¿Imayna runataq kanayki?

1, 2. ¿Imayna runataq kananchik Diospa chaskisqan kananchikpaq?

LLAPANCHIKMI munanchik runakunapa qayllanpi allin qawasqa kayta. Chayna kaptinpas, ñoqanchik cristianokunaqa astawanraqmi munananchik Jehova Diospa qayllanpi allin qawasqa otaq chaskisqa kayta. Arí, payqa llapallan kamachiq Diosmi hinaspapas paymantam hamun ‘tukuy kawsakuypas’ (Sal. 36:9).

² Apostol Pedropa nisqanman hinaqa, Jehova Diospa chaskisqan kanapaqqa ‘chuya sonqo’ hinaspa ‘Diosta servispam kawsananchik’ (leey 2 Pedro 3:11). ‘Chuya sonqo’ kasqanchiktam qawachisun kawsayninchikpi, yuyayninchikpi hinaspa Dios yupaychayninchikpipas chuya kaspanchik. Chaymantapas, Jehova Diosta ancha kuyasqanchiktawan respetasqanchiktam qawachisun ‘Diosta servispa kawsaspanchik’. Chaynaqa, Diospa chaskisqan kanapaqqa manam ruwasqallanchikmantachu penden aswanqa imayna kasqanchikmantawanmi. Jehova Diosqa “runakunapa sonqonta” qawasqanraykum allintapuni yachan sichu chuya sonqo kasqanchikta otaq sichu payllata yupaychasqanchikta (1 Cron. 29:17).

 3. ¿Ima tapukuykunatam ruwakunanchik?

³ Diabloqa manam munanchu Jehova Diospa chaskisqan kanapaq kallpanchakunanchiktaqa. Chaymi tukuyta ruwan Dioswan amistadninchikta yanqacharunanpaq. Chaypaqmi tukuy pantachikuykunatawan llullakuykunata servichikun chaynapi Diosmanta karuncharuwananchikpaq (Juan 8:44; 2 Cor. 11:13-15). Chayraykum kaynata tapukunanchik: “¿Imaynatam Satanasqa pantarachiwayta munan? ¿Imaynatam Jehova Dioswan amistadniyta waqaychayman?”, nispa.

 4. ¿Imatam Satanasqa churayta munan sonqonchikpi, hinaspa imanasqa?

⁴ Santiagom kaynata nirqa: “Runaqa kikinpa mana allin munasqankunawan engañachikuspanmi aysachikun tentachikunanpaq”, nispa. Nirqataqmi: “Chayna mana allin munaykunam huchallichin chaymi huchallikusqanrayku wañunan”, nispa (Sant. 1:14, 15). Dioswan amistadninchikta chinkarachinanpaqmi, Satanasqa tukuyta ruwan sonqonchikpi imapas mana allin munaykunata churananpaq.

5, 6. a) ¿Imaynatam Satanasqa sonqonchikpi mana allinkunata churan? b) ¿Ima toqllakunatam Satanasqa servichikun sonqonchikta yanqacharunanpaq, hinaspa hayka tiempoñam chayta servichikun?

⁵ ¿Imaynatam Satanasqa sonqonchikpi mana allinkunata churan? Bibliam nin ‘kay Pachapi mana allin kaqkunaqa Diablopa makinpiña kasqanta’ (1 Juan 5:19). Qawasqanchikman hinaqa, Satanasqa servichikuntaqmi “kay pachapi mana allin kaqkunatapas” (leey 1 Juan 2:15, 16). Diabloqa waranqantin watañam kay Pachapi tukuy imakunata munasqanman hina ruwachkan. Chaymi rikchan-rikchanlla kananchik toqllankunaman mana wichiykunapaq (Juan 17:15).

⁶ Satanasqa tukuy rikchaq toqllakunatam servichikun mana allin munaykunawan sonqonchikta yanqacharunanpaq. Apostol Juanmi riman kimsa toqllankunamanta, chaykunam: 1) ‘aychapa munapayasqankuna’, 2) ‘ñawipa munasqankuna’ hinaspa 3) ‘tukuy imamanta hatunchakuykuna’. Tukuy chay toqllakunatam Diabloqa servichikurqa Jesusta urmachinanpaq. Chay toqllakunata una-unayña servichikusqanraykum kunanqa hichu-hichullaña rikurirun. Chaymi imakunapi pantasqanchikta yachaspan mayqantapas servichikun. Chaynaqa, toqllankunaman mana wichiykunapaq imakuna ruwanamanta manaraq rimachkaspa, puntata qawasun toqllankunata Evawan hinaspa Jesuswan imayna servichikusqanmanta. Qawasuntaqmi sapakama ima ruwasqankumantapas.

