Jehova Diospa tukuy ima quwasqanchikwan yanapachikusun

1, 2. (1) ¿Imaynatam Jehova Diospa testigonkunaqa bibliata qawanchik? (2) ¿Bibliapi mayqin librotam astawan ñawinchayta munanki?

JEHOVA DIOSPA testigonkunaqa anchatam bibliataqa chaninchanchik. Chaymi bibliata qawaspaqa sumaq yachachikuykunata, imakuna suyakuyninchik kasqanmanta chaynataq hawkayaytapas tarinchik (Rom. 15:4). Bibliaqa manam runakunapa piensasqanman hinachu qillqasqa kachkan aswanqa kikin Jehova Diospa palabranmi (1 Tes. 2:13).

² Bibliata qawaspankum wakinku anchata ñawinchayta munanku Mateo, Marcos, Lucas hinaspa Juan librokunata, chaypim Jesusmanta yachaspa Jehova Diospa imayna kayninkunamanta yachanku (Juan 14:9). Wakinkuñataqmi anchata yachayta munanku Apocalipsis libropi willakuykunamanta, chaypim willakun hamuq tiempopi imakuna kananmanta (Apoc. 1:1). Wakinkuñataqmi Salmos librota leespanku hawkayayta tarinku, hukkunañataqmi Proverbios librota leespanku allin consejokunata tarinku. Chayraykum enteron pachapi runakunapa biblianku kasqanmantaqa mana iskayrayachwanchu.

3, 4. (1) ¿Imaynatam qillqanchikkunata qawanki? (2) Jehova Diospa testigonkunapaq qillqanchikkuna kapuwaptinchikpas, ¿imakunaraqtaq kapuwanchik?

³ Bibliata anchata chaninchasqanchikraykum, wakin qillqanchikkunatapas chaninchanchik. Jehova Dios quwaptinchikmi kapuwanchik tukuy rikchaq qillqanchikkuna. Chaykunam yanapawanchik Jehova Diosman asuykunapaq hinaspa iñiyninchikpi allinta takyanapaq (Tito 2:2).

⁴ Yaqa llapallan qillqanchikkunam Jehova Diospa testigonkunapaq ruwasqa kachkan. Ichaqa wakin qillqanchikkunam ruwasqa kachkan mozo-sipaskunapaq utaq tayta-mamakunapaq. Achka yachachikuykunawan videokunam internetpi kachkan Diosta mana yupaychaq runakunapaq. Chayna achka yachachikuykuna kasqanmi qawachin Jehova Diospa nisqanman hina yupaychaqninkuna iñiyninkupi yanapasqa kasqankumanta (Is. 25:6).

 5. ¿Imamantam mana iskayrayananchikchu?

⁵ Llapanchikmi munanchik aswan tiempoyuq kayta bibliatawan qillqanchikkunata leenapaq. Ichaqa manapaschá chaynallatachu tiempochakusun llapan qillqanchikkunata leenapaqqa. Manam iskayrayachwanchu bibliata hinaspa qillqanchikkunata ñawinchananchikpaq hinaspa estudiananchikpaq tiempochakuptinchik Jehova Dios kusisqa kananmantaqa (Efes. 5:15, 16). Ichaqa kantaqmi pantarachiwananchikpaq kaq sasachakuypas. ¿Mayqantaq chayqa?

 6. ¿Imayna piensaymi mana yanapawachwanchu?

⁶ Sichu bibliapi wakin yachachikuykuna utaq wakin qillqanchikkuna mana ñuqanchikpaq hina kasqanta piensaspanchikqa manam yanapachikusunchu. Ichapas, bibliapi wakin yachachikuykuna mana yanapawasqanchikta ninchik. Utaq wakin qillqanchikkuna mana ñuqanchikpaq hina kasqantapas piensachwan. Chay yachachikuykunata yanqa-yanqallata leespaqa utaq mana leespaqa, manam yanapachikusunchu. ¿Imatam ruwachwan mana chayna kananpaq? Yuyarinanchikmi Jehova Diosmanta tukuy chay yachachikuykuna hamusqanta. Bibliam nin: ‘Yupaychasqayki [Jehova] Diosmi ñuqaqa kani. Allinnikipaq yachachiqnikim kani. Imaynam kawsanaykipaq yachachiqnikim kani’, nispa (Is. 48:17). Kay yachachikuypim qawasunchik kimsa yanapakuykunamanta, kaykunaqa yanapawasunmi bibliapi lliw yachachikuykunawan yanapachikunapaq. Qawasuntaqmi Jehova Diospa quwasqanchik yachachikuykunawan imaynata yanapachikunamantapas.

