2 Juan

1 Ñucaca ñami rucu capani. Ñucaca Taita Diospa agllashca huarmiguman y paipa huahuacunamanmi escribijupani. Quiquingunataca ciertopachami juyani. Pero na solo ñucallachu quiquingunataca juyapani. Sino cabal yachachishcacunata yachajushcacunapashmi quiquingunataca juyan. 2 Cabal yachachishcacunamandami quiquingunataca juyapanchi. Chai cabal yachachishcacunaca ñucanchi shungupimi can. Para siempremi ñucanchi shungupi cashpa catinga. 3 Jahua cielopi Taita Dios y paipa Churi Jesucristomi, ñucanchimanga cai cabal yachachishcacunataca cunga y ñucanchitaca juyangami. Paicunami ñucanchimanga ninanda juyashcata* ricuchinga, llaquishcatapash ricuchinga y tranquilo ali causaigutapashmi caranga.

4 Quiquinba huaquin huahuacuna, Taita Dios mandashcashna cabal yachachishcacunata catishpa causanajujta yachaj chayashpaca, ninandami cushijurcani. 5 Shinaca panigu, caishuj chaishuj juyarishpa causapaichi nishpa rogangapami, quiquinmanga escribijupani. Pero chaica na shuj mushuj mandamientochu can, sino ñucanchicuna callarimandapacha uyashca mandamientomi can. 6 Paipa mandamientocunata cazushpa catishpami juyarishpa causashcataca ricuchinchi. Quiquingunaca, juyarishpami causana canguichi nishca mandamientotaca callarimandapachami uyapashcanguichi. 7 Umachijcunaca ashtacacunami cai mundopica ricurimushca. Paicunaca Jesucristo gente tucushpa cai alpaman shamushcataca na crinchichu ninmi. Chaicunaca umachijcuna, anticristomi* can.

8 Ñucanchica shinllitami quiquingunamandaca esforzaripashcanchi. Chaita ama chingachingapami cuidarina capanguichi. Shinami, Taita Dios quiquingunaman carasha nishca bendiciongunataca chasquinguichi. 9 Maijan cashpapash, Jesuspa yachachishcacunata na catishpa y pandacunatara yachachishpaca, Taita Diospa ñaupapica na ali ricurinllu. Pero Jesuspa yachachishcacunata catishpa causajcunaca, Taita Diospa ñaupapipash y Churipa ñaupapipash alimi ricurin. 10 Pipash quiquingunapaman rishpa y Cristo imata yachachishcata na yachachijpica, na quiquingunapa huasipi chasquinachu capanguichi, ni saludaitapash na saludanachu capanguichi. 11 Porque paita saludashpaca, paipa nali ruraicunatami apoyanajunguichi.

12 Ashtaca cosascunatami quiquingunamanga ningapaj munapani. Pero caicunata shuj cartapi escribingapaca na munapanichu. Sino quiquingunapaman rishpa, ñavi ñavi ricushpa parlangapami munapani. Shinami quiquingunaca ninanda cushijupanguichi.

13 Quiquinba ñañaca Taita Diospa agllashcami capan. Paipa huahuacunami saludocunata cachamupan.