“Qamkunawan riytam munaniku”

 1. ¿Imatam Jehova Diosninchik willakurqaña kay tiemponchikpaq?

JEHOVA DIOSNINCHIKMI kay tiemponchikpaq kaynata willakurqa: ‘Chay punchawkunapim, tukuy rikchaq rimayniyuq huk law nacionkunamanta chunka runakuna, Juda nacionniyuq runata capanmanta hapipakuruspa ninqaku: “Qamkunawan riytam munaniku, qamkunawan Dios kasqantam uyariruniku”’, nispa (Zac. 8:23). “Juda nacionniyuq” runaqa hanaq pachapaq akllasqakunawanmi tupan, hina paykunatam bibliapi nin ‘Diospa llaqtan Israel’ nispa (Gal. 6:16). Chay ‘chunka runakunañataqmi’ kay allpa pachapi wiñaypaq kawsakuyta suyaqkunawan tupan. Ñuqanchikqa manam iskayrayanchikchu hanaq pachaman riqkunata Jehova Dios akllasqanmantaqa, chaymi paykunawan kuska huk sunqulla Diosta yupaychanchik.

 2. Hanaq pachapaq kaqkunaqa hinaspa kay pachapaq kaqkunaqa, ¿sapakamachu Diosta yupaychanku?

² Ñuqanchikqa manam yachanchikchu llapallan akllasqakunapa sutintaqa.b Chaywanpas paykunawan kuskam Diosta yupaychanchik. Bibliapi nisqanman hinapas, chunka runakunam nirqaku Juda nacionniyuq runata “qamkunawan riytam munaniku, qamkunawan Dios kasqantam uyariruniku” nispa. Chay Juda nacionniyuq runa chullalla kachkaptinqa, ¿imaynanpitaq chay chunka runakunaqa achkatapas hina nirqaku “qamkunawan riytam munaniku” nispaqa? Chay Juda nacionniyuq runa llapallan hanaq pachapaq akllasqakunawan tupasqanraykum. Chaynaqa, kay pachapaq kaspa utaq hanaq pachapaq kaspapas llapallanchikmi huk sunqulla Jehova Diosta yupaychanchik. Chaywanpas kay pachapaq kaqkunaqa, hanaq pachapaq akllasqakunataqa manam kamachiqninchikkunata hinachu qawanchik, Jesusllamriki ñuqanchikpa kamachiqninchikqa (Mat. 23:10).

 3. ¿Imakunamantam kay yachachikuypi yachasunchik?

³ Hanaq pachapaq akllasqa kaqkunamanta wakinkuqa kay pachapiraqmi kachkanku. Chaynaqa, ¿imaynam kananku hanaq pachapaq akllasqa iñiqmasinchikkunaqa? Chaymantapas, ¿imaynatam paykunata qawananchik Jesuspa wañukusqanta yuyarisqanchikpi, tantata mikuptinku chaynataq vinota tomaptinku? ¿Hukmanyananchikchu watakuna pasasqanman hina tantata mikuq hinaspa vinota tomaq iñiqmasinchikkuna yapakusqanwan? Chaymantam kay yachachikuypi yachasunchik.

 4. ¿Imatam nin 1 Corintios 11:27-29 hanaq pachapaq akllasqakunata? ¿Imaynanpim chaypi yuyaymanananku?

⁴ Hanaq pachapaq akllasqakuna mana allinta kawsachkaspanku tantata mikuspa chaynataq vinota tomaspankuqa huchallikuchkanmankum (Heb. 6:4-6; 10:26-29). Chayraykum yuyaymanananku 1 Corintios 11:27-29 nisqanpi (qaway). Kaypi nisqanman hina kawsakusqankuqa Diosman sunqu kanankupaqmi yanapanqa, Diosman sunqu kaspallataqmi Jesuswan kuskapas kamachimunqaku (Filip. 3:13-16).

 5. ¿Imaynam kanku hanaq pachapaq akllasqa iñiqmasinchikkunaqa?

⁵ Jehova Diosmi yanapawanchik mana hatun tukuq kananchikpaq (Efes. 4:1-3; Col. 3:10, 12). Chaymi hanaq pachapaq kaq iñiqmasinchikkunaqa hukkunamanta aswan allin kasqankupaqqa mana hapikunkuchu. Manataqmi ninkuchu aswan yachayniyuq kasqankutaqa. Chaymantapas manam ninkuchu paykunata Jehova Dios astawan yanapasqantaqa. Nitaqmi hukkunatapas ninkuchu “qampasriki hanaq pachapaq akllasqam kanki, chaynaqa mikunaykim tantata hinaspa tomanaykim vinota” nispaqa. Aswanqa riqsikunkum Jehova Dioslla hanaq pachaman rinankupaq akllay atisqanmanta.

 6. 1 Corintios 4:7, 8 nisqanman hinaqa, ¿imaynam kananku hanaq pachapaq akllasqa kaqkunaqa?

