2 Corintios

2 Quiquingunata llaquiyachingapaca na munapanichu. Chaimi cutin visitangapaca na rishachu yajurcani. 2 Ñucamanda quiquinguna llaquiyajpica ¿pishi ñucataca cushichita ushanga? 3 Chaimi ñucaca quiquingunaman escribircani. Quiquingunapaman rishpa quiquingunamanda llaquilla cangapaca na munanichu. Sino cushilla cangapami munani. Imacunamandami ñuca cushijushcani, chaicunamandallata quiquingunapash cushijunataca seguromi capani. 4 Ñuca shungupi ninanda llaquirishpa, ninanda pinarishpami quiquingunamanga huacai huacai escribiparcani. Shinapash llaquilla sintirichunga na escribiparcanichu. Sino quiquingunata ninanda juyashcata yachachunmi escribiparcani.

5 Pero pipash quiquingunata llaquichishpaca, na ñucataca llaquichihuashcachu. Sino tucui quiquingunatami llaquichishca. Pero caicunamanda imacunatapash yapata nijungapaca na munapanichu. 6 Pero pecadota rurashca runataca, ñami consejanataca consejashcanguichi. 7 Shinaca tucui shunguhuanmi paitaca perdonana capanguichi. Yapata llaquirijuimanda ama ninanda pinarijuchunmi, paitaca cushichina capanguichi. 8 Chaimi, paita juyashcata ricuchinami canguichi nishpa quiquingunataca consejajupani. 9 Shinallata, tucuipi cazunajujta o na cazunajujta yachangapapashmi escribircani. 10 Pitapash quiquinguna perdonajpica, ñucapashmi paitaca perdonasha. Imapash nalita perdonashpaca, quiquingunata ayudangapami ñucaca perdonashcani. Perdonashpaca Cristo ricujtami perdonashcani. 11 Chaimi Diabloca* ñucanchicunataca na pandachinga. Porque Diablo imashina pandachijtaca alimi yachapanchi.

12 Cristomanda ali villaicunata villachingapami Troas llactaman chayarcani. Y chaipica Señor Jesuspa obrata ashtahuan rurangapami shuj pungu pascarinshna shuj oportunidad ricurirca. 13 Ñuca huauqui Titohuan na chaipi tuparimandami ñucaca* na tranquilo carcani. Chaimi, chai llactapi huauquicunamanda dispidirishpa Macedonia llactaman rircani.

14 Taita Diostami pagui nipanchi. Paimi ñucanchitaca guerrata mishashpa Cristohuan igual tigranajuj soldadocunatashna pushajun. Taita Diosmanda yachachishcacunaca imapash mishquilla ashnajuj cuendami can. Chai yachachishcacuna gulpi ladocunaman chayachunmi ñucanchitaca utilizajun. 15 Cristomanda villajcunaca, Taita Diospaca imapash mishquillagu ashnajuj cuendami capanchi. Chai mishquilla ashnajujmi salvarina ñanbi cajcunamanbash y tucuchi tucuna ñanbi cajcunamanbash chayan. 16 Tucuchi tucuna ñanbi cajcunapaca, huañushcashnallami ashnanajunchi. Y chai ashnaica huañuimanmi apan. Pero salvarina ñanbi cajcunapaca, causaillami ashnanajunchi. Y chai ashnaica causaimanmi apan. Pero ¿pita chaicunata pactachitaca ushanga? 17 Ñucanchimi chaitaca pactachita ushanchi. Porque ñucanchica, shuj gentecunashna Taita Diospa shimihuan negociota rurajcunaca na capanchichu.* Sino Cristopa discipulocuna caimandami cabalta parlapanchi. Ari, ñucanchicunaca Taita Dios cachamushcacunami capanchi. Y ñucanchica Taita Diospa ñaupapimi villachinajupanchi.