¿Imakunatam ruwana bautizakunapaq?

1, 2. Sichu manaraq bautizakunaykipaq hina kaspaqa ¿imanasqataq mana hukmanyanaykichu? (Qaway qaranpi kaq fotokunata).

SICHU munankiña bautizakuyta hinaptinqa anchatam kusikuniku. ¿Yaqachu bautizakunaykipaq hinaña kachkanki? Sichu “arí” ninki hinaspa punta apaqkunapas “allinmi” ninku hinaptinqa chayllayá bautizakuy. Hinaspaqa kusisqam Jehova Diosninchikta servikunki.

² Ichaqa “manaraqmi bautizakuwaqchu” nispa punta apaqkuna nisuptikiqa utaq manaraq chaypaq hina hapikuspaykiqa amayá hukmanyaychu. Hinalla kallpanchakuspaykiqa atiwaqmi bautizakuytaqa jovenllaraq utaq yuyaqña kaspapas.

 3. ¿Ima nispam Etiopia nacionpi kamachiqqa Felipeta tapukurqa? ¿Imamantam yachasun? (Rimarimuytaq Hechos 8:36, 38 nisqanmantapas).

³ (Leey Hechos 8:36, 38). Etiopia nacionpi kamachiq runam Felipeta kaynata tapukurqa: “¿Imaraqtaq faltawan bautizakunaypaq?”, nispa. Arí, payqa bautizakuytamá munarqaña. Ichaqa, ¿chaypaq hinañachu tarikurqa? Chaymantayá yachaykusun.

 4. Etiopia nacionpi kamachiq runaqa, ¿imatam ruwarqa astawan yachayta munaspan?

⁴ Etiopia nacionpi kamachiq runaqa Jerusalenta Diosta yupaychaq risqanmantam kutichkarqa (Hech. 8:27). Payqa yaqachusmi Jehova Diosta yupaychananrayku judio religionpiña karqa. Hebreo rimaypi Diospa palabrantaqa allintachá yacharqa, chaychá Jehova Diosmantaqa yacharqaña. Chaywanpas astawan yachaytam munarqa, chaymi Isaias qillqata leechkarqa Felipe ñanpi tariruptinqa (Hech. 8:28). Isaiaspa qillqasqankunaqa sasa entiendeymá karqa. Chaywanpas Etiopia nacionpi kamachiqqa hinallam astawan yachayta munarqa.

 5. ¿Imatam Etiopia nacionpi kamachiqqa ruwarqa Diosmanta yacharuspanqa?

⁵ Chay runaqa Etiopia nacionpi reina Candacepa qullqin waqaychaqmi karqa (Hech. 8:27). Payqa achka ruwayniyuq kachkaspanpas Jehova Diosta yupaychaq rinanpaqmi tiempochakurqa. Manam yachasqallanwanchu qipakurqa, aswanqa ruwaymanmi churarqa. Chaymi Etiopia nacionmanta Jerusalenkama rirqa Jehova Diosta yupaychaq. Jerusalenman riynin karu hinaspa qullqipaq kaptinpas Jehova Diosta yupaychayta munasqanraykum rirqa, manamá imapas harkarqachu.

6, 7. ¿Imata ruwananpaqmi tantiakurqa Etiopia nacionpi kamachiqqa Jehova Diosta astawan kuyasqanrayku?

⁶ Etiopia nacionpi kamachiq runamanmi Felipeqa yachachirqa mana yachasqankunata, willarqamá Jesusqa Diospa akllasqan Cristo kasqanta (Hech. 8:34, 35). Anchatachá kusikurqa Jesus payrayku tukuy ima ruwasqanta yacharuspanqa. ¿Imatam chayrayku ruwarqa? Manamá yachasqallanwanchu nitaq allin riqsisqa kasqallanwanchu qipakurqa. Aswanqa Jehova Diosta hinaspa Jesusta riqsisqanman hina astawan kuyasqanraykum bautizakunanpaqña tantiakururqa, chaynapi Jesuspa qatiqninña kananpaq. Chaymi Felipeqa chaypaq hinaña kasqanta qawaykuspa bautizarurqa.

⁷ Etiopia nacionpi kamachiqmanta yachaynikim yanapasunki bautizakunaykipaq imata ruwanaykimanta. Pay hina listoña kaspaykiqa ninkim: “¿Imaraqtaq faltawan bautizakunaypaq?”, nispa. Kay yachachikuypim yachasunchik Etiopia nacionpi kamachiq runa hina bautizakunaykipaqqa pay hina astawan yachanaykimanta, yachasqaykikunata ruwayman churanaykimanta hinaspa Jehova Diosta astawan kuyanaykimanta.

