¿Imaynatam kay pachapi tukuy ima rikurirqa?

Bibliapim nin: “Qanmi Diosnilláy tukuy imata kawsachiqqa kanki”, nispa (Salmos 36:9). Ichaqa wakin runakunam ninku: “Tukuy imataqa manam Dioschu unancharqa, aswanqa kikillanmantam imapas rikurirqa”, nispa. Chayna kaptinqa, yuyaqyaruspa wañunallapaqchiki kachkanchik. Jehova Dios unanchawaqninchik kaspanqa ¿imayna kawsakunanchiktataq munarqa?a Bibliapi qawaykusun tukuy ima imaynata qallarisqanmanta.

1. ¿Imaynatam rikurirqa hanaq pachapi chaynataq kay pachapi kaqkuna?

Bibliapim nin: “Qallariypim Diosqa unancharqa hanaq pachatawan kay pachata”, nispa (Genesis 1:1). Cientifico runakunapas wakinqa ninkum kay pachapas, hinaspa imapas qallarichisqa kasqanmanta. ¿Imaynatam tukuy imata Dios unancharqa? Chuya espiritunwanmi utaq ‘atiyninwanmi’ Jehova Diosqa killata, intita, lucerokunata hinaspa tukuy imata unancharqa (Genesis 1:2).

2. ¿Imapaqtaq allpa pachata Dios unancharqa?

Jehova Diosqa ‘allpa pachataqa manam yanqapaqchu unancharqa’ aswanqa ‘runakuna yachanankupaqmi’ (Isaias 45:18). Jehova Diosmi kay allpa pachanchikta tukuy imayuqta unancharqa runakuna kusisqa wiñaypaq kawsakunanchikpaq (leey Isaias 40:28 hinaspa 42:5). Yachaysapa runakunapas ninkum kawsananchikpaqqa kay allpa pachallanchik tukuy imayuq kasqanmanta.

3. ¿Imakunapim animalkunawanqa mana chaynallachu kanchik?

Kay allpa pachata Jehova Dios unancharuspanñataqmi sachakunata chaynataq animalkunata unancharqa. Chaymantañataqmi “runata unancharqa kikinman rikchakuqta” (leey Genesis 1:27). Diosqa kuyapayakuqmi, llakipayakuqmi, chayna kayninpim runakunaqa payman rikchakunchik. Chaymantapas, runakunatam unanchawarqanchik rimaqta, qawasqanchikkunawan kusikuqta chaynataq sumaq takikunata uyarispa kusikuqta. Runakunallataqmi Jehova Dios yupaychaytapas atinchik, animalkunaqa manam.

ASTAWAN YACHAYKUSUN

Kaypim yachasunchik tukuy imata Dios unanchasqanmanta hinaspa Genesis qillqapi nisqanmanta imanasqa mana iskayrayanapaqpas. Yachasuntaqmi imakunapi Diosman rikchakusqanchikmanta chaynataq Jehova Dios imayna sunquyuq kasqanmantapas.

4. Diosmi tukuy imata unanchaqqa

Runakunam alabasqa kanku animalkuna, plantakuna imayna kasqanta qawaspanku imatapas ruwasqankuwan. Ichaqa, ¿pitataq hatunchananchik animalchakuna, plantakuna sumaq kasqanmantaqa? VIDEOTA qawaykuychik hinaspa qatiqninmanta rimariychik:

VIDEO: Diospi creeymanta (2:43)

• ¿Imakunatam runakunaqa ruwanku animalchakunapa imayna kasqanta qawaspanku?

Wasikunataqa runakunam ruwanku. ¿Pitaq hanaq pachapi chaynataq kay pachapi kaqkunataqa ruwarqa? Leeychik Hebreos 3:4 hinaspa qatiqninmanta rimariychik:

• Plantachakunata, animalchakunata, lucerokunata, intita, killata qawaspayki, ¿mayqinwantaq admirakunki?

• ¿Hanaq pachapi chaynataq kay pachapi kaqkunaqa Diospa unanchasqanchu? ¿Ima niwaqtaq?

Yachaykunaykipaq

Kay yachachikuymantam qillqakunata chaynataq videokunata tarinki jw.org niqpi. Maskay “¿Kikillanmantachu rikurirqa?” hinaspa “Kawsakuymanta ima nisqanku” niqta.

