Libre Diosninchikta servisun

“Diosta kuyaspanchikqa kamachikuyninkunatapas kasukunchikmi, kamachikuyninkunaqa manam llumpay sasachu” (1 JUAN 5:3).

¿IMATAM NIWAQ?

Diospa kamachikuyninkunamanta, ¿imayna piensananchiktam Satanasqa munan?

¿Imanasqam allinta tanteananchik amistadninchikkunata akllanapaq?

¿Imataq yanapawasun hinalla Jehová Diosman sonqo kanapaq?

 1. ¿Imatam Jehová Diosqa mana ruranchu libre kaspanpas, hinaspa imayna kanankupaqmi Adanmanwan Evaman saqerqa?

JEHOVÁ DIOSLLAM pimantapas libre tarikun. Ichaqa manamá serviqninkunapa tukuy ima rurasqankutaqa controlanchu. Aswanmi saqen kikinku imatapas tanteanankupaq hinaspa allinninkupaq kaqta akllanankupaqpas. Rimasun Adanmantawan Evamanta. Paykunamanqa huk kamachikuyllatam Diosqa qorqa, chayqa karqa “allin kaqta hinaspa mana allin kaqta yachanapaq sachapa” rurunta mana mikunankupaq kamachikuymi (Gen. 2:17). Chayta kasukuspankum Diospa munayninta ruraspa libre kawsakunmanku karqa.

 2. ¿Imaynatam Adanwan Evaqa chinkarachirqaku libre kasqankutaqa?

² ¿Imanasqataq Jehová Diosqa Adantawan Evata libre kanankupaq saqerqa? Kikinman rikchakuqta hinaspa concienciayoqta unanchasqanraykum. Payqa munarqamá Dios kuyayninku vidankupi yanapananta (Gen. 1:27; Rom. 2:15). Ichaqa chayna libre kasqankuta chaninchaspa agradecekunankumantaqa, Satanastam kasukurqaku hinaspam kikillankumantaña allin kaqta otaq mana allin kaqta tanteanankupaq akllakururqaku. Chaynata ruraspankum piensarqaku aswan libre kasqankuta, ichaqa manam chaynachu karqa. Aswanmi paykunaqa huchapa munaychakusqan rikuriruspanku wañuypi tukururqaku, chaynallataqmi mirayninkunapas (Rom. 5:12).

3, 4. ¿Diospa kamachikuyninkunamanta imayna piensananchiktam Satanasqa munan?

³ Mana huchayoq Adantawan Evata hinaspa wakin angelkunatapas Satanas pantarachispanqa, ¿manachu ñoqanchiktapas pantarachiwachwan? Satanasqa munanmi Diospa kamachikuyninkuna llumpay sasa kasukunapaq kasqanta piensananchikta (1 Juan 5:3). Chayna piensayta qallaykuspaqa mana allin ruraykunapim tukuruchwan. 24 watanpi kaq huk paninchikmi huchapakurusqanmanta kaynata willakun: “Mana allin amistadniykuna hina kayta munasqayraykum, mana allinkuna rurayta qallaykurqani”, nispa. Yaqa llapanchikmá haykallapipas amistadninchikkunawan hikutasqa karqanchik.

⁴ Wakinpiqa mana allin amistadkunaqa kanmanmi congregacionpipas. Mozollaraq huk iñiqmasinchikmi nin: “Wakin amistadniykunaqa mana Testigo kaqkunawanmi hukllawakuqku. Tiempopa risqanman hinam musyakururqani, astawan paykunawan lloqsispay paykuna hina kasqaymanta. Iñiyniypipas chiriyarurqanim, manañam huñunakuykunaman riytapas munarqaniñachu hinaspapas qellapakuspaymi predicaymanpas lloqsiq kani. Chayraykum tantearurqani chay amistadniykunawan manaña hukllawakunaypaq, hinaspam chayman hina rurarqani”, nispa. Qawasqanchikman hinaqa, mana allin amistadkunaqa mana allin ruraykunamanmi pusaruwachwan. Qatiqninpim Bibliapa willakusqanman hina chayna kasqanmanta qawasun (Rom. 15:4).

