Diospa gobiernonpaq tukuyta ruwasun

 1. ¿Imata ruwanankupaqmi achka runakuna tukuyta ruwanku, hinaspa imanasqa?

RUNAKUNAQA imapas munasqankuta ruwanankupaqmi tukuyta ruwanku. Tayta-mamakunam tiemponkuta, qollqenkuta hinaspa kallpankuta servichikunku churi-wawankuta allinta qespichinankupaq. Achka mozo-sipaskunañataqmi hatun pukllaykunapi nacionninkuta puntaman horqonankurayku, amistadninkunawan kusirikuyninkuta qepanchanku tukuy tiemponkuwan preparakunankupaq. Jesuspas allin kaqkunata puntapi churananpaqmi tukuyta ruwarqa. Payqa apu otaq familiayoq kananpaqmi akllakunman karqa, ichaqa Diospa Gobiernonta yanapananpaqmi tukuyta ruwarqa (Mat. 4:17; Luc. 9:58). Qatiqninkunapas Diospa Gobiernonraykum imapas munasqankuta qepancharqaku. Chay Gobierno ancha allin kasqanraykum, paykunaqa llamkayninkutawan familiankuta saqerqaku (Mat. 4:18-22; 19:27). ¿Ima nichwantaq ñoqanchikmanta? Allinmi kanman kayna tapukuyninchik: “¿Imatataq puntapi churani?”, nispa.

 2. a) ¿Imatam lliw cheqap cristianokunaqa ruwananku Dioswan allin amistad kanankupaq? b) ¿Imapaqmi wakin cristianokunaqa imapas munasqankuta qepanchanku?

² Lliw cheqap cristianokuna Jehova Dioswan hinalla allin amistad kayta munaspankuqa tukuytam ruwananku. Arí, tiempotam horqonanku Diosta mañakunankupaq, Bibliata leenankupaq, familiawan Diosta yupaychanankupaq, huñunakuykunaman rinankupaq chaynataq Diosmanta willakunankupaqpas (Jos. 1:8; Mat. 28:19, 20; Heb. 10:24, 25).a Kallpanchakusqanchikta Dios bendecisqanraykum, paymanta willakuyqa hinalla yapakuchkan hinaspapas hinallam achka runakuna ‘Diospa templonpa kasqan orqoman’ yaykuchkanku (Is. 2:2). Chaymantapas, wakin cristianokunaqa imapas munasqankutam qepanchanku Betel wasipi servinankupaq, Huñunakunapaq Salonkunata hinaspa Asambleakunapaq wasikunata ruwaypi yanapakunankupaq, asambleakuna apakunanpaq otaq hatun desgraciakuna pasakuptin yanapakunankupaq. Manamá chaykunata ruwasqanchikraykuchu wiñay kawsaytaqa haypasun. Chayna kaptinpas, ancha allinmi Diospa munaynin ruwakunanpaq.

 3. a) ¿Imaynam tarikusunchik Jehova Diosta servinapaq tukuyta ruwaspaqa? b) ¿Ima tapukuykunatam ruwakunanchik?

³ Kunanmi haykapimantapas astawan Diospa Gobiernonta yanapananchik. Achka iñiqmasinchikkunam tukuyta ruwachkanku tukuy sonqonkuwan Jehova Diosta servinankupaq, chayqa ancha kusikunapaqmi (leey Salmo 54:6). Jehova Diosta servinapaq tukuyta ruwaspaqa, Gobiernon chayamunankamam kusisqa kawsakusun (Deut. 16:15; Hech. 20:35). Chaynaqa, sapakamam kaynata tapukunanchik: “¿Tukuyta ruwaymanchu Diospa Gobiernonrayku? ¿Imaynatam servichikuchkani tiempoyta, qollqeyta, kallpayta hinaspa imapas ruway atisqaykunata? ¿Diosta serviyniypi ima ruwayniykunatataq mana qonqanaychu?”, nispa. Qawasunchik ñawpaq tiempopi Israel runakuna kikinkumanta ofrendakuna qosqanku ima yachachiwasqanchikmanta. Chaymanta yachayninchikmi yanapawasun kusikuywan Jehova Diosta servinapaq.

 4. ¿Imanasqam ancha allin karqa Israel runakunapa ofrendakuna qoyninkuqa?

⁴ Ñawpaq Israel nacionpiqa ofrendataqa qoqku huchankumanta pampachasqa hinaspa Diospa chaskisqan kanankupaqmi. Wakinmi karqa prometekusqanku ofrendakuna, wakinñataqmi karqa kikinkumanta qosqanku ofrendakuna (Lev. 23:37, 38). Chay kikinkumanta qosqanku ofrendakunamantam karqa kañasqa ofrenda qosqanku, chaypiqa lliw animaltam kañaqku. Israel runakunapa ofrendakuna qosqankum sutillata qawakurqa Salomonpa ruwachisqan templo qespiruptin (2 Cron. 7:4-6).

