Amayá pantachisunaykichikta saqekuychikchu

1, 2. ¿Imanasqataq kunan tiempopi runakunaqa llullanakuyllapi kachkanku, hinaspa imaynatam chaykunata cheqechinku? (Qaway 6 kaq paginapi dibujota.)

KUNAN tiempopi runakunaqa pantachinakuypi hinaspa llullanakuypim kachkanku. Bibliam sutillata nin kay Pachata kamachiq Diablo chay ruwaykunapi hichu-hichullaña kasqanmanta (1 Tim. 2:14; 1 Juan 5:19). Diospa piñakuynin punchaw astawan hichpamusqanraykum Satanasqa aswan piñasqallaña kachkan, payqa yachanmi “pisi tiempoyoqllaña kasqanta” (Apoc. 12:12). Chayraykum nichwan Satanaswan aysachikuqkunaqa aswan-aswan llulla kasqankuta hinaspa Diospa serviqninkunatapas pantachiy munasqankuta.

² Wakinpim Jehova Diospa testigonkunamanta hinaspa imakunapi iñisqankumanta llullakunata willakunku televisionpi, periodicokunapi chaynataq Internetpipas. Chaymi wakin runakunaqa hukmanyanku, wakinpiqa piñakunkuraqmi chay willakuykunata creespanku.

 3. ¿Imataq yanapawasun pantarachiwananchikta mana saqekunapaq?

³ Satanaspa chay toqllankunaman mana wichiykunapaqmi Diospa Palabran yanapawanchik, chayqa “allinmi [. . .] pantaypi puriptinchikpas allin ñanman kutirichiwananchikpaq” (2 Tim. 3:16). Apostol Pablom Tesalonica llaqtapi cristianokunaman qellqasqanpi qawachirqa wakin cristianokuna yanqa yachachikuykunawan pantachisqa kasqankumanta. Paymi nirqa: “Amayá facillataqa pipas chaqwarusunkichikchu [otaq pantarachisunkichikchu]”, nispa (2 Tes. 2:1, 2). ¿Imakunatam chayna nisqanmanta yachachwan hinaspapas imaynatam yanapawachwan?

 4. a) ¿Imaynam Tesalonica llaqtapi cristianokuna willasqa karqaku Diospa hamunan punchawmanta? b) ¿Imaynam kunanpas willasqaña kanchik?

⁴ Tesalonica llaqtapi cristianokunaman punta kaq cartasqanpim apostol Pablo willakurqa ‘Señorpa [otaq Diospa] hamunan’ punchawmanta. Payqa manam munarqachu paykuna ‘tutayaypi’ kanankutaqa. Chaymi yuyarichirqa “kanchaymanta” kasqankurayku ‘rikchaspalla cuidakunankupaq’ (leey 1 Tesalonicenses 5:1-6). Kunanqa suyachkanchikmi Hatun Babiloniawan sutichasqa lliw pantay religionkuna chinkachisqa kanankuta. Chay pasakuptinmi Diospa piñakuynin punchaw qallaykunqa. Kunanqa aswan allintañam entiendenchik munayninta Dios imayna ruwananmanta. Chaymantapas, Diosqa llaqtanwanmi sapa kuti yuyarichiwanchik rikchan-rikchanlla kanapaq. Chay yuyarichikuykunata kasukuyqa yanapawasunmi ‘allin kaqtapas hinaspa mana allin kaqtapas reqsispa’ Diosta hinalla servinapaq (Heb. 5:14).

5, 6. a) ¿Imamantam Pablo nirqa Tesalonica cristianokunaman iskay kaq cartasqanpi? b) ¿Imatam Dios chayllaña ruwanqa Jesusnintakama? c) ¿Ima tapukuykunatam ruwakunanchik?

⁵ Tesalonica llaqtapi cristianokunaman punta kaq cartanta qellqaruspanmi, Pabloqa paykunaman iskay kaq cartanta qellqarqa. Chaypim nirqa “Dios mana reqsiqkunatawan Señorninchik Jesusmanta allin noticia mana kasukuqkunata” Jesusnintakama Dios juzgaptin ñakariy kananmanta (2 Tes. 1:6-8). Chay cartanpa 2 kaq capitulonmi qawachiwanchik wakin cristianokuna chaqwarusqa otaq pantachisqa kasqankuta, hinaspam piensarqaku Jehova Diospa piñakuynin punchawqa chayllapiña kasqanmanta (leey 2 Tesalonicenses 2:1, 2). Punta cristianokunaqa manamá lliwtachu entienderqaku Diospa munaynin imayna ruwakunanmantaqa. Arí, chayna kasqanta reqsikuspanmi Pablopas kaynata nirqa: “Wakillantam yachanchik, wakillantataqmi Diospa revelasqankunatapas willakunchik. Llapallanta yacharuptinchikqa wakillan yachasqanchikmi chinkarunqaña”, nispa (1 Cor. 13:9, 10). Chaywanpas, chay tiempopi cristianokunaqa allintam iñiyninkupi takyarqaku. ¿Imanasqa? Apostol Pablo, Pedro chaynataq wakin cristianokuna Diospa yanapakuyninwan paykunaman cartakuna qellqasqankuta kasukusqankuraykum.