‘ISRAEL RUNAKUNAPA SONQONTAM’ SUWARURQA

5, 6. a) ¿Imaynatam Absalonqa Israel runakunata pantarachirqa? b) ¿Allinpichu Absalonpa chayna rurasqanqa tukurqa?

⁵ Bibliaqa willakunmi mana allin amistadkunamanta. Huk kaqninmi karqa rey Davidpa churin Absalon. Payqa sumaq rikchayniyoqmi karqa. Ichaqa Satanas hinam, tukuy imayoq kayta munapayaspan taytanpa kamachikuynintapas qechuruyta munarqa.a Chaypaqmi sacrellawanña qawachirqa taytanmantaqa Israel runakunapi pay interesakusqanta. Eden huertapi Diablopa rurasqanman hinam Absalonpas allin runa tukuspan taytanpa contranpi llullakunata rimarqa (2 Sam. 15:1-5).

⁶ ¿Allinpichu chayna rurasqan tukurqa? Wakinpiqa yaqamá chayna karqa, chaymi Bibliaqa nin ‘Israel runakunapa sonqonta Absalon suwasqanmanta’ (2 Sam. 15:6). Ichaqa chayna hatunchakuspan rurasqanqa mana allinpim tukururqa, paywan lliw qatiqninkunam wañuchisqa karqaku (2 Sam. 18:7, 14-17).

 7. ¿Imatam Absalonmanta yachachwan? (Qaway 14 paginapa dibujonta.)

⁷ ¿Imaynatam Israel runakunaqa Absalonwan chaylla engañarachikurqaku? Ichapas allinninkupaq rikchakurqa Absalonpa tukuy nisqankuna otaq allin rikchayniyoq kasqanwan apachikurqaku. Imayna kaptinpas, paykunaqa manam Jehová Diosmanqa sonqochu karqaku nitaq churasqan rey Davidmanpas. Kunanpas Satanasqa Absalon hina runakunatam hinalla servichikuchkan Diospa serviqninkunata pantarachinanpaq. Chaymi wakinkuqa ninku: “Diospa kamachisqankunaqa sasa kasukuymi”, “Diosta mana serviqkunaqa aswan allinmi tarikunku”, nispa. Hinaptinqa, ¿hinallachu Diosman sonqo kasun chayna llulla rimaykunata uyarispaqa? ¿Segurochu kachkanchik Diospa ‘alli-allin leynin’ otaq Cristopa leynillan cheqaptapuni libre tarichiwananchikmanta? (Sant. 1:25.) Cristopa leyninta chaninchasqanchiktayá qawachisun, hinaspapas libre kasqanchikraykuqa amayá mana allinkunataqa rurasunchu (leey 1 Pedro 2:16).

 8. ¿Ima willakuykunam qawachin Diosta mana kasukuyqa llakipi tarichiwasqanchikmanta?

⁸ Satanasqa astawanmi mozo-sipaskunata pantarachiyta munan. 30 watanpiña kaq huk cristianom nin: “Mozollaraq kasqaypim piensarqani Diospa kamachikuyninkuna mana yanapawasqanmanta, aswanmi piensarqani libre kanaypaq mana saqewasqanta”, nispa. Chaynata piensasqanraykum huchapakuyman wichiykurqa. ¿Aswan kusisqachu chay rurasqanwan tarikurqa? Manamá. Paymi nin: “Chay rurasqaymantam watantin llumpayta ñakakurqani, concienciaypas manam saqewarqachu”, nispa. Huk cristianapas sipasllaraq kasqanmanta yuyarispanmi nin: “Huchapakuruspaqa, llakisqallañam tarikunki. Chunka isqonniyoq watakunaña pasaruptinpas, manam qonqanichu chay mana allin rurasqaytaqa”, nispa. Huk cristianapas ninmi. “Kuyasqaykunata huchallikurusqay llumpayta hukmanyarachiptinmi, qalaypaq tarikurqani. Llumpay llakikunapaqmi Jehová Diosmanta karunchasqa tarikuyqa”, nispa. Mozo-sipas kaspaykiqa, amayá saqekuychu Satanas pantachisunaykitaqa. Manaraq imatapas rurachkaspa piensay imapi tukunanmanta.

