Jehová carasha nishcacunataca ricunajunshnami causarca

 1. Imatapash ricujunshnalla pensarinaca ¿imashinata ayudan? (Callari dibujota ricupangui.)

JEHOVÁ DIOSMI gentecunataca imatapash ña chaipi ricujunshnalla pensari ushachun rurarca. Chaimandami ñucanchicunaca shamuj punlla ali causaipipash, imata ruranapipash pensarita ushanchi. Bibliapimi Jehová Diosca shamuj punllacunapica ali causaimi tianga nishpa villajun. Chaita nara ricushpapash chai ali causaipi pensarishpami ñucanchi feta ashtahuan shilliyachinchi (2 Cor. 4:18).

2, 3. a) ¿Imacunapita gentecunaca pensarinchilla? b) ¿Maijan ishcai tapuicunatata cai temapica yachajupashun?

² Huaquinbica napash pactarina cosascunapimi pensarinchilla. Shuj ejemplota ricupashun. Shuj huahuaguca mariposapi tiarishpa volashpa rijushcataca pensarinllami. Shinapash chaica ima horapash na pactaringachu. Cutin Bibliapica Ana shuti huarmigumandami parlan. Paica cierto ima pasanata pensarishpami, paipa churi Samuelta Jehovapa huasiman apana punllapi pensarin carca. Shina pensarishpami Anaca Jehovaman ima nishcata pactachi usharca (1 Sam. 1:22). Ñucanchipash Jehovapa nishcacuna seguro pactarinata crishcamandami chaicunapi pensarina canchi (2 Ped. 1:19-21).

³ Ñaupa punllacunapi Jehovata sirvijcunapash Jehová Dios carana bendiciongunapimi pensarinajun cashcanga. Shinaca shamuj punlla bendiciongunapi pensarinaca ¿imashinata paicunataca ayudarca? ¿Imashinata ñucanchitapash ayudanga?

 4. ¿Imashinata Génesis 3:15​pi shimicunaca shamuj punlla bendiciongunapi pensarichun Abeltaca ayudarca?

⁴ Cai Alpapica Abelmi Jehová Diostaca primero ali sirvi callarirca. Paica Jehová Diospa nishcacuna pactarijtaca na ricurcachu. Shinapash culebrata Jardín de Edenbi cashna nishcataca alimi yacharca: ‘Canhuan huarmihuanga fiñanajushpa causachunmi churagrini. Shinallata canba miraihuanbash, huarmipa miraihuanbash fiñanajuchunmi churasha. Paipa miraimi candaca umapi chugrichinga. Canga chaqui talonbimi chugrichingui’ nishpa (Gén. 3:14, 15). Chai shimicuna imashina pactarinata na yachashpapash Abelca chai shimicunapica pensarijunmi cashcanga. Paica tapurijushcangami ¿pishi talonbi chugrichi tucushpa jucha illaj causaita gentecunaman cutin cunga? nishpa. Imapi pensarijushca cashpapash Jehovapa nishcacuna pactarinataca tucui shunguhuanmi crirca. Tucui shunguhuan crishcamandami Jehová Diosca alicachishpa Abelpa carashcataca chasquirca (Génesis 4:3-5; Hebreos 11:4, liingui).

 5. Jehovapa nishcacunapi pensarinaca ¿imashinata Enoctaca ayudarca?

⁵ Enoc shuti runagupash Jehovataca alimi sirvin carca. Nali gentecunapurapi causashpapash shinlli fetami charirca. Enocca ima pasanata villachishpami gentecunamanga nin carca: ‘Huaranga huaranga angelcunahuan Mandaj Dios shamujujtami ricurcani. Paica Diosta na manllaj runacuna nalita ruranajujta ricuchingapami shamurca. Diosta na manllaj gentecuna paita fiñashpa rimanajushcata ricuchingapami shamunga’ nishpa (Jud. 14, 15). Cai shimicunami Enoctaca nali gentecuna tucurishca punllacunapi ña causajushcata pensarichun ayudashcanga (Hebreos 11:5, 6, liingui).