 8. Juan 17:3 nisqanqa, ¿imata ruwanapaqmi kallpanchawanchik?

⁸ (Leey Juan 17:3). ¿Jesuspa kayna nisqanqa kallpanchasurqankichu testigokunawan biblia estudiayta qallaykunaykipaq? Achkaqtam kallpancharqa estudiayta qallaykunankupaq. Kay textoqa griego rimaypiqa nichkan hinalla Diosta riqsinamantam. Chaymi kallpanchawanchik hinalla estudianapaq. Diosmantaqa hinallamá yachasun wiña-wiñaykamapas (Ecl. 3:11). Jehova Diosta astawan riqsispaqa astawanmi asuykusun (Sal. 73:28).

 9. ¿Imatawanraqmi entiendenanchik Diosmanta qallariypi yachachikuykunata yacharuspapas?

⁹ Jehova Diosmanta yachayta qallaykuspaqa hawallantam yacharqanchik, chaytam apostol Pablo hebreo kasta iñiqkunaman cartaspan nirqa ‘Diosmanta qallariypi yachasqaykichikkuna’, nispa. Chaypas ancha allinmi karqa, chaymi Pablo nirqa ‘qallariypi yachasqanchikkunaqa’ wawata kawsachiq leche hinalla kasqanta (Heb. 5:12; 6:1). Chayraykum Pabloqa iñiqmasinkunata nirqa qallariypi yachasqallankuwan ama qipanankupaq, aswanqa Diosmanta sasa entiendena kaqkunatapas yachanankupaq. ¿Qamqa chaykunamanta yachayta munankichu? ¿Hinalla kallpanchakuyta munankichu Jehova Diosmantawan imakuna ruwananmanta aswan entiendenaykipaq?

10. ¿Wakiqninchikqa imanasqataq sasachakunchik estudiayta?

¹⁰ Wakiqninchikqa sasachakunchikchá estudiayta hinaspa leeyta. ¿Qamqa escuelaman rirqankichu leeyta hinaspa estudiayta yachaq? ¿Gustarqankichu chay ruwayta? ¿Icha kunankamachu librokuna leeyqa mana gustasunkichu? Chayna kaptinqa manam qamllachu. Estudiayta munanaykipaqqa Jehova Diosmi yanapasunki, payqa suma-sumaq yachachiq profesormi.

11. ¿Imanasqataq Jehova Diosqa ‘suma-sumaq yachachiq’?

¹¹ Kikin Jehova Diosmi nin payqa ‘suma-sumaq yachachiq’ kasqanta (Is. 30:20, 21). Payqa pacienciakuqmi, kuyakuqmi hinaspa entiendeqmi. Chaymantapas estudiantenkunapa allin ruwasqantam qawan (Sal. 130:3). Diosqa imapas ruway atisqallanchiktam niwanchik, payqariki suma-sumaqtam umanchiktaqa ruwarqa (Sal. 139:14). Hinaspapas imapas mana yachasqanchikkunata yachay munaqtam unanchawarqanchik, chaymi payqa munan hinalla yachaspa kusisqa kananchikta, chayraykum kunanmanta munananchik Diospa palabranmanta astawan yachayta (1 Ped. 2:2). ¿Imataq chaypaq yanapawasun? Ruway atisqallanchikta ruwanapaqmi tantiakuna. Sapa kutim bibliata leena hinaspa estudiana (Jos. 1:8). Jehova Diospa yanapakuyninwanqa paymanta leeyqa hinaspa yachayqa gustawasunmi.

12. ¿Imanasqataq Jesuspa vidanmanta hinaspa imayna willakusqanmanta estudiananchik?

¹² Jesuspa vidanpi hinaspa imaynata Diosmanta willakusqanpi sapa kuti yuyaymananapaqyá tiempochakusun. Kay sasachakuy tiempopipas Jehova Diosta allinta servinapaqqa Jesuspa ruwasqanta allinta estudiaspam qatipakunanchik (1 Ped. 2:21). Jesusqa qatiqninkunatam nirqa sasachakuykunapi kanankumanta (Luc. 14:27, 28). Ichaqa yacharqam qatiqninkunapas pay hina Diosman sunqu kanankumanta (Juan 16:33). Chaynaqa Jesuspa vidanmanta allinta yachaspa imayna kasqanta qatipakunapaqyá sapa punchaw kallpanchakusun.

13. ¿Imatam sapa kuti Jehova Diosta mañakunanchik? ¿Imanasqataq chayqa ancha allin?