⁶ Cristianokuna mana pantanankupaqmi hinaspa imayna piensasqankuta cambianankupaqmi, Pablo willakurqa manaraq Diospa piñakuynin chayamuchkaptin pantachikuqkuna rikurimunanmanta, rikurimunantaqmi karqa ‘leyta mana kasukuq runapas’.a Chaymanta qepamanñataqmi Señorninchik Jesucristo lliw pantarachikuqkunata ‘chinkachinan’ karqa. ¿Imanasqataq chinkachisqaqa kananku karqa? Apostol Pablom kaynata nirqa: “Cheqap yachachikuy chaskiyta mana munasqankurayku”, nispa (2 Tes. 2:3, 8-10). Chaymi allin kanman kaynata tapukuyninchik: “¿Sonqomantachu kuyani cheqap yachachikuykunata? ¿Leechkanichu chayllaraq lloqsimuq qellqanchikkunata chaynapi mosoq yachachikuykunaman hina iñinaypaq?”, nispa.

7, 8. a) ¿Imakunamantam punta cristianokuna cuidakunanku karqa? b) ¿Imamantam astawanqa kunan tiempopi cristianokunapas cuidakunanchik?

⁷ Manam pantachikuqkunapa yachachikuyninkunallamantachu cristianokunaqa cuidakunanku karqa. Pablom Timoteoman kaynata qellqarqa: “Qollqella kuyayqa tukuy mana allin ruraykunapa mamanmi”, nispa. Nirqataqmi: “Wakin runakunapas qollqellata kuyaruspankum Diosman iñisqankumantapas karunchakurunku hinaspam tuksikuchkaq hina llumpaysuta ñakarinku”, nispa (1 Tim. 6:10). Cuidakunankutaqmi karqa ‘aychapa munasqallanpi kawsakuymantapas’ (Gal. 5:19-21).

⁸ Ichaqa, Pabloqa Tesalonica llaqtapi cristianokunamanmi allinta willarqa ‘llulla apostolkunamanta’ cuidakunankupaq. Paykuna ukumantam wakiqninkuna ‘llullakunata yachachiqku’ chaynapi iñiqkuna paykunata qatinankupaq (2 Cor. 11:4, 13; Hech. 20:30). Chaymanta qepamanmi Efeso llaqtapi cristianokunata Jesus kallpancharqa ‘mana allin ruraq’ runakunata mana chaskisqankumanta. Chaypi cristianokunaqa “apostolmi kani” niqkunatapas pruebaspam yacharurqaku “llulla kasqankuta” (Apoc. 2:2). Pablom Tesalonica llaqtapi cristianokunaman iskay kaq cartasqanpi nirqa: “Kamachimuykikum Señor Jesucristopa sutinpi, karunchakuychikyá qella wawqe-panikunamanta”, nispa. Rimarqataqmi ‘mana llamkayta munaq’ cristianomantapas (2 Tes. 3:6, 10). Sichu chayna runakunawan mana hukllawakunanku kachkaptinqa, ¡astawanraqchá pantachikuqkunamantaqa karunchakunanku karqa! Paykunawan hukllawakuyqa manam allinchu karqa, chayraykum karunchakunanku karqa. Chaynam kananchik kunan tiemponchikpipas (Prov. 13:20).

 9. ¿Imanasqam cuidakunanchik pipas Diospa Palabranpa mana yachachisqanman hina rimaptin otaq Diospa llaqtanmanta mana allinkunata rimaptinqa?

⁹ Hatu-hatun ñakariy hinaspa Diospa piñakuynin punchawqa kayllapiñam kachkan, chaymi ñawpaq tiempopi cristianokunaman willakuy qosqanqa haykapimantapas kunan cristianokunapaq aswan allin. Manamá allinchu kanman ‘Diospa hatun favorninta’ chaskiruspa qepancharuyninchikqa, chayta ruwaspaqa manam atichwanchu hanaq pachapi otaq kay Pachapi wiñay kawsay haypaytaqa (2 Cor. 6:1). Huñunakuyninchikkunaman hamuq pi runapas Bibliapa mana yachachisqanman hina rimapayawaptinchikqa otaq Diospa llaqtanmanta mana allinkunata rimaptinqa, allintamá cuidakunanchik (2 Tes. 3:13-15).