 6. Jatun Manllanai Tamia Punllacunamanda salvarishca jipaca ¿imapi pensarinashi Noetaca ayudashcanga?

⁶ Noepash Jehovapa nishcacuna pactarinata crimandami Jatun Manllanai Tamia Punllacunamanda salvarirca (Heb. 11:7). Arcamanda llujshishpapash Jehovapi crimandami Noeca Jehovaman carani nishpa huaquin animalgucunata huañuchishpa, mishquillaguta cushnichirca (Gén. 8:20). Noepash Abelshnallatami gentecuna juchamanda, huañuimanda salvarinataca tucui shunguahuan crirca. Chai punllacunapi Nemrod shuti nali runa, Jehovata na cazujpipash, shuj nali gentecuna ashtahuan mirajpipash Noeca Jehovapa nishcacunapi crinataca na saquircachu (Gén. 10:8-12, NM ). Noeca nali gentecuna ña tucurishca punllacunapi causajushcata pensarishpami animarishcanga. Ñucanchicunapash ali gentecunalla causana punllacunapimi pensarina canchi. Chai punllaca ñallapachami chayamunga (Rom. 6:23).

 7. Abrahán, Isaac, Jacobca ¿imapita pensari usharca?

⁷ Abrahán, Isaac, Jacobpash Taita Diospa nishcacunapi crimandami ali causai tianataca seguro carca. Jehová Diosca paicunataca nishcarcami, cangunapa miraimandami tucui llactacuna bendiciai tucunga nishpa (Gén. 22:18; 26:4; 28:14). Paicunapa familia mirashpa shuj jatun llacta tucujpimi Jehová Diosca shuj juyailla Alpagutami carasha nirca (Gén. 15:5-7). Jehovapa nishcacunapi crimandami Abrahanbash, Isaacpash, Jacobpash paipa huahuacuna shuj juyailla Alpagupi ña causanajujta pensari usharca. Jehová Diosca Adán juchata rurashca punllamandapachami gentecunamanga cutin cutin nirca jucha illaj, juyailla causaigutami carasha nishpa.

 8. ¿Imata Abrahandaca Jehovata cazuchun, llaquicuna ricurijpipash shinlli feta charichun ayudarca?

⁸ Abrahanbash, Jehovata shuj sirvijcunapash Jehová Diospa tucuilla nishcacuna pactarijtaca na ricushpami huañurca. Shinapash Jehovapa nishcacuna pactarinataca tucui shunguhuanmi crirca. Bibliapica ninmi, paicunaca ‘Dios imata pactachinatapash, carumanda ricunshna crishpami cushijurca’ nishpa (Hebreos 11:8-13, liingui). Chashna crinami Abrahandaca Jehovata cazuchun, llaquicuna ricurijpipash shinlli feta charichun ayudarca. Ñaupa punllacunapi Jehová Dios paipa nishcacunata pactachishcata crishpami Abrahanga shamuj punllacunapipash Jehová Dios paipa tucuilla nishcacunata pactachinata crirca.

 9. Jehovapa nishcacunapi crinaca ¿imashinata Abrahandaca ayudarca?

⁹ Jehovapa nishcacuna pactarinata crimandami Abrahanga Jehovata cazushpa Ur llactata saquishpa rirca. Shinallata, Jehovata na sirvij reycunapa llactacuna tucurinata ali yachashpami chai llactacunapi causangapajpash na munarca (Jos. 24:2). Ashtahuangarin, tucuilla Alpata Jehová Dios para siempre mandana punllatami shuyanajurca. Bibliapica ninmi Diospa Reinoca ‘Taita Diosllata aligutapacha callarichishca, shinlliyachishca’ pueblomi can nishpa (Heb. 11:10). Abrahán, Abel, Enoc, Noepash huañushcacuna causarinatapash crinmi carca. Chai Paraíso Alpagupi ña causajushcata cutin cutin pensarishpami Jehovapa tucui nishcacuna pactarinataca ashtahuan crirca (Hebreos 11:15, 16, liingui).

10. Jehová Dios bendiciashami nishcata yachaimandaca ¿imacunapita Saraca pensari usharca?

¹⁰ Cunanga Abrahanba huarmi Sarata yaripashun. Paica 90 huatacunatami charirca. Shuj huahuagutallapash na charircachu. Shinapash Jehová nishca shina shuj huahuaguta charinataca crircami. Shinapash ¿imashinata cri usharca? Paica shamuj punllacunapi paipa huahuacuna mirashpa Jehová Dios carasha nishca Alpagupi purinajujta pensarimandami cri usharca (Heb. 11:11, 12). Jehová Diosca Sarapa cusa Abrahandaca nishcarcami: ‘Paita bendiciashpami, paimandapash churita canman carasha. Paitaca bendiciashapachami. Paimandami jatun mandajcunapash llujshinga’ nishpa (Gén. 17:16). Jehová Dios paipa nishcata pactachijpimi Saraca Isaac shuti huahuaguta charirca. Isaacta charishpami Saraca Jehovapa tucui nishcacuna shamuj punllacunapipash pactarinataca tucui shunguhuan crirca. Ñucanchicunapash shamuj punlla bendiciongunata ña chasquishcatashna pensarishpami Jehovapa nishcacuna pactarinataca tucui shunguhuan crishun.

