¿Imamantam Jesuspa wañukusqanqa librawanchik?

Adanwan Evam mana kasukuspanku Diosmanta karunchakururqaku. Chayraykum ñuqanchikpas huchayuq kaspanchik ñakarinchik hinaspa wañunchik.a Chaymi Jehova Diosqa churinta kachamurqa huchamantawan wañuymanta librawananchikpaq. Bibliapim nin Jesuspa wañukusqanwan huchamantawan wañuymanta librasqa kasqanchikta (leey Mateo 20:28). Jesusqa mana huchayuq kasqanraykum wiñaypaq kay allpa pachapi kawsakunman karqa, ichaqa ñuqanchikraykum wañukurqa chaynapi Dioswan kuyachikuspa wiña-wiñaypaq kawsakunanchikpaq. Chaywanmi yachanchik Jehova Dioswan Jesusqa anchata kuyawasqanchikta. Kay yachachikuypim yachasunchik Jesuspa wañukusqanmanta tukuy sunqunchikwan agradecekunapaq.

1. ¿Imaynatam yanapawanchik Jesuspa wañukusqanqa?

Llapallanchikmi munanchik Dioswan kuyachikuytaqa, ichaqa pantaq runakuna kasqanchikraykum Diospa mana munasqankunata ruwanchik. Chaymi huchanchikkunamanta Jehova Dios pampachaykuwananchikpaq Jesuspa sutinpi mañakunanchik, hinaspapas mana allinkuna ruwasqanchikmantam wanakunanchik (1 Juan 2:1). Bibliapim nin: “Cristoqa huk kutillatam runakunapa huchanrayku wañukurqa, mana huchayuq runam huchasapakunarayku wañukurqa, chaynapi Diosman asuykunaykichikpaq”, nispa (1 Pedro 3:18).

2. Jesuspa wañukusqanrayku, ¿imaynañataq kawsakusunchik?

Taytanchik Jehova Diosmi kuyawasqanchikrayku churinta kachamurqa, ‘haykam paypi iñiqqa mana wañuchisqa kananpaq, aswanqa wiñay kawsayniyuq kananpaq’ (Juan 3:16). Jesuspa wañukusqanwanmi Jehova Diosqa Adanpawan Evapa huchallikusqankumanta librawasun. Chaymi Jesuspa wañukusqanpi iñispaqa kay allpa pacha suma-sumaq kaptin wiña-wiñaypaq kawsakusunchik (Isaias 65:21-23).

ASTAWAN YACHAYKUSUN

3. Jesusqa wañukusqanwanmi wañuymantawan huchamanta librawanchik

VIDEO: ¿Imanasqataq Jesusqa wañukurqa? (1 kaq) (2:01)

• Adan kasukuspanqa ¿imaynam kawsakunman karqa?

Leeychik Romanos 5:12 hinaspa qatiqninmanta rimariychik:

• ¿Imaynam kawsachkanchik Adan huchallikurusqanrayku?

Leeychik Juan 3:16 hinaspa qatiqninmanta rimariychik:

• ¿Imapaqmi Diosqa churinta kay pachaman kachamurqa?

1. Adanqa mana pantaqmi karqa, chaywanpas Diostaqa manam kasukurqachu, chaymi kunanqa huchayuq kanchik hinaspa wañunchik.

2. Jesuspas mana pantaqmi karqa, Diosta kasukuspan ñuqanchikrayku wañukusqanwanmi wiñaypaq kusisqa kawsakusun.

4. Jesuspa wañukusqanqa lliw runatam yanapan

VIDEO: ¿Imanasqataq Jesusqa wañukurqa? (2 kaq) (2:00)

• ¿Imaynataq Jesuspa wañukusqallanwanqa lliw runa huchanchikmanta pampachasqa kachwan?

Leeychik 1 Timoteo 2:5, 6 hinaspa qatiqninmanta rimariychik:

• Adanqa mana pantaqmi karqa, chayna kachkaspanpas mana kasukusqanraykum wañuyman aparuwarqanchik. Jesuspas mana pantaqmi karqa, chayrayku ¿imatam ruwarqa huchamantawan wañuymanta librawananchikpaq?

5. Diosqa payman asuykunaykita munasqanraykum churinta kachamurqa

Diosta serviqkunaqa manam iskayrayankuchu paykunarayku Jehova Dios churinta kachamusqanmantaqa. Apostol Pablopas chaynatam qillqarqa. Leeychik Galatas 2:20 hinaspa qatiqninmanta rimariychik:

• ¿Pipaq Jesus wañukusqanmantataq apostol Pablo nirqa?

Adan huchallikurusqanraykum llapallan mirayninkuna wañuqlla kanchik. Jehova Diosmi ichaqa churinta kachamurqa manaña wañuspa qampas wiñaypaq kawsakunaykipaq.

Jehova Diosqa maynatach llakikurqa churinta ñakarichiptinku. Chaymanta yachaykunaykichikpaq leeychik Juan 19:1-7 hinaspa 16-18, chaymantañataq qatiqninmanta rimariychik:

• Diosqa anchatam llakikurqa Jesusta ñakarichiptinku, Jesuspas ñakarillarqam ñuqanchikrayku, ¿imaynam chaymanta yachaspayki sientekunki?

YUYARIYKUSUN

Jesus wañukusqanraykum Jehova Diosqa huchanchikmanta pampachawanchik. Chayraykutaqmi wiña-wiñaypaq kawsakusun.

¿Ima niwaqtaq?

• ¿Imamanta librawananchikpaqmi Jesus wañukurqa?

• ¿Imanasqam Jesusqa mana pantaq kasqanrayku Adanpa huchanmanta librayta atiwarqanchik?

• ¿Imapaqmi yanapasunki Jesuspa wañukusqan?

ASTAWAN YACHANAYKIPAQ

Yachaykuy imanasqa Jesuspa wañukusqanqa Adanpa huchanmanta librawasqanchikta.

“¿Imamantataq Jesusqa librawanchik?” (Tarinkim jw.org nisqanpi)

Wiñaypaq kawsakuyta munaspaykiqa, ¿imatam ruwanayki? Chaymanta kaypi leeykuy.

“¿Imaynatataq Jesusqa salvawanchik?” (Tarinkim jw.org nisqanpi)

¿Diosqa pampachaykuwachwanchu llumpa-llumpayta huchallikuruptinchikpas? Chaymanta kaypi leeykuy.

“Bibliamanta tapukuykuna” (Tarinkim jw.org nisqanpi)

Jesus huchanchikrayku wañukusqanmanta yachaymi yanaparqa imayna kasqanta cambiananpaq. Paymanta kaypi leeykuy.

“Manañam tukuy mana allinkuna ruwaqñachu kani” (Tarinkim jw.org nisqanpi)