10. ¿Ima yachachikuykunamanmi Tesalonica llaqtapi cristianokuna hapipakunanku karqa?

¹⁰ Apostol Pablom Tesalonica llaqtapi iñiqmasinkunata kallpancharqa iñiyninkupi allinta takyanankupaq hinaspa yachachikuykuna chaskisqankuta hatallinankupaqpas (leey 2 Tesalonicenses 2:15). ¿Ima yachachikuykunamantam Pabloqa rimachkarqa? Manam pantasqa religionkunapa yachachikuyninkunamantachu, aswanqa rimachkarqa Jesuspa chaynataq kikinpawan wakin cristianokunapa Jehova Diosmanta chaskisqanku yachachikuykunamantam. Chaykunamanta yaqa llapanmi Diospa Palabranpi kachkan. Corinto llaqtapi iñiqmasinkunatam Pablo kallpancharqa kaynata: “Alabaykichikmi yuyariwasqaykichikmanta hinaspa yachachisqaykunaman hina rurasqaykichikmanta”, nispa (1 Cor. 11:2). Chay yachachikuykunaqa cheqap kasqanraykum hapipakunapaq karqa.

11. ¿Imaynakunatam Jehova Diosmanta karunchakurunman pantachisqa kaqkunaqa?

¹¹ Hebreo cristianokunaman qellqasqanpim Apostol Pablo nirqa imakunarayku pi cristianopas iñiyninpi chiriyaruspan mana allinman wichiykunanmanta (leey Hebreos 2:1; 3:12). Rimarqam ‘pantaruymanta [otaq karunchakuymanta]’ hinaspa Jehova Diosmanta ‘rakikuruymanta’. Kaypi piensarisun: buquepi pipas kaspanqa wakinpim yaku apaptin mana musyaylla mayupa patanmanta pisi-pisimanta karunchakurunman. Wakinpim ichaqa, kikin buqueta tanqaruspan mayupa patanmanta rakikurunman. Chaynallataqmi wakin cristianokunapas pantachisqa kaspanku Jehova Diosmanta mana musyaylla karunchakurunku, wakinpiñataqmi musyakuspanku. Chaynapim iñiyninkupi chiriyarunku.

12. ¿Ima kusirikuykunam iñiyninchikta hukmanyarachinman?

¹² Yaqapaschá Tesalonica llaqtapi wakin cristianokunaqa pantachisqa karqaku. ¿Ima nichwantaq ñoqanchikmanta? Kunan tiempopiqa tukuy ima kusirikuykunam kan, chaykunam tiemponchikta usuchinman. Wakin runakunaqa tiemponkutam usuchinku: Internetpi, chaynintakama qellqanakuypi chaynataq pukllaykuna imayna kasqanmanta tukuy imantakama yachaypi. Tukuy chaykunapi tiemponchikta usuchispaqa Dios serviyninchikpim hukmanyayta qallaykuchwan. Chaynapim Diosta mañakuyninchikpas mana sonqomantañachu kanman hinaspapas Biblia estudiayninchikta, huñunakuykunaman riyta chaynataq Diosmanta willakuyninchiktam saqeruchwan. ¿Imatam ruwachwan mana pantachisqa kanapaq?

13. a) Bibliapa nisqanman hinaqa, ¿imaynam runakunaqa kachkanku? b) ¿Imam yanapawasun iñiyninchikpi mana hukmanyarunapaq?

¹³ Iñiyninchikpi mana hukmanyarunapaqmi yanapawasun ima tiempopi kawsasqanchikta yuyariyninchik, manataqmi allinchu kanman ‘qepa [otaq tukupay] punchawkunapi’ kawsasqanchikta mana reqsikuq runakunawan hukllawakuyninchikqa. Apostol Pedrom kunan tiemponchikmanta kaynata qellqarqa: “Hamunqa[m] burlakuqkuna hinaspam burlakuspa munasqallankupi purinqaku. Paykunam ninqaku: Cristom hamunanpaq prometekurqa ¿maytaq hamunchu? Abuelonchikkunapa wañukusqanmantaraqmi tukuy imapas hina kaqlla kachkan, chaynaqa kachkan kay pachata unanchay qallarisqanmantaraqmi”, nispa (2 Ped. 3:3, 4). Chaymi Bibliata sapa punchaw leeyninchik hinaspa estudiayninchik yanapawasun tukupay punchawkunapi kasqanchikta yuyarinapaq. Pantachikuqkunamanta Bibliapa willakusqanqa pachaknintin watakuna ñawpaqtaraqmi rikurirurqa hinaspapas kunankamam hinalla kachkan. ‘Mana kasukuq runaqa’ hinallam Diospa serviqninkunata pantachichkan. Chaykunaraykum mana qonqananchikchu Jehova Diospa piñakuynin punchawqa hichpallapiña kasqanta (Sof. 1:7).