⁶ Hanaq pachapaq iñiqmasinchikkunaqa manam ancha riqsisqa kaytaqa munankuchu (Filip. 2:2, 3). Jehova Diospas paykunata akllaykuspanqa manam hukkunamanqa riqsichirqachu. Chayraykum paykuna akllasqa kasqankumanta hukkuna iskayrayaptinkupas mana hukmanyankuchu. Bibliapipas ninmi pipas akllasqa kasqanmanta niptinqa mana chaypunilla kasurunapaq (Apoc. 2:2). Akllasqa kaqkunapas manataqmi willakachakunkuchu Jehova Dios akllaykusqanmataqa. Manataqmi akllasqa kasqankuraykuqa hatunchakunkuchu (qaway 1 Corintios 4:7, 8).

 7. Hanaq pachapaq akllasqa iñiqmasinchikkunaqa, ¿imatam mana ruwankuchu? ¿Imaynanpi?

⁷ Hanaq pachapaq akllasqa iñiqmasinchikkunaqa manam paykunapurallachu hukllawanakunku. Manataqmi kikinkupurallaqa huñunakunkuchu akllasqa kasqankumanta rimanankupaqqa utaq bibliamanta yachanankupaqqa (Gal. 1:15-17). Chayta ruwaspankuqa iñiqmasinchikkunatam rakichkanmanku, hinaspapas Jehova Diostam qipanchachkanmanku. Jehova Diosqariki munan yupaychaqninkuna huklla kanankutam (Rom. 16:17, 18).

 8. ¿Imaynam kananchik hanaq pachapaq akllasqa iñiqmasinchikkunawan? ¿Imaynanpi? (Qaway uray patanpi kaq willakuyta).

⁸ ¿Imaynam kananchik hanaq pachapaq akllasqa iñiqmasinchikkunawan? Jesuspa wawqinkuna kachkaptinkupas, paykunataqa manam ancha riqsisqa runata hinachu qawananchik (Mat. 23:8-12). Bibliapi iñiyninkuta qatipakunapaq niptinpas, manam chayraykuchu ancha riqsisqata hinaña qawananchik (Heb. 13:7). Bibliaqa nintaqmi wakin iñiqmasinchikkunaqa allin qawasqa kanankumanta, ichaqa manam hanaq pachapaq akllasqa kasqankuraykuchu, aswanqa iñiqmasinchikkunapaq allin kaqkunata ruwasqankuraykum (1 Tim. 5:17). Hanaq pachapaq akllasqakunata ancha riqsisqata hina qawaspaqa paykunatam hukmanyachichwanc, utaqmi chayna qawasqanchikwan hatun tukuyta qallaykunmanku (Rom. 12:3). Chaytaqa manamá munanchikchu (Luc. 17:2).

 9. Hanaq pachapaq akllasqa iñiqmasinchikkunata kuyaspaqa, ¿imaynam paykunawan kasun?

⁹ Hanaq pachapaq akllasqa iñiqmasinchikkunata kuyaspanchikqa, ¿imaynam paykunawan kasun? Manam tapupayananchikchu “¿imaynatam yacharqanki Jehova Dios akllaykususqaykita?” nispaqa (1 Tes. 4:11; 2 Tes. 3:11). Manataqmi ninanchikchu pay akllasqa kasqanrayku ayllunkunapas akllasqa kasqankumantaqa. Hanaq pachapaq akllasqaqa kanku Jehova Dios akllaykuptillanmi, manam ayllunkuraykuchu (1 Tes. 2:12). Akllasqa iñiqmasinchikkunapa warminta utaq qusantaqa, manataqmi tapupayananchikchu qusan utaq warmin hanaq pachaman ripukuptin, sapallanña kay allpa pachapi qiparuspan imayna tarikunanmantaqa. Imaynaña kanan kaptinpas, kay allpa pacha huertayaptinqa llapallanchikmi kusisqa tarikusun (Sal. 145:16, NM).

10. Hanaq pachapaq akllasqakunataqa, ¿imanasqataq mana ancha riqsisqa runata hinachu qawananchik?

¹⁰ Hanaq pachapaq akllasqakunataqa manam ancha riqsisqa runakunata hinachu qawananchik. Chaynapi paykuna Diosta qipancharuptinkupas ñuqanchik hinalla Diospi hapipakunapaq. Bibliapipas nirqañam paykunamanta wakiqninku Jehova Diosta qipancharunankumanta (Mat. 25:10-12; 2 Ped. 2:20, 21). Chayraykum mana paykunaraykullachu Jehova Diostaqa yupaychananchik. Paykunaraykulla Jehova Diosta yupaychaspanchikqa runakunapa qatiqninñam rikuriruchwan, chaytaqa manam munanchikchu (Jud. 16).

11. ¿Pikunataq kay watakunapi yapakuyta qallaykurqaku?

