Jesustayá qatipakusun sunqunchikpi hawka tarikunapaq

1, 2. ¿Ima sasachakuypitaq Jesusqa tarikurqa?

WAÑUKUNAN punchawmi Jesusqa llumpay sasachakuypi tarikurqa. Payqa yacharqam chiqniqnin runakuna ñakarichispa wañuchinankumanta. Jesusqa taytanta anchata kuyasqanraykum kusichiyta munarqa. Chaymi payqa yacharqa Diosman sunqu kaspanqa taytanpa sutinta hatunchananmanta. Chaymantapas runakunatam llumpayta kuyarqa, chaymi runakuna wiñay kawsayta chaskinankupaqqa wañunankama Diosman sunqu kanan karqa.

² Sasachakuykunapi tarikuspanpas Jesusqa sunqunpim hawka tarikurqa. Qatiqninkunatam kaynata nirqa: “Hawkayayniytam quykichik”, nispa (Juan 14:27). Jesuspiqa “Diospa hawkayayninmi” karqa, chay hawkayaytaqa tarinku Jehova Diospi hapipakuqkunam. Chaymi Jesusqa sunqunpi hinaspa yuyayninpipas hawka tarikurqa (Filip. 4:6, 7).

 3. ¿Imamantam kay yachachikuypi yachasun?

³ Jesuspa sasachakuyninkunapi hinaqa manachá mayqinninchikpas tarikusunchu, chaywanpas llapanchikmi imawanpas sasachakunchik (Mat. 16:24, 25; Juan 15:20). Chaynaqa, ¿imataq yanapawasun mana llumpayta hukmanyaruspa sunqunchikpi hawka tarikunanchikpaq? Kay yachachikuypim yachasun Jesus kay pachapi kachkaspan ima ruwasqanmanta, chaynapi ñuqanchikpas sasachakuypi tarikuspa payta qatipakunapaq.

 4. 1 Tesalonicenses 5:17 nisqanman hinaqa, ¿imaynatam yachanchik wañukunan punchaw Jesus achka kutita taytanta mañakusqanta?

⁴ (Qaway 1 Tesalonicenses 5:17). Wañukunan punchawmi Jesusqa achka kutita taytanta mañakurqa. Wañukusqanta yuyarinankupaq nispanmi, Jesusqa Diosta mañakurqa qatiqninkunaman tantata manaraq quchkaspan. Hinaspa vinotapas manaraq quchkaspan (1 Cor. 11:23-25). Mañakurqataqmi wañukusqanta yuyarinankupaq huñunakusqan tukuytapas (Juan 17:1-26). Getsemani huertaman chayaruspanpas achka kutitam mañakurqa (Mat. 26:36-39, 42, 44). Wañukunanpaqña kachkaspapas taytantam mañakurqa (Luc. 23:46). Arí, yachasqanchikman hinapas Jesusqa tukuy tiempom taytanta mañakurqa.

 5. ¿Imanasqataq Jesuspa qatiqninkuna sasachakuypi tarikuspanku manchakurqaku?

⁵ Jesusqa taytanta tukuy tiempo mañakusqanraykum ñakariykunata aguantarqa. Qatiqninkunam ichaqa mana pay hinachu ruwarqaku, chaymi sasachakuypi tarikuspanku manchakurqaku (Mat. 26:40, 41, 43, 45, 56). Chay pasasqanmanta, ¿imatam yachachwan? Diosman sunqu kayta munaspaqa Jesus hinam tukuy tiempo Diosta mañakunanchik. Ichaqa, ¿imakunamantam Diosta mañakuchwan?

 6. ¿Imanasqataq ninchik allin iñiyniyuq kayqa hawka tarikunanchikpaq yanapawasqanchikmanta?