 9. a) ¿Ima tapukuykunatam Jehová Diosmantawan kamachikuyninkunamanta rurakuchwan? b) ¿Imanasqam allintapuni Jehová Diosta reqsinanchik?

⁹ Achka mozo-sipaskunam mana allin munaykunaman wichiykuspankuña, musyakunku chay rurasqanku ñakarichikuq kasqanmanta, chayqa ancha llakikunapaqmi (Gal. 6:7, 8). Chaymi sapakama tapukunanchik: “¿Musyakuyta atinichu Satanaspa toqllankuna mayqan kasqanta? ¿Allin amistadniyta hinachu Jehová Diosta qawani? ¿Qawanichu nisqankuna allinniypaq hinaspa cheqap kasqanta? ¿Segurochu kachkani kusisqa kanaypaq imawanpas Jehová Diosqa mana haykapipas harkawananmanta?”, nispa (leey Isaias 48:17, 18). Chay tapukuykunata “arí” nispa kutichinapaqqa, allintapunim Jehová Diosta reqsinanchik. Reqsikunanchiktaqmi kuyawasqanchikrayku tukuy kamachikuyninkunata qowasqanchikta, manam libre kananchikta mana munaspanchu (Sal. 25:14).

MAÑAKUSUN YACHAYTAWAN SONQOMANTA KASUKUYTAPAS

10. ¿Imanasqam mozollaraq kasqanpi Salomonpa rurasqanta qatipakunanchik?

¹⁰ Mozollaraq kachkaspanmi Salomonqa Diosta kaynata mañakurqa: “Ñoqaqa warmaraqmi kani, manam ima ruraytapas yachaniraqchu”, nispa. Hinaspanmi yachaytawan sonqomanta kasukuyta mañakurqa (1 Rey. 3:7-9, 12). Jehová Diosqa uyariykurqamá chay mañakusqantaqa. Ñoqanchiktapas Diosqa uyariwasunmi hayka watayoqña kaptinchikpas. Ichaqa manachá yachaytaqa milagrota hinaqa qowasunchu. Chayna kaptinpas, yachayniyoqmi kasun Bibliata allinta estudiaspaqa, chuya espiritunta mañakuspaqa hinaspa Diospa llaqtanpi tukuy qowasqanchikkunawan yanapachikuspaqa (Sant. 1:5). Arí, Jehová Diosqa kay yanapakuykunatam servichikun mozo-sipas serviqninkuna kay Pachapi “yachayniyoqkunamantawan entiendeqkunamanta” hinaspa mana kasukuqkunamanta aswan yachayniyoq kanankupaq (Luc. 10:21; leey Salmo 119:98-100).

11-13. a) ¿Imakunatam Salmo 26:4, Proverbios 13:20 hinaspa 1 Corintios 15:33 nisqankuna yachachiwanchik? b) ¿Imaynatam chay textokunapa nisqanta vidanchikpi kasukuchwan?

¹¹ Hinaptinqa allintapuni Jehová Diosta reqsinapaqqa, Bibliatam estudiananchik hinaspapas leesqanchikpim yuyaymanananchik. ¿Imaynatam chayta rurachwan? Chaypaq qatiqninpi qawasun amistadkunamanta Bibliapa yachachisqanta. Salmo 26:4 nin: “Llulla rimaq runakunawanqa manam kawsakullarqanichu. Iskay uya runakunawanqa manam kuskanchakurqanichu”, nispa. Proverbios 13:20 nin: “Yachayniyoq runakunawan juntanakuspaykiqa yachayniyoqmi kanki. Sonso runakunawan juntanakuspam ichaqa sasachakuypi kanki”, nispa. Hinaspapas 1 Corintios 15:33 nin: “Mana allin amistadkunaqa urmachinmi allin kawsaqkunatapas”, nispa.