 7. ¿Imaynatam Satanasqa ‘aychapa munapayayninkunata’ servichikurqa Evata wichiykachinanpaq?

⁷ Lliw runakunam hinalla kawsananchikpaqqa mikunanchik. Chaymi Unanchawaqninchik Jehova Diosqa kay Pachata unancharqa tukuy rikchaq mikuykuna kananpaq. Satanasmi ichaqa chay mikuy munasqanchikta servichikun Diosmanta karuncharuwananchikpaq. Qawasun Evata pantarachinanpaq chay toqllata imayna servichikusqanmanta (leey Genesis 3:1-6). Diablom Evata nirqa “allin kaqta hinaspa mana allin kaqta yachanapaq” sachapa rurunta mikunanpaq hinaspa mikuruspan manapuni wañunanmantapas (Gen. 2:9). Nirqataqmi chay sachapa rurunta mikuruspanqa kikin Dios hina kananmanta. Chaynata nispanmi Satanasqa nichkarqa Diosta mana kasukuspanpas hinalla kawsananmanta. ¡Mayna hatun llullakuymi chayqa karqa! Chaynaqa, ¿imatam Evaqa ruwayta atinman karqa? Paypaqa makillanpim kachkarqa chayna nisqanta qepancharunanpaq otaq mikuy munasqanwan hinalla intuchikunanpaq. Mikunanpaq wakin sachakuna kachkaptinpas, Evaqa chay sachapa rurunta mikunanpaq Diablopa nisqanpim hinalla piensarqa. Hinaptinmi payqa chay sachapa ‘rurunta pallaruspan mikururqa’. Satanasmi sonqonpi churarurqa Diospa contranpi mana allin munayta.

 8. ¿Imaynatam Satanasqa ‘aychapa munapayayninwan’ Jesusta wichiykachiyta munarqa, hinaspa imanasqam mana wichiykachiyta atirqachu?

⁸ Satanasqa chay toqllallatam servichikurqa Jesustapas wichiykachinanpaq. Payqa chunniqpi tawa chunka punchaw hinaspa tawa chunka tuta mana mikusqa kaspaqa mayna yarqaymantachá kachkarqa, chayta yachaspanmi Diabloqa kaynata nirqa: “Diospa Churin kaspaykiqa kay rumitayá kamachiy tantayarunanpaq”, nispa (Luc. 4:1-3). Jesuspaqa makillanpim kachkarqa rumita tantayarachispan mikunanpaq otaq Diablopa nisqanta qepancharunanpaqpas. Payqa allintam yacharqa munasqallanta tarinanpaq atiyninta mana servichikunanmanta. Yarqaymanta kachkaptinpas, paypaqqa Jehova Dioswan amistadninmi aswan allin karqa. Chaymi Diablota nirqa: “Bibliam nin: ‘Runaqa kawsanqa manam mikuyllawanchu’”, nispa (Luc. 4:4).

 9. ¿Imatam qawachiwanchik ‘ñawipa munapayayninkuna’ niq rimayqa, hinaspa imaynatam Satanasqa chay toqllata servichikurqa Evata wichiykachinanpaq?

⁹ Apostol Juanqa rimarqataqmi Satanaspa huknin toqllanmantapas, chayqa ‘ñawipa munapayayninkunam’. Kaymi qawachiwanchik imatapas qawaspalla munapayaytaña qallaykunamanta. Satanasqa chay toqllata servichikuspanmi Evata kaynata nirqa: ‘Ñawikichikmi kicharikurunqa’, nispa. Chaymi Evaqa sachapa rurunta astawan qawaspan astawan mikuyta munarqa. Arí, ‘munayllapaqña kasqantam’ qawarqa.

10. ¿Imaynatam Satanasqa ‘ñawipa munapayayninkunata’ servichikurqa Jesusta wichiykachinanpaq, ichaqa imatam Jesusqa ruwarqa?

