Ñawpaqman purishallaypuni

BIBLIAMANTA yachasqaykiman hinaqa ñawpaqpi imayna yuyaykusqaykita, rimasqaykita, kawsayniykitapas t’ikraytan qallarirqanki, allin saphichasqaña karqan chaypas. Chaytaqa manaraq kay Escuelaman haykushaspaykiraqchá ruwarqanki. Kunanqa ñachá Jehová Diosman qokuspa bautizakurqankiña, chaywanpas wiñarishanallaykin iñiyniykipiqa. Bautismoqa qallariyllaraqmi.

Apóstol Pablon umalli Timoteota nirqan yuyaychasqankunapi Diosmanta chaskisqan llank’aykunapipas ‘makillapuni ruwananpaq [otaq yuyaymanananpaq]’. Nillarqantaqmi: “Chaykunaman k’askakuy, ahinapin iñiypi wiñasqaykita lliwpas sut’ita rikunqaku”, nispa (1 Tim. 4:12-15). Chhaynaqa, Diospa ñanninpi chayllaraq kaqkunapas unayña kaqkunapas wiñarishanallankun iñiyninkupi.

Apóstol Pablon iñiqmasikunata valekurqan Diospa yachachikuyninkunata “anchonmanpas, wask’anmanpas, ukhunmanpas, sayayninmanpas” allintapuni entiendenankupaq (Efe. 3:14-19). Chaypaqmi Jesusqa regalota hina wakin runakunata qorqan, Diospa llaqtanpi yachachinankupaq, anyaykunankupaq, iñiyninkupi wiñachinankupaqpas. Chhaynaqa Diospa Simin Qelqapi yuyaymanaspa, allin iñiyniyoq yachachiqkunawan yanapachikuspan iñiyninchispi “wiñasunchis” (Efe. 4:11-15).

Chhaynata wiñanapaqqa Dios hina Cristo hinan yuyaykunanchis, chhaynapin ‘yuyayninchispas sonqonchispas mosoqman t’ikrasqa kanqa’. Chaypaqmi sapa kutilla yachashanallanchis paykunaq yuyaykusqankumanta, chhaynapi ‘mosoq runawan p’achallikunanchispaq’ (Efe. 4:23, 24). Evangelio qelqakunapi Cristoq ruwasqanmanta leeshaspayki, ¿reparankichu chayman hina kawsanayki kasqanta? ¿Makillachu kashanki Jesuspa imayna kasqanta reparaspa yupinta qatikunaykipaq? (1 Ped. 2:21.)

Iñiypi wiñasqanchistaqa reparallasunmantaqmi imamanta sapa kutilla rimasqanchispi. Mosoq runawan p’achallikuqkunaqa manan llullakunkuchu, k’aminkuchu, qhellikunata rimankuchu, nitaq hukkunamanta yanqata rimankuchu, aswanmi “allin kaqkunallatapuni” rimanku “uyariqkunaq wiñanankupaq necesitasqanman hina” (Efe. 4:25, 26, 29, 31; 5:3, 4; Jud. 16). Huñunakuypiña otaq maypiña kashaspankupas Diospaq hinan imatapas rimanku, chhaynapitaq rikuchikunku mosoqman tukushasqankuta.

Chaymantapas ñawpaqllaman puriqkunaqa manan wawakuna hinañachu “runakunaq tukuy llulla yachachikuyninwan [...] kayman chayman apaykachasqa[chu]” kanku (Efe. 4:14). Chayrayku tapukuy: “¿Aysachikushanichu runakunaq rikhurichimusqanku yanqa yachachikuykunawan? ¿Paykuna hinachu ima ruwanaypaqpas yuyaykushani, kusirikuytapas munashani? ¿Chaykunamanchu aswanta tiempoyta qoyta munashani?” nispa. Sichus Diosman qonanchis tiempota hukman qosunman chayqa, pisipasunmanmi iñiyninchispi. Chayrayku amapuni yanqa ruwaykunapiqa tiemponchista usuchisunchu (Efe. 5:15, 16.)

Ñawpaqllaman puriqkunaqa kallpachakullankutaqmi ‘khuyapayakuq pampachaykukuq’ kanankupaq (Efe. 4:32). ¿Chhaynachu kanki iñiqmasikunapaq?

Huñunakuypi, wasinchispi, escuelapi, callekunapi, llank’anapi, maypiña kashaspapas Jehová Diospa munasqanman hinan kawsananchis, chhaynapin sonqonta kusichisunchis (Efe. 5:21–6:9). Lliwtaq sut’ita rikunqaku iñiyninchispi wiñasqanchista.

Ima ruway atisqanchistapas Jehová Diosmantan chaskirqanchis, chaymi hukkunata yanapananchis paykunapas Diospa khuyapayakuyninta chaskinankupaq. Apóstol Pedron nirqan: “Sapankaykichismi Diospa qosqan atiy qokuyta chaskirqankichis, chaywan hukkunata serviychis, Diospa imaymana qokuyninkunawan allinta llank’aspa”, nispa (1 Ped. 4:10). ¿Allintachu llank’ashanchis Diospa qokuyninkunawan?