 7. ¿Imanasqam yanapawananchikta piensaspa bibliata leenanchik?

⁷ Yanapasunaykita piensaspa ñawinchay. Bibliam nin: ‘Llapallan qillqasqa kaqkunaqa Diospa espiritunpa qusqanmi, allinmi yachachiwananchikpaq’, nispa (2 Tim. 3:16). Ichaqa, bibliapi wakin yachachikuykunaqa huk kaqnin runapaq utaq achka runakunapaqmi qillqasqa kachkan. Chayraykum yanapawananchikta piensaspa leenanchik. Huk iñiqmasinchikmi nin: “Bibliata leespayqa yuyarinim huk textollapi achka yachachikuykuna kasqanta. Chaymi kallpanchakuni yuyaymananaypaq”, nispa. Chaymi bibliata manaraq leechkaspa Jehova Diosta mañakunanchik yachayta quwananchikpaq hinaspa yachasqanchikkuna umanchikpi takyananpaq (Esd. 7:10; leey Santiago 1:5).

8, 9. (1) ¿Ima tapukuykunatam ruwakunanchik bibliata leespaqa? (2) ¿Imatam Jehova Diosmanta yachachiwanchik anciano kanapaq imakunata ruwanapaq niwasqanchikqa?

⁸ Tapukuykunata ruwakuy. Bibliata leespaykiqa tiempochakuy kay tapukuykunata ruwakunaykipaq: “¿Imatam kayqa Jehova Diosmanta yachachiwan? ¿Imaynatam ñuqata yanapawan? ¿Imaynatam kayta servichikuyman hukkunata yanapanaypaq?”, nispa. Kayna tapukuykunata ruwakuymi bibliata leeptinchikqa yanapawasun. Yuyaymanay iñiqkunamanta nanachikuq ancianokunapi, bibliapim nin manaraq anciano kachkaspanku imakunata ruwanankumanta (leey 1 Timoteo 3:2-7). Yaqa llapanchikmi mana ancianochu kanchik, ichapas chayrayku nichwan mana yanapawananchikmanta. Sichu qawamusqanchik kimsa tapukuykunata ruwakuspanchikqa achka yachachikuykunatam tarisunchik llapanchikpaq.

⁹ “¿Imatam kayqa Jehova Diosmanta yachachiwan?”. Iñiqmasinchikkuna anciano kanankupaq imakunata ruwanankumanta bibliapi Jehova Diospa qillqachisqanmi qawachin yupaychaqninkunamanta nanachikusqanta. Ancianokunaqa hukkunapa qatipakunanpaqmi kananku. Manam chayllachu, Jehova Diosqa ‘Jesucristopa yawarninwan rantisqanrakum’ yupaychaqninkunata imayna qawasqankumanta ancianokunata cuentata mañanqa (Hech. 20:28). Diosqa munanmi michiqninchik ancianokuna allinta waqaychawananchikta (Is. 32:1, 2). Chaynata qawaptinchikqa, anciano kanapaq imakuna ruwayqa yachachiwanchikmi Jehova Dios ñuqanchikmanta nanachikusqanta.

10, 11. (1) ¿Imaynatam anciano kanapaq bibliapa nisqankunata yachayqa yanapawanchik? (2) ¿Imaynatam hukkunata yanapanapaq servichikuchwan?

¹⁰ “¿Imaynatam ñuqata yanapawan?”. Ancianoña kaspaykiqa sapa kutim bibliapi imakuna nisqanta qawanayki, chaynapi allin kaqkunata ruwanaykipaq. Sichu pi iñiqmasinchikpas anciano kananpaq kallpanchakuspaqa “allin llamkaytam munachkan” (1 Tim. 3: 1). Ichaqa Diosta lliw yupaychaqkunatam kayqa yanapawanchikman. Jehova Diosqa sapakama entiendeq runakuna kananchiktam hinaspa allin yuyayniyuq kananchiktam munan (Filip. 4:5; 1 Ped. 4:7). Ancianokuna qatipakunapaq hina allin michiq kaptinkuqa, atichwanmi paykunapa iñiyninkuta qatipakuyta (1 Ped. 5:3; Heb. 13:7).