¹³ Estudiananchikqa manam astawan yachanallapaqchu, aswanqa Jehova Diosta riqsispa astawan kuyanapaqmi hinaspa paypi astawan hapipakunapaqmi (1 Cor. 8:1-3). Jehova Diosmantam astawan yachananchik, hinaspapas sapa kutim mañakunanchik aswan iñiyniyuq kanapaq (Luc. 17:5). Chaytaqa Diosqa uyariykuwasunmá. Sichu Diosmanta astawan allinta yachaspaykiqa paypim astawan hapipakunki hinaspaqa ñawparinkim (Sant. 2:26).

14. ¿Pimanta rimaspanmi Pedroqa nirqa yachasqanchikta ruwayman churayqa ancha allin kasqanta? (Qawaytaq dibujotapas).

¹⁴ Apostol Pedrom nirqa Jesuspa qatiqninkunaqa yachasqanchikta ruwayman churanamanta, chayta entiendenapaqmi Noeymanta rimarirqa. Jehova Diosmi Noeyta nirqa chay tiempopi mana allin runakunata nisyullay-nisyu parawan chinkachinanmanta. Ichaqa Noeywan familianqa manamá yachasqallankuwanchu salvakunankuqa karqa, aswanqa hatun buquetam ruwananku karqa. Manaraq nisyullay-nisyu para chayamuchkaptin Noeypa tiemponmanta rimarispanmi Pedro nirqa “wasi hina hatun buqueta ruwachkaptinku”, nispa (1 Ped. 3:20). Arí, Noeywan familianqa Jehova Diospa nisqanman hinam hatun buqueta ruwarqaku (Heb. 11:7). Noeypa chay ruwasqantam Pedro tupachirqa bautizakuywan, nirqam: “Chayna pasakusqanmi rikchakun bautizakuyman, qamkunapas [...] bautizakuspaykichikmi salvasqa kachkankichik”, nispa (1 Ped. 3:21). Arí, bautizakunapaq tukuy imata ruwayqa rikchakunmi Noeywan familian hatun buqueta ruwanankupaq tukuy imata ruwasqankuwan. Chaynaqa ¿imatam ruwanayki bautizakunaykipaq?

15. ¿Imatam manaña ruwanchu sunqumanta wanakuqqa?

¹⁵ Puntataqa sunqumantam wanakunanchik imapas huchanchikmanta (Hech. 2:37, 38). Sunqumanta wanakuyqa ñawpa ruwasqanchikkunata manaña ruwaymi. ¿Saqirunkiñachu Jehova Diospa chiqnisqan kaqkuna ruwayta, huchapakuyta, cigarro pitayta hinaspa qacha simi kayta? (1 Cor. 6:9, 10; 2 Cor. 7:1; Efes. 4:29). Manaraq saqispaykiqa saqinaykipaqyá kallpanchakuy, chaypaqqa bibliamanta yachachisuqnikiwanmi rimawaq utaqmi punta apaqkunata niwaq yanapaykusunaykipaq. Sichu warmaraq kanki hinaspaqa tayta-mamaykitam tapukuwaq bautizakunaykipaq ima ruwayta saqinaykimanta hinaspapas yanapaykusunaykipaqmi niwaq.

16. ¿Imataq kanman Diospaq sapa kuti ruwayninchikkunaqa?

¹⁶ Kallpanchakunaykitaqmi Diospaq kaqkunata sapa kuti ruwanaykipaqpas. Diospaq huknin ruwaynikim huñunakuyman riy hinaspa chaypi rimariy (Heb. 10:24, 25). Manaraq bautizasqa kachkaptikipas Diosmanta willakunaykipaq punta apaqkuna nisuptikiqa sapa kuti willakuy, sapa kuti willakuspaqa aswan kusisqam willakunki (2 Tim. 4:5). Warmaraq kaspaykiqa tapukuy: “¿Tayta-mamayraqchu yuyachiwan huñunakuyman rinaypaq utaq willakuq lluqsinaypaq? ¿Icha kikiymantachu ruwayta munani?”, nispa. Kaykunata kikikimanta ruwaspaykiqa allin iñiyniyuqmi kachkanki, Jehova Diostam kuyachkanki hinaspa agradecekuchkanki. Diospaq kaqkunata sapa kuti ruwaspaykiqa tukuy sunquykiwan servisqaykitam qawachichkanki, chayqa Jehova Diosman regalo qusqayki hinam (2 Ped. 3:11; Heb. 13:15). Payqa munan kuyasqanchikrayku servinanchiktam, manam pipas niwaptinchikraqchu (tupachiy 2 Corintios 9:7 nisqanwan). Arí, Jehova Diosta astawan servispanchikqa kusisqam tarikunchik.