⁶ Jehova Diostam mañakunanchik allin iñiyniyuq kanapaqqa (Luc. 17:5; Juan 14:1). Satanasmi Diospa llapallan serviqninkunata ñakarichinqa, chaymi allin iñiyniyuq kananchik (Luc. 22:31). Allin iñiyniyuq kaspaqa hawkam tarikusun achka sasachakuypi tarikuspapas. ¿Imanasqa? Allin iñiyniyuq kaspaqa imapas sasachakuyninchiktam Diospa makinpi churasunchik. Hinaspapas Jehova Dios yanapawananchikmanta mana iskayrayasqanchikmi yanapawasun sunqunchikpi hinaspa yuyayninchikpi hawka tarikunapaq (1 Ped. 5:6, 7).

 7. Robertpa willakusqanmanta, ¿imatam yachachwan?

⁷ Diosta mañakuyninchikqa yanapawasuntaqmi imaña kaptinpas hawka tarikunapaq. Rimarisun 80 watayuq punta apaq Robert iñiqmasinchikmanta. Paymi willawanchik hawka tarikunanpaq ima ruwasqanta, paymi nin: “Ñakariykunata atipanaypaqmi yanapawan Filipenses 4:6, 7 nisqan. Mana qullqiyuq kasqayraykum ñakariq kani, chaymantapas hukmanyarqanim manaña punta apaq kaspay”, nispa. Hina kikinmi nin: “Sunquyman ima llakipas chayaramuptinqa chayllam Diosta mañakuni. Musyakunim sapa kuti sunquymanta Diosta mañakuspay hawka tarikusqaymanta”, nispa.

 8. Juan 8:29 nisqanman hinaqa, ¿imanasqataq Jesusqa sunqunpi hawka tarikurqa?

⁸ (Qaway Juan 8:29). Qatikachasqa kaspanpas Jesusqa sunqunpim hawka tarikurqa. ¿Imanasqam chayna tarikurqa? Ruwasqanwan taytan kusisqa kasqanta yachasqanraykum. Payqa ñakarinan kaptinpas tukuy imapim taytanta kasukurqa. Taytanta kuyasqanraykum payllapaqña kawsarqa. Manaraq kay pachaman hamuchkaspam Jesusqa taytanpa yanapaqnin karqa (Prov. 8:30). Kay pachapi kachkaspanñataqmi tukuy sunqunwan taytanmanta runakunaman willakurqa (Mat. 6:9; Juan 5:17). Willakusqanmi anchata kusichirqa (Juan 4:34-36).

 9. Diosmanta willakuyqa, ¿imanasqataq yanapawanchik sunqunchikpi hawka tarikunapaq?

⁹ Jesustaqa qatipakunchikmi tukuy imapi Diosta kasukuspanchik hinaspa ‘señorninchikpa ruwayninpi tukuy tiempo aswan llamkaspanchik’ (1 Cor. 15:58). “Mana samaykuspa” utaq tukuy tiempo Diosmanta willakuptinchikqa manañam umanchikqa sasachakuyllanchikpiñachu kanqa (Hech. 18:5). Uyariwaqninchik runakunam ñuqanchikmantaqa aswan sasachakuyniyuq kanku, Jehova Diosta riqsispa hinaspa nisqanta kasukuspankum ichaqa, allin hinaspa kusisqa kawsakunku. Chaykunata qawaspanchikmi Diosman astawan hapipakunchik hinaspa sunqunchikpipas hawka tarikunchik. Yaqa chaynam pasarurqa huk iñiqmasinchikta, payqa unay watañam hukmanyasqa kaspan mana kaqpaq hapikuq hinaspa nisyuta llakikuq. Paymi nin: “Diosmanta tukuy tiempo willakusqayraykum manaña sunquypiqa llumpaytachu llakikuni, astawanqa kusisqañam tarikuni. Diosmanta willakusqayraykum chaynaqa tarikuni hinaspapas pay ñuqawan kasqantam musyakuni”, nispa.

