Leprawan unquq runam allinyaruspan agradecekurqa

Judiokunapa tukuy rikchaq autoridadninkunam tantearurqaku Jesusta wañuchinankupaq, ichaqa manam atirqakuchu Jerusalenpa hichpan Efrain llaqtaman pasakusqanrayku. Chaypim Jesusqa qatiqninkunawan karqa chiqniqninkuna mana tarinanpaq (Juan 11:54). Ichaqa 33 kaq watapi pascua fiesta chayamunanpaqña kaptinmi Galilea lawman Samaria lawninta chay kutillaña rirqa.

Jesusqa llaqtachakunaman yaykustinmi rirqa, chayna risqanpim lepra unquyniyuq 10 runakunawan tuparurqa. Chay unquywanqa wakinpim unquq runapa dedonpas, rinrinpas utaq imanpas wichiriruq (Numeros 12:10-12). Diospa kamachikuyninpim nirqa leprayuq runaqa “¡millakuypaqmi kani! ¡millakuypaqmi kani!” nispa qaparinanmanta hinaspa karupi yachananmanta (Levitico 13:45, 46).

Chayraykum leprawan unquq chay 10 runakunaqa Jesusmanta karullapi karqaku. Ichaqa nirqakum: “¡Jesus, yachachikuq, llakipayariykullawaykuyá!”, nispa. Jesusñataqmi qawaykuspan nirqa: “Sacerdotekunaman rispayá qawachikamuychik”, nispa (Lucas 17:13, 14). Chaynatam Jesusqa Diospa kamachikuynin kasukusqanta qawachirqa. Chay kamachikuyman hinaqa sacerdotekunallam niqku pipas manaña leprayuq kasqantaqa, chaynapim chayraq sanoyaqkunaqa runakunawan hukllawakuqku (Levitico 13:9-17).

Leprawan unquq chay 10 runakunaqa manam iskayrayarqakuchu imapaqpas Jesus atiyniyuq kasqanmantaqa, chaymi hinallaraq leprawan kaspapas sacerdotekunaman rirqaku. Hinaptinmi richkaptinku lepra unquyninkuqa chinkarurqa.

Chaymantam isqunqa hinalla rirqaku, Samaria lawmanta kaqmi ichaqa Jesusman kutirqa hampiykusqanmanta llumpa-llumpayta agradecekunanpaq. Chaymi “simin huntamanta Diosta hatunchastin” kutirqa, payqa musyakurqam Jehova Dios hampiykusqanta (Lucas 17:15). Jesusman kutiruspanñataqmi ñawpaqninpi kumuykuspan qunquranpa agradecekurqa.

Chayta qawaspanmi Jesusqa chaypi kaqkunata nirqa: “Chunkam sanoyachisqaqa karqankichik. Hinaptinqa, ¿maytaq wakin isqunqa? ¿Kay huk law nacionniyuq runallachu kutiramun Diosta hatunchananpaq?”, nispa. Hinaspam agradecekuq runata nirqa: “Hatarispayá ripukuy, iñiyniyuq kasqaykiraykum sanoyarunki”, nispa (Lucas 17:17-19).

Jesusqa leprawan unquq chay 10 runakunata hampiruspanmi qawachirqa Jehova Diospa yanapasqan kasqanta. Chayta ruwasqanraykum huknin runaqa ichapas wiñay kawsayman apaq ñantawan tarirurqa. Kunanqa manaraqmi Jehova Diosqa ima unquymantapas Jesuswanqa hampiwanchikraqchu, chaywanpas Jesusta qatipakuspaqa atichwanmi wiñay kawsayman apaq ñanninta puriytaqa. ¿Samaria lawmanta runa hinachu chaymanta agradecekunchik?