Jesusqa Jerusalenman risqanpipas yachachirqam

Jesusqa unayñam Galilea lawpi Diosmanta willakurqa achka runakuna uyarisqankurayku, manam chaynachu Judea lawpiqa karqa. Aswanqa Jerusalenpi sabado punchawpi unquqta hampiruptinmi wañurachiyta munarqaku (Juan 5:18; 7:1).

32 kaq watapim ramada sutiyuq fiesta qallarirqa, chayqa septiembre utaq octubre killakunam karqa. Chay fiestataqa cosecha tiempo tukusqantam ruwaqku, hinaspam Diosta kusikuspa agradecekuqku kawsayninkuta qispichisqanmanta. Chaytaqa qanchis punchawmi ruwaqku, pusaq kaq punchawñataqmi hatun huñunakuyta ruwaqku.

Jesustaqa wawqin Santiago, Simon, Josey hinaspa Judasmi hikutasparaq nirqaku: “Kaymanta lluqsispayki Judeaman riy”, nispa. Jerusalenqa lliw Israel runakunapa Diosta yupaychananku llaqtam karqa, chaypim watan-watan kimsa fiestata ruwaqku. Chaymi wawqinkunaqa nirqakuraq: “Manamriki pipas runakunapa riqsisqan kayta munaspanqa pakallapiqa imatapas ruwanchu. Kaykunata ruwachkaspaqa llapa runakunamanyá riqsichikamuy”, nispa (Juan 7:3, 4).

Ichaqa wawqinkunaqa manam Diospa kachamusqan kasqanpaqchu Jesustaqa hapiqku. Chaywanpas munarqakum fiestapi imatapas ruwaspan riqsichikunanta. Jesusñataqmi Jerusalenpiqa wañurachinankuta yachaspan nirqa: “¿Imamantamá qamkunataqa runakuna chiqnisunkichikman? Ñuqatam ichaqa chiqniwanku paykunapa mana allin ruwasqankumanta willaptiy. Qamkunayá fiestamanqa riychik, ñuqaqa manaraqmi chay fiestamanqa risaqraqchu horay manaraq chayamusqanrayku”, nispa (Juan 7:5-8).

Wawqinkuna Jerusalenpi fiestaman risqanku qipallatam Jesuspas qatiqninkunawan kuska pakanpalla rirqa. Paykunaqa manam wakin runakuna hinachu Jordan mayu patantaraq rirqaku, aswanqa chaylla chayanankupaqmi Samaria lawllantaña rirqaku. Chaypi samapakunankupaqmi Jesusqa wakin qatiqninkunata kacharqa ñawpaspa wasita maskamunankupaq. Ichaqa Jerusalenman fiestata ruwaq Jesus risqanraykum Samariapa huk kaqnin llaqtachanpi runakunaqa mana sumaqtachu chaskirqaku, manataqmi samaykachirqakupaschu. Chaymi Santiagowan Juanqa piñakuspa nirqaku: “Señor, ¿munankichu hanaq pachamanta nina uraykamuspan kay runakunata hukllata chinkarachinanpaq ninaykuta?”, nispa (Lucas 9:54). Jesusñataqmi chay nisqanku mana allin kasqanmanta qaqchaspan hinalla Jerusalenman rirqaku.

Chayna richkaptinkum huk escriba runa Jesusta nirqa: “Yachachikuq, maymanña riptikipas ñuqaqa qatisqaykim”, nispa. Jesusñataqmi nirqa: “Atuqkunapam kan uchkun, alton pawaqkunapapas kantaqmi tapan, runapa churinpam ichaqa mana kanchu maypi puñuykunanpaqpas”, nispa (Mateo 8:19, 20). Chaynatam qawachirqa qatiqnin kaspaqa kapuqllanwan kawsakunanmanta. Ichaqa chayta ruwananpaqqa hatun tukuqchusmi chay runaqa karqa. ¿Ñuqanchikqa? ¿Imakunatataq Jesuspa qatiqnin kanapaqqa ruwachwan?

Chaymantam Jesusqa huk runata nirqa: “Qatiqniyyá kay”, nispa. Chay runañataqmi nirqa: “Señor suyaykuway, taytaytaraq puntata pamparamusaq”, nispa. Jesusñataqmi imayna kasqanta riqsispan nirqa: “Wañusqakunayá wañuqninkunata pampachunku, qamyá ichaqa rispayki Diospa munaychakuyninmanta tukuy hinastinpi willakamuy”, nispa (Lucas 9:59, 60). Chay runapa taytanqa kawsarqaraqmi, manachayqa manam Jesuswanqa parlanmanchu karqa. Chay runaqa manamá Diospa munaychakuynintaqa puntapichu churarqa.

Chaymantapas hinalla risqankupim huk runa Jesusta nirqa: “Señor qatisqaykim, ichaqa saqiykuwayraqyá wasiypi kaqkunamanta puntata despedikaykamunayta”, nispa. Jesusñataqmi nirqa: “Pipas takllawan yapuchkaspan qipapi saqisqankunata qawariq runaqa manam Diospa munaychakuyninpaq hinachu”, nispa (Lucas 9:61, 62).

Jesuspa qatiqnin kayta munaqkunaqa Dios yupaychaytam imamantapas puntapi churananku. Yapuq runaqa ñawpaqllata qawaspam yapunan, manachayqa wiksu-wiksutam ruwarunman. Chaynallataqmi qipanta qawananpaq sayaspanqa llamkasqanta mana tukunmanchu. Chaynam imapas saqisqankunata llakikuspan yuyarayaq runaqa wiñay kawsay ñanmanta lluqsirunman.