Leeqkunapa tapukuyninkuna

¿Haykapim Satanasqa hanaq pachamanta qarqomusqa karqa? (Apo. 12:1-9.)

Apocalipsis libroqa manam willawanchikchu haykapi chay pasakusqanmantaqa, ichaqa ninmi imakuna pasasqanmanta, chaymi yanapawasun haykapi kasqanmanta entiendenapaq. Puntataqa sapaqchasqa Gobiernom hanaq pachapi churasqa karqa. Chaymanta qepatam “hatu-hatun guerra karurqa”, hinaptinmi Diablo vencerachikuspa hanaq pachamanta wischuchikamurqa.

Bibliaqa sutillatam qawachin 1914 watapi ‘mana judio runakunapa munaychakusqan tiempo tukusqanta’ chaynataq Diospa Gobiernon munaychakuyta qallarisqantapas (Luc. 21:24).a ¿Hayka tiempotaq pasarqa hanaq pachapi guerra kaptin Satanas qarqomusqa kanankama?

Apocalipsis 12:4 kaynata nin: “Dragon sutiyoq animalñataqmi [otaq Satanasñataqmi] sayachkarqa wachakuywan kaq warmipa ñawpaqninpi, chaypiqa sayachkarqa naceruptillan wawachanta mikurunanpaqmi”, nispa. Kaymi qawachiwanchik Diospa Gobiernon kamachiyta qallaykuptin Satanas chaypunilla chinkarachiy munasqanta. Jehová Diosmi mana saqerqachu Satanas chayna rurananta, ichaqa Diablom chinkarachiytapuni munarqa chayllaraq churasqa Diospa Gobiernonta. Hinaptinqa, ninchikmanmi Diospa Gobiernon waqaychasqa kananpaq ‘Miguelwan angelninkuna’ hanaq pachamanta ‘dragontawan angelninkunatapas’ qarqomusqanta. Chaynaqa, Diospa Gobiernon 1914 watapi kamachiyta qallarisqan qepallatam Satanasqa vencerachikuspa hanaq pachamanta qarqochikamurqa.

Chaymantapas, hanaq pachaman riq cristianokunapa kawsarimusqanpipas piensarinanchikmi. Bibliapa nisqanman hinaqa 1914 wata qepatam kayqa qallarirqa (Apo. 20:6).b Ichaqa manam ninchu dragonpa hinaspa angelninkunapa contranpi hanaq pachaman riqkuna peleasqankutaqa. Hinaptinqa, Cristopa wawqenkuna kawsarimuyta qallariptinkuqa, hanaq pachapi guerraqa karurqañachá hinaspa Satanaspiwan demonionkunapas qarqosqañachá karqaku.

Chaynaqa, Bibliaqa manam ninchu haykapim Satanaswan angelninkuna hanaq pachamanta qarqomusqa kasqankutaqa, ichaqa tukuy imam qawachiwanchik 1914 watapi Jesucristo Kamachimunanpaq churasqa kasqan qepata pasasqanta.

[Willakuykuna]