 5. ¿Ima ofrendatam wakchakunaqa qoyta atirqaku?

⁵ Jehova Diosqa yacharqam llapallanku chaynallata mana qoy atisqankumanta, chaymi nirqa kapusqankuman hinalla qonankupaq. Diospa Kamachikuyninpim nirqa animalkunata ofrecenankupaq hinaspa yawarninta altarman tallinankupaq. Chay ofrendakunaqa, Jesusnintakama allin kaqkuna chayamunanpaq ‘llantuy hinallam karqa’ (Heb. 10:1-4). Jehova Diosqa entiendeq kasqantamá qawachirqa. Sichu pi israelitapas ovejakunamanta otaq cabrakunamanta otaq vacakunamanta ofrendata mana qoyta atispanqa, chaypa rantinpim qoqñukunata qonan karqa. Chaynapim wakchakunapas ofrendakunata qoyta atiqku (Lev. 1:3, 10, 14; 5:7). Mayqan ofrendata qoptinkupas Jehova Diosqa chaskirqam, ichaqa ¿imatam Jehova Diosqa suyarqa chay ofrenda qosqanku chaskisqa kananpaq?

 6. ¿Imatam Jehova Diosqa suyarqa ofrenda qosqanku chaskisqa kananpaq, hinaspapas imanasqataq chayta kasukuyqa ancha allin karqa?

⁶ Puntataqa, pipas ofrendata qospanqa allinnin kaqtam qonan karqa. Jehova Diosqa chaskirqa sano animal ofrendakunallatam (Lev. 22:18, 20). Chaymi mana chaskiqchu onqoq animalkuna qosqankutaqa. Chaymantapas, Kamachikuypa nisqanman hinaqa ofrenda qoqqa limpiom kanan karqa. Sichu chayna mana kaspaqa Diospa chaskisqan kananpaqmi huk ofrendata huchallikusqanmanta otaq imapipas pantarusqanmanta apanan karqa (Lev. 5:5, 6, 15). Chayna ruwayninkuqa ancha allinmi karqa. Kamachikuypa nisqanman hinaqa, Diosman mana asuykunanpaq hina kachkaspan kikinmanta qosqanku ofrenda animalpa aychanta mikuruq runaqa chinkachisqam karqa (Lev. 7:20, 21). Ichaqa, Diospa qawasqanman hina limpio chaynataq animal ofrecesqanpas allin kaptinqa, kusikuywan qospanmi hawka tarikuq (leey 1 Cronicas 29:9).

7, 8. a) ¿Imaynam iñiqmasinchikkuna tarikunku Diospa Gobiernonpaq yanapakuspanku? b) ¿Imatam lliw cristianokuna Jehova Diosman qoyta atinmanku?

⁷ Kunan tiempopi achka iñiqmasinchikkunam tukuy sonqonkuwan Jehova Diosta servispanku payta anchata kusichinku. Ancha kusisqataqmi tarikunku hukkunata yanapaspanku. Huñunakunapaq Salonkunata ruwaypi hinaspa hatun desgraciakuna pasakuptin yanapakuq huk iñiqmasinchikmi willakun ancha kusisqa tarikusqanmanta. Paymi nin: “Huñunakunapaq Salonta ruwaypi otaq hatun desgraciakuna pasakuptin yanapakusqaymanta iñiqmasinchikkuna kusisqa kasqankuta hinaspa agradecekusqankuta qawaspaymi, musyakuni kallpanchakusqay mana yanqapaq kasqanmanta”, nispa.

⁸ Jehova Diospa llaqtanqa tukuytam ruwarqa Diospa Gobiernonta yanapananpaq. 1904 watapim iñiqmasinchik Russell nirqa tiemponchikta, qollqenchikta chaynataq tukuy imanchiktapas Jehova Diosta hatunchanapaq allinta servichikunamanta. Tukuy chaykunata Jehova Diosman qoyninchik sasaniraq kaptinpas, ancha kusisqamá tarikunchik (2 Sam. 24:21-24). Chaymi tapukunanchik: “¿Atiymanchu tiempoyta, qollqeyta hinaspa imapas ruway atisqaykunata allinta servichikuyta?”, nispa.

 9. ¿Imatam yachachwan Lucas 10:2-4 nisqanpi Jesuspa rimasqanmanta?