11, 12. ¿Imamandata Moisesca Jehová Diosta ashtahuan ashtahuan juyarca?

¹¹ Moisespash Jehovapa nishcacunapi crishpami Jehovataca tucui shunguhuan juyarca. Moisesca Egipto llactamanda reypa familiahuanmi viñarca. Munashpaca ashtaca cosascunata charinallami carca. Jatun mandajpash tucunallami carca. Shinapash chai cosascunataca Moisesca na munarcachu. ¿Imamandata na munarca? Jehová Diosca pundatallatami nishcarca, israelitacuna esclavocunashna Egiptopi causachunga na munanichu. Paicunataca shuj juyailla Alpagupi causachunmi Egiptomanda llujchisha nishpa. Moisespa taitamamacunaca Jehová Dios shina nishcataca alimi yacharca. Chaimandami, Moisés huahua cajpica chai tucuilla nishcacunata Moisesmanga parlashcanga (Gén. 13:14, 15; Éx. 2:5-10). Moisesca chai ali punllacunapi cutin cutin pensarijuimandami Jehovata ashtahuan juyashpa, Egiptopi charij canataca na munarca.

¹² Bibliapica ninmi: ‘Moisés viñashpaca crimandami, Faraonba ushipa churimi cangui ni tucungapaca na munarca. Paica juchata rurashpa ashacamanlla ninanda cushijushpa causangapaca na munarcachu. Ashtahuangarin Taita Diospa gentecunahuan ninanda llaquichi tucunatami munarca. Moisesca Egiptopi ninanda charijyangapaca na munarcachu. Paipaca Jehovapa agllashca canami ashtahuan importante carca. Paica Jehová carasha nishcacunapi pensarijuimandami shina pensarca (Heb. 11:24-26).

13. Jehovapa nishcacunapi pensarinaca ¿imashinata Moisestaca ayudarca?

¹³ Moisesca Jehovapa nishcacunapica cutin cutinmi pensarijun cashcanga. Gentecunata Jehová Dios huañuimanda salvajpi imashina causanataca, pensarijunmi cashcanga (Job 14:14, 15; Heb. 11:17-19). Jehovapa nishcacunapi siempre pensarijuimandami Moisesca cuenta japirca, Jehová Diosca tucui gentecunata juyajta. Chaimi Moisespash Jehovata ashtahuan juyashpa, Jehovapa nishcacuna pactarinatapash crishpa, paipa tucui causaipipash Jehovata cazushpa causarca (Deut. 6:4, 5). Ashtahuangarin, Jehovapa nishcacuna pactarinata crimandami Moisesca Egiptomanda rey huañuchinatapash na manllarca (Éx. 10:28, 29).

14. Gentecunaca ¿maijan na pactarina cosascunapita pensarinata yachan?

¹⁴ Ashtaca gentecunaca ima horapash na pactarina cosascunapimi pensarin. Huaquin ejemplocunata ricupashun. Bibliapica ninmi: Gentecunaca ‘llaquita apashpa, llaquinaita causangapallami’ causan nishpa. Bibliapi shina nijpipash gentecunaca cai mundopi ninanda charijyashpa tranquilo, ima llaquipash illaj causanapimi pensarin (Sal. 90:10). Bibliapica ninbashmi, Diospa Reinollami gentecunapa tucuilla llaquicunata tucuchinga nishpa. Shinapash gentecunaca pensarinmi, cai mundopi gobiernomi gentecunapa tucui llaquicunata tucuchinga nishpa (Dan. 2:44). Bibliapica ninmi, Taita Diosca nali gentecunata tucuchingami nishpa. Shinapash gentecunaca na imapash pasanatami pensarin (Sof. 1:18; 1 Juan 2:15-17). Biblia ima nijta na crishpa shuj cosascunapira pensarij gentecunaca ninandami llaqui apanga.

15. a) ¿Imamanda shamuj punlla bendiciongunapi pensarinaca alipacha can? b) Paraisopi cashpaca ¿imata ruranatata pensapangui?

