¿Bibliapi yachachikuykuna yanapawanmanchu wañuruyllapiña piensaptiy?

Bibliaqa Diospa palabranmi chaymi ‘llakisqakunapa sunqunta tiyaykachin’ (2 Corintios 7:6). Bibliapi yachachikuykunaqa achka runakunatam wañuruyllapiña mana piensanankupaq yanapachkan, qamtapas yanapasunkimanmi.

• ¿Imaynatam hawka kanapaq bibliaqa yanapawanchik?

• ¿Bibliapiqa willawanchikchu wañuyllapiña piensaq runakunamanta?

• Bibliam yanapasunki wañuyllapiña mana piensanaykipaq

• ¿Amistadninchik wañuyllapiña piensaptinqa imaynatam yanapachwan?

• ¿Diosqa pampachawanmanchu wañurachikuy munasqaymanta?

• ● Imayna sientekusqaykimanta willakuy.

  Bibliapim nin: ‘Tukuy tiempopim chiqap amigoqa kuyakun. Sasachakuy tiempopipas wawqi hinaraqmi kuyakun’, nispa (Proverbios 17:17).

  ¿Imatam yachachiwanchik? Hukmanyasqa tarikuspaykiqa allinmi kanman imayna sientekusqaykimanta pimanpas willaykuyniki.

  Imayna sientekusqaykimanta pimanpas mana willakuspaykiqa aswanmi hukmanyaruwaq, pimanpas willaykuptikim ichaqa sunquyki tiyaykunqa.

  

  Sunquyki tiyaykunanpaq kayta ruway: Imayna sientekusqaykimanta confianzapaq hapisqayki familiaykiwan utaq amistadnikiwan kunanpuni rimay.a Mana pimanpas willayta atispaykiqa imayna tarikusqaykimanta qillqay.

• ● Doctorman riy

  Bibliapim nin: “Sano runakunaqa manam necesitanchu doctortaqa, unquqkunam ichaqa necesitanku”, nispa (Mateo 9:12).

  ¿Imatam yachachiwanchik? Imaynam imawanpas unquspaqa mana pinqakuspa doctorman rinchik.

  Chaynallataqmi wañuyllapiña piensaspapas doctorman rinanchik, sano kaspanchikqa manam wañuyllapiñaqa piensachwanchu.

  Sunquyki tiyaykunanpaq kayta ruway: Chaykunamanta yachaq doctorta yanapasunaykipaq chaylla maskay.

• ● Diosqa anchatam kuyasunki, chaytaqa ama qunqaychu.

  Bibliapim nin: “¿Manachu pichqa pichinkuchakunata mana ancha valorniyuq iskay qullqillapaq rantikunku? Chayna kaptinpas Diosqa manam hukllantapas qunqanchu. [...] Amayá manchakuychikchu, qamkunaqa achka pichinkuchakunamantapas aswan valorniyuqmi kankichik”, nispa (Lucas 12:6, 7).

  ¿Imatam yachachiwanchik? Qamqa Diospaqqa ancha valorniyuqmi kanki.

  Ichapas qunqasqa kasqaykita piensanki. Ama chaynataqa piensaychu, Diosqa yachanmi ima sasachakuypi kasqaykitaqa. Manaña kawsayta munaptikipas Diosqa hinallam kuyasunki. Bibliapim Salmos 51:17 nin: ‘Diosnilláy, llakisqa sunquyuq runatam munanki mastaqa’, nispa. Arí, Jehova Diosqa kuyawanchikmi manam wañunanchiktaqa munanchu.

  Sunquyki tiyaykunanpaq kayta ruway: Diosqa anchata kuyawasqanchikmanta bibliapi leey. Dios kuyawasqanchikmanta mana iskayrayanaykipaqqa yanapasunkimantaqmi 2018 watapi 3 kaq lluqsimuq Willakuq qillqapas.

• ● Diosta mañakuy.

  Bibliapim nin: “Chaynallataqyá tukuy llakikichiktapas Diospa makinpi saqiychik, payqariki qamkunamantam nanachikun”, nispa (1 Pedro 5:7).

  ¿Imatam yachachiwanchik? Diosqa munanmi llakikikunata payman willakunaykita.

  Diosqa kallpatam qusunki hawkalla kanaykipaq (Filipenses 4:6, 7, 13). Payman asuykuqkunataqa Diosqa yanapaykunmi (Salmos 55:22).

  

  Sunquyki tiyaykunanpaq kayta ruway: Kunanpuni Diosta mañakuy. Jehova Diosta sutinmanta qayakuy hinaspa imayna kasqaykita willakuy (Salmos 83:18) Chaymantapas mañakuy hinalla yanapaykusunaykipaq.

• ● Hamuq tiempokunapiqa allinña kawsakunanchikpi yuyaymanay.

  Bibliapim nin: “Chay suyasqanchikqa ñuqanchikpaqmi yaqa buqueta sayachiq llasaq fierro hina, mana imapa kuyurichinan hinaspa allin takyasqa kachkan”, nispa (Hebreos 6:19).

  ¿Imatam yachachiwanchik? Sasachakuykunawanqa muspaypi hinam kawaq, llumpay wayra buqueta kayman-wakman apachkanmanpas hina. Bibliapi willakuykunam ichaqa buque sayachiq llasaq fierro hina hawkallata takyachiwanchik.

  Kay willakuyqa manam yanqallachu kikin Jehova Diosmi prometewanchik llakinchikkunata chinkachinanmanta (Apocalipsis 21:4).

  Sunquyki tiyaykunanpaq kayta ruway: Hamuq tiempopiqa allinña kawsakunanchikmanta yachanaykipaq “Hamuq tiempopiqa kusisqañam kawsakusun” niq yachachikuyta leey.

