Familianchikwan hinaspa sapanchikpi estudianapaq yanapakuykuna

JEHOVÁ DIOSPA testigonkunaqa 2009 watapa enero killanmantam, enteron Pachapi qallaykurqanchik ñawpaqpi iskay punchaw huñunakuy apakusqanta huk punchawllapiña rurayta. Diospa Llaqtanpi Punta Apaqkunam niwarqanchik chay manaña huñunakunapaq punchawpi, familiawan Diosta yupaychanapaq kaqta otaq sapallanchikpi estudianapaq kaqta ruranapaq. ¿Allintapunichu servichikuchkanchik?

Achka iñiqmasinchikunam tapukurqaku ima qellqakunata estudianankumanta. Manamá llapallanchikchu hina kaq qellqallataqa estudiananchik, aswanmi sapakama tanteakuna ima qellqakuna kikinchikta otaq familianchikta yanapananmanta.

¿Imakunatam chay tutapi rurachwan? Wakin iñiqmasinchikkunaqa huñunakuykunapaqmi preparakunku, ichaqa manam chayllatachu rurananku. Leechwanmi Diospa Palabranta hinaspa qellqanchikkuna leesqanchikmantapas rimarichwanmi chaynataq warmachakuna kaptinqa actuacionta hinam rurachwan. Chaymantapas manam huñunakuypi hinachu tapukuywan hinaspa kutichiywan rurana. Chay huñunakuyqa kusikunapaq hinam kanan, chaynapim llapallanku rimariyta munanqaku hinaspapas kallpanchanakunqaku. Arí, llapallankum ima piensasqankuta rimanqaku, chaykunawanmi familiawan Diosta yupaychayninchikqa ancha kusikunapaq kanqa.

Kimsa churiyoq wawqenchikmi nirqa: “Yaqa llapanpim Bibliata leeniku. Llapaykutaqmi tiempowanraq leeniku, hinaspa warmaykunapas munasqankumanta estudianku. Chaymantañataqmi huñunakuniku yachasqankumanta willakunankupaq. Michael [7 watayoq] warmaymi wakinpi dibujokunata pintan otaq qellqanpas. Davidwan Kaitlyn [13 hinaspa 15 watayoq] warmaykunañataqmi leesqankunata kikinkutapas pasasqanman hina qellqanku. Ejemplopaq: [Genesis 40 capitulonpi] panaderopa hinaspa faraonpa vino serviqninpa mosqokusqankumanta leeruptiykum, Kaitlyn warmay qellqarqa Joseywan carcelpi kachkanmanpas hina”, nispa.

Sapakama ayllukunam mana chaynallachu kanchik, chaymi ichapas qampaqqa huk ruraykuna aswan allin kanman. Qatiqnin paginapim achka yanapakuykunata tarinki sapallayki otaq familiaykiwan estudianaykipaq. ¿Imakunatawanraqmi rurawaq?

[6 hinaspa 7 kaq paginakunapi dibujo hinaspa recuadro]

Familiapi mozo-sipaskuna kaptin:

• Los jóvenes preguntan qellqapa mayqan yachachikuynintapas leespam rimawaqchik.

• Bibliapa huk kaqnin willakuyta leespam tapuwaq: “¿Imatam qamqa rurawaq karqa?”, nispa (qaway w96-S 15/5 pág. 14 párrs. 17-18).

• Rimawaqmi Dios serviypi ima haypay munasqankunamanta.

• Rimariwaqchikmi Bibliamanta horqosqa videokunata qawaspa.

• Estudiaychik Llaqta Cuidaq qellqapi, “Mozo-sipaskunapaq” niqmanta.

Mana wawa-churiyoq casadokuna:

• Estudiawaqchikmi Familiaykiwan kusisqa kawsakuy qellqapa 1, 3 hinaspa 11-16 kaq yachachikuyninkunata.

• Biblia leesqaykichikmanta huk kaqnin yachachikuyta estudiaspa rimariychik.

• Preparakuwaqchikmi Biblia Estudianapaq Huñunakuypaq otaq Llaqta Cuidaq qellqatapas.

• Rimawaqchikmi casado hina imayna astawan predicanamanta.

Sapallan kaqkuna:

• Estudiawaqmi kimsa punchaw asambleapi chaskisqanchik qellqakunata.

• Leewaqmi kay watapaq Anuario qellqata otaq pasaq kaqkunatapas.

• Maskawaqmi predicaypi sapa kuti tapuwasqanchikpa kutichiyninta.

• Ensayawaqmi predicasqayki lawpi runakunawan rimayta qallarinapaq.

Uña warmachayoq familiakuna:

• Actuaychik Bibliapi runakunapa rurasqanmanta.

• ¡Despertad!, qellqapa 30 hinaspa 31 paginankunapi kaqtam rurawaqchik.

• Yuyaymananapaq kaqkunatam rurawaq (qaway 1996 watapa 8 de marzo ¡Despertad!, qellqapi 16-19 paginankunata).

• Estudiawaqmi Llaqta Cuidaq qellqapi, “Churi-wawaykichikta yachachiychik” niq yachachikuyta.