¹¹ “¿Imaynatam kayta servichikuyman hukkunata yanapanaypaq?”. Anciano kanapaq bibliapa imakuna nisqantaqa servichikuchwanmi bibliamanta yachay munaq runakunata hinaspa biblia estudiaqkunata yanapanapaq, chaynapi Jehova Diospa llaqtanpi ancianokuna religionpi punta apaqkunawan mana chaynalla kasqankuta qawanankupaq. Chayta yachayqa yanapawachwantaqmi ancianokuna imakunata ruwaspa yanapawasqanchikta. Kayta yachaytaqmi yanapawasun paykunata respetanapaq, paykunaqa ñuqanchikraykum anchata llamkanku (1 Tes. 5:12). Anchata llamkasqankumanta respetaptinchikqa, paykunaqa aswan kusisqam kanqaku (Heb. 13:17).

12, 13. (1) ¿Ima yanapakuykunatam servichikuchwan bibliata estudiananchikpaq? (2) ¿Imatam yacharunchik bibliapi willakuyta astawan estudiaspanchik?

¹² Estudiay. Bibliata estudiaspanchikqa maskachwanmi qatiqninpi tapukuykunamanta yachananchikpaq:

• ¿Pitaq bibliapi kay librota qillqarqa?

• ¿Maypi hinaspa haykapim qillqarqa?

• ¿Imakunam pasakurqa kay librota qillqaptinku?

Chaykunata yachaymi yanapawasunchik allin yachachikuykunata tarinapaq.

¹³ Ezequiel 14:13, 14 nin: ‘Huk kaqnin nacionpi runakuna huchallikuptinqa paykunatam castigarusaq, lliw mikunankutapas chinkarachisaqmi, paykunamanqa yarqayta kachaykuspaymi runakunatapas hinaspa animalkunatapas wañurachisaq. Sichum chay nacionpi yachanmanku Noey, Daniel hinaspa Job hinaspaqa chay kimsallankuch allin ruwasqankurayku salvakunmanku. Chaynatam nini ñuqa [Jehova] Dios’, nispa. Kayta astawan estudiaspam yachanchik 612 wata ñawpaqtaraq Jesus manaraq hamuchkaptin qillqasqa kasqanmanta. Noeywan Job unay watakunaña wañukuptinkupas, Jehova Diosqa manam qunqarqachu payman sunqu kasqankutaqa. Ichaqa Danielmi hinallaraq kawsachkarqa. Payqa yaqapaschá 20 watanpi kachkarqa Noeywan Job hina allin ruwaq kasqanta Jehova Dios niptinqa. ¿Imatam kayqa yachachiwanchik? Jehova Diosqa lliw yupaychaqninkunatam qawawanchik hinaspam chaninchawanchik warmallaraq kaptinchikpas (Sal. 148:12-14).

14. (1) ¿Imaynatam mozo-sipaskunata yanapan paykunapaq lluqsimuq yachachikuykunaqa? (2) ¿Imaynatam wakiqninchiktapas yanapawanchikman? (Qaway 27 paginapi kaq dibujota).

¹⁴ Mozo-sipaskunapaq qillqakuna. Yachamusqanchikman hinam bibliapi lliw yachachikuykunaqa allinta yanapawanchik. Chaynallataqmi llapan qillqanchikkunapas yanapawanchik. Kay punchawkunapiqa astawanraqmi mozo-sipaskunapaq achka yanapakuykuna kachkan.^[1] Chaykunam yanapanqa estudiasqankupi sasachakuykunata atipanankupaq. ¿Imaynatam wakiqninchiktapas yanapawachwan? Chayta ñawinchaspanchikmi musyasun mozo-sipaskuna imakunawan sasachakusqankuta hinaspam chayman hina kallpanchaspa yanapasun.

15. ¿Imanasqam yuyayniyuqkunapas mozo-sipaskunapaq yachachikuykunata ñawinchananku?

