¿Imamanta yachaytam Juanqa munachkarqa?

Bautizaq Juanqa yaqa huk watañam presochasqa kachkarqa. Chayna kachkaptinmi qatiqninkuna willarqaku Diospa atiyninwan Jesus imakunatapas ruwasqanmanta, willarqakutaqmi viuda warmipa wawanta Jesus kawsarirachisqanmantapas. Chayta uyariykuspanqa anchatach Juanqa kusikurqa, chaywanpas yachaytam munarqa sichus Jesus Diospa akllasqan kasqanmanta. Chaymi iskay qatiqninkunawan tapuchimurqa: “¿Qamchu kachkanki suyasqayku runa, icha huktachu suyasaqku?”, nispa (Lucas 7:19).

¿Juanqa iskayrayachkarqachu Jesusqa Diospa akllasqan kasqanmanta? Manam. Iskayrayaptinqa Jesusqa manachá Juanmantaqa imatapas rimanmanñachu karqa. Chaymantapas Juanqa yaqa iskay wata ñawpaqtam Jesusta bautizaspan rikurqa Diospa chuya espiritun Jesusman uraykamusqanta, uyarirqataqmi Jesusta akllarusqanmanta kikin Jehova Dios hanaq pachamanta rimamusqantapas. Chaynaqa, ¿imanasqataq Jesusta tapurqa “qamchu kachkanki suyasqayku runa” nispa?

Ichapas munarqa Diospa akllasqan kasqanmanta kikin Jesus niykunanta, chaynapi presochasqa kaspanpas ama hukmanyarunanpaq. Chaymantapas Juanqa yacharqam Diosmanta willakuqkunapa nisqanta, paykunaqa nirqakuñam Diospa akllasqan runaqa kamachiq kananmanta hinaspa runakunata librananmanta. Ichaqa Jesus bautizakusqanmantapacham chayqa manaraq qawakurqachu, chaymi Juanqa yachayta munarqa sichus huk runaña Jesuspa ruwasqanta tukupananmanta.

Chaymi Jesusqa Diospa atiyninwan tukuy imaymana unquyniyuqkunata hampisqanwan Diospa akllasqan Cristo kasqanta paykunaman qawachirqa. Chaymantam nirqa: “Riychikyá hinaspa Juanman willamuychik uyarisqaykichikmantawan qawasqaykichikmanta: Ñawsakunam kaqmanta qawakuchkanku, wistukunam purichkanku, leprawan unquqkunam sanoyachkanku, mana uyariqkunam uyarichkanku, wañuqkunam kawsarimuchkanku, wakchakunapas sumaq willakuytam uyarichkanku”, nispa (Mateo 11:4, 5).

Yaqapaschá Juanqa munachkarqa presochasqa kasqanmanta Jesus libraykunanta, ichaqa Juanpa qatiqninkunaman nisqanwanmi Jesusqa nichkarqa huk milagrokunataraq ruwanantaqa Juan ama suyananpaq.

Juanpa qatiqninkuna pasakuptinkuñataqmi Jesusqa chaypi kaq runakunaman nirqa Juanqa Malaquias 3:1 nisqanman hinaqa “willakuq” kasqanmanta, chaynataq Malaquias 4:5, 6 nisqanman hinañataq “Elias” kasqanmanta. Hinaspam nirqa: “Chiqaptapunim nikichik: Warmimanta nacemuqkunamantaqa manam pipas rikurimurqachu bautizaq Juanmanta aswan riqsisqaqa”, nispa. Chaymantapas nirqam: “Chayna kaptinpas hanaq pacha Diospa munaychakuyninpi mana ancha riqsisqa runam paymanta aswan riqsisqaqa”, nispa (Mateo 11:11).

Chayna nisqanwanmi Jesusqa nichkarqa Juanqa hanaq pachaman mana rinanmanta. Juanqa Diospa kachamusqan Cristo hamunanmantam willakurqa, chaywanpas manaraq hanaq pachaman riqkunata Dios akllachkaptinmi wañukurqa (Hebreos 10:19, 20). Chayna kaptinpas payqa Diosman sunqu runam karqa, chaymi Diospa munaynin kay pachapi ruwakuptin wiñaypaq kawsakuytapas atinqa.