¹⁰ ¿Imaynatam Satanasqa ‘ñawipa munapayayninkunata’ servichikurqa Jesusta wichiykachinanpaq? Kay Pachapi llapallan nacionkunata qawarichispanmi kaynata nirqa: “Ñoqam qosqayki atiyta kay nacionkunata gobiernanaykipaq chaynataq sumaqllaña kaynintapas”, nispa (Luc. 4:5, 6). Chayta munapayaspan wichiykunanpaqmi Satanasqa huk revelacionpi lliw chay nacionkunapa sumaqllaña kayninta qawachirqa. Hinaspanmi nirqa: “Tukuy kaykunaqa qampam kanqa ñawpaqniypi qonqorakuptikiqa”, nispa (Luc. 4:7). Jesusmi ichaqa manapuni ruwarqachu Satanaspa munasqantaqa. Chaymi nirqa: “Bibliam nin: ‘Señor Diosllaykitam adoranki, payllatataqmi servinkipas’”, nispa (Luc. 4:8).

11. ¿Imaynatam Satanasqa Evata wichiykachirqa?

¹¹ Apostol Juanqa nirqataqmi ‘tukuy imamanta hatunchakuypas’ Satanaspa huk kaqnin toqllan kasqanmanta. Kay Pachapi Adanwan Evallaraq kachkaptinkuqa, manam pi runapas karqachu tukuy kapuqninkunata hukkunaman qawachinankupaqqa. Chayna kaptinpas, hatunchakuq kasqankutam qawachirqaku. ¿Imaynata? Evawan Satanas rimaspanqa nichkarqam Jehova Dios allinninpaq kaqta pakasqanta. Satanasqa nirqamá ‘allin kaqta hinaspa mana allin kaqta yachanapaq sachapa’ rurunta mikuspanqa, ‘kikin Dios hinaña allin kaqtapas hinaspa mana allin kaqtapas yachaqña rikurirunanmanta’ (Gen. 2:17; 3:5). Chaynata nispanmi, huk rimaypiqa nichkarqa Diosta qepanchaspan allin kawsakunanmanta. Yaqachá Evataqa hatunchakuynin aparurqa Satanaspa llullakusqanta kasukunanpaq. Mana wañunanta piensaspanmi Evaqa chay ruruta mikururqa. ¡Pasaypaq mana allintam ruwarurqa!

12. ¿Imaynatawanmi Satanasqa Jesusta wichiykachiyta munarqa, ichaqa imatam Jesus nirqa?

¹² Jesusqa manamá Eva hinachu karqa, payqa humilde kasqantam qawachirqa. Satanasqa kaqmantam Jesusta wichiykachiyta munaspan payta nirqa runakunapa admirakunanpaq kaqta ruwananpaq. Jesus chayta ruwaspanqa Diostam pruebaman churanman karqa. Chaymi Jesusqa mana iskayrayaspan nirqa: “Bibliam nin: ‘Amam pruebaman churankichu Señor Diosnikitaqa’”, nispa (leey Lucas 4:9-12).

13, 14. ¿Imaynatam Satanasqa toqllankunata servichikun kunan tiempokunapi?

¹³ Satanasqa Evatawan Jesusta wichiykachinanpaq kaq toqllakunatam kunan tiempopipas servichikun. Arí, payqa ‘aychapa munapayasqankunatam’ servichikun huchapakuyman hinaspa mikuyllamanña otaq tomayllaman qokurunapaq. ‘Ñawipa munapayasqankunatapas’ servichikunmi millakuypaq qalalla kaqkunata Internetpi runakuna qawanankupaq. Chaymantapas, ‘tukuy imamanta hatunchakuytapas’ servichikunmi runakuna aswan allinpaq hapikunankupaq, reqsisqa kanankupaq hinaspa tukuy kapuqniyoq kanankupaqpas.

¹⁴ ‘Kay Pachapi mana allin kaqkunataqa’ tupachichwanmi challwata hapinapaq mikuywan. Challwakunapaq chay mikuy munayllapaqña kaptinpas, chay mikuypa ukunpim kachkan anzuelo. Chaynallataqmi Satanaspas imapas necesitasqanchikta servichikun Diospa contranpi kaqkunata munapayanapaq. Arí, Diospa munaynin ruwanamantaqa, Satanasqa munanmi imapas necesitasqanchikta puntapi churay aswan allin kasqanta piensananchikta. ¿Wichiykusunchu Satanaspa chay toqllanman?

15. ¿Imaynatam Jesuspa allin takyasqan yanapawanchik Satanaspa toqllankunaman mana wichiykunapaq?

