Diosmi munasqanta ruran chuya espiritunwan

‘Chaynam rimasqaykunaqa, manam yanqachu kanqa [. . .]. Kachasqayman hinam rurakunqa.’ (ISA. 55:11.)

 1. ¿Imatam qawachin rikchanachiypi kay iskay runakunapa tanteasqanku?

KAYPI piensariy: iskay runakunam carronkuwan viajanankupaq tanteachkanku. Hukninmi tantearun chayanankama huk sitiollanta imaynapas rinanta. Hukninpas yachanmi chay sitioman imayna chayanantaqa, ichaqa imapas kaptinqa huk lawnintapas rinanpaqmi tantearun. Kay rikchanachiymi kayta qawachin: wakinkum tanteasqankuman hinapuni imaynatapas rurayta munanku, wakinkunañataq mana chaynatachu piensanku aswanqa imakuna cambiaptinpas kallpanchakunku munasqankuta haypanankupaq.

2, 3. a) ¿Imam Diospa huknin rurananqa, hinaspa imatam rurarqa Adanwan Eva mana kasukuptinku? b) ¿Imanasqataq yachananchik Diospa munasqan imayna cumplikusqanmanta hinaspa chayman hina rurananchikpas?

² Jehová Diosqa munasqanta rurananpaqqa, manam kaynatapunim rurasaq ninchu, aswanqa munaynin cumplikunanpaqmi imatapas ruran (Efe. 3:11). Huknin rurananqa: qallariypi hina kay Pacha paraiso kaptin, runakuna hawka, kusisqa chaynataq mana pantaq kaspa wiñaypaq kawsakuymi (Gen. 1:28). Adanwan Eva mana kasukuptinkupas Jehová Diosqa tukuy imatam rurarqa munasqan hinalla cumplikunanpaq (leey Genesis 3:15). Tantearurqam warminmanta otaq llapallan kasukuq angelkunamanta huk ‘miray’ chayamunanta, paymi Diospa contranpi hatariq Satanasta chinkachinqa hinaspam tukuy mana allin rurasqanta allichanqa (Heb. 2:14; 1 Juan 3:8).

³ Manam kanchu ima atiypas hanaq pachapi hinaspa kay Pachapipas, Jehová Diospa munasqan rurakunanta harkaqqa (Isa. 46:9-11). ‘Munasqanqa rurakunqapunim’ (Isa. 55:10, 11). ¿Imanasqa? Mana tupachiy atina kallpantam otaq espirituntam servichikunqa. Hamuq tiempopi kawsakuyninchikqa kanqa Diospa munasqan rurasqa kaptinmi, chaymi yachananchik imayna cumplikusqanta hinaspam chayman hina rurananchik. Chaymantapas, ñawpaq tiempopi, kunan tiempopi hinaspa hamuq tiempopipas Diospa munasqan rurakunanpaq chuya espiritu imaynata yanapasqanmanta yuyariptinchikqa, iñiyninchikmi kallpanchasqa kanqa.

Chuya espiritupa ñawpaq tiempopi rurasqan

 4. ¿Imaynatam Jehová Diosqa ima rurananmanta willarqa?

⁴ Ñawpaq tiempopiqa, manam llapallantachu Jehová Diosqa ima rurananmantapas willarqa. Qallariypiqa ‘pakasqam karqa’ prometesqa Miray pi kasqanmanta yachayqa (1 Cor. 2:7). Iskay waranqa wata pasaruptinñam kaqmanta willarqa. Chayqa karqa Abrahanman prometesqanpim, chaypim Miraymanta astawan willarqa (leey Genesis 12:7; 22:15-18). Chaypim nirqa “miraynikirayku” nispa, chaymi entiendechiwanchik runamanta rimasqanta hinaspa paypa familianmanta kasqantapas. Chayna willaytaqa mayna atencionwanchá Satanasqa uyarirqa, imata ruraspapas Abrahampa mirayninta puchukachinanpaq otaq yanqachananpaq, chaynapi Diospa rurasqanta harkarunanpaq. Chaytaqa manam rurayta atinmanchu karqa Jehová Diospa atiynin amparasqanrayku. ¿Imaynatam ampararqa?

