LEEQKUNAPA TAPUKUYNINKUNA

Kay tapukuyqa ancha allinmi, astawanraqmi warminku otaq qosanku wañukuptin sapallanku kaqkunapaqqa. Paykunaqa ichapas anchata munanku wañukuq qosan otaq warmin mosoq pachapi kawsarimuptin kaqmanta casarasqa kayta. Huk viudom nirqa: “Señoraywan ñoqam tantearqaniku casarakusqayku mana haykapipas tukunanpaq. Kuskaykum munarqaniku Jehova Diosta tukuy sonqoykuwan wiñaypaq serviyta. Ñoqaqa hinallam chaynata piensani”, nispa. Chaynaqa, ¿yaqachu kawsarimuqkunaqa mosoq pachapi kaqmanta casarakunqaku? Chaytaqa manam yachanchikchu.

Achka watakunam qellqanchikkuna willakurqa chay kawsarimuymanta hinaspa casarakuymanta Jesuspa rimasqan, yaqapas kay Pachapi kawsarimuymanta kasqanta. Chaymi qellqanchikkunaqa nirqa kay Pachapi kawsarimuqkunaqa mana casarakunankumanta (Mat. 22:29, 30; Mar. 12:24, 25; Luc. 20:34-36, NM).a Ichaqa, ¿yaqachu Jesusqa rimachkarqa kay Pachapi kawsarimuqkunamanta, icha hanaq pachapi kawsarimuqkunamantachu? Chaypaqqa allintayá qawasunchik Jesuspa rimasqankunamanta.

Puntata qawasunchik imanasqa chayna rimasqanmanta (leey Lucas 20:27-33, NM). Kawsarimuypi mana creeq saduceokunam Jesusta pantarachiyta munarqaku kawsarimuymanta hinaspa casarakuymanta tapuspanku.b Jesusñataqmi nirqa: “Kay pachapi runakunaqa casarakunkum hinaspapas casarachinakunkum, ichaqa hamuq tiempopi kawsanankupaq kaqkuna hinaspa wañuqkunamanta kawsarimunankupaq hina kaqkunaqa, manam casarakunqakuchu nitaq casarachinakunqakuchu. Manataqmi wañunmankuñachu angelkuna hina kasqankurayku, hinaspapas kawsarichisqa kasqankuraykum Diospa churinña kanqaku”, nispa (Luc. 20:34-36, NM).

¿Imanasqataq qellqanchikkunaqa nirqa casarakuymanta Jesuspa rimasqanqa yaqapas kay Pachapi kawsarimuqkunamanta kasqanta? Chaynataqa nirqa kaykunaraykum: Punta kaq, saduceokunaqa Jesuswan rimaspankuqa yaqachusmi piensachkarqaku kay Pachapi kawsarimuymanta. Chayraykum Jesusqa paykunawan rimaspanqa kay Pachapi kawsarimuymanta rimanman karqa. Iskay kaq, Jesusqa paykunawan rimasqantam tukurqa Abrahanmanta, Isaacmanta hinaspa Jacobmanta rimaspan. Paykunaqa kay Pachapim kawsarimunqaku (Luc. 20:37, 38).

Chayna kaptinpas, Jesusqa yaqachusmi hanaq pachapaq kawsarimuqkunamanta rimachkarqa. ¿Imanasqataq chaynata ninchik? Qatiqninpi qawasunchik imakuna nisqanmanta.

“Wañuqkunamanta kawsarimunankupaq hina kaqkunaqa”. Bibliam nin hanaq pachapaq kaqkunaqa ‘Diospa munaychakusqanpaqña kasqankuta’ (2 Tes. 1:5, 11). Paykunaqa Jesuspa wañukusqanwanmi allin ruwaqpaq chaskisqa kanku. Paykuna wañukuptinkuqa mana huchayoqpaqñam Diosqa chaskin (Rom. 5:1, 18; 8:1). Bibliam sapakamamanta nin ‘kusisqa hinaspa Diospaq rakisqa’ kasqankuta, chaymi hanaq pachapi kawsarinankupaq chaskisqa kanku (Apoc. 20:5, 6). Ichaqa, kay Pachapi kawsarimuqkunamantam kanqa Diosmanta mana yachaspanku ‘mana allin ruwaqkuna’ (Hech. 24:15). ¿Yaqachu paykunatapas Bibliaqa ninman ‘wañuqkunamanta kawsarimunankupaq hina kaqkuna’ nispa?

