecinonkunawanpas. Ichapas manchakunku mana allin qawasqa kayta, manaña amistadniyoq kayta otaq manaña yanapakuy chaskinantapas. Chakrapi kaqkunañataqmi manchakunmanku vecinonkuna manaña animalninku cuidaypi, chakra llamkaypipas yanapanankuta. Chayna kaptinpas millonninpi runakunam Jehová Diospi confiakunku hinaspam Jesucristo hina kamachikuyninkunatapas kasukunku, chayraykum Jehová Dios paykunata yanapan.

Diostayá manchakusun, ama runatachu

Bibliaqa niwanchikmi Diosta manchakunapaq otaq respetanapaq, manam runakunatachu. Chaymi niwanchik ‘yachayniyoq kanapaqqa Tayta Diosta respetanamanta’ otaq manchakunamanta (Salmo 111:10). Chaynaqa, ¿ima ninantaq Diosta manchakuyqa? Manam rimachkanchu katkatataspa manchakuymantachu, aswanqa kuyaspanchik mana piñachinapaq respetaymantam. ¿Imanasqataq Diosta manchakunanchik, mana runatachu? Qawasuchikyá 5 razonkunata.

 1 Jehová Diosllam tukuy atiyniyoq. Diosllam pi runamantapas tukuy atiyniyoq. “Paypaqqa nacionkunaqa puyñupi puchuruq sutuy yaku hinallam” (Isaias 40:15). Tukuy atiyniyoq Diosninchikqa librawachwanmi contranchikpi churakuqkunamantaqa (Isaias 54:17). Chaymantapas paymi ninqa pikuna wiñay kawsayta chaskinanmanta. Chaymi paypa serviqnin kananchik. ¿Imaynatam chayta rurachwan? Paymanta yachaspanchik hinaspa mana manchakuspa munayninta ruraspanchik (Apocalipsis 14:6, 7).

 2 Diosqa yanapawanchikmi hinaspapas amparawanchikmi. Proverbios 29:25 versiculom nin: “Kikinpaq toqlla churachkaq hinam runamasin manchakuq runaqa. Tayta Diospi confiakuqñataqmi paypa amparasqan kanqa”, nispa. ¿Imanasqataq runa manchakuyqa toqlla hina kanman? Runata manchakuspaqa Jehová Dios serviyninchiktam saqeruchwan. Diosmi kaynata niwanchik: “Amayá manchakuychikchu. Ñoqam qamkunawan kachkani. Amayá hukmanyaychikchu. Ñoqam Diosnikichik kani. Kallpanchaspaymi yanapasqaykichik. Churinta alleq makinwan hapichkaq runa hinam allinta ruraspa atiyniywan pusasqaykichik”, nispa (Isaias 41:10).

 3 Diosqa kuyanmi payman asuykuqkunataqa. Apostol Pablom kusikunapaq hina kaynata nirqa: ‘Yachanim wañuypas, kawsaypas manam imapas Diospa kuyakuyninmantaqa rakiwachwanchu nitaq angelkunapas nitaq munaychakuqkunapas [. . .], manam rakiwachwanchu paypa kuyawasqanchikmantaqa. Chaytam reqsichiwarqanchik Señorninchik Jesucristowan’, nispa (Romanos 8:37-39). Tukuy unanchaq Jehová Diospi confiaspa kasukuptinchikqa, payqa kuyawasunchikmi.

 4 Diospa tukuy rurasqankunata chaninchasun. Jehová Diosmi vida qowaqninchikqa. Qowarqanchiktaqmi sumaqllataña kawsanapaq tukuy ima necesitasqanchiktapas. Chaymantapas Bibliapa niwasqanchikman hinam ‘llapa ima allin kaqkunaqa’ Diosmanta hamun (Santiago 1:17). Davidmi Diospa kuyakuyninta chaninchaspan kaynata nirqa: “Yupaychasqay Dios Taytalláy, achka-achkallañam milagrokunapas rurallasqaykiqa. [. . .]. Manam pipas yupaytaqa atinmanchu rurasqaykitaqa. Manach willaytapas atiymanchu rurallasqaykimantaqa”, nispa (Salmo 40:5).