5, 6. ¿Imaynatam Jehová Diosqa chuya espiritunta servichikurqa Miray rikurichiq familiata waqaychananpaq?

⁵ Jehová Diosqa espiritunwanmi waqaycharqa chay Miray rikurichiq familiata. Chaymi Abrahamta (chay tiempopim Abran sutin karqa) nirqa: “Ñoqam waqaychasqayki”, nispa (Gen. 15:1). Manam yanqa rimayllachu karqa. Ejemplopaq, piensarisun cristianokunapa tiemponmanta 1919 wata ñawpaqtaraq ima pasasqanpi. Paymi señoranwan rirqaku Gerar llaqtaman huk tiempo yachanankupaq, hinaptinmi chay llaqtapi rey Abimelec Saraita pusachimurqa paywan casarakunanpaq, chaytaqa rurarqa soltera kasqanta piensaspanmi. ¿Satanaschu chaykunata rurachkarqa chaynapi Abrahampa churin mana kananpaq? Chaymantaqa manam Bibliaqa ninchu ichaqa Diosmi waqaycharqa, chaymi reytapas mosqoyninpi nirqa mana llachpananpaq (Gen. 20:1-18).

⁶ Manam chay kutillapichu librarqa Abrahamta hinaspa familiantapas (Gen. 12:14-20; 14:13-20; 26:26-29). Chaymi mana yanqachu salmos qellqaqqa kaynata nirqa: ‘Diosqa manam consienterqachu pipas ñakarichinanta. Paykunarayku [otaq Abrahanrayku hinaspa mirayninkunarayku] qaqchaspam nirqa reykunata: “Akllasqay runakunataqa amam llachpankichikchu [. . .]. Ñoqamanta willakuqkunataqa amam imanankichikchu”’, nispa (Sal. 105:14, 15).

 7. ¿Imaynakunatam Jehová Diosqa Israel nacionta waqaycharqa?

⁷ Jehová Diosqa espiritunwanmi ñawpaq Israel nacionta waqaycharqa, chaypim prometesqa Miray nacenan karqa. Puntata, Leytam qorqa cheqap religion hinalla kananpaq, huk dioskunata mana yupaychanankupaq hinaspa kawsayninkupiwan cuerponkupipas limpio kanankupaq (Exo. 31:18; 2 Cor. 3:3). Juezkunapa tiemponpipas wakin runakunamanmi espiritunta qorqa enemigonpa makinmanta israelitakunata librananpaq (Jue. 3:9, 10). Chaynataq, chay Miraypa otaq Jesuspa nacenankama pachaknintin watakuna pasaptinpas, chuya espiritum waqaycharqa Jerusalenta, Belenta, templota hinaspa Mesiasmanta willakusqan achka sitiokunatapas.

 8. ¿Ima ejemplokunam qawachiwanchik Jesuspa vidanpi hinaspa rurasqankunapi chuya espiritu yanapasqanta?

⁸ Chuya espirituqa Cristotam yanaparqa vidanpiwan rurasqanpipas. Yanaparqam mana qari reqsiq Maria wiksayakunanpaq hinaspa mana creenapaq hina pantaq kachkaspanpas mana huchayoq wawata wachakunanpaq, chaynapim wawanqa libre karqa huchallikuspa wañuymanta (Luc. 1:26-31, 34, 35). Harkarqataqmi warmacha kasqanpi otaq wañukunanpaq tiempo manaraq chayamuchkaptin wañunanmanta (Mat. 2:7, 8, 12, 13). Chaynataq Diosqa Jesusman 30 watayoq kachkaptin espiritunta qorqa, chaynapim nombrasqa karqa Davidpa rantinpi kamachikuq kananpaq hinaspa Diospa Gobiernonmanta willananpaqpas (Luc. 1:32, 33; 4:16-21). Hina chay espirituwanmi milagrota ruraspan: onqoqkunata hampirqa, mikuyta mirachirqa hinaspa wañuqkunata kawsarichirqa. Chayna rurasqanmi qawachiwanchik kamachisqan tiempopi bendicionkuna qowananchikta.