10. Brendapa willakusqanmanta, ¿imatam yachachwan?

¹⁰ Rimarisuntaq Brenda sutiyuq iñiqmasinchikmanta. Paywan warmi wawanmi mana hampiy atina unquywan ñakarinku, chaymi Brendaqa mana imatapas ruwachkaspan pisipan, hinaspapas hukpa tanqasqallanñam purin. Atikuptinqa Diosmantam willakun wasin-wasin rispa, astawanqa willakun cartawanmi. Paymi nin: “Kunan tiempo mana pipas hampiway atisqanta yachaspaymi, Diosmanta astawan willakuyta qallaykurqani. Diosmanta willakuq lluqsispaymi sasachakuyniykunatapas qunqarini. Chaymantapas ñuqaqa astawanmi yachasqay lawpi runakunata imayna yanapanaypaq yuyaymanani. Yuyaymananitaqmi hamuq tiempopi Dios ñuqanchikrayku ima ruwananpipas”, nispa.

11-13. (1) ¿Imaynatam Jesuspa qatiqninkuna hinaspa hukkunapas allin amistad kasqankuta qawachirqaku? (2) ¿Imaynam Jesusqa tarikurqa chayna amistadninkunawan kaspan?

¹¹ Jesustaqa Diosmanta willakusqanraykum runakuna sasacharqaku. Chayna sasachakuypi tarikuptinmi qatiqninkuna yanaparqaku. Paykunaqa Proverbios 18:24 nisqanman hinam karqaku. Chaypim nin: ‘Kantaqmi wawqinmantapas aswan hapipakunapaq hina amigokunapas’, nispa. Paykunatam Jesusqa anchata kuyarqa. Chay tiempopiqa Jesuspa wawqinkunaqa manam paypa qatiqninchu karqaku (Juan 7:3-5). Huk kutipim ayllunkunaqa nirqaku Jesus locoyarusqanta (Mar. 3:21). Jesuspa qatiqninkunam ichaqa mana chaynachu karqaku. Chaymi wañukunanpaq kachkaspan paykunata nirqa: “Qamkunam sasachakuykunapi kaptiypas tukuy tiempo ñuqawan karqankichik”, nispa (Luc. 22:28).

¹² Wakiqninpiqa Jesustam qatiqninkuna llakichirqaku, chaywanpas Jesusqa manam imapas pantasqankutachu qawaq. Payqa qawaq allin kayninkutam (Mat. 26:40; Mar. 10:13, 14; Juan 6:66-69). Wañukunanpaq huk tutallaña kachkaptinmi Jesusqa qatiqninkunata nirqa: “Qamkunataqa sutichaykichik ‘amistadniykuna’ nispañam, taytaymanta tukuy ima uyarisqaykunata qamkunaman willasqayrayku”, nispa (Juan 15:15). Arí, Jesustaqa kuyasqan amistadninkunam allinta kallpancharqaku. Chaywanqa Jesusqa mayna kusisqachá tarikurqa (Luc. 10:17, 21).

¹³ Wakin qatiqninkunamantapas karqataqmi huk amistadninkunapas. Wakinkum wasinkuman pusaqku mikuykachinankupaq (Luc. 10:38-42; Juan 12:1, 2). Wakinkuñataqmi Jesusta riysiqku maymanña riptinpas hinaspa kapuqninkuwan yanapaqku (Luc. 8:3). ¿Imanasqataq Jesuswanqa hukllawakuyta munaqku? Allin runa kasqanraykum. Payqa hukkunatam yanapaq hinaspapas manam mana atisqankuta ruwanankupaqqa niqchu. Jesusqa mana pantaq runa kachkaspanpas payrayku tukuy ima ruwasqankutam anchata agradecekuq. Arí, Jesus hawka tarikunanpaqmi amistadninkunaqa allinta yanapaqku.

14, 15. (1) ¿Imaynatam tarichwan allin amistadkunata? (2) ¿Imaynatam paykunaqa yanapawasunchik?

