Astawan yachay munaqkunapaq

¿Ima niytataq Pablo munachkan 2 Corintios 6:14 versiculopi “amayá mana iñiqkunawanqa hukllawakuychikchu” nisqanwan?

2 Corintios 6:14 versiculopim nin: “Amayá mana iñiqkunawanqa hukllawakuychikchu yuguman mana tupaqnintinta watarusqa hinaqa”, nispa. Pablopa imamanta willakusqanman hinaqa rimachkan mana iñiq runakunamantam. Chayqa sutillam wakin partekunapi Pablopa rimasqanpipas.

Huk kutipim iñiqmasinkunata Pablo qaqcharqa “Diospi mana iñiq autoridadkunaman” pusasqankumanta (1 Corintios 6:6). Paykunaqa Corinto llaqtapi autoridadkunam karqaku. Corintopi kaqkunaman iskay kaq cartasqanpipas Pabloqa nirqam “mana iñiq runakunapa yuyayninkuta” satanas tutayarachisqanmanta, chaynapim tapaqnin telayuq hina kasqankurayku mana munankuchu Dios kasukuytaqa. Chaymi Pabloqa nirqaraq: “Jehova Diosman pipas kutirikuptinmi ichaqa tapaqnin telaqa hurqusqaña”, nispa (2 Corintios 3:16; 4:4).

Mana iñiq runakunaqa mana allinkuna ruwaqmi kanku (2 Corintios 6:15, 16). Chaywanpas wakinqa Jehova Diosmanta willasqaqa uyarinkum. Achkapam qusanku utaq señorankuqa Diospi iñiq, ichaqa mana harkakuspam hinalla kuska kanku (1 Corintios 7:12-14; 10:27; 14:22-25; 1 Pedro 3:1, 2). Chayna kaptinpas apostol Pablo nisqanman hinaqa manam paykunaqa Jesuspa qatiqninkunachu kanku, Jesuspa qatiqninkunaqa ‘señorpi iñiqkunallam’ (Hechos 2:41; 5:14; 8:12, 13).

2 Corintios 6:14 versiculopi nisqanqa ancha allintam yanapan Jesuspa qatiqninkunataqa, achka kutipitaqmi chaypi nisqanqa yanapan casarakuy munaqkunatapas (Mateo 19: 4-6). Bautizasqaña kaqkuna casarakuyta munaspaqa Diospi iñiqllawanmi casarakunanku, chayta ruwanankupaq tantiakuspaqa yachaywanmi ruwachkanku. Mana iñiqkunapa imayna kawsakusqanqa manam chaynallachu Jesuspa qatiq iñiqkunapa imayna kawsakusqankuwanqa.

Ichaqa, ¿ima nichwantaq Diospi iñiqkunawan bibliata estudiaqkunapa hukllawakuqkunamanta chaynataq manaraq bautizasqa kaspa Diosmanta willakuqkunamanta? Paykunapas, ¿mana iñiqkunachu kanku? Manam. Sumaq willakuyta uyarisqankurayku kasukuqkunataqa hinaspa bautizakuyta munasqankurayku allintaña kawsakuqkunataqa manam nichkanchu “mana iñiqkuna” nispaqa (Romanos 10:10; 2 Corintios 4: 13). Bibliapim Corneliomanta manaraq bautizakuchkaptinpas nirqa: “Payqa wasinpi llapallan kaqkunapiwanmi Diosta respetaq hinaspa yupaychaq”, nispa (Hechos 10: 2).

Chaymantapas, ¿allinchu kanman manaraq bautizasqa Diosmanta willakuqwan riqsinakuy utaq casarakuy? Manam. ¿Imaynanpi? Jesuspa qatiqnin viudakunaman apostol Pablopa kayna nisqanraykum, nirqam: “Qusan wañukuptinmi ichaqa libreña piwanpas munasqanwan casarakunanpaq, ichaqa señorpi iñiqllawanmi casarakunan”, nispa (1 Corintios 7: 39). Chaypi nisqanman hinaqa Diosta yupaychaqkunaqa casarakunanku “señorpi iñiqllawanmi”.