¹² Kay textokunaqa allin yachachikuykunatam qowanchik. Puntataqa, Jehová Diosqa munanmi amistadninchikkunata allinta akllananchikpaq, chaynapi iñiyninchikpi hinaspa yuyayninchikpipas allin kanapaq. Chaymantapas qawachiwanchikmi amistadninchikkuna akllasqanchikqa allinninchikpaq otaq mana allinninchikpaq kananmantapas. Kay textokunapa imayna qellqasqa kasqanqa qawachiwanchiktaqmi, Jehová Dios piensananchikta munasqanta. ¿Imanasqam chaynata ninchik? Kay textokunapiqa Diosqa manam niwanchikchu: “Kaytaqa otaq waktaqa ama ruraychu”, nispaqa. Aswanmi niwanchik rurasqanchikkuna imapi tukunanmanta. Huk rimaypiqa Jehová Diosqa kaynatapas niwachkanchikman hinam: “Kayqa kaynam otaq waknam. Hinaptinqa, ¿imatam ruranki? ¿Imataq sonqoykipi kachkan?”, nispa.

¹³ Chaymantapas, chay textokunapa nisqan cheqap kasqanraykum maypipas hinaspa ima tiempopipas yanapawanchikman. Tapukusun: “¿Imatam rurayman ‘iskay uya runakunawan’ amistadta mana ruranaypaq? ¿Imakunataq aparuwanman paykunawan hukllawakuyta qallaykunaypaq? (Pro. 3:32; 6:12.) ¿Pikunataq kanku amistadta ruranaypaq ‘yachayniyoq runakunaqa’, hinaspa mana hukllawakunaypaq ‘sonso runakunaqa’? (Sal. 111:10; 112:1; Pro. 1:7.) ¿Ima ‘allin kawsakuytam’ chinkarachisaq mana allin amistadkunawan kuskanchakuspayqa? ¿Mana allin amistadkunaqa mana iñiyniyoq runakunallachu kanmanku?”, nispa (2 Ped. 2:1-3). Kay tapukuykunapa kutichiyninpi yuyaymanayqa ancha allinmi kanman.

14. ¿Imaynam aswan allin kanman Familiawan Diosta Yupaychanapaq Tutaqa?

¹⁴ Qawamusqanchik textokunapi yuyaymanasqaykiman hinam, familiaykiwan yachay munasqayki huk textokunata leespapas yuyaymanawaq chaynapi Jehová Diospa piensasqanmanta yachanaykipaq.b Tayta-mamakuna, ¿atiwaqchikchu Familiawan Diosta Yupaychanapaq Tutapi chaykunamanta rimayta? Chaynata ruraspaqa, kallpanchakuyá Diospa lliw niwasqanchikkuna ancha kuyawasqanchikta qawachisqanmanta sapakama entiendenankupaq (Sal. 119:72). Familiaykiwan kaykunapi reparaspa estudiaptikiqa, Jehová Dioswan hinaspa churi-wawaykikunawan amistadnikim aswan allin kanqa.

15. ¿Imaynatam yachachwan yachayniyoq hinaspa sonqomanta kasukuq kasqanchikta?

¹⁵ ¿Imaynatam yachachwan yachayniyoq hinaspa sonqomanta kasukuq kasqanchikta? Chaypaqqa imayna piensasqanchiktam tupachinanchik ñawpaq tiempopi Dios serviqkunapa piensayninkuwan. Qawasun Davidpa ima nisqanta, nirqam: “Diosnilláy, munachkanim munallasqaykiman hina rurallayta. Diosnilláy, sonqollaypim waqaychani qampa yachachisqaykita”, nispa (Sal. 40:8). Salmo 119 nisqanta qellqaqpas kaynatam nirqa: “¡Maynatam yachachikuynikita kuyallani! Chaypim tukuy punchaw yuyaymanani”, nispa (Sal. 119:97). Diospa niwasqanchikkunata chaynata kuyanapaqqa, kallpanchakunanchikmi Bibliata estudianapaq, Diosta mañakunapaq hinaspa yuyaymananapaqpas. Chaymantapas qawananchikmi Diospa kamachikuyninkunata kasukusqanchikrayku kusisqa kawsasqanchikmanta (Sal. 34:8).