¹⁵ Jesusta catijcunaca jahua cielopi causana cashpa o cai Alpapi causana cashpapash Jehová Dios carana bendiciongunapimi pensarinchi. Chai bendiciongunapi pensarinami quiquindaca ashtahuan cushilla causachun ayudanga. Cai Alpapi causana esperanzata charishpaca pensaripai: Cai Alpata shuj juyailla paraíso Alpagu tucuchun tucuicunahuan tandanajushpa cushilla trabajanajujta, tucuicuna Jehovata sirvinajujta, ima llaquipash illaj, ima ungüipash illaj sano purijushcata pensaripai. Shinallata pensaripai, ñaupaman pushaj huauquicuna quiquinda juyashpa, llaquishpa aliguta mandanajujta, quiquinbash gushtashca trabajopi cushilla, ali trabajashpa shujcunata ayudajujta, Jehová Diosta alabajujta, huañushcacuna causarijpi paicunaman Diosmanda yachachijushcatapash pensaripai (Juan 17:3; Hech. 24:15). Chai bendiciongunapi pensarinaca alipachami can. Bibliapi Jehová Dios villachishcamandami chai bendiciongunaca cierto pactaringa (Is. 11:9; 25:8; 33:24; 35:5-7; 65:22).

16, 17. ¿Imamandata Jehová Dios carana bendiciongunapi pensarinaca ali can?

¹⁶ Paraisopi imata ruranata huauquipanicunahuan parlanami Jehovapa nishcacuna cierto pactarinapi crichun ayudanga. Paraisopi causai imashina canata na tucuillata ali yachashpapash paraisopi imata ruranata parlashpami Jehovapa nishcacunapi crishcatapash ricuchinchi, huauquipanicunahuanbash Jehovata ali sirvingapaj animarinchi. Ñaupa punllacunapi apóstol Pablopash shina rurashpami Roma llactamanda huauquipanicunahuanga caishujhuan chaishujhuan animarirca (Rom. 1:11, 12). Ñucanchicunapash cai llaqui punllacunapica shinallatami animarina canchi.

¹⁷ Shamuj punlla bendiciongunapi pensarishpaca cunan punlla problemacunapica na yapata pensarinajushunllu. Apóstol Pedroca paipash, paipa cumbacunapash preocuparishca cashpami Jesustaca cashna nishpa tapurca: ‘Ricui, ñucanchica imaguta charishpapash tucuita saquishpami catinajunchi. Shina catishcamandaca ¿imagutashi charishun? nishpa. Shina tapujpimi Jesusca cashna nirca: Na llullashpami cangunataca nini: Taita Dios tucuita mushujyachi punllapimi, Runa Aichayu tucushca ñucaca, punchapamba tiarinapi tiarishpa mandajusha. Chai punllapimi ñucata catinajushcamandaca, cangunapash chunga ishcai tiarinapi tiaringuichi. Shina tiarishpami, chunga ishcai Israel aillucuna imata rurashcatapash ricuchishpa mandanguichi. Maijan cashpapash, ñuca shutipi villangapaj, paipa huasita, huauquicunata, panicunata, taitata, mamata, huarmita, huahuacunata, paipa alpacunata saquishcamandaca, patsaj viajetapash yalitami chasquinga. Shinallata causaita causagrinatapashmi japinga’ nishpa (Mat. 19:27-29). Cai shimicunami Pedrotapash paipa cumbacunatapash ayudarca, Diospa Reinopi mandajushcapi, shuj gentecunatapash ayudanapi pensarichun.

18. ¿Imamandata Jehová Dios carana bendicionguna ña pactarijushcata pensarinaca ali can?

¹⁸ Jehová Diosta sirvijcunaca siempremi Jehovapa nishcacuna pactarijtaca ña ricujunshna pensarishca. Abelmanda parlashpaca Jehovapa nishcacuna pactarijta pensarishpami Jehovaman ashtahuan quimirirca. Abrahanbash Jehová Dios nishca shina, paipa mirai tianatami pensarin carca (Gén. 3:15). Shina rurashpami Abrahanga siempre Jehová Diosta cazui usharca. Moisespash Jehová Dios carana bendiciongunapi pensarijuimandami ashtahuan shinlli feta charirca, Jehovatapash juyarca (Heb. 11:26). Ñucanchicunapash Jehová Dios carasha nishca bendiciongunapi pensarishpaca Jehovata ashtahuan juyashpami, Jehovapa nishcacuna pactarinataca tucui shunguhuan crishun. Shamuj temapica Jehová carana bendiciongunapi pensaringapaj shuj ayudatapashmi ricupashun.