¹⁵ Yuyayniyuq iñiqmasinchikkunaqa manam piensanankuchu mozo-sipaskunapaq yachachikuykuna paykunata mana yanapananmantaqa. Chaynata piensayqa hatun tukuy hinam kanman. Mozo-sipaskunapaq yachachikuykunaqa yanapanmanmi yuyayniyuqkunatapas sasachakuyninkuta atipanankupaq. Yaqa llapanchikmi iñiyninchikmanta willakunanchik mana uyariwaptinchikpas, kallpanchakunataqmi hawkalla kanapaqpas, hukkuna hikutawaptinchikpas manam paykuna hinaqa ruwananchikchu nitaqmi mana allin amistadkunawanqa hukllawakunanchikchu hinaspapas mana allin kusirikuytaqa qipanchananchikmi. Kay yanapakuykuna mozo-sipaskunallapaq ruwasqa kaspanpas, bibliamantam ruwasqa kachkan. Chayraykum Diospi llapallan iñiqkunatapas yanapanman.

16. ¿Imaynatawanmi mozo-sipaskunapaq qillqanchikkunaqa yanapakun?

¹⁶ Mozo-sipaskunapaq yachachikuykunaqa manam sasachakuyninkuta atipanallankupaqchu yanapan, astawanmi iñiyninkupi suni takyanankupaq chaynataq Diosman astawan asuykunankupaqpas (leey Eclesiastes 12:1, 13). Chay qillqakunawanqa yuyayniyuqkunapas yanapachikunmankum. Castellano rimaypim lluqsimurqa 2009 watapa abril killanpi ¡Rikchariy! qillqapi “Mozo-sipaskunam tapukunku. ¿Imaynatam bibliata kusikuywan ñawinchayman? niq yachachikuy. Chaypim yanapakuykunata qurqa bibliata imayna leenapaq. Casarasqa wawayuq warmim kaynata qillqarqa: “Sapa kutim biblia ñawinchaytaqa sasachakurqani, ichaqa chay yachachikuykunapa nisqanman hina ruwaptiymi yanapawarqa leesqaykunapi yuyaymanaspay hinaspa kusikuywan bibliamanta hinalla yachanaypaq. ¡Manam haykapipas kayna kusisqaqa karqanichu!”, nispa.

17, 18. ¿Imaynatam lliw runakunapaq qillqasqa yachachikuykunaqa yanapawanchikman? Willamuy.

¹⁷ Qillqanchikkunaqa lliw runakunapaqmi. 2008 watamantam estudianapaq Willakuq qillqanchikqa kapuwanchik, chayqa Jehova Diospa testigonkunallapaqmi ruwasqa kachkan. Ichaqa kantaqmi lliw runakunapaq Willakuq qillqanchikpas. ¿Chay qillqanchikkunapas yanapawachwanchu? Kaypi yuyaymanay: Huñunakuyman hamunanpaq nisqayki runa hamuruptinqa kusisqallañam tarikunki. Chaymantapas iñiqmasinchik ñawpaqmanta yachachimusqanta chay runa uyarisqanpim piensanki, yuyaymanankim imayna tarikusqanpi hinaspa kawsakuyninpi imayna yanapasqanpipas. Yaqa paypas kachkawaq hina tarikuspaykim kusikunki. ¿Manachu huñunakuy tukuytaqa chay yachachikuy ancha allin kasqanta qawarqanki?

¹⁸ Yaqa chaynam ñuqanchikwanpas kanman lliw runakunapaq qillqanchikkunata leeptinchikqa. Jehova Diosta mana yupaychaq runakunapaq Willakuq qillqanchikwan internetpi yachachikuykunaqa mana sasachakuspalla yachanankupaqmi kachkan. Chaykunata leespanchikqa astawanmi bibliapi yachachikuykunata chaninchasunchik. Chaymantapas Diosmanta imayna willakunanchikpaqmi astawan yanapawasun. Yaqa chaynataqmi ¡Rikchariy! qillqanchikpas yanapawanchik Dios kasqanmanta mana iskayrayanapaq hinaspa iñiyninchikmanta tapuwaptinchik kutichinapaq (leey 1 Pedro 3:15).

19. ¿Imaynatam Jehova Dios agradecekusqanchikta qawachichwan?

¹⁹ Sutillatam qawanchik Jehova Diosqa achka yachachikuykunata yanapawananchikpaq quwasqanchikmanta (Mat. 5:3). Hinallayá yachachikuykuna quwasqanchiktaqa leesun hinaspa ruwayman churasun. Chaynata ruwaspam Jehova Dios agradecekusqanchikta qawachisun, payqa allinninchikpaqmi imatapas yachachiwanchik (Is. 48:17).