 5 Imayna kawsasqanchikqa hukkunatam yanapanman. Diosta respetaspa, kuyaspa chaynataq contranchikpi kaqkunata mana manchakuspaqa hukkunatam yanapasun. Jesuspa ayllunkunapi piensarisun. Qallariypiqa wakin familiankunaqa manam paypiqa iñirqakuchu, aswanmi nirqaku “locoyarunmi” nispanku (Marcos 3:21; Juan 7:5). Wañukuspan kawsarimusqan qepatam ichaqa wakiqninku paypi iñirqaku. Paykunamantam karqaku Judaswan Santiago, mamallanmanta kaq wawqenkuna, paykunapas Bibliatam qellqarqaku. ¿Ima nichwantaq Saulomantapas? Payqa cristianokunata qatikachaq runam karqa, hinaspam tiempopa risqanman hina apostol Pabloña karqa. ¿Imatam paykunamanta yachachwan? Ñoqanchikpas iñiyninchikpi qaqa hina sayaptinchikqa, wakiqnin cheqniwaqninchik runakunachá cheqappi kasqanchikta reqsikunqaku (1 Timoteo 1:13).

Kay tiemponchikpi chayna pasakusqanmanta qawasunchik. África lawmanta Aberash sutiyoq warmim unayña Diosta mañakurqa yachachikuyninta tarinanpaq. Jehová Diospa testigonkunawan Biblia estudiayta qallaykuptinmi wakin familiankuna chaynataq llaqtanpi kaq religionpi kaqkunapas cheqniyta qallaykurqaku. Chaywanmi wakin familiankuna mancharikuspa Biblia estudiasqankuta saqerurqaku. Chayna kaptinpas Jehová Dios kallpata qonanpaqmi mañakurqa chaymi tiempopa risqanman hina bautizakururqa. Chayna kallpanchakusqanwanmi pusaq runakuna familianmanta Bibliata estudiachkanku hinaspam iñiyninkupi ñawparichkanku.

Imaynatam atipachwan runakuna manchakuyta

Runakunata mana manchakunapaqqa Dios kuyayninchiktam kallpanchananchik. ¿Imaynatam rurachwan? Bibliata estudiaspanchik hinaspa yachachikuyninkunapi yuyaymanaspa. Ejemplopaq, yuyaymanachwanmi Hebreos 13:6 nisqanpi, chaypim nin: “[Jehová Diosmi] ñoqapa yanapawaqniyqa manam manchakusaqchu. Runapa imapas rurawanantaqa manam manchakusaqchu”, nispa. Amayá qonqasunchikchu Jehová Diosta manchakunapaq kay pichqa razonkunata chaynapi runata mana manchakunapaq.

Chaymantapas, amataq qonqasunchu Bibliapa nisqankunata kasukuyqa allinninchikpaq kasqanta. ¿Imakunataq chayqa? Vidanchikpi tapukuyninchikkunapa kutichiyninkunatam tarinchik. Chaymantapas sapa punchaw yanapawananchikpaq consejokunatam tarinchik. Kantaqmi hamuq tiempopaq sumaq suyakuyninchikpas, chaymi yanapawanchik ima sasachakuytapas aguantanapaq. Chaymantapas tukuy atiyniyoq Diosninchiktaqa imay horapas mañakuchwanmi.

Apostol Juanmi kaynata qellqarqa: “Kay pachapi mana allin ruraykunawan mana allin munaykunaqa tukuruqllam, Diospa munasqanman hina ruraqmi ichaqa wiñaypaq takyanqa”, nispa (1 Juan 2:17). Chaynaqa amayá runakunataqa manchakusunchu, aswanqa Dios respetayninchiktayá kallpanchasun. Llapallanchikmi atichwan Jehová Diospa kayna niwasqanchik kasukuyta: “Churilláy yachayniyoq kaspayá kusiriykachiy sonqoyta. Chayna kaptikiqa contestasaqmi insultaqniy runata” (Proverbios 27:11).

Amayá haykapipas qonqasunchu Jehová Diospa kayna prometewasqanchikta: “Diospa qayllanpi humillakuspa respetaqnin runaqa kapuqniyoqmi kanqa. Reqsisqa kaspataqmi unaypaq kawsakunqa” (Proverbios 22:4). Manamá pipas chaynataqa qowanchikmanchu.

[17 kaq paginapi dibujo]

Aberash paninchikpa kallpanchakusqanwanmi 8 familiankuna Bibliata estudiachkanku