“Manataqmi wañunmankuñachu”. Jesusqa manam kaynatachu nirqa: “Manañam wañunqakuchu”, nispaqa. Aswanqa nirqam: “Manataqmi wañunmankuñachu”, nispa. Hanaq pachapaq kaq cristianokuna wañukuspanku kawsarimuspankuqa, mana wañuq kanankupaqñam kawsarichisqa kanku (1 Cor. 15:53, 54). Hanaq pachapaq kawsarimuqkunamantaqa manañam wañuyqa munaychakunñachu.c

Hinaptinqa, ¿imatam nichwan casarakuymantawan kawsarimuymanta Jesuspa rimasqanmanta? Yaqachusmi chaymanta Jesus rimaspanqa hanaq pachapaq kawsarimuqkunamanta rimachkarqa. Chaynaqa, hanaq pachapaq kawsarimuqkunamantaqa kaykunatam yachanchik: 1) paykunaqa manam casarakunkuchu, 2) manataqmi wañunmankuñachu hinaspa, 3) hanaq pachapi kaq angelkunamanmi rikchakunku. Ichaqa, hanaq pachapaq kawsarimuqkunamanta Jesus rimaptinqa, qatiqninpi kaq tapukuykunatam kutichinanchik.

Punta kaq, kay Pachapi kawsarimuqkunamanta saduceokuna piensachkaptinkuqa, ¿imanasqataq Jesusqa hanaq pachapaq kawsarimuqkunamanta rimachkarqa? Jesusqa manamá yaqa llapanpichu cheqniqninkunamanqa paykunapa piensasqankuman hina kutichirqa. Huk kutipim milagrota ruwananpaq judiokuna niptinku, Jesusqa nirqa: “Tuñirachiychik kay templota hinaptinmi kimsa punchawllapi hatarirachisaq”, nispa. Jesusqa yaqapaschá yacharqa judiokuna perqasqa templomanta piensanankumanta. Ichaqa, “templomanta rimaspanqa Jesusqa nichkarqa kikinpa cuerponmantam” (Juan 2:18-21). Jesusqa manapaschá saduceokunapa piensasqankuman hina kutichiytaqa munarqachu. Paykunaqa karqa iskay uyakunam, manataqmi creerqakuchu kawsarimuypipas nitaq angelkunapipas (Prov. 23:9; Mat. 7:6; Hech. 23:8). Qatiqninkunamanmi ichaqa willayta munarqa hanaq pachapaq kawsarimuymanta. Paykunaqa allin sonqoyoq runakunam karqaku hinaspapas chayna kawsarimuytam chaskinanku karqa.

Iskay kaq, ¿imanasqataq Jesusqa rimasqanta tukurqa kay Pachapi kawsanankupaq suyakuyniyoq Abrahanmanta, Isaacmanta hinaspa Jacobmanta rimaspan? (Leey Mateo 22:31, 32.) Jesusqa paykunamanta rimayta qallaykuspanmi kaynata nirqa: “Wañuqkunapa kawsarimunanmantaqa”, nispa. Chaynataqa rimarqa ichapas kay Pachapi kawsarimunankupaq kaqkunamanta rimananpaq. Jesusqa yacharqataqmi Moisespa qellqasqankunapi saduceokuna hapipakusqankuta. Chayraykuchá Jesusqa tankar kichkapi rupachkaq ninapi Moisesman Jehova Diospa nisqankunata servichikurqa. Jesusqa saduceokunamanmi qawachiyta munarqa kay Pachapi kawsarimuyqa Jehova Diospa munaynin kasqanta (Ex. 3:1-6).

Kimsa kaq, saduceokunaman Jesuspa rimasqan hanaq pachapi kawsarimuqkunapaq kaptinqa, ¿yaqachu kay Pachapi kawsarimuqkunaqa casarakunqaku? Diospa Palabranqa manamá chaymantaqa sutillatachu niwanchik. Manataqmá allintaqa yachanchikchu kay Pachapi kawsarimuqkunamanta Jesus rimasqantaqa. Chayraykutaqmi mana allintaqa yachanchikchu kay Pachapi kawsarimuqkuna casarakunankumanta otaq mana casarakunankumantaqa.

Ichaqa, yachanchikmi casado vidapi huk kaqnin wañukuptin casarasqa kayninku tukusqanmanta Bibliapa nisqanta. Hinaptinqa, manam pi viudopas otaq pi viudapas hukmanyananchu kaqmanta casarakuspanqa. Chayqa sapakamamantam. Manataqmi pitapas mana allintaqa qawananchikchu kaqmanta casarakuptinqa (Rom. 7:2, 3; 1 Cor. 7:39).

Arí, tukuytam tapukuchwan mosoq pachapi imayna kawsakuy kananmantaqa. Ichaqa manam allinchu kanman mana yachasqanchikkunamanta rimayqa. Imamantapas yachanapaqqa chay chayamunantam suyananchik. Chayna kaptinpas, kaymantaqa manam iskayrayananchikchu: chay tiempopiqa lliw runakunam kusisqallaña kawsakunqaku. Jehova Diosqa munasqanchikman hinamá kawsachiwasunchik (Sal. 145:16).