KALLPANCHAKUSUN CRISTIANO VIDANCHIKPI LIBRE KANAPAQ

16. ¿Imatam yuyarinanchik cheqaptapuni libre kanapaqqa?

¹⁶ Ñawpaqmantaraqmi, achka nacionkunaqa libre kanankupaq guerrakunata rurarqaku. Ñoqanchikpas kallpanchakunanchikmi mana allin ruraykunamanta librakunanchikpaq. Yuyarisun, manam Satanasllawanchu nitaq kay Pachapi mana allin munaykunallawanchu ñoqanchikqa atipanakunchik, atipanakunchiktaqmi pantaq kasqanchikwan hinaspa engañakuq sonqonchikwanpas (Jer. 17:9; Efe. 2:3). Ichaqa atipachwanmi Diospa yanapakuyninwanqa. Sapa kuti atipaspaqa, puntatam Jehová Diosta kusichisun (Pro. 27:11). Chaymantañataqmi ‘librawaqninchik alli-allin leyta’ kasukusqanchikman hina, kallpanchasqa tarikusun wiñay kawsayman apawaqninchik ñanpi hinalla takyanapaq. Hinaspapas hamuq tiempopim astawanraq libre kasunchik, serviqninkunaman Jehová Diospa prometesqanman hina (Sant. 1:25; Mat. 7:13, 14).

17. ¿Imanasqam imapipas pantaruspaqa mana llumpayta hukmanyanachu, hinaspa ima yanapakuytam Jehová Diosqa qowanchik?

¹⁷ Arí, llapallanchikmi imatapas ruraspa haykapipas pantanchik (Ecl. 7:20). Chaynata pantaspaqa, amayá hukmanyasunchu nitaq piensasunchu mana valesqanchiktaqa. Urmaspanchikqa hatarisunyá, chaypaqqa ancianokunapa yanapakuynintam maskananchik. Santiagom nirqa ancianokuna confiakuspa mañakuptinkuqa, Jehová Dios iñiyninpi onqoqta sanoyachispan sayarichinanmanta, huchapi kaptinpas pampachananmanta (Sant. 5:15). Ama haykapipas qonqasunchu Jehová Dios llakipayakuq kasqanmanta hinaspa sonqonchikpi allinkunata qawaspan llaqtanman pusamuwasqanchikmantapas (leey Salmo 103:8, 9). Chaynaqa, Diosman sonqo kanapaq kallpanchakuptinchikqa payqa manam haykapipas saqewasunchu (1 Cro. 28:9).

18. Jesuspa mañakusqanman hina, ¿imatam rurananchik Jehová Dios waqaychawananchikpaq?

¹⁸ Wañuchisqa kananpaqña kachkaspanmi, Jesucristoqa chunka hukniyoq apostolninkunapaq Taytanta mañakuspan kaynata nirqa: ‘Mañakuykiqa [. . .] Diablomanta waqaychanaykipaqmi’, nispa (Juan 17:15). Kunanpas Jesusqa chayna waqaychasqa kananchiktam munan. Chaymi mana iskayrayananchikchu Jesuspa chay mañakusqanta Taytan uyarispan kay sasallaña tiempopi waqaychawananchikmanta. Bibliam niwanchik: “Payqa mana culpayoq kawsaqkunatam imamantapas harkaykun [. . .]. Diosqa paypi sonqoyoqkunatam waqaychan”, nispa (Pro. 2:7, 8). Diosman sonqo kayqa sasaniraqmá, ichaqa chayna kaspallam wiñay kawsayta haypasun hinaspa imamantapas libre kasunchik (Rom. 8:21). Chaynaqa, ¡amayá imawanpas harkachikusunchu!

[Willakuykuna]

[14 kaq paginapi dibujokuna]

¿Pikunataq kunan tiempopi Absalon hina kanku, hinaspa imaynatam paykunamanta cuidakuchwan?