Samuelta Jehova Dios rimapayasqanmanta

Sacerdotekunapa kamachiqnin Eliypa churinkunam karqa Hofni hinaspa Fineas. Paykunaqa sacerdote kaspankum Diospa carpanpi llamkaqku. Ichaqa Diosta mana kasukuspankum munasqankuta ruwaqku. Israel runakuna Jehova Diospaq animalta apaptinkupas wiran kaq allinnin aychataraqmi paykunaqa hapikuykuqku. Taytan Eliyñataqmi chay ruwasqankuta yachaspanpas mana imanarqachu.

Anapa wawan Samuelqa Eliypa churinkunapa sullkan kaspanpas Jehova Diostam kasukurqa, chaymi Diosqa anchata kuyaq. Huk tutam Samuelqa uyarirurqa “¡Samuel!” nispa qayamusqanta, chaymi hatarispan Eliyman rirqa pay qayasqanta piensaspan. Eliyñataqmi nirqa: “Manam qayamurqaykichu, hawkalla puñukamuy”, nispa. Chaymi Samuelqa puñukuq kutirqa. Kaqmanta chayna qayasqanta willakuptinmi Eliypas yapamanta nirqa: “Manam ñuqaqa qayamurqaykichu”, nispa. Kimsa kutipiña qayasqanta Samuel willakuptinmi Eliyqa musyarurqa Samuelta Jehova Dios qayasqanta, chaymi yachachirqa kaqmanta qayamuptin kaynata ninanpaq: “Jehova Dioslláy, ñuqa serviqnikiqa uyarillachkaykim”, nispa.

Kaqmantam puñuchkaspan uyarirurqa: “¡Samuel, Samuel!”, niqta. Samuelñataqmi nirqa: “Jehova Dioslláy, ñuqa serviqnikiqa uyarillachkaykim”, nispa. Chaymi Jehova Dios nirqa: “Eliyta nimuy paytawan ayllunta castiganaymanta. Payqa churinkuna carpaypi huchallikuptinkupas qawayllam-qawakun”, nispa. Paqarinnintinmi ruwasqanman hina Samuelqa Diospa carpanpa punkunkunata kicharqa. Payqa manchakurqam Diospa nisqanta Eliyman willaytaqa, chaywanpas kikin Eliy tapuykuptinmi lliwta willaykurqa.

Samuelqa wiñaruspanpas hinallam Jehova Diosta kuyarqa. Chaymi llapallan Israel runakuna yacharqaku willakuq hinaspa juez kananpaq Samuelta Jehova Dios akllasqanmanta.