“Wasiqa runapa ruwasqanmi, Diosmi ichaqa tukuy imata ruwarqa”.

5. Tukuy ima unanchasqa kasqanmanta bibliapi nisqanqa mana iskayrayanapaqmi

VIDEO: ¿Hanaq pachapas kay pachapas unanchasqachu karqa? (Videopa partellan) (3:51)

• Suqta punchawpi Dios tukuy imata unanchasqanmanta bibliapi nispanqa, ¿hayka tiempomantataq rimachkan?

• Tukuy imata Dios unanchasqanmanta Genesis libropi nisqanqa, ¿ciertochu icha yanqallachu? ¿Ima niwaqtaq?

Leeychik Genesis 1:1 hinaspa qatiqninmanta rimariychik:

• Cientifico achka runakunam ninku hanaq pachapi chaynataq kay pachapi kaqkunaqa qallarichisqa kasqanmanta. Chayqa ¿tupanchu Genesis 1:1 nisqanwan?

Wakin runakunam ninku: “Diosqa mana rikuy atina uruchakunatam unancharqa, hinaspam saqiykurqa kikillanmantaña imapas kananpaq”, nispa. Ichaqa, ¿chaynachu? Leeychik Genesis 1:21, 25, 27 hinaspa qatiqninmanta rimariychik:

• ¿Bibliapiqa ninchu Diosqa mana rikuy atina uruchakunata unancharuspan saqiykuptin chaymanta animalkuna, runakuna hinaspa tukuy imapas kikillanmantaña rikurirusqanta? ¿Icha sapakamata unanchasqanmantachu?

6. Diosqa runakunallatam payman rikchakuqta unancharqa

Runakunaqa animalkunawanqa manam chaynallachu kanchik. Leeychik Genesis 1:26 hinaspa qatiqninmanta rimariychik:

• Diosmi payman rikchakuqta unanchawarqanchik, chaymi kuyakuq chaynataq llakipayakuq kanchik. Chaynaqa, ¿Jehova Diosqa imayna sunquyuq kasqanmantataq niwaq?

YUYARIYKUSUN

Jehova Diosmi hanaq pachapi chaynataq kay pachapi tukuy imata unancharqa.

¿Ima niwaqtaq?

• Bibliapi nisqanman hinaqa, ¿imaynatam hanaq pachapi chaynataq kay pachapi tukuy ima rikurirqa?

• ¿Dioschu tukuy imata unancharqa icha kikillanmanta rikurinanpaqchu saqirqa?

• ¿Imaynataq runakunaqa kanchik kikinman rikchakuqta Dios unanchawasqanchikrayku?

ASTAWAN YACHANAYKIPAQ

Animalchakunata Dios sumaqta unanchasqanmanta yachanaykipaq kay yachachikuyta leey.

“¿Imatam yachachwan Diospa unanchasqankunamanta?” (¡Rikchariy!, septiembre 2006)

Tukuy ima unanchasqa kasqanmanta warmachanman papan imayna yachachisqanta yachanaykipaq kay videota qaway.

Jehova Diosmi tukuy imata unancharqa (2:36)

Tukuy imapas kikillanmanta rikurisqanta nisqankuqa, ¿bibliapi nisqanwan tupanchu? Chaymanta kay qillqapi leey.

“¿Wakillantachu Dios unancharqa?” (Tarinki jw.org nisqanpi)

Kay allpa pachanchikpiqa, ¿kikillanmantachu tukuy ima rikurinman karqa icha unanchasqachu karqa? Chaymantam kay qillqapi yachanki.

El origen de la vida. Cinco cuestiones dignas de análisis (folleto)

1. ¿Imanasqataq sumaqta cuidakunanchik?

Vidanchiktaqa cuidananchik taytanchik Jehova Dios quwasqanchikraykum. Pay munaptinmi tukuy imapas kawsan (Salmos 36:9). “Payqa llapallan runakunamanmi qun vidata, samayta hinaspa tukuy imakunatapas” (Hechos 17:25, 28). Arí, Jehova Diosmi parachimun, intitapas qispichimun, hinaspa kawsaykunatapas qispichin, chaynapi kawsakunanchikpaq. Payqa tukuytam quwanchik kusisqa kawsakunapaq (leey Hechos 14:17).