¿Ima nichwantaq Jesuspa milagrokuna ruwasqanmanta?

“MILAGRO” palabraqa griego rimaypim dý·na·mis, chayqa ‘atiy’ ninanmi (Lucas 8:46; Mateo 11:20; 25:15). Chaymi huk yachaysapa runa nin: “Dý·na·mis nispanqa Diospa atiyninwan milagro kasqanmantam rimachkan”, nispa.

Wakinpiñataqmi “milagro” palabrata griego rimaypi ninku té·ras nispa, chay ninanqa admirakuypaq kaqkuna ruwaymantam (Juan 4:48; Hechos 2:19). Chaymi Jesuspa qatiqninkunapas hinaspa achka runakunapas ancha admirasqallaña karqaku Jesuspa admirakuypaq milagrokunata ruwasqanta qawaspanku (Marcos 2:12; 4:41; 6:51; Lucas 9:43).

Milagro palabrataqa ninkutaqmi griego rimaypi sē·méi·on nispapas, chay ninanqa milagrokunata ruwaspan pi kasqanta riqsichikuq ninanmi. Chaymi Robert Deffinbaugh sutiyuq runapas kaynata nirqa: “Jesuspa milagrokuna ruwasqanwanmi yachanchik Diospa churin kasqanta”, nispa.

¿Pipa atiyninwantaq Jesusqa milagrokunata ruwarqa?

Huk kutipim Jesusqa demonioyuq warmachata hampirurqa, bibliam willawanchik chaytaqa ‘Diospa hatun atiyninwan’ ruwasqanmanta (Lucas 9:37-43). Jesus chayta ruwananpaqqa Jehova Diosmi atiyta qurqa, Diospaqqa manamá imapas sasachu tukuy atiyniyuq kasqanrayku (Isaias 40:26).

Bibliapim niwanchik 35 milagrokunata Jesus ruwasqanmanta. Ichaqa manapaschá chayllatachu ruwarqa. Mateo 14:14 niwanchik achkallaña runakunata llakipayaykuspan sanoyaykachisqanmanta, chaywanmi nichwan achkallay-achka runakunata hampisqanmanta.

Milagrokunata Jesus ruwasqanwanmi runakunaqa cuentata qukurqaku Diospa churin kasqanmanta, chaynataq paypa yanapakuynillanwan milagrokunata ruwasqanmanta. Chaymi apostol Pedropas kaynata nirqa: “Jesustaqa Diosmi qamkunaman kachamurqa, chaytaqa ruwarqa yachasqaykichikman hina qayllaykichikpi mana pipapas ruway atisqanta hinaspa admirakuypaq kaqkunatawan milagrokunata paywan ruwaspanmi”, nispa (Hechos 2:22). Huk kutipipas Pedroqa kaynatam nirqa: “[Jesustam] atiyninwan hinaspa chuya espiritunwan Dios akllarqa, hinaptinmi tukuy lawpi purirqa allinkunata ruwaspan hinaspa diablopa ñakarichisqan runakunata sanoyachispan, tukuy chaykunataqa ruwarqa paywan Dios kasqanraykum”, nispa (Hechos 10:37, 38).

Marcos 1:21-27 niwanchik Jesus yachachiptin hinaspa milagrokunata ruwaptin runakuna imayna tarikusqankumanta. 22 versiculopim niwanchik imayna yachachisqanwan ima niytapas mana atisqankumanta, 27 versiculopipas niwanchikmi demonioyuq runata sanoyachiptin admirasqallaña kasqankumanta. Diosmanta willakusqanwanmi hinaspa milagrokunata ruwasqanwanmi runakunaqa yacharqaku Jesusqa Diospa kachamusqan kasqanta.

Tukuy chaykunata ruwachkaptinpas wakinqa manam creerqakuchu Jesusqa Diospa akllasqan kasqantaqa, chaymi payqa mana manchakuspan nirqa: “Ñuqapa ruwasqaymi [bautizaq] Juanpa willakusqanmantapas aswanraq ñuqamanta willakun, ñuqaqa ruwachkani ruwanaypaq taytaypa kamachiwasqankunatam, kay ruwasqaykunam qawachin taytay kachamuwasqanta”, nispa (Juan 5:36).

¿Imaynanpitaq mana iskayrayachwanchu milagrokunata Jesus ruwasqanmanta?

Chaymantayá qatiqninkunapi yachaykusunchik.

Jesusqa ima milagrotapas ruwaspanqa manam payta hatunchanankutaqa munarqachu, aswanqa taytanta hatunchanankutam. Chaymi huk kutipi ñawsa runachata manaraq sanoyachichkaspan nirqa: “[Kaytaqa ruwani] Diospa ruwasqankunata runakuna qawanankupaqmi”, nispan (Juan 9:1-3; 11:1-4).

Kunan tiempopi curanderokunaqa tukuytam ruwanku runakunata hampinankupaq, ichaqa yanqallam chaykunataqa ruwaq tukunku. Señorninchik Jesucristom ichaqa Diospa atiyninwan runakunata llachpaykuspallan hampirqa, huk kutipipas iskay ñawsakunatam hampirurqa. Chaymantam biblia kaynata nin: “Jesusñataqmi paykunata llakipayaspan ñawinkuta llachpaykurqa, hinaptinmi chaylla qawarikururqaku hinaspam payta qatikurqaku”, nispa (Mateo 20:29-34). Chaymantapas Jesusqa achkallaña runakunapa qayllanpim milagrokunataqa ruwarqa, manam pakallapichu (Marcos 5:24-29; Lucas 7:11-15).

