Samuelqa Diospa munasqanman hinam kawsarqa

Samuelqa warmacha kasqanmantam Diospa karpanpi yacharqa hinaspa llamkarqa. Chay karpamanmi runakunaqa riqku Jehova Diosta yupaychanankupaq. ¿Munawaqchu yachayta imanasqa chaypi Samuel yachasqanmanta? Chayta yachanapaqqa, puntata yachasun mamanmanta. Paypa sutinmi Ana.

Anaqa wawayoq kaytam munarqa, ichaqa mana wachakuqmi karqa. Chaymi Jehova Diosta mañakurqa: “Dioslláy amayá qonqaruwaychu. Qari wawata qoykuwaptikiqa qamta servisunaykipaqmi sapaqchasaq”, nispa. Diosqa uyariykurqamá mañakusqantaqa, chaymi Anaqa wawayoq karqa. Chay wawatam Samuelwan suticharqa, hinaspam kimsa otaq tawa watachayoq kaptin Diospa karpanman pusarqa chaypi servinanpaq.

Diospa karpanpi sacerdotekunapa jefenmi karqa Eliy. Chaypim llamkarqaku yuyayniyoq iskay churinkuna. Chay karpaqa Jehova Diosta yupaychanapaqmi karqa, chaymi chaypi yachaq runakunaqa Diospa munasqanman hina kawsananku karqa. Ichaqa Samuelmi qawarqa Eliypa churinkuna mana allinkuna ruwasqankuta. ¿Paykuna hinachu Samuelpas mana allinkunata ruwarqa? . . . Manam. Samuelqa tayta-mamanpa yachachisqanman hinam Jehova Diospa munasqanta ruwarqa.

¿Imatam Eliyqa churinkunawan ruwanan karqa? . . . Correginanmi karqa. Ichaqa manamá imatapas ruwarqachu. Hinallam Diospa karpanpi llamkarqaku. Chaymi Jehova Diosqa paywan hinaspa churinkunawan piñakururqa, hinaspam wañuchinanpaq tantearurqa.

Samuel tuta puñuchkaptinmi sutinmanta qayaqta uyarirqa. Chaymi Eliypa kasqanman kallpaylla rirqa, ichaqa paymi nirqa: “Manam ñoqaqa qayamurqaykichu”, nispan. Chaynatam iskay kutikamaraq uyarirqa. Ichaqa kimsa kaq kutipim Samuelta Eliy nirqa: “Yapatawan qayamusuptikiqa kaynatam ninki: ‘Rimapayaykuwayá Dios Taytalláy, uyarichkaykim’”, nispa. Chayta Samuel niptinmi, Jehova Dios nirqa: “Eliypa familiantam castigasaq mana allinkuna ruwasqankumanta”, nispa. ¿Manchapakurqachu Samuelqa chayta Eliyman willananpaq? . . . Sasachá karqa chayta willananpaqqa. Ichaqa Jehova Diosta kasukuspanmi, chay nisqanta Eliyman willarqa. Chaymanta qepatam, Jehova Diospa nisqanman hina Eliywan iskay churinkuna wañururqaku.

Anchatamá Samuelmantaqa yachachwan. Wakin runakunapa mana allinkuna ruwasqankuta qawaspanpas, payqa Jehova Diospa munasqantam haykapipas ruwarqa. ¿Qamqa pay hinachu kanki? ¿Samuel hinachu hinalla Jehova Diosta kasukunki? Chayta ruwaptikiqa, Jehova Dioswan tayta-mamaykipas kusisqam kanqaku.