9, 10. a) ¿Imakunam qawachin punta pachak watapi Jesuspa qatiqninkuna chuya espiritu chaskisqankumanta? b) Punta pachak watapi, ¿imatam Jehová Diosqa manaña munarqachu hinaspa pikunatam rantinpi churarqa munasqan rurakunanpaq?

⁹ Pentecostes 33 watamantapacham Jehová Diosqa chuya espiritunwan akllayta qallaykurqa Abrahampa mirayninpa parten kaq runakunatapas, paykunamantaqa yaqa llapankum mana Abrahampa familianmantachu karqaku (Rom. 8:15-17; Gal. 3:29). Paykunata chuya espiritu yanapaptinmi tukuy sonqomanta predicaqku hinaspa milagrokunata ruraqku (Hech. 1:8; 2:1-4; 1 Cor. 12:7-11). Chayna rurasqankum, qawachirqa munasqan rurakunanpaq huk mosoq ruray kananmanta. Diosqa manañam munarqachu Jerusalen templopi hina yupaychanankutaqa, rantinpim churarqa hanaq pachaman riy suyaq cristianokunata, paykunatam servichikurqa munasqan rurakunanpaq.

¹⁰ Qawasqanchikman hinaqa ñawpaq tiempopim, Jehová Diosqa espiritunta servichikurqa serviqninkunata waqaychananpaq, admirakuypaq kaqkunata ruranankupaq hinaspa akllananpaqpas. Chaynataqa rurarqa munasqan rurakunanmanta seguro kasqanta qawachinanpaqmi. ¿Imatam nichwan kunan tiempomanta? ¿Imaynatam servichikun espiritunta munasqan rurakunanpaq? Kay tapuykunamanta yachayqa allinmi, chayman hina ruranapaq. Ancha allinmi espiritunwan kunan tiempopi rurasqanmanta yachayqa, tawamanta qawasun.

Chuya espiritupa kunan tiempopi rurasqan

11. ¿Ima ejemplokunam qawachin chuya espiritu yanapaptin cristianokuna allin kawsasqankuta? Hinaspa, ¿imaynatam cristianokuna qawachinku chuya espirituwan yanapachikusqankuta?

¹¹ Puntataqa, chuya espiritum yanapawanchik cheqap cristianokuna allinta kawsakunapaq. Diospa munasqan rurakunanpaq yanapakuq runakunaqa allin kawsakuqmi kananku (leey 1 Corintios 6:9-11). Achkam Bibliamanta manaraq yachaspaqa: huchapakuqku, casado kachkaspa hukwan pierdekuqku, qarimasinwan otaq warmimasinwan kaqku hinaspa wakinkuqa chaykuna rurayta munaqllañam karqaku (Sant. 1:14, 15). Ichaqa kuyakuq Diosninkuta kusichinankupaqmi vidankuta cambiarqaku, chaymi Biblia nin ‘mayllasqa’ kasqankuta. ¿Pipa kallpanwanmi mana allin ruraykunata saqenku? 1 Corintios 6:11 nisqanman hinaqa ‘Diospa espiritunwanmi’. Allinta kawsaspankum qawachinku vidankupi chay kallpa yanapasqanta.

12. a) Ezequielpa revelacionninpi qawasqanman hina, ¿imaynatam Diosqa llaqtanta pusan? b) ¿Imaynatam qawachinchik chuya espiritu yanapasqanchikta?

¹² Iskay kaq, Diosqa chuya espirituntam servichikun llapallan angelkunatawan kay Pachapi llaqtanta munasqanman hina pusananpaq. Ezequielpa revelacionninpim Diospa hanaq pachapi llaqtanta tupachin mana harkay atina hinaspa altollan puriq carrowan, chaynataqa richkan Diospa munasqan cumplinanpaqmi. ¿Imataq chay carrota yanapan maymanpas rinanpaq? Diospa espiritunmi (Eze. 1:20, 21). Hina chay espiritum kay Pachapi llaqtantapas pusachkan. Chaymi niwasqanchikta kasukuspaqa, Jehová Diospa carronwan kuska richkanchik hinaspa chuya espirituntapas yanapachkanchik (Heb. 13:17).

