Judea lawman risqanpi Jesuspa yachachisqan

Jesusqa unayniqmi ‘Jordan mayupa wak law chimpan’ Perea lawpi karqa (Juan 10:40). Ichaqa Jerusalenmanmi hinalla kutichkarqa.

Paywan kuskam qatiqninkunapas chaynataq ‘achkallaña runakunapas’ rirqaku, wakinmi karqaku autoridadkunapaq qullqi mañaypi llamkaqkuna hinaspa huchasapakuna (Lucas 14:25; 15:1). Jesuswanqa rirqakutaqmi chiqniqnin fariseokunawan escribakunapas. Paykunaqa chinkasqa chitachamanta, chinkasqa churimanta hinaspa apu runamantawan Lazaromanta Jesuspa yachachisqanpim yuyaymanananku karqa (Lucas 15:2; 16:14).

Chaymantam Jesusqa qatiqninkunaman kaqmanta yachachirqa Galilea lawpi wakin yachachisqankunamanta, chaytaqa yuyarichirqa ichapas chiqniqnin runakuna chaypi kasqankurayku.

Nirqam: “Pantachikuykunaqa kanqapunim, ichaqa ¡imaynaraq kanqa pantachiq runaqa! [...] Cuidakuychikyá. Wawqiki huchallikuptinqa anyaykuy, wanakuptinñataq pampachaykuy. Huk punchawpi qanchis kutita contraykipi huchallikuspan qanchis kutikama qanman kutimuspa, ‘wanakunim’ nisuptikipas, pampachanaykim”, nispa (Lucas 17:1-4). Qanchis kutimanta Jesuspa rimasqanqa yaqachusmi Pedrota yuyarichirqa haykakama pitapas pampachananmanta tapukusqanta (Mateo 18:21).

Jesuspa yachachisqanwanqa yaqachusmi qatiqninkunaqa mana atinankupaq hina hapikuspanku nirqaku: “Yanapaykuwayku aswan iñiyniyuq kanaykupaq”, nispa. Jesusñataqmi nirqa: “Mostaza muhu sayayllapas iñiynikichik kaptinqa niwaqchikchá kay mora sutiyuq sachata: ‘¡Sapikimanta chutakuruspayki lamar quchapi sapichakuy!’, nispa. Hinaptinqa kasusunkichikmanmi”, nispa (Lucas 17:5, 6). Arí, tumpallapas iñiyniyuq kaspaqa mana atisqanchikkunatam ruwachwan.

Hinaspam Jesusqa yachachirqa mana hatun tukuq kaymanta: “Qamkunapa sirvientekichik chakrapi yapusqanmanta utaq oveja michisqanmanta kutiramuptinqa mayqinnikichiktaq niwaqchik: ‘¡Utqaylla kayman hamuy hinaspa mikunaykipaq tiyaykuy!’, nispa. Ichaqa manachu niwaqchik: ‘Cenanaypaqyá imallatapas yanupamuway hinaspa serviwanaykipaq pachawan churakuspa atiendeway: Mikuyta hinaspa tomayta tukunaykama, chaymantañam qamqa mikunki hinaspa tomanki’, nispa. Patronqa manamá sirviententaqa agradecekunmanchu imapas ruwanallanta ruwasqanmantaqa, ¿aw? Qamkunapas tukuy ima ruwanaykichikta ruwaruspaykichikqa niychikyá: ‘Mana imapaq valeq sirvientem kanchik. Ruwanallanchiktam ruwarunchikqa’”, nispa (Lucas 17:7-10).

Diosta serviqkunaqa lliwmi yachananchik Diospa kaqtaqa puntapi churanamanta hinaspa llaqtanpi kaspa Diosta yupaychayqa ancha kusikunapaq kasqanmanta.

Chaynata Jesus yachachichkaptinmi Mariapawan Martapa kachasqanku runa Jesusman chayarurqa, paykunaqa Judea lawpi Betania llaqtayuq Lazaropa paninkunam karqaku. Chay runam Jesusta nirqa: “Señor, kuyasqayki amistadnikim unquchkan”, nispa (Juan 11:1-3).

Jesusñataqmi Lazaropa unqusqanmanta yacharuspan llumpayta llakikurqa. Chaymantam nirqa: “Chay unquyqa manam wañuchinqachu aswanqa Dios hatunchasqa kananpaqmi, chaynapi Diospa churin chaywan hatunchasqa kananpaq”, nispa. Hinaspam hinallapi iskay punchawña karuspan qatiqninkunata nirqa: “Judea lawman kaqmanta hakuchik”, nispa. Paykunañataqmi iskayrayaspa nirqaku: “Yachachikuq qayninpallataq Judeapi kaqkunaqa rumiwan chuqaparuyta munasurqanki, ¿chaychu kutiytaraq munachkanki?”, nispa (Juan 11:4, 7, 8).

Jesusñataqmi nirqa: “¿Manachu punchawqa chunka iskayniyuq hora? Punchawpi pipas puriqqa manam imawanpas urmanchu achki kasqanrayku. Tutapi puriqmi ichaqa imawanpas urman achkin mana kasqanrayku”, nispa (Juan 11:9, 10). Chaywanqa yaqachusmi Jesusqa qawachiyta munarqa Diospa munayninta ruwayta tukunanpaq punchaw manaraq chayamusqanta. Chaymi tukuyta hinallaraq ruwanan karqa chay punchaw chayamunankama.

Jesusqa nirqataqmi: “Amistadninchik Lazaroqa puñuchkanmi, ichaqa rikchachimuqmi risaq”, nispa. Chayraykum qatiqninkunaqa Lazaro puñusqallanta piensaspa nirqaku: “Señor, sichum puñuylla-puñuchkan hinaspanqa allinyanqachiki”, nispa. Chaymi Jesusqa kaynataña nirqa: “Lazaroqa wañukunmi, [...]. Hakuchikyá payman”, nispa (Juan 11:11-15).

Qatiqnin Tomasñataqmi Judeapi Jesusta wañurachiyta munaptinkupas yanapananpaq hinaspa kuska kananpaq paywan riyta munarqa. Chaymi qatiqmasinkunata nirqa: “Hakuchik ñuqanchikpas paywan wañumunanchikpaq”, nispa (Juan 11:16).