⁹ Tiemponchikmanta. Tiempom necesitakun qellqanchikkunata tikraspa horqonapaq, Salonkunata hatarichinapaq, asambleakuna apakunanpaq chaynataq hatun sasachakuykuna pasakuptin yanapakunapaq. Ichaqa, huk punchawqa utqayllamanmi pasan. Chayrayku, ¿imatam ruwachwan tiemponchikta allinta servichikunapaq? Jesusmi qatiqninkunata Diosmanta willakunankupaq kamachispan nirqa: “Ñanpiqa amataqmi pitapas rimaykunkichikchu”, nispa (Luc. 10:2-4). ¿Imanasqam Jesusqa chaynata kamachinman karqa? Jesuspa tiemponpi runakunaqa manam kunan tiempopi hinachu kumuykuspalla otaq makinkuta haywarispalla rimaykanakuqku, aswanqa achka kutita abrazanakuspanku, pampaman kumuykuspanku otaq qonqorakuykuspankum rimaykanakuqku. Tukuy chaykunata ruwasqankuqa tiempopaqmi karqa. Jesusqa manam qatiqninkunataqa mana rimakuykuq kanankupaqchu kallpanchachkarqa. Aswanqa mana ancha tiempoyoq kasqankuta musyakunankupaqmi yanapayta munarqa hinaspapas aswan allin kaqkunata ruwanankupaqmi tiemponkutaqa servichikunanku karqa (Efes. 5:16). ¿Kasukuchwanchu Bibliapa chayna nisqanta chaynapi Diosmanta astawan willakunanchikpaq?

10, 11. a) ¿Imaynatam yanapakun sonqomanta qollqe qosqanchik? b) ¿Imaynatam yanapawachwan 1 Corintios 16:1, 2 nisqan?

¹⁰ Qollqenchikmanta. Achka qollqem necesitakun Diospa munaynin ruwakunanpaqqa. Diospa llaqtanmi sapa wata millonnintin dolar qollqeta gastan congregacionkuna watukuqkunata, precursor especialkunata chaynataq misionerokunata yanapaspan. Chaymantapas, 1999 watamantam mana ancha qollqeyoq nacionkunapi 24.500 Huñunakunapaq Salonkunata ruwarqaku, ichaqa 6.400 Salonkunaraqmi ruwanapaq kachkan. Hinaspapas, sapa killam ruwakun yaqa 100 millonnintin Willakuq hinaspa ¡Rikchariy! qellqakuna. Tukuy chaykunaqa ruwakun sonqonchikmanta qosqanchikwanmi.

¹¹ Apostol Pablopa nisqanmi allinta yanapawachwan qollqenchikta qonapaq ima ruwanamanta (leey 1 Corintios 16:1, 2). Corinto llaqtapi iñiqmasinkunatam kallpancharqa atisqankuman hina sapa semanapa qallariynin punchawpi wasinkupi qollqeta rakinankupaq, chaynapi sapa semanapa tukuynintaraq mana suyanankupaq. Chaynallataqmi kunanpas sapakama tanteanchik atisqanchikman hina qonanchikpaq (Luc. 21:1-4; Hech. 4:32-35). Chayna qosqanchiktaqa Jehova Diosqa anchatam chaninchan.

12, 13. a) ¿Imayna piensaytaq harkaruwachwan tukuy kallpanchikwan Diospa munayninta mana ruwanapaq? b) ¿Imaynatam Jehova Diosqa yanapawachwan?

¹² Kallpanchikmantawan imapas ruway atisqanchikmanta. Jehova Diosqa kallpanchiktawan imapas ruway atisqanchikkunata paypa munayninta ruwanapaq servichikuptinchikqa yanapawanchikmi. Kikinmi niwanchik mana kallpayoq tarikuptinchik yanapaykuwananchikpaq (Is. 40:29-31). Ichaqa, manam piensananchikchu ñoqanchikmantaqa hukkuna aswan imapas allin ruwaq kasqankuta, ¿imatam ruwachwan chaynata piensaspanchikqa? Yuyarinanchikmi imapas ruway atisqanchikpi Jehova Dios astawan yanapaykuwananchikmanta, chaynatam ruwarqa Bezaleelwan hinaspa Aholiabwanpas (Ex. 31:1-6; qaway 11 kaq paginapi dibujota).

¹³ Diosninchikqa mana recelaspa qonanchikpaqmi kallpanchawanchik (Prov. 3:27). Jerusalenpi templo kaqmanta hatarichisqa kaptinmi, Jehova Diosqa judiokunata nirqa ‘imayna kawsasqankumanta allinta piensarinankupaq’, huk rimaypiqa piensarinankum karqa chay templo hatarichiypi imayna yanapakusqankumanta (Hag. 1:2-5). Paykunaqa aswan allin kaqkunatam mana ruwachkarqakuchu huk ruwaykunapi afanakusqankurayku. Chaymi ñoqanchikpas kaynata tapukunanchik: “¿Diospa munaynin ruwaychu ñoqapaq aswan allin? ¿Piensariymanchu imayna kawsasqaypi chaynapi kay tukupay punchawkunapi Diosmanta willakuypi astawan yanapakunaypaq?”, nispa.