Pedroqa nillarqantaqmi: “Pipas willan chayqa, Diospa siminkunata willachun”, nispa (1 Ped. 4:11). Chaypi nisqan hina, Diospa Siminwan tupaqtapunin yachachinanchis Jehová Dios hatunchasqa kananpaq. Chhaynaqa imayna rimasqanchiswanpas paytan yupaychananchis. Chaypaqmi yanapasunki Bibliamanta Allin Yachachiq Kanapaq Escuela, chaypin yachanki imapas ruway atisqaykiwan hukkunata yanapaspa Dios hatunchayta. Ichaqa, ¿imaynatan yachanki chay ruwaypi ñawparishasqaykita?

Kusa rimaq kanapaq askha yachachikuykunatañachá hunt’arqanki, allin kaq discursokunatapas qorqankiña, ichaqa manan chaypichu rikukun ñawparisqaykiqa. Aswanmi qhawarinayki Escuelapi yachasqaykiwan may allintachus Diosman yupaychay sacrificio qosqaykita. Qhawarinallaykitaqmi predicaypi may tukuy ñawparisqaykita, chaypaq tapukuy: “¿Preparakunichu predicanaypaq? ¿Interesakunichu predicasqay runakunapi? Pimanpas predicayta tukushaspa, ¿willanichu hukpi kutispay imamantas parlasunman chayta? ¿Bibliamanta estudiachisqaykunaq sonqonmanchu chayashani?” nispa.

Allin llank’aykunataña Diospa llaqtanpi chaskikurqanki chaypas, chayta imayna hunt’asqaykin rikuchinqa allintachus ñawparishanki icha manachus chayta. Chayrayku, huk discursota qosqayki qhepaman tapukuy: “¿Allintachu yachachimurqani? ¿Uyariqkunaq ruwanankupaq hinachu allinninkupaq rimamurqani?” nispa.

Diosmanta atiy chaskisqaykikuna hukkunaq allinninpaq kananpaqqa qanmi imatapas ñawpaqta ruwanayki. ¿Ninkichu huk iñiqmasikunata qanwan predicanankupaq? ¿Yuyaykushankichu mosoqkunata, wayna-sipaskunata, onqosqakunatapas yanapanaykipaq? ¿Huñunakuy Wasita pichakunan kaqtin chaypichu kashanki? ¿Yanapakunkichu hatun huñunakuykunapaq imaymana ruwaykunapi? ¿Atiwaqchu precursor regular kayta? ¿Yanapakuwaqchu maypichus predicaqkuna necesitakusqanpi? ¿Kallpachakushankichu umalli otaq yanapakuq qhari kanaykipaq? Chay tapuykunapi yuyaymanay. Pipas pay kikinmanta chaykunata ruwaqqa iñiypi wiñarisqantan rikuchishan (Sal. 110:3).

“Mosoqllaraqmi kani, manaraqmi allintachu yachani”, ¿nispachu ninki? Chhayna kaqtinqa, ama pisipaychu. Diospa Siminqa “mana yachaqtan yachayniyoqman tukuchin” (Sal. 19:7; 119:130; Pro. 1:1-4). Bibliaq yuyaychasqanta kasukuspanchisqa Jehová Diospa mana aypay atina yachaynintan chaskikushanchis, chay yachayqa aswan allinmi tukuy kawsasqanchis p’unchaykunapi imaymana yachasqanchismantaqa. Chaywanpas Dios serviyninchispi ñawparisqanchisman hinan aswan allinta imatapas ruwayta atinchis. ¿Imatan ruwasunchis chay atisqanchiswan?

Manan kikinchispi confiakunanchischu. Biblian nin: “Ama yuyaykuychu yachaysapa kasqaykita”, nispa (Pro. 3:7). Chhaynaqa manan ninaykichu: “Yachaniñan kayta imayna allichanaytaqa”, nispa. Imaymanakuna sucedewasqanchis yanapawanchisña sasachakuykuna allichayta chaypas, iñiypi wiñaqkunaqa allintan yachanchis sasachakuykunata atipanapaqqa Jehová Diospa yanapaynin necesitasqanchista. Chhaynaqa, iñiypi wiñasqanchisqa manan kikinchispi confiakusqanchispichu rikukun, aswanmi tukuy sonqowan Jehová Diospa yanapayninta maskhasqanchispi. Manaña hark’awanchischu wakin sasachakuykunamanta chaypas, iñiypi wiñashaqkunaqa allintan yachanchis tukuy imapipas Dios yanapawananchista, chaymi tukuy sonqowan munakuywan payman hap’ipakunanchis.

Apóstol Pabloqa allin iñiyniyoqña, hanaq pachapaq akllasqaña karqan chaypas, “ñawpaqllamanpunin” purishanan karqan kawsay premioman chayananpaq (Fili. 3:13-16). ¿Pay hinachu qanpas kallpachakushanki?

¿Maykamañan ñawparirqanki? Chayta yachanaykipaqqa qhawarikuy may allintachus mosoq runa kaywan p’achallikusqaykita, Jehová Diosta tukuypichu kasukusqaykita, hinallataq imapas ruway atisqaykiwan Jehová Diosta imayna yupaychashasqaykitapas. Bibliamanta Allin Yachachiq Kanapaq Escuelapi yachasqaykiqa yanapasunkin Diospa Simin Qelqaq nisqanman hina rimanaykipaq yachachinaykipaqpas. Chaykunapi allinta yuyaymanay, kusikuytaq chayman hina ruwaspa, chhaynapin lliwpas sut’ita rikunqaku iñiypi wiñashasqaykita.