¹⁴ Allin amistadkunaqa yanapawasunmi Diosman sunqu kanapaq. Chayna hukkunawan kananchikpaqmi ñuqanchikpas kallpanchakunanchik (Mat. 7:12). Bibliapas niwanchikmi hukkunapaq allin kaqkunata ruwananchikpaq, astawanraqmi mana imayuqkunapaqqa (Efes. 4:28). Ñuqanchikwan huñunakuq iñiqmasinchikkunapim yuyaymanananchik. ¿Kachkanchu pi iñiqmasinchikpas unqusqanrayku utaq imaraykupas wasinmanta mana lluqsiy atiq? Paykunataqa yanapaykuchwanmi ima pisipusqantapas rantiykapuspanchik. Mana ancha kapuqniyuq iñiqmasinchikkunatapas qayaykuchwanmi kuska mikurunapaq. ¿Yachanchikchu jw.org^® nisqanman imayna yaykuyta, utaq allintataqchu servichikunchik JW Library^® nisqanta? Chayna kaptinqa iñiqmasinchikkunapas chaykunata allinta servichikunankupaqyá yanapaykusun. Arí, hukkunata yanapananchikpaq kallpanchakuspanchikqa kusisqam tarikusun (Hech. 20:35).

¹⁵ Amistadninchikkunaqa yanapawasunmi sasachakuyninchikkunata atipananchikpaq, yanapawasuntaqmi sunqunchikpi hawka tarikunanchikpaqpas. Imaynam ñawpaq tiempopi Eliu Jobpa nisqankunata sumaqllata uyariykurqa, chaynam allin amistadninchikkunaqa llakinchikkunata willakuptinchik sumaqllata uyariykuwasun (Job 32:4). Chayna kaptinpas manam paykuna ñuqanchikrayku tantianankupaqqa ninanchikchu, ichaqa allinmi kanman bibliapa nisqanman hina imam niwasqanchikkunapi yuyaymanay (Prov. 15:22). Chaymantapas kamachiq David hinam kananchik, sasachakuypi tarikuspaqa mana hatun tukuspam amistadninchikkunapa yanapakuyninta chaskikunanchik (2 Sam. 17:27-29). Arí, chayna amistadkunaqa Diosmantam hamun (Sant. 1:17).

16. Filipenses 4:6, 7 nisqanman hinaqa, ¿imaynatam hawkayaytaqa tarichwan? Willarimuy imanasqa chayna nisqanchikmanta.

¹⁶ (Qaway Filipenses 4:6, 7). Jehova Diospa nisqanman hinaqa, ¿imanasqataq hawkayaytaqa tarichwan Jesusnintakama? Jehova Diospa munaynin paynintakama ruwakusqanraykum. Chaymi sunqunchikpi hinaspa yuyayninchikpi hawkalla tarikunapaqqa Jesuspa nisqankunapi hapipakunanchik. Yachasqanchikman hinam Jesus vidanta qusqanrayku huchanchikmanta pampachasqa kanchik, chayqa sunqunchiktam tiyaykachin (1 Juan 2:12). Manam chayllachu, yachanchiktaqmi manapas unaymanta Jesus kamachiq kaspan satanasta hinaspa ruwasqankunata chinkachinanmanta, chaypas sunqunchiktam tiyaykachin (Is. 65:17; 1 Juan 3:8; Apoc. 21:3, 4). Chaymantapas kallpanchasqam tarikunchik Jehova Diosmanta willakuptinchik Jesus ñuqanchikwan kasqanta yachaspanchik (Mat. 28:19, 20). Kaykunamanta yachaspanchikqa hawkayaypim tarikunchik, ¿aw?

17. (1) ¿Imata ruwaspam sunqunchikpi hawka tarikuchwan? (2) Juan 16:33 nisqanman hinaqa, ¿imatam atipasun?

¹⁷ Llumpay sasachakuypi tarikuspaqa, ¿imatam ruwananchik sunqunchikpi hawka tarikunanchikpaq? Jesustam qatipakunanchik. Jesus hinam tukuy tiempo Diosta mañakunanchik, Jehova Diospa nisqankunata kasukuspam sasachakuypi tarikuspapas tukuy sunquwan Diosmanta willakunanchik. Chaymantapas amistadninchikkunapa yanapawasqanchiktam chaskikunanchik. Chaykunata ruwaptinchikqa Jehova Diospa hawkayayninmi sunqunchiktawan yuyayninchikta waqaychanqa. Hinaspapas Jesus hinam ñuqanchikpas ima sasachakuykunatapas atipasun (qaway Juan 16:33).