¿Allinchu kanman pitapas sabado punchawpi hampiy?

Jesusqa yaqachá Galilea lawman chayaruspan sabado punchaw yupaychana wasiman rirqa. Chaypim tarirurqa makinta mana haywariy atiq runata (Lucas 6:6). Escribakunawan fariseokunañataqmi Jesusta pantarachiyta munaspanku ima ruwasqantapas qaway-qawaqku. Chaymi sacrellawanña nirqaku: “¿Allinchu kanman sabado punchawpi sanoyachiy?”, nispa (Mateo 12:10).

Chay runakunaqa niqkum pipas wañuy patanpi kaptillan sabado punchawqa hampisqa kananmanta, chaymi pipas muqakuruptinqa utaq makinta utaq chakinta tullmana kaptinqa mana yanapaqkuchu. Chayraykum chay runakunaqa Jesusta pantarachiyta munasqankuraykulla tapukurqaku, manam runamasinmanta llakipayarikusqankuraykuchu.

Jesusqa sumaqtam yacharqa sacrellawanña imapas nisqankutaqa. Payqa yacharqam sabado punchawpi samanapaq Diospa kamachikuyninta yapa-yaparispa yachachisqankuta (Exodo 20:8-10). Chaymantapas Jesuspa allinkuna ruwasqanmantaqa achka kutipiñam chiqniqninkunaqa rimapakurqaku. Chaywanpas piñakunankuta mana manchakuspanmi Jesusqa chay unquq runata nirqa: “Hatarispayki kay chawpiman hamuy”, nispa (Marcos 3:3).

Hinaspam escribakunatawan fariseokunata qawaspan nirqa: “¿Mayqinnikichiktaq chullalla ovejaykichikta mana hurquwaqchikchu sabado punchawpi uchkuman wichiykuptin?”, nispa (Mateo 12:11). Pipas manam ovejantaqa uchkuman wichiykuptinqa saqiruqchu, hinallapi saqiruptinqa wañuruqmi, hinaptinmi rantikunapaqpas manaña allinñachu karqa. Chaymantapas Diospa palabranqa kamachiqmi uywachakunata allinta qawanamanta (Proverbios 12:10).

Chaymi Jesusqa nirqa: “Ovejamantapas aswan ancha valorniyuqmi runaqa, chaymi sabado punchawpi allin kaqkuna ruwayqa allinpuni”, nispa (Mateo 12:12). Chaynaqa, Jesusqa sabado punchawpi chay unquq runata hampispanpas allinllatam ruwachkarqa, manam Diospa kamachikuynintachu qipanchachkarqa. Chaynapim chay runakunaqa manaña ima niytapas atispanku upallallaña karqaku.

Jesusñataqmi piñakuywan paykunata qawarirqa rumi sunqu kasqankurayku, hinaspam chay unquq runata nirqa: “Haywariy makikita”, nispa (Mateo 12:13). Hinaptinmi makinta haywariykuptin makillanqa chaylla allinyarurqa. Chaymi chay runaqa kusisqallaña karqa, fariseokunawan escribakunam ichaqa mana kusikurqakuchu.

Aswanqa llapallankum “Herodespa qatiqninkunawan chaylla huñunakuspanku tanteanakurqaku Jesusta wañuchinankupaq” (Marcos 3:6). Herodespa wakin qatiqninkunaqa saduceo religionniyuq runakunam karqaku. Saduceokunawan fariseokunaqa chiqninakuqkum Diosmanta mana chaynallata rimasqankurayku. Chaywanpas llapanku Jesusta wañuchiyta munasqankuraykum hukllaña karqaku.