¹¹ Achka watakuna ñawpaqtaqa, asllam karqaku tantata mikuqkunaqa chaynataq vinota tomaqkunaqa, kay watakunam ichaqa astawan yapakurun. Ichaqa chaywanqa manam hukmanyananchikchu. ¿Imaynanpi? Chaymantayá yachaykusun.

12. ¿Imaynanpitaq mana hukmanyananchikchu tantata mikuqkuna chaynataq vinota tomaqkuna yapakusqanwanqa?

¹² “Jehova Diosqa paypa kaqkunataqa riqsinmi” (2 Tim. 2:19). Jehova Diosllam sumaqtaqa yachan pikunalla hanaq pachapaq akllasqa kasqankutaqa, manam sapa wata tanta mikuqkunatawan vino tomaqkunata yupaq iñiqmasinchikkunachu. Pikuna akllasqa kasqankuta mana yachasqankuraykum, paykunaqa tanta mikuqkunata chaynataq vino tomaqkunata llapallanta yupanku. Chay yupasqankumanta wakinqa yuyayninkupi mana allin kasqankuraykum tantata mikunku chaynataq vinotaqa tomanku. Ñawpaq watakunapi tantata mikuspa vinota tomaqkunañataqmi, kunanqa manaña mikunkuñachu nitaq tomankuñachu. Chayraykum mana sumaqtachu yachanchik Jehova Diospa akllasqankuna haykaraq kay allpa pachapi kasqanmantaqa.

13. ¿Bibliapiqa ninchu llumpa-llumpay ñakariy punchawkuna qallaykuptin, hanaq pachapaq akllasqakuna haykaraq kanankumanta?

¹³ Akllasqakunata pusakunanpaq Jesus hamuptinqa achkaraqmi kay allpa pachapiqa kanqaku (Mat. 24:31). Bibliapiqa niwanchikmi kay tukupay punchawkunapiqa hanaq pachapaq akllasqakunamanta wakinkunaqa kay pachapiraq kanankumanta (Apoc. 12:17). Ichaqa manam niwanchikchu llumpa-llumpay ñakariy punchawkuna qallaykuptin haykaraq kanankumantaqa.

14. Romanos 9:11, 16 nisqanman hinaqa, ¿pillataq yachan hanaq pachapaq haykapi akllayta?

¹⁴ Jehova Diosllam yachan haykapi hanaq pachapaq kaqkunata akllaytaqa (Rom. 8:28-30). Hanaq pachapaq kaqkunataqa Jehova Diosmi akllayta qallaykurqa Jesuspa kawsarirusqan qipata. Chaymi Jesuspa wañukusqan qipamanqa llapallan Jesuspa qatiqninkunaqa hanaq pachapaq akllasqa karqaku. Chaymanta qipaman Jehova Diosta yupaychaq tukuqkuna miraruptinpas Jehova Diosqa hinallam hanaq pachapaq kaqkunata akllarqa. Chay akllasqankunaqa karqaku mana allin qurapa chawpinpi trigo hinam (Mat. 13:24-30). Kay tukupay punchawkunapipas Jehova Diosqa hinallam akllachkan hanaq pachapaq kaqkunataqa.d Kay tukupay punchawkunapi Jehova Dios hanaq pachapaq kaqkunata hinalla akllasqanmantaqa manam hukmanyananchikchu (qaway Romanos 9:11, 16).e Manam Jesuspa willakusqan runakuna hina kaytaqa munanchikchu, paykunaqa qipallaña chayaq runakunamantam rimapakurqaku (Mat. 20:8-15).

15. ¿Imaynatam yachanchik llapallan hanaq pachapaq akllasqakunamanta wakillan Diospa llaqtanpi punta apaqkuna kasqankumanta?

¹⁵ Manam llapallan hanaq pachapaq akllasqakunachu Diospa llaqtanpi punta apaqkunaqa kanku (qaway Mateo 24:45-47). Jehova Dioswan Jesusqa ñawpaq tiempopi hinam kunanpas ruwachkanku. Ñawpaq tiempopiqa as runankunallawanmi llapallan runankunaman yachachirqa, hanaq pachapaq akllasqa kaqkunamanta wakillantaqmi bibliatapas qillqarqaku. Kunanpas as runankunallawanmi llapallan yupaychaqninkunaman yachachichkan, paykunaqa kanku Diospa llaqtanpi punta apaqkunam.

16. ¿Imamantam yacharunchik kay yachachikuypi?

¹⁶ Kunan yachamusqanchikman hinam, Jehova Diosqa llapanchikman wiñay kawsayta quwasunchik. Wakiqninchikmi kay pachapi kawsakusunchik, wakiqninchikñataqmi hanaq pachapi. Chaypaqqa llapallanchikmi Diospa nisqankunata kasukunanchik, hinaspapas mana hatun tukuspam Jehova Diosta yupaychananchik. Chaynaqa, tukupay punchawkunapi kasqanchikraykuyá huk sunqulla Jehova Diosta yupaychasun, huk sunqullataqyá Jesustapas qatikusun (Juan 10:16).