14. ¿Imaynatam yanapawanchik Diosmanta sapa kuti willakuyninchik?

¹⁴ Rikchan-rikchanlla kanapaq hinaspa pantarachiwananchikta mana saqekunapaqqa, yanapawasuntaqmi Diosmanta sapa kuti willakuyninchikpas. Congregacionpa Uman Jesucristom qatiqninkunata kamachirqa paykunaman tukuy ima yachachisqankunata llapallan nacionpi runakunaman rispanku willamunankupaq. Chay ruwayninkuqa kikinkutam yanapanan karqa (Mat. 28:19, 20). Ichaqa, Diosmanta willakunapaq Jesuspa kamachiwasqanchikta cumplinapaqqa tukuy sonqowanmi ruwananchik. ¿Yaqachu nichwan Tesalonica llaqtapi cristianokuna cumplinankuraykulla Diosmanta willakusqankuta? Yuyarisun, Pablom paykunaman kaynata qellqarqa: “Chuya Espiritupa ruraynintaqa amayá amachaychikchu. Amayá despreciaychikchu Diosmanta willakuqkunapa nisqankutaqa”, nispa (1 Tes. 5:19, 20). Arí, ¡ancha kusikunapaqmá Bibliapa yachachikuyninkunata runakunaman willakusqanchikqa!

15. ¿Imatawanmi ruwachwan familiawan Diosta yupaychanapaq tutapi?

¹⁵ Llapanchikmi familianchikta yanapayta munanchik Diosmanta willakuyninkupi aswan allin kanankupaq. Chayraykum wakin iñiqmasinchikkunaqa familiawan Diosta yupaychasqanku tutapi tiempota rakispanku preparakunku Diosmanta imayna willakunankupaq. Ichapas runakunaman kaqmanta watukunanchikpaq preparakuchwan. ¿Imamantataq rimapayasun? ¿Ima nichwantaq wasiyoq astawan yachayta munaptin? ¿Imay hora watukuyninchiktaq allin kanman? Achka iñiqmasinchikkunapas familiawan Dios yupaychasqanku tutapim tiempota rakinku huñunakuykunapaq qellqakunata estudianankupaq chaynataq chaypi rimarinankupaqpas. ¿Ñoqanchikpas chaynata ruwachwanchu? Huñunakuykunapi rimariptinchikqa iñiyninchikmi aswan kallpanchasqa tarikunqa hinaspapas pantarachiwananchiktam mana saqekusunchu (Sal. 35:18). Arí, familianchikwan Diosta yupaychayqa yanapawanchikmi Bibliapa mana yachachisqan kaqkunamanta yanqa mana rimanapaq, yanapawanchiktaqmi Bibliapa yachachikuyninkunamanta mana iskayrayanapaqpas.

16. ¿Imataq hanaq pachapaq cristianokunata yanapan mana pantachisqa kanankupaq?

¹⁶ Tiempopa risqanman hinam, Jehova Diosqa llaqtanman astawan entiendechirqa Palabranpi willakuykuna imayna cumplikusqanta. Chaypi yuyaymanaymi astawan kallpanchawanchik sumaq suyakuyninchikpi hapipakunapaq. Akllasqa cristianokunaqa hanaq pachamantam Cristowan kuska kamachimunqaku. Chayna suyakuyniyoq kasqankum paykunata yanapan mana pantachisqa kanankupaq. Arí, paykunapas Tesalonica cristianokunaman Pablopa qellqasqanman hinam kaynata ninmanku: “Señorpa kuyakusqan wawqe-panillaykuna, ñoqaykuqa tukuy tiempom graciasta qonayku Diosman qamkunamanta. Diosmi puntamantaraq akllasurqankichik Espiritupa chuyanchasusqaykichikwan”, nispa (2 Tes. 2:13).

17. ¿Imaynatam 2 Tesalonicenses 3:1-5 nisqan kallpanchawanchik?

¹⁷ Kay Pachapaq suyakuyniyoq cristianokunapas manam pantachisqa kaytaqa saqekunankuchu. Sichu qam chayna suyakuyniyoq kachkanki hinaptinqa, Tesalonica llaqtapi akllasqa cristianokunaman Pablopa qellqasqanmi kallpanchasunki (leey 2 Tesalonicenses 3:1-5). ¡Anchatamá agradecekunchik kuyakuywan chayna nisqankunamantaqa! Tesalonica llaqtapi cristianokunaman Pablopa qellqasqanmi, yanapawanchik Bibliapa mana yachachisqan kaqkunamanta yachachiqkunata mana uyarinapaq. Chay willakuykunamantaqa anchatamá kusikunchik Diospa piñakuynin punchaw hichpallapiña kasqanrayku.