• ● Imapas gustasusqaykita ruway.

  Bibliapim nin: ‘Kusisqalla sunquyuq runaqa sanoy-sanoymi kanqa’, nispa (Proverbios 17:22).

  ¿Imatam yachachiwanchik? Gustawasqanchik kaqkunata ruwaspaqa kusisqam kasun.

  

  Sunquyki tiyaykunanpaq kayta ruway: Imapas gustasusqaykikunata ruwanaykipaq tiempochakuy. Allin tarikunaykipaqmi takikunata uyariwaq, utaqmi leewaq, utaqmi pitapas yanapawaq. Chaykunawanqa kusisqam kanki (Hechos 20:35).

• ● Mana unqurunaykipaq cuidakuy.

  Bibliapim nin: ‘Cuerponchikwan ejercicio ruwayqa [...] yanapawanchikmi’, nispa (1 Timoteo 4:8).

  ¿Imatam yachachiwanchik? Ejerciciota ruwayqa, allinta puñuyqa hinaspa allinta mikuyqa yanapasunkim allin kawsakunaykipaq.

  Sunquyki tiyaykunanpaq kayta ruway: Puririkuq maytapas riy 15 minutollapas.

• ● Imapas cambiaqllam, chaynam imayna kasqanchikpas cambiarunman.

  Bibliapim nin: “Qamkunaqariki manam yachankichikchu paqarin punchaw imam pasarusunaykichiktaqa”, nispa (Santiago 4:14).

  ¿Imatam yachachiwanchik? Ima sasachakuypas mana tukuruq hina rikchakapuwaptinchikpas tiempopa risqanman hinaqa tukurunqam.

  Kunan punchaw sasachakuykunapi tarikuptinchikpas paqarinpaqqa cambiarunmanmi. Chaynaqa ama hukmanyaychu (2 Corintios 4:8). Imapas tiempopa risqanman hinaqa cambianmi, chaynaqa wañuyllapiñaqa amayá piensaychu.

  Sunquyki tiyaykunanpaq kayta ruway: Bibliapi leey llumpay hukmanyasqa kaspanku wañuyllapiña piensaq runakunamanta, paykunamanta leespaqa yachankim tiempopa risqanman hina allinña kasqankumanta. Wakiqninmanta kaypi yachaykusun.

Arí, bibliapiqa willawanchikmi llumpay hukmanyasqa tarikuspanku wañuyta munaq runakunamanta. Chayna tarikusqankuraykuqa Diosqa manam paykunawanqa piñakurqachu, aswanqa paykunatam yanapaykurqa. Paykunata hinam qamtapas Diosqa yanapasunki.

Elias

• ● ¿Pitaq karqa Eliasqa? Diosmanta willakuq kachkaspanpas wakinpiqa hukmanyarqam. Bibliapim Santiago 5:17 nin: “Eliaspas ñuqanchik hina sentimientoyuq runam karqa”, nispa.

• ● ¿Imanasqataq wañukuyta munarqa? Huk kutipim Eliasqa mana kaqpaq hina hapikuspan llumpayta hukmanyaruspan Diosta kaynata mañakurqa: ‘Ñuqataqa wañurachiwayñayá’, nispa (1 Reyes 19:4).

• ● ¿Imataq yanaparqa? Eliasqa imayna tarikusqanmantam Jehova Diosman willakurqa. ¿Imaynatam Jehova Diosqa yanapaykurqa? Paymanta llakikuspanmi sunqunta tiyaykachirqa. Jehova Diosqa niykurqataqmi ancha valorniyuq kasqantapas hinaspanmi huk kaqnin angelninta nirqa payta cuidananpaq.

• ▸ Eliasmanta yachanaykipaq leey: 1 Reyes 19:2-18.

Job

• ● ¿Pitaq karqa Job sutiyuq runaqa? Jobqa achka churiyuq, apu runam karqa. Hinaspapas Diosman sunqum karqa.

• ● ¿Imanasqataq wañukuyta munarqa? Qunqayllamantam Jobqa llumpay sasachakuypi tarikurqa. Tukuy imanpas huk punchawllapim chinkarurqa, kikinpas llumpaytam unqururqa. Hukkunaqa nirqakuraqmi chaykunaqa kikinpa huchanrayku kasqanmanta. Jobqa llumpay hukmanyasqa kaspanmi nirqa: “Ñuqaqa amiruniñam vidaytaqa”, nispa (Job 7:16).

• ● ¿Imataq yanaparqa? Jobqa Jehova Diostam mañakurqa hinaspapas huk runakunamanmi imayna sientikusqanmanta willakurqa (Job 10:1-3). Eliu sutiyuq amistadninmi kuyakuywan kallpanchaykurqa. Jehova Dios yanapaykunantapas Jobqa saqirqam.

• ▸ Jobmanta yachanaykipaq leey: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moises

• ● ¿Pitaq karqa Moisesqa? Moisesqa israel llaqtapa punta apaqninmi karqa hinaspa Diosmanta willakuqmi karqa.

• ● ¿Imanasqataq wañukuyta munarqa? Moisesqa achka ruwayniyuqmi karqa, llaqtamasinkunapas paymantam mana allinkunata rimapakuqku. Chaymi Moisesqa llumpayta hukmanyarurqa, chayraykum Diosta ruegakurqa: “Ama hina kaspaykiyá wañurachiwayña”, nispa (Numeros 11:11, 15).

• ● ¿Imataq yanaparqa? Moisesqa Diosmanmi willakurqa imayna sientekusqanmanta, hinaptinmi Diosqa yanapaykurqa manaña llumpayta llakikunanpaq.

• ▸ Moisesmanta yachanaykipaq leey: Numeros 11:4-6, 10-17.