17, 18. ¿Pita kuyaytaq yanapasunki bautizakuyman chayanaykipaq? ¿Imanasqa? (Rimarimuytaq Proverbios 3:3-6 nisqanmantapas).

¹⁷ Bautizakuyman chayanaykikamaqa sasachakuykunaqa kanqamá. Wakinqa asikusunkichá utaq llumpayta sasachasunki (2 Tim. 3:12). Utaqchá qamqa kallpanchakuchkanki imapas mana allin ruwayta saqinaykipaq. Chaywanpas wakinpiqa kutirunkichá, utaqchu piensanki bautizakuytaqa mana haykapipas atinaykimanta. Ichapas chay hukmanyachisunki. Chay pasasuptikiqa ¿imataq yanapasunkiman? Jehova Diosta kuyaymi.

¹⁸ Jehova Diosta kuyaynikim aswan sumaqqa (leey Proverbios 3:3-6). Jehova Diosta tukuy sunquykiwan kuyaspaykiqa ima sasachakuyña pasasuptikipas manam hukmanyankichu. Bibliam willawanchik Jehova Diosqa serviqninkunata imaña kaptinpas hinalla kuyasqanta. Manamá saqinchu, hinallamá kuyan (Sal. 100:5). Arí, qampas atiwaqmi Jehova Dios hina kuyakuq kaytaqa (Gen. 1:26). ¿Imaynatam chayna kuyakuq kawaq?

19. ¿Imatam ruwawaq imapas qususqaykimanta Jehova Diosta agradecekunaykipaq? (Rimarimuytaq Galatas 2:20 nisqanmantapas).

¹⁹ Puntataqa Diostam agradecekunayki (1 Tes. 5:18). Sapa punchawmi tapukunayki: “¿Imatataq Jehova Dios quwarqa kuyawasqanrayku?”, nispa. Hinaspa chaykunamanta Diosta agradecekuy. Chaytaqa qampaq ruwapususqaykita hinam qawanayki, apostol Pablopas chaynatam qawarqa (leey Galatas 2:20). Chayta ruwaruspayki kaynata tapukuy: “¿Imaynatam Diosman kuyakuyniyta qawachiyman?”, nispa. Jehova Diosta kuyaspaykiqa manam mana allin munaywanqa aysachikunkichu, ima sasachakuytapas atipankim hinaspapas Diospaq kaqkunatam hinalla ruwanki. Chaykunata ruwaspaykiqa Jehova Dioslla kuyasqaykitam sapa punchaw qawachinki.

20. ¿Imataq Jehova Diosman prometekuyqa? ¿Imapaqmi chayqa yanapasunki?

²⁰ Tiempopa pasasqanman hinam Jehova Diosta anchata kuyasqaykirayku payllataña servinaykipaq prometekuyta munanki, chaypaq tantiakusqaykiqa yanapasunkim Diosllapaqña wiñaypaq kawsakunaykipaq. Jehova Diosllataña servinaykipaq nispaykiqa prometekuchkankim imaña-haykaña kaptinpas payllata servinaykipaq. Chaytaqa prometekunki huk kutillatam wiña-wiñaypaq, chaymá chayqa mana pukllay hinachu. Ichaqa yuyarinaykim chayqa allinnikipaq kasqanta (Sal. 50:14). Satanasqa tukuy imatam ruwanqa Jehova Diosta manaña servinaykipaq, ichaqa amayá munasqantaqa ruwaychu (Job 27:5). Jehova Diosta anchata kuyasqaykiraykum payman prometekusqaykitaqa cumpliyta atinki, hinaspapas astawanmi asuykunki.

21. ¿Imanasqataq nichwan bautizakuyqa Jehova Diosta serviyninchikpa qallariyllanraq kasqanta?

²¹ Payllataña servinaykimanta Jehova Diosta prometekuruspaykiqa punta apaqkunawan parlay bautizakuy munasqaykimanta. Ichaqa kayta yuyariy, bautizakusqaykiqa qallariyllanraqmi, hinallam Jehova Diostaqa wiña-wiñaypaq servinki. Chaynaqa, bautizakuyta munaspaykiqa yachamusqanchik kaqkunata ruwanaykipaq kallpanchakuy, chaynapi Jehova Diosta sapa punchaw astawan kuyanaykipaq. Chayqa yanapasunkim bautizakuyman chayanaykipaq. Chay punchawtaqa manamá qunqankichu, ichaqa qallariyllanraqmi. Chaynaqa, munanikum Jehova Diostawan churinta hinalla astawan kuyanaykita.