Jesusqa paypi iñiqta chaynataq paypi mana iñiqtapas sanoyaykachirqam. Chaymi Capernaum llaqtapi kachkaptin ‘demoniopa ñakarichisqan achka runakunata Jesusman pusarqaku, hinaptinmi huk rimayllawan chay espiritukunata qarqurqa, hinaspa ñakariqkunatapas llapallanta sanoyarachirqa’ (Mateo 8:16).

Runakunapa ñakarisqanta qawaspanmi Jesusqa milagrokunata ruwarqa yanapananpaq (Marcos 10:46-52; Lucas 23:8). Chaymantapas Jesusqa milagrokunataqa ruwarqa manam qullqita utaq imatapas chaskikunanraykuchu (Mateo 4:2-4; 10:8).

¿Bibliaqa imam kaqtachu willawanchik Jesus milagrokuna ruwasqanmanta?

Jesuspa milagrokuna ruwasqanmantam willakuykunata tarinchik Mateo, Marcos, Lucas hinaspa Juan librokunapi. Ichaqa, ¿chiqapchu chay milagrokuna ruwasqan kanman karqa? Awriki.

Jesusqa milagrokunataqa ruwarqa achka runakunapa qayllanpim, manam pakallapichu. Chaymantapas Jesuspa chay milagrokuna ruwasqanta rikuq runakunaqa kawsakurqakuraqmi Mateo, Marcos, Lucas hinaspa Juan librokunata qillqasqanku tiempopiqa. Bibliata qillqaqkunamantam huk libropi kaynata nin: “Mateo, Marcos, Lucas hinaspa Juan librokunapi Jesuspa milagrokuna ruwasqanmanta qillqasqankumantaqa manam pipas ninmanchu ‘paykunaqa runakunata creechinankupaqmi llullakuykunata qillqarqaku’ nispaqa. Aswanqa paykunaqa imam kaqtam qillqarqaku”, nispa.

Jesusta chiqniq judiokunaqa manam iskayrayarqakuchu Jesuspa milagrokuna ruwasqanmantaqa. Ichaqa piensarqakum satanaspa atiyninwan chay milagrokuna ruwasqanta (Marcos 3:22-26). Jesuspa wañukusqan qipataqa manam pipas iskayrayarqachu milagrokuna ruwasqanmantaqa, tukuy chaykunamantaqa qipa wiñay warmakunamanpas hinallam willakuqku. Chaymi nichwan Mateo, Marcos, Lucas hinaspa Juan librokunapi Jesuspa milagrokuna ruwasqanmanta willakusqanqa chiqappuni kasqanta.

¿Imanasqataq Jesusqa milagrokunata ruwarqa?

Bibliam niwanchik runakunata kuyasqanrayku chaynataq llakipayasqanrayku Jesusqa milagrokuna ruwasqanmanta.

Chayna llakipayakuq kasqanmantam Marcos 1:40-42 willawanchik, chaypim nin: “Asuykurqataqmi leprawan unquq runapas hinaspam qunqurakuykuspanraq ruegakurqa: ‘¡Señorlláy, munaspaykiqa sanoyaykachillawayá!’, nispa. Chaymi Jesusqa llakipayariykuspan makinta haywariykurqa, hinaspanmi llachpaykuspan nirqa: ‘Munanim sanoyanaykita, allinyayñayá’, nispan. Hinaptinmi lepra unquynin chaylla chinkaruptin sanoyarurqa”, nispa.

Huk kutipiñataqmi Nain llaqtapi huk viudapa sapallan wawan wañuruptin pampanankupaq apachkarqaku. Chaymi chay viudata Jesus rikuruspan llakipayariykurqa hinaspanmi asuykuspan “amaña waqaychu” nirqa, hinaspam chay wawanta kawsarirachirqa (Lucas 7:11-15).

Milagrokuna ruwasqanwanmi yachanchik Jesusqa runakunata llakipayasqanrayku yanapasqanmanta. Hebreos 13:8 nisqanman hinam señorninchik ‘Jesucristoqa ñawpaqpas, kunanpas hinaspa wiñaypaqpas hina kaqlla’. Ñawpaq tiempopim runakunata yanapayta munasqanrayku milagrokunata ruwarqa, chaynam hamuq tiempopipas ruwanqa. Chaymantapas paytaqa taytanmi akllarun kamachiq kananpaq. Kamachichkanñam hanaq pachapiqa, pisi tiempollamantañam kay allpa pachapipas kamachinqa hinaspam kasukuq runakunata sanoyachinqa. Hamuq tiempopi imakunata Jesus ruwananmanta astawan yachayta munaptikiqa Jehova Diospa testigonkunam yanapasunkiman.

[Fotokuna]

Diospa atiyninwanmi Jesusqa milagrokunata ruwarqa

[Foto]

Jesusqa runakunatam llakipayarqa