¿Imanasqataq Diosqa permiten atiyniyoq runakuna inocente runakunata ñakarichinanpaq?

Bibliam willawanchik atiyniyoq runakuna inocente runakunata ñakarichisqankumanta. Jesuspa tiemponmanta waranqa wata ñawpaqtam Nabotpa hinaspa churinkunapa kaq allpata munapayarurqa Israelpi kamachiq Acab sutiyoq rey. Chaymi reypa warmin Jezabel tantearurqa Nabotta imaynata wañuchinankupaq, Acab chayta yacharuspanqa manam harkakurqachu (1 Reyes 21:1-16; 2 Reyes 9:26). ¿Imanasqataq Diosqa saqerqa inocente runakuna wañunanta?

Iskay razonkuna kasqanraykum. Punta kaq razon, Diosqa manapuni llullakuqmi (Tito 1:2). Qallariypi runakunamanmi Diosqa Eden sutiyoq huertapi willarqa mana kasukuspankuqa wañunankupaq kasqanmanta, chay huertapi mana kasukusqankumantapacham pi runapas wañuymantaqa mana librakuyta atinchikchu. Bibliaqa willawanchikmi inocente Abelta wawqen Cain wañuchisqanmanta (Genesis 2:16, 17; 4:8).

Bibliaqa nintaqmi runakunaqa chaymanta pacha ‘runamasinmanta munaychakuspan ñakarichisqanmanta’ (Eclesiastes 8:9). Chaymantapas israelitakunamanmi Jehova Diosqa nirqa mana kuyapayakuq reykuna ñakarichiptin Diosta qayakunankupaq kasqanmanta (1 Samuel 8:11-18). Yachayniyoq rey Salomonpas runankunatam achka impuestokunata cobraspan puramenteta ñakarichirqa (1 Reyes 11:43; 12:3, 4). Wakin reykunaqa astawanraqmi runakunata ñakarichirqaku Acab hina. Chayna runakunamanta inocente runakunata Dios libraspanqa yanqa rimaq kasqantachá qawachinman karqa.

Chaymantapas Satanasqa runakunatam acusan imatapas Diosmanta chaskinankuraykulla servisqankumanta (Job 1:9, 10; 2:4). Mana allin runakunamanta serviqninkunata Dios amparaspanqa, ¿manachu qawachichkanman Satanaspa nisqanqa cierto kasqanta? Satanasqa nirqam runakunaqa Diosmanta karunchakuspa allinta kawsakunankupaq kasqanmanta, mana allin runakunamanta lliw runakunata Dios amparaspanqa qawachichkanmanchá Satanaspa nisqanqa cierto kasqanta. Ichaqa Bibliam qawachiwanchik runakunaqa kikillankumanta mana kawsay atisqankuta (Jeremias 10:23). Chaymi llapallanchik munanchik Diospa Gobiernonta, chay gobiernom mana allin runakunata chinkachinqa.

¿Chaywanqa nichkanchikchu ñakariqkunapi Dios mana reparasqanmanta? Manam. Palabranpim willawanchik mana allin runakunaqa imayna kasqankumanta. Jezabelmantam willawanchik Nabotta imaynata wañuchisqanmanta. Bibliaqa willawanchiktaqmi chayna mana allin runakunata pi kallpanchasqanmantapas (Juan 14:30; 2 Corintios 11:14). ¿Pitaq chayqa? Satanas Diablom. Mana allinta ruwanankupaq pi kallpanchasqanmanta willawaspanchikmi Diosqa cuidawanchik, mana chayqa mana allin ruwaykunaman wichiykuspam wiñay kawsayninchikta yanqacharuchwan.

Iskay kaq razon, Diosqa prometentaqmi runamasin ñakarichiq mana allin runakunata chinkachinanpaq. Acabtawan Jezabelta juzgaspan imayna castigasqanmi qawachiwanchik kay tiempopipas runamasin ñakarichiqkunataqa cuentata mañaspa juzgananpaq kasqanta (Salmo 52:1-5). Chaymantapas Diosmi prometen payman sonqo runakunaqa pipapas manaña ñakarichisqan hawkayaypi kawsakunankupaq.a Nabotpas chaynataq churinkunapas kawsarimuspam suma-sumaq huertapi pipapas manaña ñakarichisqan kawsakunqaku (Salmo 37:34).