¿Ima nintaq bibliapi warmi-qari puñuymanta?

Achka runakunam warmi-qari puñuymanta rimaytaqa pinqakunku, Jehova Diosmi ichaqa warmi-qari puñuymanta palabranpi qillqachirqa ñuqanchikta yachachiwananchikpaq. Diosqa unanchawaqninchik kasqanraykum imatapas allinninchikpaq yachachiwanchik, chaymi bibliapi niwanchik imayna kawsakunanchikta munasqanta. Payta kasukuspaqa wiñaypaqmi kusisqa kawsakusun.

1. ¿Jehova Diosqa imatataq piensan warmi-qari puñuymanta?

Jehova Diosqa munan warmi-qariqa casarakuspallanku kuska puñunankutam. Casarakunkuqa manam churi-wawayuq kanallankupaqchu, aswanqa Diospa nisqanman hina kuyanakuspanku kusisqa kawsakunankupaqmi. Chaymi bibliapiqa kaynata nin: “Musullaraq kaspa casarasqayki warmillaykiwan puñuspayá kusikuy”, nispa (Proverbios 5:18, 19). Jehova Diosqa manam munanchu casarasqakuna huchallikunankutaqa, payqa munan warmillanwan utaq qusallanwan kuyanakunankutam (leey Hebreos 13:4).

2. ¿Jehova Diospaqqa imakunataq huchapakuyqa?

Bibliapim nin: ‘Dios kamachiptinqa manam kanqachu huchapakuqkunaqa’, nispa (1 Corintios 6:9, 10). ¿Jehova Diospaqqa imakunataq huchapakuyqa? 1)  Warmiwan qari manaraq casarakuchkaspanku puñusqankum,a 2) qaripuralla utaq warmipuralla puñusqankum, 3) animalkunawan huchapakuymi. Tukuy chaykunaman mana wichiykuspanchikqa allinllam kawsakusunchik, Jehova Dioswanpas kuyachikusunmi (1 Tesalonicenses 4:3).

ASTAWAN YACHAYKUSUN

3. Amayá huchapakuymanqa wichiykuychu

Bibliapim willawanchik Diosta serviq Josey huchapakuyman mana wichiykusqanta. Leeychik Genesis 39:1-12 hinaspa qatiqninmanta rimariychik:

• ¿Imanasqataq Joseyqa patronninpa warmin paywan puñunanpaq niptin mana munarqachu? (Kaqmanta leeykuychik 9 versiculota).

• ¿Joseypa ayqikusqanqa allinchu karqa? ¿Imanasqa?

VIDEO: Huchamantaqa karunchakusunyá (5:06)

Jehova Diosqa manam munanchu huchapakuyman wichiykunanchiktaqa. Leeychik 1 Corintios 6:18 hinaspa qatiqninmanta rimariychik:

• ¿Imakunataq huchapakuyman pitapas aparunman?

• ¿Imataq yanapasunkiman huchapakuyman mana wichiykunaykipaq?

4. ¿Imakunataq yanapasunkiman huchapakuyman mana wichiykunaykipaq?

VIDEO: Mana huchallikunapaqyá bibliata leesun (3:02)

• Kay videopi qawasqanchik iñiqmasinchikqa, huchapakurunanmanta cuentata qukuruspan, ¿imatam ruwarqa?

Diosta yupaychaqkunaqa kallpanchakunankum huchapakuypi mana piensanankupaq. ¿Imataq qamtapas yanapasunkiman huchapakuypi mana piensanaykipaq? Leeychik Filipenses 4:8 hinaspa qatiqninmanta rimariychik:

• Huchapakuypi piensanamantaqa, ¿imakunapitaq piensananchik?

• Bibliata leesqayki hinaspa Diosta servisqaykiqa, ¿yanapasunkimanchu huchapakuyman mana wichiykunaykipaq? ¿Imanasqa?

5. Diospa niwasqanchikkunaqa allinninchikpaqmi

VIDEO: Mana yuyayniyuqkunaqa sasachakuypim kanku (9:31)

• Bibliapi leesqanchik musuqa, ¿imanasqataq huchapakuyman wichiykurqa? (Leeychik Proverbios 7:8, 9).

• Proverbios 7:23, 26 nisqanman hinaqa huchapakuqkunaqa sasachakuypim tarikunku. Huchapakuyman mana wichiykuspaqa, ¿imakunamantam librakusun?

• ¿Huchapakuyman mana wichiykuspaqa imaynataq kawsakusun kunanpas hinaspa hamuq tiempopipas?

Bibliapim nin warmipura utaq qaripura puñuyqa huchapakuy kasqanta. Diosqa llapallanchiktam kuyawanchik, chaymi kusisqa kawsakunanchikta munaspan kamachikuykunata quwanchik. Leeychik 1 Corintios 6:9-11 hinaspa qatiqninmanta rimariychik:

• ¿Diospaqqa qaripura utaq warmipura puñuyllachu manaqa allin?

Dios kuyawananchikpaqqa mana allin ruwaykunatam saqinanchik, chayqa allinninchikpaqmi. Leeychik Salmos 19:8, 11 hinaspa qatiqninmanta rimariychik:

• ¿Diospa kamachikuyninkunaqa allinninchikpaqchu? ¿Imanasqam chaynata ninki?

YUYARIYKUSUN

Jehova Diosqa warmitawan qaritaqa unancharqa casarakuspalla kuska puñunankupaqmi, chaynapi kuyanakuspanku kusisqa kawsakunankupaq.

¿Ima niwaqtaq?

• Jehova Diospaqqa ¿imakunataq huchapakuyqa?

• ¿Imam yanapawachwan huchapakuyman mana wichiykunapaq?

• ¿Diospa kamachikuyninkunata kasukuyqa allinninchikpaqchu? ¿Imanasqam chaynata ninki?

ASTAWAN YACHANAYKIPAQ

Warmi-qari puñunankupaqqa puntatam casarakunanku Diospa nisqanman hina. Chaymanta kaypi yachaykuy.

“¿Diosqa ima nintaq mana casarakuspa uywanakuymanta?” (Tarinkim jw.org nisqanpi)

Bibliapiqa ninmi qaripura utaq warmipura puñuyqa hucha kasqanta, chayqa manam chiqninakuytachu hatarichin. Chaymanta kaypi yachaykuy.

“¿Es malo ser homosexual?” (Tarinkim jw.org nisqanpi)

Bibliapi kamachikuykunam yanapawanchik huchapakuyman mana wichiykunapaq hinaspa llakipi mana tarikunapaq. Chaymanta kaypi yachaykuy.

“¿Ima nintaq bibliapi qari kayninwan utaq warmi kayninwan mana allinkuna ruwasqankumanta?” (Tarinkim jw.org nisqanpi)

¿Imataq yanaparqa qarimasillanwan kakuq runata Diostaña kasukunanpaq? Paymanta kaypi leeykuy.

“Bibliam vidankuta cambiarurqa” (Llaqta Cuidaq, julio-septiembre 2011)