13, 14. a) ¿Pikunam kanku “kay miray runakuna” nispa Jesuspa nisqanqa? b) Chuya espiritupa yanapayninwan mosoq entiendesqanchikkunata willamuy (“¿Yachanchikchu chayllaraq entiendesqanchik yachachikuykunata?” niq recuadrota qaway).

¹³ Kimsa kaq, Diosqa chuya espirituntam servichikun tiempopa risqanman hina Bibliapa nisqanmanta entiendenanchikpaq (Pro. 4:18). Achka watakunañam, ‘allin yuyayniyoq confianza sirvienteqa’ kay revistata servichikun Bibliamanta yachasqankuta willawananchikpaq (Mat. 24:45). Ejemplopaq, qawasunchik “kay miray runakuna” nispa Jesuspa nisqanmanta (leey Mateo 24:32-34). ¿Pikunam kanku? Chaymantam explicakurqa “¿Imaninkitaq Cristoqa Ñoqanchikwanñam Kachkan Nisqanmanta?” estudiopi, chaypim yacharqanchik chuya espirituta chaskinankupaqña kaq qatiqninkunamanta rimasqanta, manam mana allin ruraq runakunamantachu.a Chay willakuy cumplikuptinqa, hanaq pachaman riy suyaqkunam chay tiempopipas hinaspa kunanpas señalta qawanmanku chaynataq yachanmanku Cristopa ‘hichpallapiña kasqantapas’.

¹⁴ ¿Ima ninantaq chayqa? Manayá yachanchikmanchu “kay miray runakuna” nispa hayka wata pasananmanta nisqanta, ichaqa miraymanta rimayqa nichkanmi mana wiñaypura kaspapas huk tiempopi kawsaq runakunamanta, chay tiempoqa tukuqllam hinaspa manam unaychu (Exo. 1:6). Hinaptinqa, ¿imaynatam entiendenanchik Jesuspa “kay miray runakuna” nisqanmanta? Lliwmi qawachin (Cristopa ñoqanchikwan kasqanpa qallarisqanpi) 1914 watapi kawsaq hanaq pachaman riy suyaqkunawan, hatu-hatun ñakariypa qallarisqanta rikuq wakin hanaq pachaman riy suyaqkunapas huk tiempopi kawsasqankuta. Chay mirayqa qallarirqam hinaspa tukunqataqmi. Señalpa nisqankunapa cumplikusqanmi qawachin hatu-hatun ñakariy hichpallapiña kasqanta. Kay tiempopiqa rikchan-rikchan hinaspa chaylla ruraqmi kananchik (Mar. 13:37). Chayna kaspaqa, qawachisunmi Bibliamanta mosoq yachachikuykuna entiendesqanchikta hinaspa chuya espirituwan yanapachikusqanchiktapas.

15. ¿Imam qawachin predicananchikpaq chuya espiritu yanapawasqanchikta?

¹⁵ Tawa kaq, espiritum kallpanchawanchik predicananchikpaq (Hech. 1:8). Mana chayna kaptinqa, ¿yaqachu Diosmanta allin noticia kay pachapa cantonkama willasqa kanman karqa? Kikinchikpipas piensasun. Ichapas llumpay manchakuq kaspa huk punchaw nirqanchik: “Manam haykapipas atisaqchu wasin-wasin predicaytaqa”, nispa. Kunanmi ichaqa kusisqa predicachkanchik.b Achka testigokunam qatikachasqa otaq cheqnisqa kaspankupas hinalla predicanku. Chuya espiritu yanapawaptillanchikmi chayna sasachakuykunata atipanchik hinaspa kikinchikpa kallpanchikwan mana ruray atina llamkaytapas ruranchik (Miq. 3:8; Mat. 17:20). Chaymi tukuy kallpanchikwan predicaspanchikpas chuya espirituwan yanapachikuchkanchik.

Chuya espiritupa hamuq tiempopi ruranan

16. ¿Imanasqataq seguro tarikunchik hatu-hatun ñakariy tiempopi llaqtanta Dios waqaychananmanta?

