Hebreos

11 Feta charijcunaca paicuna imata shuyanajushca pactarinataca seguromi can. Shinallata feta charijcunaca, paicuna imata crishcacuna na ricunalla cajpipash chaicuna cierto cajtaca seguromi can. 2 Punda tiempopi gentecuna tucui shunguhuan crijpimi, Taita Diosca paicunata ali chasquishcata ricuchirca.

3 Taita Diospi tucui shunguhuan crimandami, cai alpapi y jahua cielopi tiashca cosascunata* Taita Dios paipa shimihuan rimashpa ordenbi churashcataca cuenta japinchi. Shinaca, ñucanchi ricunajushca cosascunaca, na ricunalla cosascunamandami tiai callarishca.

4 Abelca tucui shunguhuanmi Taita Diospi crirca. Chaimandami, Caindapash yali ashtahuan ali sacrificiota Taita Diosmanga cararca. Abel tucui shunguhuan crijpimi, Taita Diosca paipa ofrendata chasquishpa paitaca alita rurajmi* can nirca. Chaimi Abelca ña huañushca cashpapash, Taita Diospi tucui shunguhuan crimandaca, cunangaman ñucanchimanga yachachishpa catijun.

5 Enocca tucui shunguhuan crimandami huañuita ama rijsingapaj apai tucurca.* Taita Dios apashcamandami paitaca nipipash na tarita usharca. Enoc nara apai tucujpillatami, Taita Diosca Enochuan cushijushca cashcata ricuchirca. 6 Ashtahuangarin, na tucui shunguhuan crishpaca, Taita Diosta cushichitaca nimamanda na usharinllu. Chaimi Taita Diosman quimirijcunaca, pai tiajta y paita tucui shunguhuan sirvingapaj munajcunata bendiciajtaca crina can.

7 Noeca tucui shunguhuanmi Taita Diospica crirca. Tucui shunguhuan crimandami, nara pasashca cosascunamanda Taita Dios advirtijpica, paita cazurca* y paipa familiata salvangapapashmi Noeca shuj arcata* rurarca. Tucui shunguhuan crimandami cai mundopi gentecuna castigai tucuna cashcata ricuchirca. Shinami Noetaca tucui shunguhuan crishcamandaca, alita ruraj* runami can nirca.

8 Abrahanga tucui shunguhuan crimandami Taita Dios cayajpica, paita cazushpa pai causajushca pushtutaca saquishpa Taita Dios carasha nishca pushtuman rirca. Maiman rijushcata na yachashpapashmi Abrahanga rirca. 9 Abrahanga tucui shunguhuan crimandami, Taita Dios carasha nishca alpapica, ajeno llactapishna, shuj ajeno genteshna causarca. Paica carpa huasigucunapimi Isaac y Jacobhuan causarca. Taita Diosca paicunamanbashmi Abrahanman imata carasha nishpa prometishcatallata prometishcarca. 10 Abrahanga shinlli cimientocunata charij llactatami shuyajurca. Chai llactataca Taita Diosmi imashina ruranata* ricurca y Taita Diosmi chai llactataca shayachirca.

11 Sara huarmigupash Taita Diospi tucui shunguhuan crimandami, huahuaguta charina edad ña yalishca cashpapash vijsayu* quidarca. Taita Dios paiman imata nishcata pactachinataca paica segurami carca. 12 Chaimandami huañushcashna caj runaguca ashtaca huahuacunata charirca. Chai huahuacunaca jahua cielopi estrellacunashna ashtaca ashtacacunapachami* carca. Shinallata, mar yacu manñapi na cuentai ushanalla arena alpashna ashtacacunapachami carca.

13 Tucui paicunami, Taita Dios imata carasha nishpa prometishca chai tiempopi na pactarijpipash Taita Diospi tucui shunguhuan crishpa huañurca. Pero Taita Dios imata prometishcataca carumanda ricujunshna ricushpami, chaicunahuanga cushijurca. Ashtahuangarin, caru llactacunamandami canchi y cai alpapica asha tiempotallami causashun nishpami, shuj gentecunamanga villarca. 14 Shina parlajcunaca, paicunapa shuj pushtuguta tucui shunguhuan mascanajushcatami aliguta ricuchin. 15 Shinapash, paicuna saquishca llactapi cutin cutin pensarinajushca cashpaca, chai llactaman tigrana oportunidadtaca tarinmanmi carca. 16 Shinapash cunanga shuj ashtahuan ali pushtuta taringapami ninanda esforzarin. Shuj ashtahuan ali pushtu nishpaca, cieloman pertenecij pushtutami shina nijun. Shina esforzarishcamandami, Taita Diosca na paicunamandaca pinganayachin, y paita ñuca Taita Dios nijpipash na pinganayachinllu. Ashtahuangarin Taita Diosca shuj llactatami paicunapaca listo charijun.

17 Tucui shunguhuan crimandami Abrahanga pruebapi cashpaca, Isaactaca ña shuj caranaguta cugrijunshna carca. Abrahanga Taita Dios imata cusha nishpa prometishca shimicunata cushijushpa chasquimandami, paipa shujlla churiguta carashcatashna cungapaca ña listo carca. 18 Shinapash Abrahanmanga ñami nishcarca, “canba huahuacunaca* Isaacmandami shamunga” nishpa. 19 Pero paica Isaacta Taita Dios causachinataca yacharcami. Shinami Isaactaca huañushcacunapuramanda causarishcatashna chasquirca. Cashna pasashcaca jipa punllacunaman ima tucunatami ricuchijurca.