¿Pikunamantataq bibliapi rimachkan “señorpi iñiq” hinaspa “Cristopaq llamkaq” nispanqa? Kikin bibliapim nin paykunaqa ‘Cristopaq llamkaqkuna’ kasqankumanta, ‘Cristopa allin qawasqan’ kasqankumanta, ‘kuyasqa wawqi’ kasqankumanta, ‘tukuy sunquwan señorta serviq’ kasqankumanta chaynataq ‘Pablowan kuska serviq’ kasqankumanta (Romanos 16: 8-10; Colosenses 4: 7).

¿Haykapimantataq pipas ‘señorta serviqña’ kanman? Kikinpa munaynintapas qipaman churaspa sirvientepa ruwananta ruwayta qallarisqan punchawmantam. Jesusmi nirqa: “Pipas qatiwayta munaqqa amaña kikillanpaq kawsaspayá ñakarichiqnin qirunta hombrokuykuspa hinalla qatiwachun”, nispa (Mateo 16:24). Pipas Jesuspa qatiqninqa kanman Diospa munayninta ruwananpaq tukuy sunqumanta tantiakuspanmi. Chaytaqa Jehova Diosmanmi mañakuspan ninan, chaymantam bautizakuspan Jehova Diospa runanña kanan.a Chaynaqa, ‘señorpi iñiqwan’ casarakuyqa tukuy sunquwan Jehova Diosta serviq runawan casarakuymi. Payqa “Diospa hinaspa señor Jesucristopa serviqnin” kananpaq tantiakuq runam (Santiago 1: 1).

Pipapas biblia estudiayta qallarisqanqa hinaspa Diospa kamachikuyninkunata kasukuytaña qallarisqanqa kusikunapaqmi. Chaywanpas manaraqmi Jehova Diosta mañakuspanqa prometekurqaraqchu munaynillanta ruwaspan kawsakunanpaqqa, kamachikuyninkunata lliwta kasukunanpaqqa nitaq ima sasachakuyña kaptinpas payman sunqu takyananpaqqa. Hinallaraqmi mana allin ruwaykunata saqichkan, hinaspapas hinallaraqmi kallpanchakunan kanqa. Tukuy chayqa ancha yuyaywan tantianam, chaynam casarakuypas ancha yuyaywan tantiana.

¿Allinchu kanman biblia estudiaqwan risinakuyta qallaykuy bautizakuptinña casarakuyta munaspa? Manam. Manamá allinchu kanman biblia estudiaq casarakuyta munasqanraykulla bautizakuyninqa.

Manaraq bautizasqa Diosmanta willakuqkunaqa manam unaychu chaynalla kanku, aswanqa hinalla kallpanchakuspam bautizakuyman chayanku. Chaymi ‘señorpi iñiqllawan’ casarakunamanta apostol Pablopa nisqanqa allin. Chaymantapas sichu casarakunanpaq watanpiña kanman huk sipas utaq musu, tayta-mamanpas ‘señorpi iñiq’ kasqankurayku taksanmanta Diospa yachachispa uywasqanku kanman, Diosta serviqkunawanpas kuskaña huñunakunman, hinaspapas manaraq bautizasqa kaspa Diosmanta willakuqña kanman hinaptinqa, ¿allinchu kanman paywan riqsinakuyta qallaykuy? Manam. ¿Imanasqataq mana bautizakunchu? ¿Imamantapas iskayrayasqanraykuchu? Mana iñiq runa hina mana kaspapas manaraqmi ‘señorpi iñiqraqchu’.

Apostol Pablopa piwan casarakunamanta rimasqanqa allinninchikpaqmi (Isaias 48:17). Jehova Diosta tukuy sunquwan servikuqkuna casarakuspankuqa allinmi casado vidankupi kanqaku, iskayninkumantam Diosman sunqu kanankupaqpas yanapanakunqaku. Iskayninkumanta Diospa kamachikuyninkunata kasukuspaqa hinaspa Diospa kaqta puntata ruwaspaqa huk sunqullam kusisqa kawsakunqaku. Chaymantapas ‘señorpi iñiqwan’ casarakuspaqa Jehova Diostam kasukuchkanchik, payqa hamuq punchawpim allin kaqkunata quwasun. Chayraykum bibliapi Diosmanta nin: “Diosnilláy, mana saqisuqnikikunataqa manam saqinkichu”, nispa (Salmos 18:25).

[Willakuy]

[Foto]

‘Diosnilláy, mana saqisuqnikikunataqa manam saqinkichu’