¹⁶ Hamuq tiempopipas Jehová Diosqa chuya espirituntam admirakuypaqta servichikunqa munasqanta rurananpaq. Puntataqa servichikunqa llaqtanta waqaychananpaqmi. ¿Manachu servichikurqaña wakin serviqninkunatawan Israel nacionta waqaychananpaq? Manam yanqachu creenchik hatu-hatun ñakariy kaptin llaqtanta amparananpaq kaqmanta servichikunantaqa. Ichaqa manam yanqakunataqa rimanachu imaynata Dios chay punchawpi amparawananchikmantaqa. Hamuq tiempotam confianzawan suyanchik, yachanchikmi Jehová Diosta kuyasqanchikrayku imapas paymantawan espiritunmanta mana rakiwananchiktaqa (2 Cro. 16:9; Sal. 139:7-12).

17. ¿Imapaqmi mosoq pachapiqa Jehová Dios espiritunta servichikunqa?

¹⁷ ¿Imapaqmi mosoq pachapiqa Jehová Dios espiritunta servichikunqa? Chaywanmi mosoq qellqakunata rurachinqa hinaspa hukkunapaqpas servichikunqa (Apo. 20:12). ¿Imakunamantam chay qellqa willawasun? Yaqachusmi Waranqa Wata Jesucristo Kamachikusqan tiempopi leykunamanta. Munachkanchikmi imakuna nisqanmanta yachaykuyta hinaspa Paraisopi bendicionkuna chaskiytapas. Manam entiendeyta atinchikchu chay tiempopi vida imayna kananmanta, espiritunwanmi Allpapaq hinaspa runakunapaqpas Diospa munasqan rurakunqa.

18. ¿Ima ruraytam mana qonqananchikchu?

¹⁸ Diospa munasqanqa rurakunqapunim, chaytam ruranqa ancha atiyniyoq espiritunwan. Munasqanqa ñoqanchikpaqpas rurakunqam, chaymi Diosta mañakunanchik espiritunta qowananchikpaq hinaspa yanapachikunanchik (Luc. 11:13). Chaynapim chaskisun lliw runakunapaq Diospa munasqanta: kay Pachapi wiñaypaq kawsakuyta.

[Willakuykuna]

¿Entienderunchikchu?

• ¿Imaynatam Jehová Diosqa espiritunta ñawpaq tiempopi servichikurqa munasqan rurakunanpaq?

• ¿Imaynatam Jehová Diosqa kunanpas chuya espiritunta servichikun?

• ¿Imaynatam Diosqa hamuq tiempopi espiritunta servichikunqa munasqanta rurananpaq?

[10 kaq paginapi recuadro]

¿Yachanchikchu chayllaraq entiendesqanchik yachachikuykunata?

Jehová Diosqa llaqtanmanmi hinalla entiendechichkan. ¿Ima mosoq yachaykunamantam kay watakunallapi Llaqta Cuidaq revistawan entienderunchik?

▪ Runakunapi, ¿ima pasakusqanmantam qawachin masa poqochiq qonchumanta rikchanachiy? (Mat. 13:33; 1 de julio 2008, pag. 26-27.)

▪ ¿Haykapim hanaq pachaman riqkunata Jehová Diosqa akllayta tukunqa? (1 de enero 2008, pag. 25-26.)

▪ Entienderqanchikmi mostaza muhuwan rikchanachiy pantay religionwan tupasqanta, ¿imatam chayllaraq entienderunchik? (Mar. 4:30-32; 1 de julio 2008, pag. 24-26.)

▪ Challwa hapina mallawan rikchanachiypim, entienderqanchik cheqap cristianokunawan hinaspa cristiano tukuqkunawanpas tupasqanta, ¿imatam chayllaraq entienderunchik? (Mat. 13:47-50; 1 de julio 2008, pag. 27-29.)

▪ Trigomantawan mana allin qoramanta rikchanachiypim predicacionwan tupasqanta entienderqanchik, ¿imaynatam kunanqa entiendenchik? (Mat. 13:24-30; 15 de marzo 2010, pag. 19-22.)