20 Isaacca Taita Diospi tucui shunguhuan crimandami, Jacobta y Esautaca, shamuj punllacunapi ima tucunata villashpa bendiciarca.

21 Jacobca Taita Diospi tucui shunguhuan crimandami, ña huañugrijushpaca Josepa churicunataca cada unota bendiciarca. Shinallata paipa tauna caspigupi apoyarishpami, Taita Diostaca adorarca.

22 Joseca, Taita Diospi tucui shunguhuan crimandami, israelitacuna Egipto llactamanda llujshinata villarca y pai huañujpi paipa tullucunata chaimanda apachunbashmi mandarca.

23 Tucui shunguhuan crimandami Moisespa taitamamacunaca, Moisés nacirijpica quimsa quillacaman pacashpa charirca. Moisesca juyala huahuagumi carca. Moisespa taitamamacunaca rey imata mandashcatapash na manllarcachu. 24 Moisesca Taita Diospi tucui shunguhuan crimandami, ña jatun cashpaca, faraonba* ushipa churimi can nichunga na munarca. 25 Pecadota rurashpa asha tiempotalla cushijunapa randica, Taita Diospa llacta israelitacunahuan maltratai tucunatami Moisesca agllarca. 26 Porque paipaca, Taita Diospa agllashca caimanda pingaichi tucunami, Egipto llactapi cosascunamandapash yali ashtahuan valishca carca. Paica bendiciai tucunatami tucui shunguhuan shuyajurca. 27 Moisesca Taita Diospi tucui shunguhuan crimandami, Egipto llactamanda rey culirajpipash na manllashpa Egipto llactamanda rirca. Na ricui ushanalla Taita Diosta ricujunshna ricujuimandami, llaquicunataca pacienciahuan aguantashpa catirca. 28 Moisesca tucui shunguhuan crimandami, israelitacunapa primer churicunata Taita Diospa ángel ama huañuchichunga* Pascua* Fiestatapash rurarca y huasi pungu marcocunapipash yahuarta tsirapachirca.

29 Taita Diospi tucui shunguhuan crimandami, israelitacunaca mar Rojotaca chaquishca alpatashna purishpa yalirca. Pero egipciocunaca chashnallata yalingapaj munaimandami tucuilla chai yacucunapi ahogarirca.

30 Israelitacunaca Taita Diospi tucui shunguhuan crimandami, Jericó llactata muyuriajuj jatun pircacunataca 7 punllacunata muyurca. Y chaimi chai jatun pircacunaca urmarca. 31 Tucui shunguhuan crimandami, nali purij* Rahab shuti huarmica Taita Diosta na cazujcunahuan igualca na huañurca. Paica, Jericó llactata pacalla chapangapaj rishca ishcai jaricunataca aligumanmi chasquirca.

32 ¿Imatata ashtahuanga nipasha? Porque Gedeonmanda, Baracmanda, Sansonmanda, Jeftemanda, Davidmanda, Samuelmanda y shuj profetacunamandapash parlangapaca tiempomi faltanga. 33 Paicunaca tucui shunguhuanmi crirca. Chaimandami, macanajushpa reycunataca misharca, alita rurarca* Taita Dios cusha nishpa prometishca shimicunata chasquirca, leongunapa shimitapash vicharca.* 34 Shinallata rupajuj ninapash paicunataca na imatapash rurarcachu. Espadahuan huañuchi tucunamandapashmi salvarirca, fuerza illa cashcamandapashmi fuerzayucuna tucurca, macanajuna tiempopipash na manllashpami macanajurca, paicunapa llactata atacangapaj rishca soldadocunatapashmi calpachirca. 35 Huaquin huarmigucunaca, paicunapa huañushca familiacuna causarijpimi paicunataca chasquirca. Cutin shuj jaricunaca, llaquinaita macai tucushpapash, salvari tucunamandallaca na Taita Diosta sirvinataca saquircachu. Paicunaca ashtahuan ali causaita charingapaj causachi tucungapaj munaimandami shina rurarca. 36 Cutin shujcunaca burlai tucurca y azialai tucurcami. Chai jahuapash cadenacunahuanmi huatai tucurca y prezo churai tucurcapash. 37 Shinallata huaquingunaca rumicunahuan pigai tucurca* pruebacunata charirca, ishcaipi serruchai tucushpa huañurca, espadahuan huañuchi tucurca, llama carahuan y chivo carahuan rurashca ropacunata* churajushpami caiman chaiman purirca, imagupash illa carca, llaquicunahuan sufrirca y maltratai tucurcapash. 38 Y cai mundoca paicunataca na miricircachu. Paicunaca desiertocunata, urcucunatami purirca y cuevacunapi, alpa utujucunapimi causarca.

39 Tucui paicuna tucui shunguhuan crijpimi, Taita Diosca alicunata paicunamandaca parlarca. Shinapash Taita Dios imata prometishcataca paicunaca na chasquircachu. 40 Paicuna ama ñucanchipa punda perfecto tucuchunmi, Taita Diosca shuj ashtahuan ali premiota ñucanchipaca ña charirca.