¹⁵ Satanaspa toqllanman Eva wichiykuptinpas, Jesusqa allintam takyarqa. Payqa sapa kutim kaynata niq: “Bibliam nin”, nispa. Ñoqanchikpas Bibliata allinta estudiaspaqa yuyarisunmi yachachikuyninkunata chaynapi ima mana allinmanpas mana wichiykunapaq (Sal. 1:1, 2). Chaymantapas, Bibliapa willakusqan Diospa serviqninkunapi piensaypas yanapawasunmi paykunata qatipakunapaq (Rom. 15:4). Allintataqmi waqaychawasun Jehova Dios respetayninchikpas, kuyasqankunata kuyayninchikpas hinaspa cheqnisqankunata cheqniyninchikpas (Sal. 97:10).

16, 17. ¿Imanasqam yuyayninchikta servichikuyqa ancha allin?

¹⁶ Apostol Pablom kallpanchawanchik yuyayninchikta servichikunapaq chaynapi kay Pachapi runakuna hina piensanamantaqa Diospa munasqanman hina piensanapaq (Rom. 12:1 [NM], 2). Piensayninchikta controlayninchik ancha allin kasqanmanta rimaspanmi, Pablo nirqa: “Tuñichichkanchikmi Diospa contranpi piensaykunata chaynataq hatunchakuytapas, ima piensaytapas controlanchikmi Cristotaña kasukunanpaq”, nispa (2 Cor. 10:5, NM). Yaqa llapanpim piensasqanchikqa imayna runa kasqanchikta qawachin, chaymi kallpanchakunanchik allin kaqkunapi piensanapaq (Filip. 4:8).

¹⁷ Chuya sonqo kayta munaspaqa, mana allin piensaykunatawan mana allin munaykunatam qepanchananchik. Jehova Diosqa munanmi chuya sonqowan kuyananchikta (1 Tim. 1:5). Amataq qonqasunchu sonqonchikqa pantachikuqllaña kasqanta. Ichapas mana musyakunchikchu ‘kay Pachapi mana allin kaqkuna’ intuwasqanchikta (Jer. 17:9). Chaymi ancha allin kanman Pablopa kayna niwasqanchikta kasukuyqa: “Sonqoykichikta tapukuykuychik ¿cheqaptachu Cristoman iñichkankichik?”, nisqanta (2 Cor. 13:5.) Chaynaqa, Bibliata estudiaspa tapukusun: “¿Diospa munasqanman hinachu kachkan imapas piensasqaykuna hinaspa munasqaykunapas?”, nispa.

18, 19. ¿Imanasqam kallpanchakunanchik Jehova Diospa chaskisqan runakuna kananchikpaq?

¹⁸ ‘Kay Pachapi mana allin kaqkunata’ qepanchanapaqqa, yanapawasuntaqmi apostol Juanpa kayna nisqanpi yuyaymanayninchik: “Kay pachapi mana allin ruraykunawan mana allin munaykunaqa tukuruqllam, Diospa munasqanman hina ruraqmi ichaqa wiñaypaq takyanqa” (1 Juan 2:17). Satanaspa munaychakusqanpi tukuy kaqkunaqa ichapas rikchakapuwachwan wiñaypaq kananta. Ichaqa manam chaynachu, chinkachisqañamá kanqa. Amayá pantasunchu, kay Pachapi tukuy mana allinkunaqa manam wiñaypaqchu kanqa.

¹⁹ Apostol Pedrom niwanchik Diospa chaskisqan runakuna kananchikpaq hinaspa ‘Diospa punchawnin chayamunanta suyanapaqpas’. ‘Chay punchawpim cielokuna ninawan kañasqa kanqa, tukuy imapas rupaywanmi chullunqa’ (2 Ped. 3:12). Ñam Jehova Diosqa kay Pachapi tukuy mana allinkunata chinkachinqaña. Chay punchaw chayamunankamaqa, Satanasqa hinallam ‘kay Pachapi mana allin kaqkunata’ servichikunqa Evatawan Jesusta hina huchaman aysawananchikpaq. Amayá Eva hinaqa kasunchu, payqa kikinpa munasqallantam maskarqa. Pay hina kaptinchikqa Satanasmi diosninchik hinaña karunman. Aswanqa Jesustayá qatipakusun hinaspa tukuy mana allinkunatayá qepanchasun mayna munayllapaqña kaptinpas. Chaynaqa, kallpanchakusunyá Jehova Diospa chaskisqan runakuna kananchikpaq.