14, 15. a) ¿Imaynatam kallpanchawanchik wakcha iñiqmasinchikkunapa qokuykuq kasqanku? b) ¿Imata ruwanapaqmi kallpanchasqa tarikunchik?

¹⁴ Achka iñiqmasinchikkunam yachanku sasachakuykunapa hinaspa wakchayaypa kasqan nacionkunapi, chaymi Diospa llaqtanqa kallpanchakun yanapananpaq (2 Cor. 8:14). Chaynapi tarikuspankupas, chay iñiqmasinchikkunaqa Diospa llaqtanta yanapanankupaqmi sonqomanta qokuykuq kanku. ¡Anchatamá Jehova Diosninchikqa kusikun mana kapuqniyoq kachkaspankupas sonqomanta atisqankuta qosqankurayku! (2 Cor. 9:7.)

¹⁵ África lawpi huk kaqnin wakchayaypa kasqan nacionpim, wakin iñiqmasinchikkuna huertankupa partenta rakirunku, chaynapi chaymanta imatapas horqosqankuta rantikuspanku chay qollqewan Diospa Gobiernonta yanapanankupaq. Chay nacionllapitaqmi Huñunakunankupaq Salon necesitakurqa. Iñiqmasinchikkunaqa hatarichiypi yanapakuytam munarqaku, ichaqa tarpuy tiempopim chay ruwayqa qallarinan karqa. ¿Chayraykuchu mana yanapakurqaku? Manamá. Salon ruwaypi punchawpi yanapakuspankum tutanñataq tarpuyninkupi llamkaqku. ¡Admirakuypaqmá karqa chayna ruwasqankuqa! Chayna kasqankuqa yuyarichiwanchikmi Macedonia llaqtapi yachaq punta cristianokunata. Paykunaqa “ancha wakcha” kachkaspankupas iñiqmasinku yanapaytam munarqaku (2 Cor. 8:1-4). Chaynallataqyá ñoqanchikpas ‘Dios bendeciwasqanchikman’ hina otaq kapuwasqanchikman hina qosunchik (leey Deuteronomio 16:17).

16. ¿Imakunatam mana qonqananchikchu imapas qosqanchikta Dios chaskiwananchikpaq?

¹⁶ Ichaqa kaytam yuyarinanchik. Israel runakunapa ruwasqankuman hinam imapas qosqanchikqa Dios chaskiwananchikpaq hina kanan. Chaymantapas, aswan allin kaqkunatam puntapi churananchik. ¿Imapaqtaq valenman kallpanchikwan hinaspa kapuqninchikwan hukkunata yanapaspa familianchikta iñiyninkupi hinaspa tukuy imankupi yanapayta qonqaruptinchikqa? ¿Jehova ‘Diosqa chaskiwachwanchu’ chaynata ruwaptinchik? Chayna kaptinqa, yanqapaqchá qosqanchikqa kanman (leey 2 Corintios 8:12). Kallpanchakunanchiktaqmi iñiyninchikpi sapakama allin takyasqa kananchikpaq (1 Cor. 9:26, 27). Ichaqa, sichu Bibliapa nisqanman hina kawsakuspaqa imapas qosqanchikmantam kusisqa tarikusun hinaspapas Jehova Diosmi kusikuywan chaskiwasun.

17, 18. a) ¿Imaynam tarikunchik Diospa Gobiernonta yanapanankupaq kallpanchakuq iñiqmasinchikkunamanta? b) ¿Imata ruwanapaqmi llapallanchik kallpanchakunanchik?

¹⁷ Enteron Pachapi achka iñiqmasinchikkunam ‘ofrenda hina entregakunku’ Jehova Diospa Gobiernonta yanapanankupaq (Filip. 2:17). ¡Anchatamá chayna ruwasqankumanta chaninchanchik! ¿Ima nichwantaq congregacionpi punta apaqkunapa señorankumantawan warmankumantaqa? Anchatamá agradecekunchik paykunapa yanapakuq kasqankumantawan kallpanchakusqankumantaqa.

¹⁸ Achka llamkaymi kachkan Diospa Gobiernonta yanapanapaq. Jehova Diosta mañakuspanchikyá tukuy imaymanata ruwaspa yanapakunapaq kallpanchakusun. Chaynata ruwaspaqa kunan tiempopim achka bendicionkunata chaskisun, astawanraqmi ‘hamuq tiempopiqa’ (Mar. 10:28-30).