Judas traicionarusqanraykum Jesusta presocharurqaku

Chawpi tuta pasayñam karqa. Sacerdotekunam rimanakurqaku Jesusta traicionananpaq Judasman 30 qullqita qunankupaq. Chaymi Judasqa riqsisqa sacerdotekunatawan fariseokunata pusarqa Jesusta hapinankupaq. Paykunawanqa rirqakutaqmi Romamanta achka soldadokunawan soldadokunata kamachiqkunapas.

Pascua cenata mikunankupaq huñunakusqankupi Judasta Jesus pasakunanpaq niptinqa, yaqachusmi Judasqa chaylla pasarqa riqsisqa sacerdotekunawan rimaq (Juan 13:27). Paykunañataqmi huñururqaku guardiakunata hinaspa soldadokunata. Yaqapaschá Judasqa Getsemani huertaman paykunata manaraq pusachkaspan pascua mikuyta mikusqanku wasimanraq pusarqa. Chaymantam chay runakunaqa Cedron wayqunta pasarqaku Jesuspa kasqan huertaman. Jesusta hapinankupaqmi rirqaku espadayuq, kaspiyuq hinaspa achkiyuqkama.

Judasqa chay runakunatam pusarqa Olivos muqupi Getsemani huertaman, payqa manam iskayrayarqachu Jesus chaypi kananmantaqa. Pasaq semanatapas Betaniamanta Jerusalenman achka kutita rispankum Getsemani huertapi wakinpiqa samarirqaku. Ichaqa chay kutipi tuta risqankuraykum Jesusqa olivos sachakuna llantuptin mana rikupalla karqa. Soldadokunapas manapaschá Jesustaqa haykapipas rikurqakuchu. Hinaptinqa, ¿imaynatataq hapinanku karqa? Judasmi nirqa: “Muchaykusqay runam kanqa, paytam hapinkichik hinaspam ama kacharispa pusankichik”, nispa (Marcos 14:44).

Chay huertaman chayaruptinkum Judasqa Jesustawan apostolninkunata rikururqa, hinaspam paykunaman asuykuspan “¡rimaykullayki yachachikuq!” nispan kuyakuyllawanña Jesusta muchaykurqa. Jesusñataqmi nirqa: “Yaw amigo, ¿imanasqataq kaypi kachkanki?”, nispa (Mateo 26:49, 50). Nirqataqmi: “Judas, ¿muchaykuspachu runapa churinta qipanchanki?”, nispa (Lucas 22:48). Judasqa Jesustam traicionarurqa.

Hinaspam Jesusqa achkinku lawman ichirispan nirqa: “¿Pitataq maskachkankichik?”, nispa. Hinaptinmi huk kaqnin nirqa: “Nazaretmanta Jesustam”, nispa. Jesusñataqmi mana manchakuspan nirqa: “Ñuqam kani”, nispa (Juan 18:4, 5). Chaymi runakunaqa ima niytapas mana atispa pampaman siqaykurqaku.

Jesusñataqmi lluptikurunanmantaqa chay runakunata kaqmanta tapurqa: “¿Pitataq maskachkankichik?”, nispa. Paykunañataqmi kaqmanta nirqaku: “Nazaretmanta Jesustam”, nispa. Jesusñataqmi sumaqllata nirqa: “Ñataq nikichikña ñuqa kasqayta. Ñuqata maskawaspaykichikqa paykunataqa saqiychikyá pasakunankupaq”, nispa. Chayna sasachakuypi kaspanpas Jesusqa rimasqanman hinam apostolninkuna chinkachisqa kanankutaqa utaq imapas pasanantaqa mana munarqachu (Juan 6:39; 17:12). Chaykamaqa manaraqmi mayqinninkupas chinkachisqaqa karqakuraqchu, Judasllam mana allinpiqa tarikurqa (Juan 18:7-9). Chaymi Jesusqa chay runakunata nirqa kuyaqnin apostolninkunataqa ama imananankupaq.

Apostolkunaqa musyarurqakum soldadokuna pampamanta hatarispanku Jesusta hapirunankupaq asuykusqankuta. Chaymi huk kaqnin nirqa: “Señor, ¿kay runakunata waqtaruymankuchu espadawan?”, nispa (Lucas 22:49). Jesus imatapas manaraq nichkaptinmi Pedroqa huknin espadawan Malco sutiyuq runapa rinrinta qurururqa, chay runaqa sacerdotekuna kamachiqpa sirvientenmi karqa.

Jesusñataqmi Malcopa rinrinta llachpaykuspan sanoyarachirqa. Hinaspam mana qunqanapaq yachachikuymanta Pedroman nirqa: “Espadaykita maymi kasqanman kutiykachiy, espadata hapiqkunaqa espadawanmi wañuchisqa kanqaku”, nispa. Jesusqa manam manchakurqachu presocharunankutaqa, ichaqa ¿imataq pasanman karqa ayqikuptinqa? Paymi nirqa: “¿Imaynataq cumplikunman kayna kananmanta Diospa qillqankunapa nisqanqa?”, nispa (Mateo 26:52, 54). Chaymantapas nirqam: “¿Manachu taytaypa vaso quwasqantaqa tomayman?”, nispan (Juan 18:11). Jesusqa wañuchinanku kaptinpas taytanpa munaynin ruwaytam munarqa.

Chaymantam Jesusqa chay runakunata nirqa: “¿Suwatapas hapichkaq hinachu presochawanaykichikpaq espadakunawan hinaspa garrotekunawan hamurunkichik? Sapa punchawmi templopi tiyaykuspay yachachirqani, ichaqa manam presochawarqankichikchu. Tukuy kaykunaqa karqa Diosmanta willakuqkunapa qillqasqan cumplikunanpaqmi”, nispa (Mateo 26:55, 56).

Soldadokuna, paykunapa kamachiqninkuna hinaspa judiokunapa guardiankunam Jesusta hapiruspa chaqnarurqaku. Chayta qawaspam apostolkunaqa ayqikurqaku. Ichaqa ‘mozollaraq’ kaqmi chaypi qiparurqa Jesusta pusaptinku qatiyta munaspan, payqa yaqapaschá Marcos karqa (Marcos 14:51). Ichaqa chay runakuna riqsiruspanku hapiruyta munaptinkum pachantapas saqispan lluptikurqa.